উপ-রাস্ত্রপতি শ্রী এম. ভেঙ্কয়া নাইদুনা ঙসি মপান্দা পোৎলমশিং থাদোকপদা হিদান্নবা হেনগৎহন্নবা অমদি মালেমগী কৈথেল পায়ননবা ফিরোল অমসুং ফিচেৎ লৈতেংগী শিন্মীশিংগী স্কিল হেনগৎহন্নবা অমদি খ্বাইদগী নৌবা তেক্নোলোজী শীজিন্ননবা ৱাফম থমখ্রে‍। ঐখোয়দা মচাক অমসুং মী মরাং কায়না লৈজরবসু চাংচত্তা লৈরিবা ফর্মশিং পীকপনা অমদি লিরবা তেক্নোলোজীশিং শীজিন্নবা মরম্না মালেমগী ফিরোল থাদোকপগী হীরমদা মনীংদা চৎলি‍।

এপরেল এক্সপোর্ত প্রমোসন কাউন্সিলগী ফিজেৎ লৈতেংগী পোত্থোকশিংগী ভর্চুএল প্লেতফোর্ম হৌদোক্লদুনা মহাক্না ফোঙদোকখিবদা “ফিজেৎ লৈতেংগী ফর্মশিংগী চাউবগী চাংচৎ অসি হেনগৎহনদ্রবদি, খ্বাইদগী নৌবা তেক্নোলোজীশিং শীজিন্নদ্রবদি অমদি নীংথিনা খঙ হৈরবা শিন্মীশিং য়াওদ্রগদি ঐখোয়না মতিং লৈবা পোত্থোকশিং পুথোকপা ঙম্লোই অমদি হিদান্নবা য়াবা মমলদা থাদোকপা ঙম্লোই‍। পাম্বৈ অসি ইল্লবতদা ঐখোয়না থবক পীরিবশিং অসিগী অমদি ইন্দস্ত্রী অসিগী শেন্মিৎলোনগী মপুং ফাবা মতিং ফুদোকহনবা ঙমগনি”, হায়না মহাক্না মখা তাখি‍।

এমেন্দেদ তেক্নোলোজী অপ-গ্রেদেসন ফন্দ স্কিম (এ.তি.য়ু.এফ.এস.) অসি অপীকপা ফর্মশিংদা ইনোৎ হাপ্পা ঙমবা য়াম্না ফবা স্কিম অমনি হায়না শিংথারদুনা, স্কিম অসিগী কান্নবা অনিসুবা অমদি অহুমসুবা থাক্কী ময়োল্লমশিং অমসুং খুঙ্গঙশিংদা য়ৌহনবা ঙম্নবা পুন্না হোৎনমিন্নবা চঙই হায়না মহাক্না হায়খি‍। স্কিম অদুবু শিংথাবা য়াবা থৌরাং অমনি হায়বা ৱাফম থম্লদুনা মসিনা ভারতকী ফিজেৎ লৈতেংগী পোত্থোকশিং মালেম শিনবা থুংনা থাদোকপগী থৌওং য়োকখৎপদা চাউনা কান্নগনি হায়না মহাক্কী থাজবা ফোঙদোকখি‍। মহাক্না তেক্সতাইল মন্ত্রী শ্রীমতি স্ম্রিতী জুবিন ইরানিবু মহাক্কী ইচঙ থৌবা অমদি মন্ত্রালয় অসিদা মহাক্না পায়খৎলিবা থৌরাংশিংগীদমক থাগৎখি‍।

মালেমগী ফিরোল থাদোকপগী লমদা ভারতকী শরুক শুপ্নতগী চাদা ৬ ওইরম্মি হায়বা ৱাফম থম্লদুনা উপ রাস্ত্রপতিনা অপীকপা থাক্কী বিজিনেসশিং অসিদা মালেমগী হিদান্নরিবশিংগা চাংদম্নবা ঙমহন্নবগীদমক মখোয়গী থাক চাউথোকহনবা অমদি মতিং হেনগৎহনবদা লমজিংবিবা অমদি ঙাক্লৌ পীবিফম থোকই হায়না ফোঙদোকখি‍। মপান্দা থাদোকপগী চাং হেনগৎহন্নবা তেক্সতাইল মন্ত্রালয়গা পুন্না থবক পায়খৎমিন্নদুনা অচৌবা তেক্সতাইল ফর্মশিং লিংখৎনবা নিতি অয়োগকী থৌরাংবু মহাক্না শিংথাখি‍।

