প্রধানমন্ত্রীগী লোইশঙ

পিএম.না ৱর্ল্দ ইকনোমিক ফোরমগী দাবোস দাইলোগতা ৱারোল পীখিবগী মনিপুরি ৱাহন্থোক

Posted On: 28 JAN 2021 7:52PM by PIB Imphal

খুরুমজরি,

অহানবদা ঐহাক্না প্রোফেসর ক্লোস স্ছৱব অমসুং ৱর্ল্দ ইকনোমিক ফোরমগী অপুনবা তীমবু থাগৎপা ফোঙদোকচরি। অৱাবা তারিবা মতম অসিদা নখোয়না মালেমগী শেন্মীৎলোনগীদমক্তা মরু ওইবা প্লেৎফোর্ম অসি হিংহনদুনা থমখি। মালেমগী শেন্মীৎলোনশিং অসি করম্না মাংদা পুখৎকনি হায়বগী অচৌবা ৱাহং লাকপা মতমদা নখোয়না ফোরম অসিদা ওনশিনবা হায়বা অসি মহৌশানি।

মরুপশিং,

অকিবনা থল্লবা তানফম অসিদা ভারত মচা বিলিয়ন ১.৩গী থাজবা, অফবা ৱাখল্লোন অমসুং আশাগী পাউজেল পীদুনা লাক্লি। কোরোনা থোকখিবা মতমদা ভারতকী মাংদা খুদোংথিবা হন্থনা লৈখিবা নত্তে। হৌখিবা চহিগী ফেব্রুৱারী-মার্চ-এপ্রিলদা মালেমগী মশক নাইবা এক্সপর্তশিং অমসুং মকোক থোংবা ইন্সতিত্যুসন কয়ানা হায়খিবা অদু নীংশিংলি। মালেম পুম্বদা কোরোনানা খ্বাইদগী শোকহনবা লৈবাক ভারতনা ওইগনি হায়না পান্নখি। ভারত্তা কোরোনাগী লাইনা অসি সুনামি অমগুম্না লাক্কনি মীওই খরনা হায় ভারত মচা মিলিয়ন ৭০০-৮০০ নাগনি অমরোমদনা খরনা হায় ভারত মচা মিলিয়ন ২ শীগনি হায়খি।

ভারতকুম্বা চাউখৎলক্লিবা লৈবাক অমগী মালেমনা খনখিবা অদুসু মহৌশানি মোদর্ন হেল্থ ইনফ্রাস্ত্রকচরগা লোইননা মালেমগী খ্বাইদগী অচৌবা লৈবাকশিংদা স্তেৎ ওফ এফিয়র্স পীখি। নখোয়না ঐখোয়গী ৱাখল্লোন অদু খঙবা ঙমগনি। অদুবু ভারতনা মশাগী মিংচৎ থিহনখিদে। মসিগী মহুৎ ভারতনা মীয়াম পুন্না শরুক য়াদুনা প্রোএক্তিব এপ্রোচ অমগা লোইননা মাংলোমদা চংশিনখি।

ঐখোয়না কোবিদকী স্পেসিফিক হেল্থ ইনফ্রাস্ত্রকচর মপাঙ্গল কনখৎনবা, লাইচৎ অসি লাকশিন্নবা ঐখোয়গী হ্যুমেন রিসোর্সশিং ত্রেন তৌনবা অমসুং পাকশন্না কেসশিং তেস্ত তৌনবা অমদি ত্রেক তৌনবা তেক্নোলোজী শীজিন্ননবা হোৎনখি।

লাঞ্জং অসিদা ভারতকী মীপুম খুদিংমক্না অখাং কনবগা লোইননা মখোয়গী থৌদাং পাঙথোকখি অমসুং কোরোনাগী মায়োক্তা লান্থেংনবা অসি মীয়ামগী ইহৌ ওইহনখি।ঙসি ভারত অসি মাগী প্রজাশিং মশিং য়াম্না কনবা ঙম্বদা মাই পাকখিবা লৈবাকশিংগী মরক্তা চল্লে অমসুং মিস্তর প্রভুনা হায়খিবা অদুগুম্না ঙসি কোরোনানা নাবা মীওইশিংগী মশিং অসি লেপ্পা নাইদনা হন্থরক্লি।

