প্রধানমন্ত্রীগী লোইশঙ

স্তেচ্যু ওফ য়ুনিতীগা লেপ্তনা শম্নহন্নবা ত্রেন নিপাল লম্থাবগী থৌরমদা প্রধান মন্ত্রীনা ৱা ঙাংবা

Posted On: 17 JAN 2021 1:48PM by PIB Imphal

খুরুমজরী,

এক ভারত, শ্রেস্থ ভারতকী নীংথিরবা মমি অমা ঙসি মফম অসিদা উবা ফংলে। ঙসিগী থৌরম অসিগী মওং অসি য়াম্না নীংথিজৈ অমসুং পুৱারী ওইবগী মওং চেল্লি।

কেৱরিয়াদা গুজরাৎকী রাজ্যপাল, শ্রী অচার্য় দেবব্রতজী, মুখ্য মন্ত্রী, শ্রী বিজয় রুপানীজীসু লৈরে। প্রতাপনগরদা গুজরাৎ বিধান সভাগী স্পীকর, শ্রী রাজেন্দ্র ত্রিবেদীজীসু লৈরে। অহমেদবাদতা গুজরাৎকী দীপ্যুতী সি.এম., নিতিন পতেলজী, দিল্লীদনা ঐহাক্কী মন্ত্রী-মন্দলগী মরুপশিং, শ্রী পিয়ুশ গোয়লজী, ফোরেন মন্ত্রী, এস. জয়শঙ্করজী, দাঃ হর্শ বর্ধনজী, দিল্লীগী মুখ্য মন্ত্রী, ভাই অর্বিন্দ কেজ্রিৱালজীসু ঐখোয়গা লোয়ননা লৈরে। মধ্য প্রদেশকী রিৱাদগী মুখ্য মন্ত্রী, শিবরাজ সিংহ চৌহানজীসু ঐখোয়গী ইনাক্তা লৈরে। মুম্বাইদনা মহারাস্ত্রাগী মুখ্য মন্ত্রী, ভাই উধব থাকেরাইজীসু লৈরে। বারানসিদগী য়ু.পি.গী মুখ্য মন্ত্রী, য়োগী অদিত্যনাথজীসু ঐখোয়গা লোয়ননা লৈরে। মখোয় ময়ামগী মথক্তগী, তমিল নাদু অমসুং অতোপ্পা রাজ্য সরকারশিংগী ইকায় খুম্ননীংঙাই ওইরবা মন্ত্রীশিং, মেম্বরশিং, এম.এল.এ.শিংসু ঙসিগী থৌরম অসিদা শরুক য়ানবা ঐখোয়গী নাক্তা লৈরে অমসুং খ্বাইদগী নুংঙাইবা অমনা সর্দার বল্লব ভাই পতেলজীগী ইমুং মনুংগী মীওই কয়া অমসু ঐখোয়দা য়াইফ-পাউজেল পীবীনবগীদমক্তা অনন্দদা লৈবীরিবা অসিনি। আর্তকী শক্নাইরবা মীওই কয়া অমা, শান্ন-খোৎনবগী শক্নাইরবা মীওই কয়া অমা থৌরম অসিদা শরুক য়ানবা লেংবীরক্তুনা লৈরে। মসিদা নত্তনা ঐখোয়বু থৌজানবীরিবা মপু ইবুংঙো, নুংশিরবা ইচিল ইনাওশিং অমসুং ভারতকী মমাই পুরক্কদবা অঙাং কয়া অমনা ঙসিগী থৌরম অসিবু মাই পাক্নবা থৌজালগা লোয়ননা লেংবীরকপগীদমক্তা, মীপুম খুদিংমক্তা নোল্লকচরি।