শ্রী নাইদুনা ভারতকী হিদান্নবগী মতিক অসি নীংথিনা খঙ-হৈরবা শিন্মীশিংদগী লাক্কদবনি, অহোঙবা শিন্মীশিং খক্তদগী লাক্কদবা নত্তে হায়না ফোঙদোকখি‍।

উপ রাস্ত্রপতিনা ফিরোলগী ওন্ত্রপ্রিন্যুরশিংবু মালেমগী হোংলক্লিবা দিমান্দগা চুনহন্নবা অমদি অনৌবা কৈথেলশিং লোকশিন্নবা মখোয়গী পোত্থোক পুথোকপগী পোর্তফোলিও মখল মথেলগী ওইহন্নবা ৱাফমসু থমখি‍। মহাক্না ফিজেৎ লৈতেংগী পোত্থোকশিংগী মমল হাপচিন্নবা ব্রান্দিং তৌবগী মরু ওইবা ৱাফম ফোঙদোকখি অদুগা ওন্ত্রপ্রিন্যুরশিংবু ব্রান্দ শেমগৎপদা থবক চঙশিন্নবা পাউতাকসু পীখি‍। অসিগুম্বা থৌওংশিংগী খুত্থাঙদা, স্তেতশিংগী মতেং, তেক্সতাইল মন্ত্রালয়গী ঙাক্লৌ অমদি এ.ই.পি.সি.গী মপান্দা থাদোকপগী থবক য়োকখৎনবা থৌরাংশিংগা লোয়ননা ভারতনা ফেব্রিক থাদোকপগী শরুক হৌজিক ওইরিবা চাদা ৬ অসিদগী অথুবা মতমদা দিজিত অনি য়ৌহন্নবা পান্দম থমগদবনি হায়না মহাক্না মখা তাখি‍।

শেন্মিৎলোন্দা তেক্সতাইল সেক্তরনা লৌরিবা মরুওইবা থৌদাংগী মতাঙদা পল্লদুনা শ্রী নাইদুনা সেক্তর অসি খ্বাইদগী চাউনা থবক পীবা অনিসুবা সেক্তরনি অমদি মসিনা মীওই মিলিয়ন ৪৫গী ময়াদা হকথেংননা থবক পীরি হায়না ফোঙদোকখি‍। সেক্তর অসিনা ঐখোয়গী খেন্নবা দিমোগ্রাফিক্কী মতিং লোকশিনবদা অচৌবা থৌদাং লৌবা ঙমগনি হায়না মহাক্না হায়খি‍। সেক্তর অসি ভারতকী য়াম্না মরু ওইবা ফোরেন এক্সচেঞ্জ তানবগী ইন্দস্ত্রীসু ওইদুনা ঐখোয়গী মপান্দা থাদোকপদগী তাল্লিবা শেন্ফমগী চাদা ১২ ওইরি হায়না মহাক্না মখা তাখি‍।

ফিজেৎ লৈতেংগী সেক্তরদা নুপী শিন্মী মশিং হেনগৎলকপগী মতাঙদা পল্লদুনা মহাক্না ফীভম অসিবু মনুং হঞ্জিনবা মফমশিংদা নুপীশিংগী শেলথুমগী মপাঙ্গল কনখৎহন্দুনা খুন্নাইদা অওনবা পুরক্নবগী তশেংলবা পাম্বৈ অমনি হায়না ফোঙদোকখি‍। “ঐখোয়গী হৈ শিংবগী ইপাক্কী চাদা ৫০দি নুপীশিংনা ওইরি‍। করিগুম্বা মখোয়দা পুক্নিং থৌগৎপিদুনা ত্রেনিং পীবিরবদি মখোয় য়াম্না হৈথোই শিংথোইগনি”, হায়না উপ রাস্ত্রপতিগী ৱাখল্লোন ফোঙদোকখি‍। ফিরোলগী সেক্তর চাউথোকহনবনা নুপীশিংগী মহৈ মশিং অমসুং অপুনবা ফর্তিলিতী রেত্তা কান্নবা মহৈ পুরক্কনি হায়না মহাক্না মখা তাখি‍।