মরুপশিং,

বাক অতোপ্পগা ভারতকী মাই পাকপগী চাং অসি চাংদম্নবা চুমলোই। মালেমগী মীশিংগী চাদা ১৮ লৈরিবা লৈবাক অসিনা কোরোনা মপুং ফানা লাকশিনদুনা মীওইবা খুন্নাইবু অচৌবা খুদোংথিবা অমদগী লৈবাক অসিনা কনখি।

কোরোনাগী হৌরকপা মতমদা ঐখোয়না মাস্কশিং, পি.পি.ই. কিৎশিং অমসুং তেস্ত কিৎশিং মপালদগী পুশিল্লকখি। ঙসি ঐখোয়গী লমদম অসিগী মথৌ তাবশিং অদু ফংহনবা খক্তা নত্তনা অতোপ্পা লৈবাকশিংগী প্রজাশিং কন্নবা পোৎলমশিং অসি এক্সপোর্ত তৌরি। অমসুং ঙসি ভারতনা মালেমগী খ্বাইদগী অচৌবা কোরোনা বেক্সিনেসন প্রোগ্রাম হৌদোকখ্রে।

অহানবা তাঙ্কক্তা ঐখোয়না হেল্থ অমসুং ফ্রন্তলাইন ৱার্কর মিলিয়ন ৩০ বেক্সিন কাপ্পি। ভারতনা মাগী মীয়াম বেক্সিন কাপ্পগনী খোঙজেল অসি নখোয়না খনদুনা য়েংঙু। শুপ্নগী নুমিৎ ১২দা ভারতনা হেল্থ ৱার্কর মিলিয়ন ২.৩ বেক্সিন কাপখ্রে। লাক্কদৌরিবা থা খরা অসিদা ঐখোয়না অহল ওইরবা অমদি অতোপ্পা লাইনাশিংগা লোইনদুনা হিংলিবা মীওই মিলিয়ন ৩০০রোমদা বেক্সিন কাপ্নবা পান্দম থম্মি।

মরুপশিং,

ভারতনা চহি লিশিং কয়া লিরবা অরিবা ৱায়েল মদুদি মালেম পুম্বা মশা মউ ফনা লৈবা ওইসনু হায়বা অদু ঙাক্না চৎতুনা খুদোংথিবা তারবা মতম অসিদা  মালেমগী থৌদাং লৌখি। এয়র স্পেস থিংখিবা মতমদা ভারতনা প্রজা লাখ অমা হেন্না হোনদোকখি অমসুং লৈবাক ১৫০ হেনবদা হিদাকশিং সপ্লাই তৌখি। ভারতনা লৈবাক কয়াদগী এল্থ ৱার্করশিংদা ওনলাইন ত্রেনিং পীখি। ঐখোয়না মালেমবু ভারতকী ত্রেদিস্নেল মেদিসিন সিস্তেম আয়ুর্বেদকী মতাংদা তাকপীদুনা ইম্ম্যুনিতী হেনগৎহনবদা মতেং পাংখি।

ঙসি ভারতনা কোবিদ বেক্সিনশিং থাদুনা অমসুং মফম অদুদা বেক্সিনেসন ইনফ্রাস্ত্রকচর শেমগৎপদা মতেং পাংদুনা লৈবাক কয়াগী প্রজাশিংগী পুন্সি কনখি। দবল্যু.ই.এফ. অসিদা লৈরিবা মীপুম খুদিংমক্না হৌজিক হৌজিক ‘মেদ ইন ইন্দিয়া’ কোরোনা বেক্সিন অনি খক্তা নত্তনা লাক্কদৌরিবা নুমিৎ খরানি অসিদা অতোপ্পা বেক্সিন কয়াসু লৈরগনি হায়না তাবদা নুংঙাইবা পোক্কনি। বেক্সিনশিং অসিনা অতোপ্পা লৈবাকশিং চাউনা অমসুং খোঙজেল য়াংনা মতেং পাংবা ঙমহল্লগনি।

ভারতকী মাইপাকপা অমসুং তৌবা ঙম্বা অসিগা লোইননা, মালেমগী ইকনোমীদা ঐহাক্না হৌজিক্তি ইকনোমী ফ্রন্তকী ওইরিবা ফীভম অসিদা খোঙজেল য়াংনা অহোংবা লাক্লগনি হায়না থাজবা পীনিংঙি। কোরোনাগী মতম অসিদা লুপা বিলিয়ন কয়া ওইবা প্রোজেক্তশিং লোঞ্চ তৌদুনা অমসুং অখন্নবা ইমপ্লোইমেন্ত স্কীমশিং চল্লাইদুনা শেন্মীৎলোনগী থবক-থৌরম লেপহনখিদে। মতম অদুদা ঐখোয়না পুন্সি কনবদা মীৎয়েং চংখি অদুবু হৌজিক্তি ভারতকী মীপুম খুদিংমক্না লৈবাক অসি চাউখৎহন্নবা হোৎনরি।