রেলৱেগী পুৱারীদা অহানবা ওইনা তোঙান-তোঙানবা মফম কয়াদগী চপ-মান্নবা মফম অমগীদমক্তা ত্রেন কয়া লম্থাবগী থৌরম পাংথোক্লি। হোই, কেবরিয়া অসিসু অদুগুম্বা মফম অমনি। মফম অসি এক ভারত, শেস্থ ভারতকী মন্ত্রা হৌদোক্লম্বা, লৈবাক অসিবু অমত্তা ওইনবা পুন্সিনবীরম্বা সর্দার বল্লব ভাই পতেলগী স্তেচ্যু ওফ য়ুনিতী, মালেমদা খ্বাইদগী ৱাংবা মুর্তী, অমসুং সর্দার সরোবর দামগীদমক্তা মমিং চৎলবনি। ঙসিগী থৌরম অসিদা রেলৱেগী মঙলান অমসুং সর্দার পতেলগী মীশন অসিনা ভারতপু তসেংনা পুলহল্লে। ঐহাক্না য়াম্না হেন্না নুংঙাইরিবদি, ঙসিগী থৌরম অসিদা লৈবাক্কী তোঙান-তোঙানবা রাজ্যশিংদগী মীওই কয়া লাক্তুনা পুনবা অসিনি। ঐহাক্না নখোয় খুদিংমকপু থাগৎচরি।

ঙসি কেবরিয়াদা লাক্কদৌরিবা ত্রেনশিং অসিগী মনুংদগে পুরৎচী থলাইবার, দাঃ এম.জি. রামচন্দ্র সেন্ত্রেল রেলৱে স্তেসন্দগীসু ত্রেন অমা লাক্কদৌরি। ঙসি অসি ভারত রত্না এম.জি.আর.গীসু মপোক নুমিৎ ওইবা অসিসু য়াম্না তান-চানবা থৌদোক অমনি। এম.জি.আর.না ফিল্ম স্ক্রীন্দগীনা রাজনীতিগী স্ক্রীন ফাওবা, মীয়ামগী থমোয়নুংদা মফম কনবা ঙমখি। মহাক্কী পুন্সি, মহাক্কী রাজনীতিগী পুন্সি অসি লায়রবশিংগী য়াইফনবগীদমক্তা কত্থোকখি। লায়রবশিংনা মান্নবা পুন্সিরোল অমা ফংহনবা ঙমহন্নবগীদমক্তা মহাক্না লেপ্তনা হোৎনদুনা লাকখি। মহাক্কী অসিগুম্বা মঙলান অসিবু মঙফাওনহন্নবগীদমক্তা ঐখোয়না ঙসি অপুনবা ওইনা হোৎনফম থোকই। চহি খরগী মমাংদা, মহাকপু ইকায় খুম্নবা উৎপা ওইনা চেন্নৈ সেন্ত্রেল রেলৱে স্তেসনগী মমিং অসি মহাক্কী মনিং ওন্থোক্তুনা থোনখিবনি। ঐহাক্না ঙসি মহাক্কী মফমদা ইকায় খুম্নবা উৎচরি।