‘তেক্নিকেল ফিরোল’গী মচিন তুমখৎলক্লিবা সেক্তর অসিনা ইন্দস্ত্রী অসিদা অচৌবা তাঞ্জা অমা পীরি হায়বা ৱাফম থম্লদুনা মহাক্না ওন্ত্রপ্রিন্যুরশিংদা চাউথোরক্লিবা মালেমগী কৈথেল, ২০২২ ফাওবদা য়ু.এস.দি. বিলিয়ন ২২০ য়ৌগনি হায়না থাজনরিবা, অসিদা মফম কলহৌনবা ৱাফম থমখি‍। মহাক্না নৌনা হৌগৎলক্লিবা ওন্ত্রপ্রিন্যুরশিংবু ভারতনা নৌনা হৌগৎলক্তুনা কৈথেলগী শরুক চাদা ৪ খক্তা পায়বতা ঙায়রিবা কৈথেল অসিদা চঙশিন্নবা পাউতাকসু পীখি‍।

শ্রী নাইদুনা মেন-মেদ ফাইবর (এম.এম.এফ.) অমসুং তেক্নিকেল তেক্সতাইলগীদমক হন্দক্তা লৈঙাক্না লাউথোকখিবা প্রদক্সন-লিঙ্ক ইন্সেন্তিব অদুবু শিংথাখি‍। লাইচৎ মনুংদা মেদিকেল তেক্সতাইল (পি.পি.ই. কিতশিং, ফেস সীল্দ, মাস্ক অমসুং গ্লোভশিং) পুথোকপা অমদি মপান্দা থাদোকপগী থবক য়োকখৎনবা এ.পি.ই.সি. অমসুং তেক্সতাইল মন্ত্রালয়না লৌখৎলিবা থৌরাংশিংবু মহাক্না থাগৎখি‍।

অসিগুম্লবা পুন্না পায়খৎমিন্নবা থৌরাংসিগী মহৈ ওইনা ভারতনা ঙসি পি.পি.ই. কিত পুথোকপদা মালেমদা অনিসুবা মফম কল্লি হায়না শ্রী নাইদুনা মখা তাখি‍।

ভর্চুএল থৌরম অদুদা শরুক য়াখিবশিংগী মরক্তা তেক্সতাইল মন্ত্রী শ্রীমতি স্ম্রিতি জুবিন ইরানি, এ.পি.ই.সি. চেয়রমেন দোক্তর এ. সকথিবেল, গার্মেন্ত এক্সপোর্তরশিং অমসুং ইন্দস্ত্রী লুচিংবশিং য়াওখি‍।

মখাদা পীরিবা অসি মপুং ফাবা ৱারোলনি –

“ঙসি এপরেল এক্সপোর্ত প্রমোসন কাউন্সিল (এ.ই.পি.সি.)গী ফিজেৎ লৈতেংগী পোত্থোকশিংগী ভর্চুএল প্লেতফোর্ম অসি হৌদোকপসি ঐঙোন্দা অপেনবা পোকই‍। হৌজিক লৈরিবা লাইচৎ অসিনা এক্সপোর্ত প্রমোসনগী থৌরম অসি ভর্চুএল মওংখক্তদা পাঙথোকহল্লি‍। হীরম অসিগী মতাঙদা এ.পি.ই.সি.না ভর্চুএল প্লেতফোর্ম অমগী থৌরাং লৌখৎলকপসি য়াম্না শিংথানিংঙাইনি‍। মসিনা ভারতকী ফিজেৎ লৈতেংগী পোত্থোকশিং মালেমগী মফম কয়াদা থাদোকপদা চাউনা কান্নহল্লগনি হায়না ঐনা থাজৈ‍।