হৌজিক্তি ভারতনা মরোমদোম লেপচবা ঙম্নবা অচেৎপা ফিরেপকা লোইননা মাংদা চাংশিল্লি। ভারতকী মরোমদোম লেপচনবগী অনীংবা-অপাম্বা অসিনা গ্লোবেলিজম হীংগৎহল্লগনি। অমসুং কেম্পেন অসিনা ইন্দস্ত্রী ৪.০দগী অচৌবা মতেং ফংগনি হায়না থাজৈ। মসিদা থাজবগী মরমসু লৈ।

মরুপশিং,

এক্সপর্তশিংনা হায়রি ইন্দস্ত্রী ৪.০গী ফেক্তর মরি লৈ – কন্নেক্তিবিতী, ওতোমেসন, আর্তিফিসিএল ইন্তেলিজেন্স নত্ত্রগা মেছিন লর্নিং অমসুং রিএল-তাইম দেতা। ঙসি, ভারত অসি দেতাগী চার্জশিং হোংবা লৈবাকশিংগী মরক্তা য়াওরি অমসুং মোবাইল কন্নেক্তিবিতী অমদি স্মার্ত ফোনশিংনা কাচিন-কোয়া থুংনা য়ৌহনখ্রে। ভারতকী ওতোমেসন দিজাইন এক্সপর্ত পুল অসি পাক-চাউই অমসুং মালেমগী অয়াম্বা কম্পনীশিংগী ইঞ্জিনীয়রিং সেন্তরশিং ভারত্তা লৈ। ভারতকী সোসৱে্যর ইঞ্জিনীয়রশিংনা আর্তিফিসিএল ইন্তেলিজেন্স অমসুং মেছিন লর্নিংদা চহি কয়া অসি মালেমদা মাগী মতিক-ময়াই উৎতুনা লাকখি।

মরুপশিং,

হৌখিবা চহি তরুক অসিদা ভারত্তা দিজিতেল ইনফ্রাস্তরকচর চাউখৎলকপা অসিসু ৱর্ল্দ ইকনোমী ফোরমগী এক্সপর্তশিংনা খন্ননবা মচাক অমসু ওইরি। মসিগী ইনফ্রাস্ত্রকচর অসিনা ভারতকী মীয়ামগী নুংতিগী পুন্সিদা দিজিতেল সোলুসন অসি শরুক অমা ওইহনবা ঙমখ্রে। ঙসি ভারত মচা বিলিয়ন ১.৩গী য়ুনিভর্সেল আই.দি.-আধার লৈরে মসি মখোয়গী একাউন্ত অমসুং ফোনগা কন্নেক তৌখি। দিসেম্বর থা খক্তদা য়ু.পি.আই.গী খুত্থাংদা লুপা ত্রিলিয়ন ৪গী ত্রাঞ্জেক্সন তৌখি। মালেমগী চাউখৎলবা লৈবাকশিংনা ভারত্তা দেবেলপ তৌবা য়ু.পি.আই. সিস্তেম অসি মতৌ তম্নবা হোৎনরিবা অসি বেঙ্কিং সেক্তরদা লৈরিবশিংনা খঙলমগনি।

মরুপশিং,

লাইচৎকী খুদোংথিবা নংলিঙে মনুংদা লৈবাক কয়ানা মখোয়গী প্রজাশিংদা শেলগী তেংবাং হকথেংননা করম্না ফংহনগনি হায়না ৱানখিবা ঐখোয়না উখি। নখোয় তাবদা অঙকপা পোক্কনি মদুদি মতম অসিগী মনুংদা ভারতনা দাইরেক্ত বেনিফিৎ ত্রান্সফরগী খুত্থাংদা ভারত মচা মিলিয়ন ৭৬০গী একাউন্তশিংদা লুপা ত্রিলিয়ন ১.৮কী শেলগী তেংবাং ত্রান্সফর তৌবা ঙমখি। মসি ভারতকী মপাঙ্গল কনবা দিজিতেল ইনফ্রাস্ত্রকচরগী খুদম অমনি। ঐখোয়গী দিজিতেল ইনফ্রাস্ত্রকচরনা পব্লিক সর্ভিস দেলিবরী ফগৎহনখি অমসুং মনুং মপান ফাওনা উবা ঙমহনখি। ভারতনা মাগী প্রজা বিলিয়ন ১.৩দা তোপ-তোপ্পা হেল্থ আই.দি. পীদুনা হেল্থ কিয়র লায়না ফংহন্নবা কেম্পেন অমা হৌখ্রে ।