মরুপশিং,

ঙসি, লৈবাক্কী মফম খুদিংদগী কেবরিয়া ফাওবা রেলগী কনীক্তিবিতী হকথেংননা লৈবা অসি য়াম্না মশক থোকপা থৌওং অমনি, ঐখোয়না মসিগীদমক্তা চাউথোকচবা ফাওফম থোকই। মতম খরগী মমাংদা, চেন্নৈদগীতা নত্তনা বারানসি, রিৱা, দাদর অমসুং দিল্লীদগী কেবরিয়া এক্সপ্রেস অমসুং অহমেদবাদতগী জনশতাবদী এক্সপ্রেস অসি কেবরিয়াগীদমক্তা খোঙশানখ্রে। মতৌ অসুম্না কেবরিয়া অমসুং প্রতাপনগরগী মরক্তসু মেমু সেবা অসি হৌখ্রবনি। দাভোই-চন্দোর রেল লাইন পাকথোক-চাউথোকহনখিবা অমসুং চন্দোর-কেবরিয়াগী মরক্তা অনৌবা রেল লাইন অমা লৈহনখিবা অসিনা কেবরিয়াগী চাউখৎপগী লম্বীদা অনৌবা ৱারী অমা ইবা হৌখ্রবনি অমসুং ঙসিগী থৌরম অসিদা শরুক য়াবা অসিদা মমাংগী ৱারী খরসু নীংশিংলক্লে। বরোদা অমসুং দাভোইগী মরক্তা নেরো-গেজকী রেল চেল্লম্মি হায়বসি মীওই অয়াম্বনা খঙলম্লোই। ঐহাক্না লম্বী অসিদা চৎপগী খুদোংচাবা কয়ারক ফংখি। মতম অমদা ঐহাক্না ইমা নর্মদাদা পুক্নিং য়াম্না চঙলম্মি অমসুং তোয়না চত্থোক-চৎশিন তৌরম্মি। ঐহাক্কী পুন্সিগী মতম খরদি ইমা নর্মদাগী মতম্বাক্তা লেঞ্জখি অমসুং মতম অসুদা নেরো গেজকী ত্রেন্দা খক্তা চৎখি। মসিগী নেরো-গেজ ত্রেনগী নুংঙাইবা অসিদি, ত্রেন অসিনা তপ্না চেনবনা, মফম অমদা হেক্তা কুম্থবা য়ারম্মি, মফম অমা হেক্তদা কাখৎপা য়ারম্মি, অমসুং মতম খরদংগী ওইরবসু ত্রেন অসিগা য়াম্না নুংঙাইনা চৎমিন্নবা ফাওবা য়ারম্মি। করিগুম্বা কান্দদি নহাক্না হেন্না ত্রেন্দগী য়াঙবা চৎলে হায়না খনবসু য়াওরম্মি। ঐহাকসু মদুগী নুংঙাইবা লৌরম্মি। অদুবু ঙসিদি, মসিবু ব্রোদ-গেজতা ওন্থোক্লগনি। মসিগী রেলগী লম্বী শম্নবদা খ্বাইদগী হেন্না কান্নবা ফংগদৌরিবশিংদি স্তেচ্যু ওফ য়ুনিতী য়েংবা লাকপা মীওইশিংনি অমসুং মসিগী লম্বী অসিনা কেবরিয়াগী ত্রাইবেল ইচিল ইনাওশিংগী পুন্সিদসু অহোংবা কয়া অমা পুরক্লগনি। মসিগী লম্বী অসিনা খুদোংচাবা কয়া অমগা লোয়ননা, থবক অমসুং অনৌবা কান্নবা কয়া অমসু পীরগনি। মসিগী রেল লাইন অসিনা ইমা নর্মদাগী তোর্বান্দা লৈরিবা কর্নালী, পোইচা অমসুং গরুদেশ্বরগুম্বগা মফমশিংগা তায়নরিবা শক্নাইরবা মফমশিংগসু শম্নহল্লগনি অমসুং ঐখোয়গী লৈবাক অসি স্পিরিচুএল ভাইব্রেসন্না পুম্থন থনবা মফম অমনি হায়বা অসিসু অচুম্বনি। অমসুং মসিগী খুদোংচাবা অসিনা মরম ওইদুনা, মফম অসিদা স্পিরিচুএলগীদমক্তা লাকপা মীওইশিংগী ওইনসু য়াম্না ঙক্নিংঙাই ওইবা থৌওং কয়ানা ঙাইদুনা লৈরবনি।

ইচিল ইনাওশিং,

ঙসিদগীদি কেবরিয়া অসি গুজরাৎকী মনুং হঞ্জিবা মফমদা লৈবা অপিকপা মফম অমা ওইররোই, মফম অসি মালেমগী লম-কোয়বগী খ্বাইদগী চাউবা মফম অমা ওইরকপা হৌরবনি। স্তেচ্যু ওফ য়ুনিতী য়েংবা লাকপা মীওইশিংগী মশিংনা স্তেচ্যু ওফ লিবর্তী য়েংবা লাকপা মীওইদগী হেল্লবনি। মসিবু হেক মীয়ামগীদমক্তা হাংদোকখিবদগী হৌজিক ফাওবা চাউরাক্না মীওই লাখ ৫০মুক মুর্তী অসিবু য়েংবা লাক্নখ্রে। কোরোনানা মরম ওইদুনা মফম খুদিংমক লোল্লুরবা মতুংদা, ঙসিদি কেবরিয়াদা লমকোয়বা লাকপগী মওং অসি অমুক হন্না হৌরক্লে। মফম অসিগী কন্নেক্তিবিতী হেনগৎলকপগী মতুং ইন্না লাক্কদৌরিবা মতমশিংদা মফম অসিদা নোঙমদা মীওই লাখ ১গী চাংদা লাকপা য়াই হায়না পানখিবসু লৈখ্রবনি।