নুংশিরবা ইচিন ইনাউশিং,

ভারতকী তেক্সতাইল ইন্দস্ত্রী অসি থবক খ্বাইদগী য়াম্না পীবা অনিসুবা ওইদুনা মীওই মিলিয়ন ৪৫গী ময়াদা হকথেংননা থবক পীরি‍। মসিনা লৌউ-শিংউ সেক্তরগী হেক মথঙদা লৈ‍। তেক্সতাইলগী শরুক অমা ওইরিবা ফিজেৎ লৈতেংগী সেক্তর অসিমক মীওই মিলিয়ন ১২.৯গী ময়াদা থবক পীরি‍। অদুগা ইন্দস্ত্রী অসিদা থবক শুরিবা শিন্মী অয়াম্বা নুপী শিন্মীনি‍।

ফিজেৎ লৈতেংগী ইন্দস্ত্রী অসি ভারতকী য়াম্না মরুওইবা ফোরেন এক্সচেঞ্জ তান্নবগী ইন্দস্ত্রী অমনি‍। লমদমসিগী তেক্সতাইল অমসুং ফিজেৎ লৈতেংগী ইন্দস্ত্রীনা ভারতকী জি.দি.প.গী চাদা ২.৩, লৈবাকসিগী পোত্থোক পুথোকপগী চাদা ৭ অমসুং মপান্দ থাদোকপগী তাল্লকপা শেন্ফমগী চাদা ১২ ওইরি‍। মশিংশিং অসিনা ঐখোয়গী শেন্মিৎলোন মচাদা সেক্তর অসি কয়া য়াম্না মরুওইবগে হায়বদু উৎলি‍।

ভারতকীদমক্ততি তেক্সতাইল ইন্দস্ত্রী অসি ফোরেন এক্সচেঞ্জকী হৌরকফম নৎত্রগা শিন্মী লৌশিনবগী খক্তা নত্তনা মরওইবা অমা ওইরি‍। তশেংনা হায়রবদা মসি ভারতকী ইনাক খুল্লবা অমদি লেমজনিংঙাই ওইরবা পারি পুরিগী লনগী শরুক অমনি‍।

ঙল্লিঙৈ মতমদা ভারতকী ফিশিং মখোয়গী অথোইবা মতিক অমসুং নীংথিনা শাবগী মওং মতৌগীদমক মালেমগী ওইনা মমীং চৎলম্মি‍। ভারতকী ফিশিং মতমদুদা য়াম্না পাম্নরম্মি‍। ফিশিং অসিগী মপু ওইবা হায়বসি নুংঙাই য়াইফবগী অমদি চাউথোকচবগী খুদম ওইনরম্মি‍।

অদুম ওইনমক মচু থোক্লবা সেক্তর অসি লোইলমগী মতম হৌরকপদগী মনীং হনখি‍। লৌমীশিংনা অকনবা লমগী খাজনা থেংনবদগী, ফিশাবশিংনা শৌগৎপিনবা ৱাৎপদগী, মপান্দা থাদোকপা মীওইশিংনা খাজনা চাউনা থিবা তারকপদগী ভারতকী ফিরোল অমসুং ফিজেৎ লৈতেংগী সেক্তর মরায় চায়থখি‍। অদুগা মমহৈথংদা ভারতকী কৈথেলদা ব্রিতেন্দগী মেচিন্না শাবা ফিরোলশিংনা তাউরকপা অসিনা লমদমসিগী সেক্তরদা অচৌবা চৈফু অমা নংখি‍।