অমসুং মরুপশিং,

ঙসি তিল্লিবা পুম্নমক্তা ঐহাক্না থাজবা পীনিংঙি মদুদি ভারতকী মাই পাকপা খুদিংমক মালেম পুম্বগী মাই পাকপদা মতেং শোইদনা ওইনি। ঙসি ঐখোয়না চত্থরিবা আত্মানির্ভর ভারতকী ইহৌ অসিনা গ্লোবেল গুদ অমসুং গ্লোবেল সপ্লাই চেন পীবা ঙমগনি মরমদি ভারত্তা গ্লোবেল সপ্লাই চেন মপাঙ্গল কনখৎহন্নবা কেপাসিতী, কেপাবিলিতী অমসুং রিলাইএবিলিতী লৈ হায়না থাজৈ। মাগী কঞ্জুমর বেজ চাউবা অসি মখা তানা হেনগৎলক্কনি অমসুং মালেমগী শেন্মীৎলোনদা কান্নবা পীগনি।

মরুপশিং,

প্রোফেসর ক্লোস স্ছৱবনা অসুম্না হায়রমখি, "ভারত অসি তৌবা ঙম্বা গ্লোবেল প্লেয়র অমনি।” মসিদা ঐহাক্না ঙসি হাপচনজনীংবদি, ভারত অসি ভারতনা ওইথোকপা য়াবশিংগা লোইননা থাজবনা থল্লি, অনৌবা ইনোৎনা থল্লি। চহী কয়া অসিদা ভারতনা রিফোর্মশিং পুরকপদা অমসুং ইনসেন্তিবতা য়ুম্ফম ওইবা স্তিমুলসতা মখা তানা মীৎয়েং চংখি।

কোরোনাগী মতমশিংদা ভারতনা অয়াম্বা সেক্তর খুদিংমক্তা স্ত্রকচরেল রিফোর্মশিংগী খোঙজেল য়াংখৎহনখি। রিফোর্মশিং অসি প্রদক্সন লিঙ্ক ইনসেন্তিবশিংনা শৌগৎখি। হৌজিক ভারত্তা তেক্স রেজিমদগী এফ.দি.আই. নোর্মশিংগী ওইথোকপা য়াবা অমসুং ফ্রেন্দলী এনভাইরনমেন্ত অমা লৈরে।

ভারত্তা ইজ ওফ দুইং বিজিনেস ফগৎহন্নবা মাইকৈদা ঐখোয়না চংশিল্লি। মসি পুম্নমক্কী মথক্তা মরু ওইনা ভারতনা ক্লাইমেৎ চেঞ্জকী পান্দমশিংগা লোইননা চান্ননা খুমাং চাউশিল্লি ।

মরুপশিং,

ন্দস্ত্রী ৪.০গী খন্নরিঙৈ চৈরক অসিদা ঐখোয়না ৱাফম অমগা নীংশিংবা তাই। কোরোনাগী অৱাবনা ঐখোয়দা মীওইবা জাতিগী ভেল্যু অদু খহনখি। ঐখোয়না কাউরোইদবদি ইন্দস্ত্রী ৪.০না মসি রোবোৎশিং খক্তগী নত্তে মীওইবগী শরুক য়াওই হায়বা অসিনি। ঐখোয়না তেক্নোলোজী অসি হিংবদা লাইথোক্নবা খুৎলাই অমা ওইখি মসি মাংনবা নত্তে খঙফম থোকই। মসিগীদমক মালেম পুম্বনা অমত্তা ওইবা খোঙথাং লৌখৎপা তাই। মসিদা মাই পাক্কনি হায়বা ঐহাক্না থাজৈ।

থাজবা অসিগী লোইননা ঐহাক্না ৱাহং-পাউহংগী সেসনদা মখা চত্থবা পাম্মি।

থাগৎচরি!

***



(Release ID: 1694682) Visitor Counter : 160