মরুপশিং,

নীংথিনা য়াৎপা থৌওংগা লোয়ননা অকোয়ববু ঙাক শেন্দুনা মফম অমদা শেন্মিৎলোন অমসুং ইকোলোজী অসি নাকল অনিমক্তা চাউখৎপা পুরকপা য়াই হায়বগী খুদম অসি পিক্লবা কেবরিয়ানা তাক্লবনি। ঙসিগী থৌরম অসিদা শরুক য়ারিবা মীথুংলেন কয়া অমনা কেবরিয়াদা অমুক ফাওবা চৎখিদ্রিবা য়াওরমগনি। মফম অসিগী চাউখৎপগী খোঙচৎ অসিবু য়েংলবা তুংদা অদোম পুম্নমকসু ঐখোয়গী লৈবাক্কী ফজরবা মফম অসিবু য়েংলুরে হায়দুনা চাউথোকচগনি।

মরুপশিং,

মফম অসিবু মালেমগী লমকোয়ফম অমা শেম্নবা খন্নখিবা মতমদা, মীয়াম্না ৱাহৌদোক অসিবু মঙ ওইনা খন্নখিবা অদু ঐহাক্না ঙসিসু নীংশিংলি। মসি ওইথোক্লোই হায়না মীয়াম্না হায়নখি। মসিগী থবক অসি পাংথোকপদা দিকেদ কয়া চঙগনি হায়নরম্মি। হোই, মমাংগী থৌদোকশিংগা য়েংনরুরগদি মখোয়না হায়রিবা অসিদা লান্না লৌবসু য়াদে। কেবরিয়া য়ৌনবা অফবা শোরোক, মতিক চাবা স্ত্রীৎ লেম্প, রেল, লমকোয়বশিং লৈনবা মফম অমত্তা লৈরমদে অমসুং মফম অসি লৈবাক্কী অতোপ্পা অপিকপা খুঙ্গং অমগা মান্ননা অদুম লৈরম্মি। অদুবু হৌখিবা চহি খরা অসিদা মফম অসি পুমহোং হোংলে। মফম অসিদা য়ৌরক্নবা অপাকপা লম্বী, লমকোয়বশিং লৈনবা অচৌবা তেন্ত সিতী, অতোপ্পা মরী লৈনবা খুদোংচাবা কয়া, হেন্না ফরবা মোবাইল কন্নেন্তিবিতী, অফবা হোস্পিতাল লৈরে অমসুং হৌখিবা নুমিৎ খরনিগী মমাংদগী প্লেনগী খুদোংচাবসু লৈখ্রে অমসুং ঙসিদগী হৌনা লৈবাক্কী মফম কয়াদগী রেলগী কন্নেক্তিবিতীনা মফম অসিগসু শম্নহল্লে। মসিগী শহর অসিনা মপুং ফাবা পেকেজ অমগী মওংদা লৈরে। স্তেচ্যু ওফ য়ুনিতী অমসুং সর্দার সরোবর দাম অসিগী ফজবা অসিদি মফম অসিদা য়ৌরবকান্দা খক্তা খঙবা ঙমগনি। ঙসিদি, মফম অসিদা একর লিশিং হেন্না পাক-চাউবা সর্দার পতেল জুলোজিকেল পার্ক লৈরে, জঙ্গল সফারী লৈরে। নাকল অমদা অয়ুর্বেদ অমসুং য়োগদা য়ুম্ফম ওইবা লৈকোল লৈরে অমসুং নাকল অমদনা ন্যুত্রিসন পার্ক লৈরে। নুমিদাংদা য়েংনবা কুফেত-কাফেৎ ঙানবা গ্লো গার্দেন লৈরে অমসুং নুংথিলদা য়েংনবা কেক্তস গার্দেন অমসুং কুরাক্কী গার্দেন লৈরে। লমকোয়বশিংবু পুথোক-পুশিন তৌনবা য়ুনিতী ক্রুজ লৈরে অমসুং নহাশিংগী পুক্নিং চীংশিন্নবা রাফতিং তৌবগী খুদোংচাবসু লৈরে। অঙাং, অহল, নহাগী নুংঙাইগদবা হীরম খুদিংমক লৈরে। হোংলক্লিবা মতমগী মতুং ইন্না মফম অসিগী ত্রাইবেলগী নহাশিংসু থবক ফংলে অমসুং মফম অসিগী মীওইশিংনা তঙাই ফদবা খুদোংচাবশিং অথুবা মতমদা ফংবা হৌরক্লি। মীওই কয়া অমনা মেনেজর ওইখ্রে, খরা অমনা কেফেগী মপু ওইনখ্রে, খরা অমনা গাইদকী থবক তৌবা হৌনখ্রে। ঐহাক্না উচেক য়েংনবা জুলোজিকেল পার্ক অসিগী এভিএরী দোমদা চৎখিবদা মফমদুগী গাইদ নুপী অমনা ঐঙোন্দা নীংথিজনা তাকপীরকখিবা অদু ঐহাক্না ঙসি ফাওবা নীংশিংলি। মসিদা নত্তনা মফম অসিগী নুপীশিংনা য়ুনিতী মোলদা মখোয়গী হেন্দিক্রাফকী পোত্থোকশিং য়োনবগী খুদোংচাবা ফংবা হৌনখ্রে। কেবরিয়াগী ত্রাইবেলশিংগী খুঙ্গংশিংদা কা ২০০ হেন্না মশক খঙদোক্তুনা লমকোয়বশিংগী হোম স্তে ওইহন্নবা থৌরাং চত্থরি হায়নসু ঐঙোন্দা পাউদমলকখ্রে।

