জনুৱারি ১৭, ২০২১ ফাওবদা, মহারাস্ত্রাগী মুম্বাইদা লৈবা সেন্ত্রেল পোলত্রি দিবলপমেন্ত ওর্গনাইজেসনগী পোলত্রি অমসুং মৈধ্য প্রদেসকী মান্দসৌর জিলাগী খেদা রোদতা এভিয়ান ইনফ্লুয়েঞ্জাগী কেসশিং লৈরে হায়বা খঙলে।

মখা তানা, মৈধ্য প্রদেসকী জিলাশিং হায়বদি পান্না, সাঞ্চি, রাইসেন, বালাঘাত(ক্বাকশিং), সিওপুর(ক্বাক,মকু) অমসুং মান্দসৌর(কাঙা,খুনু); ছতিসগরগী বাস্তার(ক্বাক,খুনু) অমসুং দান্তেৱাদে(ক্বাক); উত্তরখান্দগী হরিদৱার অমসুং লান্সদাউন ফোরেস্ত রেঞ্জ(ক্বাক)তা এভিয়ান ইনফ্লুয়েঞ্জা শন্দোক্লে হায়বা খঙলে।

মসিগী মথক্তা, দিল্লিগী রোহিনিদা হেরোনগী সেম্পল চাংয়েং তৌবদা এভিয়ান ইনফ্লুয়েঞ্জা পোজিতিপ ওইরে।

মহারাস্ত্রাদা আর.আর.তিশিং থম্লে অমসুং মুম্বাইগী সি.পি.দি.ও য়াওনা লায়না শন্দোক্লিবা মফমশিংদা উচেকশিং হাৎপগী থবক চৎথরি। মৈধ্য প্রদেসতা আর.আর.তিশিং থম্লে। হরিয়ানাগী লায়না হৌরকফমশিংদা মখা তানা য়েন হাৎপগী থবক চৎথরি।

ঙসি রাজস্থান অমসুং গুজরাতকী সেম্পলশিং চাংয়েং তৌবদা এভিয়ান ইনফ্লুয়েঞ্জা নেগেতিপ ওইবা থেংনরে।

লৈবাক অসিদা এভিয়ান ইনফ্লুয়েঞ্জানা শোকহল্লবা মফমশিংগী ফিবম য়েংশিন্নবা শেমখিবা কেন্দ্রগী কাংবুনা শোকহল্লবা মফমশিংদা চৎখ্রে অমসুং লাইচৎ অসিগী মতাংদা থিজিনখ্রে।

লাইচৎ লৈতবা মফমশিং/রাজ্যশিংদগী য়েন অমসুং য়েরুম পুশিল্লকপা থিংবগী পাউ ফংবদগী, মসিনা য়েন লোইবগী ইন্দস্ত্রিদা চাউনা চৈথেং পীগদবা মরম্না, অসিগুম্বা ৱারেপ অসি অমুক হন্না খন্ননবা রাজ্যশিংদা হায়জখ্রে। শেম-শারবা য়েনগী পোৎথোকশিংদগী এভিয়ান ইনফ্লুয়েঞ্জা ভাইরস শন্দোকপগী সাইন্তিফিক ওইবা পাউ অমতা লৈতে। নিংথিনা থোঙলবা য়েন অমসুং য়েরুমশিং চাবদা মীওইবগী হকচাং শোকপগী ৱাফম লৈতে। সাইন্তিফিক ওইদবা য়ুম্ফম য়াওদবা তোকঙাশিংদা মীয়াম্না থাজরোইদবনি অমসুং মসিনা চমম্নবা পোকহনগনি। মসিনা কোবিদ-১৯ লোকদাউন্না মরম ওইদুনা হান্না অৱাবা তাখ্রবা য়েন লোইবা অমসুং চুজাক থাবা লৌমীশিং শোকহনগনি অমসুং য়েন অমসুং য়েরুমগী কৈথেলশিদা শাথিনা অকায়বা পীগনি।

মহৌশাগী নত্তবা মওংদা য়েনশিং শিরকপা মতমদা পাউ পীরক্নবা লৌমীশিংগীদমক মহারাস্ত্রা এনিমেল হসবেন্দরি দিপার্তমেন্তনা তোল ফ্রি হেল্পলাইন নম্বর অমা হৌদোক্লে। দিপার্তমেন্তগী ওফিসিএলশিং অমসুং মীয়াম অনিমক্তা নৌনা শেমদোক্লবা এভিয়ান ইনফ্লুয়েঞ্জা এক্সন প্লান ২০২১গা চুন্নবা রাজ্য সরকারনা এভিয়ান ইনফ্লুয়েঞ্জাগী মরমদা দরকার ওইবা ই-পাউশিং ফংহল্লে। ‘লায়না শন্দোক্লিবা মফম’গী মরমদা দরকার ওইবা নোতিসশিং থোক্তুনা লায়না শন্দোরকপা থিংনবা রাজ্য অসিদা মাঙজৌন্না থবক পায়খৎলে।

থিন্থবা তৌদনা বার্দ ফ্লুগী থৌদোকশিং লাকশিন্নবা, প্রিভেন্সন এন্দ কন্ত্রোল ওফ ইনফেকসিয়স এন্দ কন্তাজিয়স দিজিজসেস ইন এনিমেলস এক্ত,২০০৯গী মখাদা পীরিবা শক্তিশিং শীজিন্নদুনা মখোয়না কোনবা মফমশিংদা এভিয়ান ইনফ্লুয়েঞ্জা মাঙজৌন্না ঙাকথোক্নবা, লাকশিন্নবা অমসুং মুৎথৎনবা রাজ্য সরকারনা দিস্ত্রিক কল্লেক্তরশিংদা শক্তিশিং শীন্নখ্রে।

দিপার্তমেন্তনা চেকশিনৱাশিং পীরকপগী মতুংইন্না, পাউ-চেগী এদভর্তাইজমেন্তশিং, সোসিএল মেদিয়াগী প্লেতফোর্মশিংগী খুৎথাংদা মীয়াম ৱাখল তাহন্নবা থবকশিং রাজ্যশিংনা পাংথোক্লি। তুইতর অমসুং ফেসবুকগুম্বা সোসিএল মেদিয়া প্লেতফোর্মশিং য়াওনা তোঙান-তোঙানবা মেদিয়া প্লেতফোর্মশিংগী খুৎথাংদা এভিয়ান ইনফ্লুয়েঞ্জাগী মরমদা ৱাখল তাহন্নবা অমসুং ফিবম অসি কমদৌনা লাকশিনগনি হায়বগী মতাংদা লেপ্তনা মীয়ামদা খঙহল্লি।

*****