গৃহ মন্ত্রালয় অমসুং হকশেল অমদি য়াইফ-য়ুম্বাল মন্ত্রালয়গী গাইদলাইনশিংদা য়ুম্ফম ওইরগা জৱাহর নবোদয় বিদ্যালয়শিং অমুক হন্না হাংনবা এজুকেসন মন্ত্রালয়না এস.ও.পি.শিং শেমখ্রে। জে.এন.ভি.শিংগী সেনিতাইজেসন তৌবা, মহৈরোইশিংনা সোসিএল দিস্তেন্সিং থম্নবা ক্লাসশিং অমসুং হোস্তেলদা লৈনবা শেম শাবা অমসুং ইমর্জেন্সীগী থোরকপদা থেংননবা কোবিদ মেনেজমেন্ত প্রোতোকল শেম-শাবা অসিনচিংবা চেকশিল থৌরাংগী খোঙথাং পুম্নমক জৱাহর নবোদয় বিদ্যালয়শিংনা লৌখৎখ্রে।

এজুকেসন মন্ত্রালয়গী এস.ও.পি.গী মতুং ইন্না স্কুল খুদিংমক্না রাজ্য সরকারগী এস.ও.পি.দা য়ুম্ফম ওইরগা অমসুং তাস্ক ফোর্স শেমদুনা কোবিদকী ফীভম মপুং ফানা লাকশিন্নবা দিস্ত্রিক্ত এদমিনিস্ত্রেসনগা লোইননা খন্নদুনা মশাগী ওইবা এস.ও.পি.সু শেমজখ্রে। মমা-মপাগী অয়াবা য়াওরবা মহৈরোইশিংগীদমক্তা জে.এন.ভি.শিংনা ফিজিকেল ক্লাস পাঙথোক্নবা মপুং ফানা শেম শাদুনা লৈরে। অতোপ্পা মহৈরোইশিংগী ওইনদি, চহি মাংদনবা ওনলাইন ক্লাসশিং অদুমক মখা চত্থখিগনি। মহৈরোইশিং ফিজিকেল ক্লাসশিংগীদমক তাঙ্কক নাইনা কৌগদবা অসিদা লৈঙাক্কী য়াথংশিং চেকশিন্না ঙাক্না চৎকনি। রেসিদেন্সিএল স্কুল ওইবনা মাস্ক উপ্পা, সোসিএল দিস্তেন্সিং ঙাক্না চৎপা, খুৎশা তোইনা হাম্বা অমসুং সেনিতাইজেসন তৌবদা মরু ওইবা মীৎয়েং চংগনি। মসিগা ইরোইননা জৱাহর নবোদয় বিদ্যালয়শিং রাজ্য সরকারনা স্কুল হাংবগী অয়াবা পীবশিংদা অহানবা ওইনা ক্লাস X অমসুং XIIগী ফিজিকেল ক্লাস হাংগনি। মখা তারকপদা মহৈরোইশিংগী লৈফম অমসুং দিভাইস লৈবগী মতুং ইন্না অতোপ্পা ক্লাসশিংগীসু লাউথোরকক্কনি।

জৱাহর নবোদয় বিদ্যালয়শিং অসি তর্ম এন্দ একজামিনেসনশিং লোইরবা মতুংদা মার্চ-২০২০দা কোবিদ-১৯ লাইচৎ শন্দোরক্লবা মতুংদা কালেন ছুতি থাখিবনি। ই-কন্তেন্ত অমসুং ওনলাইন ক্লাসশিং অমদি ওনলাইন এসেসমেন্তগী মেনেজমেন্তগী মতাংদা ওজাশিং ত্রেন তৌনবা থবক পাইখৎখি। জৱাহর নবোদয় বিদ্যালয়শিংদা ২০২০গী জুন ১৫দগী হৌদুনা ওনলাইন ক্লাসশিং হৌখি। তাঙ্কক নাইনা ওনলাইন এসেসমেন্তশিং পাঙথোকখি। ওনলাইন এজুকেসনগী দিভাইসশিং লৈতবা মহৈরোইশিংদা তেক্স বুকশিং, এসাইনমেন্ত, ক্বেসন বেঙ্কশিং অসিগুম্বা লর্নিং মেতরিএলশিং অখন্নবা মেসেঞ্জর/মমা-মপাশিং/পোস্তকী খুত্থাংদা ফংহনখি।

*****