ইচিল ইনাওশিং,

কেবরিয়াদা শাখ্রিবা রেলৱে স্তেসন অসিদা অতৈ খুদোংচাবা কয়াগা লোয়ননা লমকোয়বশিংগী মতাংদসু খন্নদুনা শাখিবনি। মফম অসিদা ত্রাইবেল আর্ত গেল্লরী অমসুং অতোপ্পা ভ্যুইং গেল্লরী অমসু শাখ্রবনি। মসিগী ভ্যুইং গেল্লরী অসিদগী স্তেচ্যু ওফ য়ুনিতীসু য়েংবা য়াগনি।

মরুপশিং,

মসিগা পান্দমদা মিৎয়েং চঙবা থৌওং অসিনা ইন্দিয়ন রেলৱেগী হোংলক্লিবা মওংগী খুদম অমনি। মসিনা লমকোয়বা অমসুং লাইনিংবগী মফমশিং শম্নহনবতা নত্তনা মসিগী মহৌশাগী ওইজবা মীওইশিং অমসুং পোত্থোকশিং পুবগী থবকসু অদুমক লেপ্তনা চত্থরি। হৌজিক্তি, তোঙানবা লম্বী কয়াদা বিস্তা দোম কোচশিং য়াওহন্দুনা ইন্দিয়ন রেলৱেজতা চৎপা অসিসু য়াম্না নুংঙাইহনগদৌরে। অহমেদবাদ-কেবরিয়া জন শতাব্দী এক্সপ্রেসতা হায়রিবা খুদোংচাবা অসি ফংলগনি।