ভারতকী শেন্মিৎলোন অমসুং পুন্সি মহিংদা ফিরোলগী মরুওইবা অসি ‘স্বদেসি ইহৌ’দগী হৌরগা ঐখোয়গী নীংতম লান্থেংদা মসিনা লৌখিবা থৌদাংদগীসু য়েংবা য়াই‍। মরৈবাক নীংবশিংনা লমদমসিদা পুথোকচবা ফিরোলশিং শীজিন্ননবা লাউখবা খোল্লাউ অদু ভারতকী মরোমদোম লেপচবগী অহানবা খোল্লাউনি হায়রবসু য়াই‍। তরেংদা খাদি লং নাইবা অসিনা ইশানা লৈঙাকচবগী অচৌবা খুদম ওইখি অমদি মদুনা মরৈবাক নুংশিবগী ইথিল পোকহল্লকখি‍। মসিনা লায়রবা অমসুং ইনাক খুনবশিং, লৌমী অমসুং খুৎহৈবশিং, অমদি মফম পুম্নমক্তগী মীয়ামবু অতোপ্পা পাম্বৈ অমত্তা মান্নদবা মওংদা পুনশিন্নহনখি‍।

নুংশিরবা ইচিন ইনাউশৎং,

সেক্তর অসিগী মওং মতৌ অমসুং দিমান্দ মতমগী মতুং ইন্না হোংলক্লবসু মসিনা হৌজিকসু ঐখোয়গী শেন্মিৎলোন্দা অচৌবা ইনোৎ অমা পীরি‍। ফিজেৎ লৈতেংগী সেক্তর অসি শিন্মী খ্বাইদগী মরাং কায়না চঙবা সেক্তরনি অমদি হৈ শিংলবা শিন্মীশিংদা থবক পী হায়বসি পাক শন্না খঙনরে‍। সেক্তর অসিদা চহী খুদিংগী নহা লাখ কয়ানা থবক্কী কৈথেলদা চঙলকপা ঙমগদবা মরম্না ঐখোয়গী মীয়ামগী মতিং নীংথিনা লোকশিনবদা মসিনা অচৌবা থৌদাং লৌবা ঙমগনি‍।

ফিজেৎ লৈতেংগী সেক্তর অসি নুপী থবক পীবদা হেন্না চুশিন্নবা অমদি নুপী শিন্মীশিংনা নম্না থবক তৌবা সেক্তরনি হায়বসি মীয়াম্না খঙনরে‍। কনাগুম্বা খরনা পাবদা অপুনবা সেক্তর অসিগী শিন্মীশিংগী চাদা ৭০দি নুপীনা ওই হায়বা উৎলি‍। মরূপশিং, নুপীগী অসিগুম্লবা খুদোংচাবা অসিগী খুত্থাঙদা সেক্তর অসিবু মনুং হঞ্জিনবা মফমশিংদা খুন্নাইগী ওইবা অওনবা পুরক্নবা তশেংবা পাম্বৈ অমা ওইবা ঙমগনি; মসিনা খুঙ্গঙগী মফমশিংদা নুপী শিন্মী মরাং কায়না থোরক্তবগী ৱাফমবু কোকহনবা ঙমগনি অমদি নুপী অমসুং অঙাঙগী শেলথুমগী মপাঙ্গল কনখৎহনবা ঙমগনি‍। থিজিন হুমজিনবা কয়াদা সেক্তর অসি চাউথোরকপনা নুপীগী মহৈ মশিং অমসুং অপুনবা ফর্তিলিতী রেত্তা কান্নবা মহৈ পুরক্কনি হায়বা উৎলি‍।

ফিজেল লৈতেংগী সেক্তরগী মতিং মপুং ফানা লোকশিন্নবগীদমক ঐখোয়না সেক্তর অসিদা থেংনরিবা শিংনবশিং খঙদোক্তুনা পাম্বৈ পুথোকপা মথৌ তাই‍। তশেংবদি, শিংনবশিং অসি শীজিন্নগদবগী ঙাইদুনা লৈরিবা তাঞ্জানি ওইনা য়েংবা য়াই‍।

