دستکاروں اور فنکاروں کی اندرون ملک تیار مصنوعات کو مارکٹ اور مواقع فراہم کرنے کے اپنے وسیع النظر سفر کو آگے بڑھاتے ہوئے اقلیتی امور کی وزار ت  22؍ جنوری سے 4؍فروری 2021 کے درمیان اترپردیش کے لکھنؤ میں اودھ شلپ گرام میں 24واں ‘‘ ہنرہاٹ’’ منعقد کر رہی ہے۔ اس کا موضوع ‘‘ ووکل فار لوکل’’ ہوگا۔ ملک بھر سے 31 ریاستوں نیز مرکز کے زیر انتظام علاقوں کے فنکار اور دستکار اس میں شرکت کریں گے۔ اترپردیش کے وزیر اعلیٰ جناب یوگی آدتیہ ناتھ 23 جنوری کو اس کا باقاعدہ افتتاح کریں گے۔

اقلیتی امور کے مرکزی وزیر جناب مختار عباس نقوی، اترپردیش کے نائب وزرائے اعلیٰ جناب کیشو پرساد موریہ اور جناب دنیش شرما، کھادی اور گرام ادیوگ کے چیئرمین جناب وی کے سکسینہ، اترپردیش کے مالیات کےوزیر جناب سریش کھنہ، کھادی اور گرام ادیوگ نیز ایم ایس ایم ای کے وزیر جناب سدھارتھ ناتھ سنگھ، شہری ترقیات کے وزیر جناب آشوتشو ٹنڈن، شہری ہوابازی اور  اقلیتی بہبود کے وزیر جناب نند گوپال گپتا ‘‘نندی’’ قانون اور انصاف کے وزیر برجیش پاٹھک، خواتین و اطفال کی بہبود کی وزیر محترمہ سواتی سنگھ، جل شکتی کے وزیر مملکت جناب بندیو سنگھ اولاک اور  مسلم وقف ، حج کے وزیر مملکت جناب محسن رضا بھی  اس موقع پر موجود رہیں گے۔

لکھنؤ میں منعقدہ ‘‘ ہنرہاٹ’’ میں 13 ریاستوں اور مرکز کے زیر انتظام علاقوں کے فنکار اور دستکار شرکت کریں گے۔ آندھرا پردیش، آسام، بہار، چنڈی گڑھ، چھتیس گڑھ، دہلی، گوا، گجرات، ہریانہ، ہماچل پردیش، جموں و کشمیر، جھارکھنڈ، کرناٹک، کیرالہ، لداخ، مدھیہ پردیش، منی پور ، ناگالینڈ، اڈیشہ، پڈوچیری، پنجاب، راجستھان، سکم، تمل ناڈو، تلنگانہ، اترپردیش، اتراکھنڈ، مغربی بنگال وغیرہ کے تقریبا 500 دستکار اور  طباخی کے ماہرین لکھنؤ میں ‘‘ ہنر ہاٹ’’ پہنچ گئے ہیں، جہاں وہ اپنے مخصوص دستی مصنوعات کی نمائش اور فروخت کریں گے۔

اجرخ، پارچہ کاری کے ملبوسات، آرٹ میٹل کے شاہکار، باغ پرنٹ، بٹیک، بنارسی ساڑی، بندھیج، بستر آرٹ اور ہربل مصنوعات، بلاک پرنٹ، پیتل کی دھات سے بنی چوڑیاں، بانس اور بمبو کی مصنوعات، کینوس کی پرنٹنگس، چکن کاری، تانبے کی گھنٹیاں، خشک پھول، ہینڈلوم، ٹیکسٹائل، کلم کاری، منگل  گِری، کوٹہ سِلک، لاکھ کی چوڑیاں، چمڑے کے مصنوعات، پیشمینے کی شال، رامپوری وائلن، لکڑی اور لوہے کے کھلونے، کنتھا ایمبائڈری، پیتل کی مصنوعات، شفاف شیشے کی اشیا، صندل کی لکڑی کے مصنوعات وغیرہ جیسی اندرون ملک تیار مصنوعات لکھنؤ کے اس ‘‘ہنر ہاٹ ’’میں دستیاب ہیں۔

لکھنؤ میں منعقدہ ‘‘ ہنر ہاٹ’’ میں لوگ  ملک کے مختلف  حصوں کے روایتی پروگراموں سے لطف اندوز ہوں گے۔ اس کے علاوہ ‘‘ ہنر ہاٹ’’ میں ہر روز شام کے وقت   ‘‘ آتم نربھر بھارت’’ کے موضوع پر ملک کے سرکردہ آرٹسٹ ثقافتی پروگرام پیش کریں گے۔جناب کیلاش کھیر، جناب ونود راٹھور، محترمہ شیبانی کشیپ، جناب بھوپیندر  بھپپی، مرزا سسٹرز، جناب پریم بھاٹیہ، محترمہ ریکھا راج، ہمسار حیات گروپ، مکیش پنچولی جیسے معروف آرٹس، لکھنؤ کے اس ہنر ہاٹ میں اپنی کار کردگی سے ناظرین کولطف اندوز کریں گے۔

لکھنؤ میں ‘‘ ہنر ہاٹ’’ورچوئل اور اس آن لائن پلیٹ فارم پر بھی دستیاب ہے۔  http://hunarhaat.org

ملک اور بیرون ملک کے لوگ ‘‘ ہنر ہاٹ’’کی مصنوعات کو ڈیجیٹل اور آن لائن بھی خرید سکتے ہیں۔

ہنر ہاٹ  دستکاروں اور فنکاروں کےلئے بہت زیادہ فائدے مند اور حوصلہ افزا ثابت ہوا ہے، کیونکہ لاکھوں افراد ‘‘ ہنر ہاٹ’’ کا دورہ کرتے ہیں اور اندرون ملک دستکاروں کی ہینڈ میڈ مصنوعات کو بڑے پیمانے پر خریدتے ہیں۔ 5 لاکھ سے زیادہ دستکار ، فنکار اور ان کے ساتھ منسلک افراد کو ہنر ہاٹ کے ذریعے گزشتہ تقریباً 5 برسوں میں روزگار فراہم ہوا ہے، نیز روزگار کے مواقع وا ہوئے ہیں۔

آنے والے دنو ں میں ‘‘ ہنر ہاٹ’’میسور، جے پور، چنڈی گڑھ، اندور، ممبئی، حیدرآباد، نئی دلی، رانچی، کوٹہ، سورت نیز احمد آباد، کوچی، پڈوچیری اور دیگر مقامات پر منعقد کیا جائے گا۔

*************

( ش ح ۔ا ع۔  ک ا)

U. No. 596