মরুপশিং,

হৌখিবা চহিশিংদা লৈবাক অসিগী রেলগী ইনফ্রাস্ত্রকচরবু চাউখৎহন্নবগীদমক্তা পাংথোকখিবা থবকশিং অসি হান্না পাংথোকখিদ্রিবা মওংদনি। নিং-তম্বা ফংলবা মতুংদা হান্নদগী লৈরম্লিবা ত্রেনগী খুদোংচাবশিং অসিবু হেন্না ফগৎহন্নবা থবক পায়খত্তুনা লাকখি। মদুগী মতম মদুদা অনৌবা ৱাখল্লোন অমসুং অনৌবা তেক্নোলোজী শিজিন্নবগী থৌওং কয়া লৈরমদে। মদুগী ৱাখল্লোন অসি হোংদোকপগী তঙাই ফদবা য়াম্না চাউনা লৈরম্মি। মরম অদুনা, হৌখিবা চহি খরা অসিদা অহোংবা অমা পুরক্নবা অকনবা থবক পায়খৎপা হৌখি। মসিগী থবক অসি বজেৎ হেনগৎপা/হন্থবা, অনৌবা রেল হৌদোকপা অসিখক্তদা তুংশিন্দুনা লৈত্রে। মসিগী অহোংবা অসি হীরম কয়াদা অমদা পাংথোকপনি। খুদম ওইনা, কেবরিয়াগা শম্নহনবগী রেলগী প্রোজেক্ত অসিদা য়েংলসি। মসিগী হৌদোকপগী থৌরমদা উৎখিবা ভিদিওদা হায়রিবগুম্না, প্রোজেক্ত অসি পায়খৎপা মতমদা অইং-অশাগী, কোরোনাগী অমসুং অতোপ্পা খুদোংচাদবা কয়া অমা থেংনখি। অদুবু হায়নখিবা মতমগী মনুংদা থবকশিং অসি লোইশিনবা ঙমখি অমসুং মসিদা শিজিন্নখিবা অনৌবা তেক্নোলোজী কয়া অমনা অচৌবা মতেং পাংখি। হৌজিক্তি ত্রেক্তগীনা থোং শাবগী হীরম খুদিংদা অনৌবা তেক্নোলোজী শিজিন্নরে। সিগ্নেলগী থবকশিংবু হেন্না য়াঙহন্নবগীদমক্তা ভর্চুএলগী মোদকী খুত্থাংদা চাঙয়েং তৌখি।

মরুপশিং,

দেদিকেতেদ ফ্রৈৎ কোরিদোর প্রোজেক্ত অসিসু ঐখোয়গী লৈবাকসিদা হান্না চৎনরম্বা থৌওংগী খুদম অমনি। নুমিৎ খরনিগী মমাংদা ঐহাক্না ইস্তর্ন অমসুং ৱেস্তর্ন দেদিকেতেদ ফ্রৈৎ কোরিদোর শঙ্গাবগী খুদোংচাবা ফংখি। লৈবাক্কী অসুক য়াম্না মরু ওইবা প্রোজেক্ত অসি ইং ২০০৬তগীনা ২০১৪ ফাওবা চেদা খক্তা থবক পাংথোক্তুনা লাকখি। ইং ২০১৪ ফাওবদা কিলোমীতর ১গী ত্রেক ফাওবা লৈরমদে। অদুবু মথংগী থা খরদা অপুনবা কিলোমীতর ১১০০গী থবক লোইশিনগদৌরে।

মরুপশিং,

রেলগী নেৎৱর্কপু মতমগা চান্নহনবা ঙম্লবা মতুংদা খক্তা, হান্না শম্নরমদ্রবা মফমশিং অসি হৌজিক মশমজিনবা ঙম্লিবনি। ঙসিদি, হান্নগী মওং-মতৌশিংদগী হেন্না থুনা য়াঙবা অখুবা গেজশিংবু অপাকপা গেজতা ওন্থোকপা, ইলেক্ত্রিক ওন্থোকপা অমসুং রেল ত্রেকশিংবু খোঙজেল য়াঙবা ওইহনবা ঙম্লে। মসিনা মরম ওইদুনা, লৈবাক অসিদা হাই স্পীদ ত্রেন চেনবগী ওইথোকপা লৈরে অমসুং ঐখোয়না হৌজিক হাই স্পীদ ত্রেক অমসুং তেক্নোলোজীগী তেংবাংদগী মাইকৈ অসিদা চঙশিনবা ঙম্লে। মসিদা নত্তনা, ঐখোয়গী রেলৱে অসি অকোয়বগা চানবা ওইবতা নত্তনা গ্রীন বিলদিংগী সর্তিফিকেসনসু ফংবা ঙম্লে।