মচাক, হৈ-শিংলবা শিন্মী অমসুং তেক্সতাইল ভেল্যু চেনগী শরুক খুদিংমক্তা মেনুফেকচরিং মরাং কায়না লৈবগী ফীভমগী মতুং ইন্না ভারতনা তেক্সতাইল সেক্তরদা হিদান্নবদা ওইজদবা ফীভম লৈ‍। খুদম ওইনা, ভারত অসি মালেমগী ওইনা লশিং অমসুং চনান খ্বাইদগী য়াম্না পুথোকপা অমদি মেন-মেদ ফাইবর অমসুং মুগা পুথোকপদা অনিসুবা ওইরি‍। ঐখোয়দা মালেমগী ওইনা লশিংগী লং মরাং কায়না লৈরি‍। অদুবু হিদান্নবগী ওইজবা ফীভম অসি ফি অমসুং ফিজেৎ লৈতেংগী লমদা চঙশিল্লকপদা উবা ফংদ্রি‍।

চাইনা অমসুং বঙ্গলাদেশকুম্বা লৈবাকশিং অসি ভারতকী লং খ্বাইদগী মশিং য়াম্না লৈবা লৈবাকশিংনি‍। মখোয়না মসিদা ভেল্যু হাপচিন্দুনা ভারতকা চাংদম্নবদা অতাবা মমলদা ফি অমসুং ফিজেৎ লৈতেংগী পোত্থোকশিং য়োল্লি‍। লশিং ফিগী শেয়র ভারতকী চাদা ৫-৬ ওইরিবা অসিগা য়েংনবদা চাইনাগী শেয়র চাদা ৫১ অসি য়াম্না ৱাংলি‍। ফীভম অসি ভারত্তা ফি শাবগী সেক্তর অসি ওর্গনাইজ ওইদবা অমদি মচোই মচোই তাবসিনা ওইহল্লকপনি‍।

অপীকপা বিজিনেসশিং মালেমগী কম্পিতিতরশিংগা চাংদম্নবা ঙমহন্নবগীদমক লমজিংবিবা, চাউথোকহনবদা অমদি ক্বালিতী হেনগৎহনবদা ঙাক্লৌ পীবিবা চঙই‍। পাম্বৈ পুথোকপা মথৌ তারিবা অতোপ্পা ৱাফম অমদি অরিবা চৎনদ্রবা তেক্নোলোগী শীজিন্নদুনা পোত্থোক য়ামদনা মতিং লৈতনা পুথোক্লিবা অসিনি‍। অপীকপা থাক্কী ফর্মশিংদা এমেন্দেদ – তেক্নোলোজী অপ-গ্রেদেসন ফন্দ স্কিম (এ.-তি.য়ু.এফ.এস.)কী খুত্থাঙদা ইনোৎ হাপ্তুনা সেক্তর অসিদা মতেং পাংননবা লৈঙাক্না লৌখৎলক্লিবা খোঙথাং অসিবু ঐনা থাগৎলি‍। স্কিম অসি য়াম্না ফবা স্কিম্নি অমদি মসিগী কান্নবা অনিসুবা অমসুং অহুমসুবা থাক্কী ময়োল্লমশিংদা লৈরিবা ফর্মশিংদা য়ৌহন্নবগীদমক পুন্না হোৎনমিন্নবা চঙই‍।

মতৌ অসুম্না, তেক্সতাইল শিন্মীশিংগী স্কিল হেনগৎহন্নবা থৌরাংশিং হেন্না চাউবা মওংদা পায়খৎকদবনি‍। অসুম্না তৌরবতদা ঐখোয়গী হিদান্নবগী ওইজবা ফীভম অসি তেক্নোলোজী অমসুং অহোঙবা খুৎশুমলদগী হেনগৎহনবা ঙমগনি‍। বঙ্কলাদেশ অমসুং ভিএতনাম্না মখোয়দা খুৎশুমল হেন্না হোঙবনা মরম ওইরগা ঐখোয়গী পোত্থোকশিংগা ইচঙ থৌনা চাংদম্নরবসু অতৈ মরমশিংদগী হেন্না নীংথিনা খঙ-হৈরবা শিন্মীশিং অসিনা ঐখোয়গী নুংগী পাঙ্গল ওইহনগদবনি‍।

স্তেত লৈঙাকশিংনসু সেক্তর অসিগী অচৌবা ৱাফম অমা ওইরিবা মৈ মওং তানা চাং নাইনা পীদুনা খোঙথাঙ অসিগী খোঙবু ওইফম থোকই‍। তেক্সতাইল ওন্ত্রপ্রিন্যুরশিংনসু হোংলক্লিবা মালেমগী দিমান্দ অমসুং অনৌবা কৈথেলশিং লোকশিন্নবগীদমক মখোয়গী পোত্থোক পুথোকপগী পোর্তফোলিও পাকথোক চাউথোকহন্নবা হোৎনগদবনি‍।

ফোঙদোক্নিংলিবা ৱাফমদি: ফিজেৎ লৈতেংগী ফর্মশিং চাউবগী চাং হেনগৎহন্দ্রবদি, খ্বাইদগী নৌবা তেক্নোলোজীশিং শীজিন্নদ্রবদি অমসুং খঙ-হৈরবা শিন্মীশিং য়াওদ্রগদি ঐখোয়না মতিং লৈবা পোৎলমশিং পুথোকপা ঙম্লোই অমদি চাংদম্নবা য়াবা মমলদা মপান্দ থাদোকপা ঙম্লোই‍। পরিং অসিদা চৎলবতদা ঐখোয়না ইন্দস্ত্রী অসিদা থবক শুরিবা মীওইশিং অমদি মসিগী শেন্মিৎলোনগী মপুং ফাবা মতিং ফুদোকহনবা ঙমগনি‍। চহী অসিদা নিতি অয়োগনা পায়খৎনবা হৌদোরক্লিবা প্রোজেকশিংগী মনুংদা অমদি তেক্সতাইল মন্ত্রালয়গী পুন্না থবক পায়খৎমিন্নদুনা অচৌবা তেক্সতাইল ফর্মশিং লিংখত্তুনা ফি অমসুং ফিরোলগী সেক্তর অনিমক্তা ঐখোয়গী এক্সপোর্ত হেনগৎহনবা অসিনি‍। মসি তরাম্না ওকফম থোকপা থৌরাং অমদি‍। ঐনা লনাই সেক্তরশিংদা লৈঙাক্কা খোঙবু ওইমিন্নদুনা মপান্দা থাদোকপগী চাং হেনগৎহন্নবা তেক্সতাইল সেক্তরদা অনৌবা ৱাখল্লোনশিং পুথোরক্নবা ৱাফম থম্লি‍।

ইচিন ইনাউশিং,

ঐখোয়গী এক্সপোর্ত হিদান্নবগী মতিং হেনগৎহনবগা লোয়ননা ঐখোয়না তেক্সতাইল ইন্দস্ত্রীদা হান্না চৎনরম্দবা হীরমশিংদা ঐখোয়না তুংদা তপথদুনা লৈবা য়ারোই‍। মেন-মেদ ফাইবর (এম.এম.এফ.) অমসুং তেক্নিকেল তেক্সতাইলগী মতাঙদা হৌরকপদা নীংহন্নবা মতৌ অমা লৈরম্মি‍। অসিগুম্বা নিংজিং মাংজিংনবগী মতৌ অসি ঐখোয়না থাদোকপা তাই অমদি মচিন তুমখৎলক্লিবা সেক্তরশিংদা তোংদুনা চৎনবগীদমক ঐখোয়গী শিন্মীশিং অমসুং ওন্ত্রপ্রিন্যুরশিং থাক ৱাংখৎহনবা তাই অমদি মখোয়গী স্কিল হেনগৎহনবা তাই‍।

মেতরিএল সাইন্সকী লমদা খুমাঙ চাউশিল্লকপগা লোয়ননা তেক্নিকেল তেক্সতাইলশিং অসি তুংগী য়াম্না কান্নগদবা ৱাফম অমা ওইরি‍। তেক্নিকেল তেক্সতাইলগী মালেমগী কৈথেল অসি ২০২০ ফাওবদা য়ু.এস.দি. বিলিয়ন ২২০ ওইরবা য়াই হায়না পানরি‍। ভারতনা লম অসিদা কৈথেলগী শেয়র চাউরাক্না চাদা ৪ ওইদুনা তপ্না তপ্না চঙশিল্লক্লি‍। ঐখোয়না হৌগৎলক্লিবা ওন্ত্রপ্রিন্যুরশিংবু মালেমগী কৈথেলদা য়েংননবা অমদি ইচঙ থৌনা থৌরাং পায়খৎনবা পুক্নিং থৌগৎপিবা মথৌ তাই‍। এম.এম.এফ. অমসুং তেক্নিকেল তেক্সতাইল সেক্তরগীদমক হন্দক্তা লাউথোকখিবা প্রদক্সন-লিঙ্ক ইন্সেন্তিব (পি.এল.আই.) স্কিম অসি হীরম অসিদা চাউনা কান্নবা পীরগনি‍।