ইচিল ইনাওশিং,

রেলৱেনা মতমগা চান্ননা চৎপা ঙম্লকপগী মরু ওইবা মরম অমদি রেলৱেগী পোত্থোক অমসুং তেক্নোলোজীদা ঐখোয়না মরোমদোম লেপচবা ঙম্নবা হোৎনবা অসিনি, মসিদা ঐখোয়না মিৎয়েং চঙবা অসিননি। হৌখিবা চহিশিংদা মসিগী হীরমদা থবক পাংথোকখিবশিংগী মহৈ অদু ঐখোয়না হৌজিক্তি তপ্না-তপ্না ফংবা হৌরক্লে। অমুক্তা খন্থবীয়ু, করিগুম্বা ভারতনা হাই হোর্স পাৱরগী লোকোমোতিব শারমদ্রবদি মালেমগী খ্বাইদগী অহানবা দবল স্তেক লোং হোল কন্তেনর ত্রেন অসি ভারত্তা চেনবা ঙম্লমগদরা? ঙসিদি ভারত্তা শাজবা অসিগুম্বা ত্রেন অমা ইন্দিয়ন রেলৱেজকী শরু অমা ওইনা চেল্লিবনি।

ইচিল ইনাওশিং,

ঐখোয়না ঙসি ইন্দিয়ন রেলৱেজপু শেমদোকপগী মাইকৈদা চৎলিবা অসিদা স্কিল নীংথিনা লৈরবা হৈরবা মেন-পাৱর অমসুং প্রোফেস্নেলশিংগী তঙাই ফদবা য়াম্না লৈগনি। বদোদরাদা ভারতকী অহানবা দীম রেলৱে য়ুনিভর্সিতী অমা শঙ্গাখিবগী পান্দম অদুসু হৌজিক পনখ্রিবা অদুনি। রেলৱেগীদমক্তা অসিগুম্বা ইন্সতিত্যুসন লৈবা মালেমগী খনগৎলবা লৈবাকশিংগী মরক্তা হৌজিক্তি ভারতসু অমা ওইরে। রেল ত্রান্সপোর্ত, মলতি দিসিপ্লিনরী রিসর্চ, ত্রেনিংনচিংবা তোঙানবা খুদোংচাবা কয়া মসিনা পীগনি। রাজ্য ২০গী ভারতকী নহা কয়া অমনা ইন্দিয়ন রেলৱেজপু তুংদা লাক্কদবা মতমশিংদা হেন্না ফগৎহন্নবা ঙসি কন্না হোৎনরি। মফম অসিদা পাংথোক্লিবা অনৌবা থৌওং অমসুং রিসর্চশিংনা ইন্দিয়ন রেলৱেজপু মতমগা চান্নহনবা ঙম্বদা তেংবাংগনি। ইন্দিয়ন রেলৱেজনা ভারতকী চাউখৎপদা খোঙজেল থুনবা তেংবাংলিবা অমসুং গুজরাৎ অমসুং ভারত পুম্ববু অনৌবা রেল লাইনশিংগীদমক্তা অমুক্কা হন্না থাগৎপা ফোংদোক্লি। অমসুং সর্দার সাহেবনা অপুনবা ভারত, মপাঙ্গল কনবা ভারত অমা ওইহন্নবা মঙলান মঙজরম্বা অদুসু, স্তেচ্যু ওফ য়ুনিতীগী শেংল্বা মফম অসিদা ভারতকী মফম কয়াদগী মীওই লাক্তুনা, তোঙান-তোঙানবা লোল ঙানবা মীওই কয়ানা মফম অসিদা অমত্তা ওইনা পুল্লরবদা, অপুনবা ভারত অমগী মমি অদো মফম অসিদা ঐখোয়না উবা ফংলগনি। ঙসি অসি কেবরিয়াগী ওইনা য়াম্না অখন্নবা নুমিৎ অমনি। লৈবাক অসিবু অমত্তা ওইনা পুন্সিনবগী থৌওং কয়া চত্থরক্তুনা লাক্লিবা অসিগী ওইনসু, ঙসিদগী অনৌবা তাঙ্কক অমা হৌরগনি। ঐহাক্না মীয়াম্বু অমুক্কা হন্না থাগৎচরি।

হন্না হন্না অমুক্কা থাগৎচরি।

*****



(Release ID: 1689516) Visitor Counter : 2