ইচিন ইনাউশিং,

লাইচৎ মনুংসিদা মেদিকেল তেক্সতাইল (পি.পি.ই. কিতশিং, ফেস সীল্দ, মাস্ক অমসুং গ্লোভশিং) পুথোক্তুনা মপান্দা থাদোকপগী থবক য়োকখৎপগীদমক্তা ঐনা অদোম পুম্নমকপু অমদি তেক্সতাইল মন্ত্রালয়গী মফমদা নুংঙাইবা ফোঙদোকচরি‍। থৌওং অসিগী মহৈনা ঙসিদি ভারতনা পি.পি.ই. কিত পুথোকপদা মালেমগী অনিসুবা মফম কল্লি‍।

অসিগুম্বা ৱাখল পরিং অসিদনি এ.ই.পি.সি.না এক্সপোর্ত প্রমোসন থৌরমশিং পাঙথোক্নবা মশাগী ওইবা ভর্চুএল প্লেতফোর্ম পুথোক্লিবা অসি‍। প্লেতফোরম অসি পুং খুদিং, নুমিৎ খুদিং এক্তিব ওইদুনা লৈগনি অমদি চহী চুপ্পা পোৎ লৈরিবা মীওইশিংনা মসিদা চঙদুনা ভারতকী এক্সপোর্তরশিংগা ৱারী ৱাতায় শানবা য়ারগনি হায়বসি তাবদা নুংঙাইবা ফাওই‍।

লাইচৎ অসিনা পীরিবা শিংনবশিং হন্থহন্নবা অমদি অপীকপা লল্লোনবশিং অমদি এক্সপোর্তরশিংদা ঙাক্লৌ পীবদা তেক্সতাইল মন্ত্রালয়না লৌরিবা থৌদাংবু ঐনা থাগৎলি‍।

অসিগুম্লবা পুন্না হোৎনমিন্নরিবশিং অসিনা ভারতকী ফিজেৎ লৈতেংগী পোত্থোকশিং এক্সপোর্ত তৌবগী চাং হেনগৎহনগনি হায়না ঐনা থাজৈ‍। ঐখোয়না ফি এক্সপোর্ত তৌবদা হৌজিক লৈরিবা শেয়র চাদা ৫-৬ অসিদগী দিজিত অনিগী চাং থুনা য়ৌবা ঙম্নবা পান্দম থমগদবনি‍।

প্লেতফোর্ম অসি হৌদোকপদা ঐনা অমুক্কা হন্না নুংঙাইবা ফোঙদোকচরি‍। ‘মরোমদোম লেপচবগী’ মায়কৈদা চঙশিল্লিবা ঐখোয়গী খোঙচৎ অসিদা অতোপ্পা মায় পাকপগী য়ুম্বী অমা ওইরিবা থৌরাং অসি লৌখৎলকপগীদমক ঐনা এ.ই.পি.সি.গী চেয়ামেন দোক্তর এ. সকথিবেল অমসুং মহাক্কী কাঙবুগী মফমদা নুংঙাইবা ফোঙদোকচরি‍। মসিনা ইন্দস্ত্রী অতৈদসু অসিগুম্বা থৌরাংশিং পায়খৎলক্নবগী পুক্নিং থৌগৎপা ওইরসনু অমদি অতৈনা তমজনিংঙাই ওইবা খ্বাইদগী ফবা থৌওং ওইরসনু‍।

জয় হিন্দ‍।”

*****