খাদিগী থবক থৌরমশিংদা হৌখিবা চহিদা – কোবিদ-১৯গী লোকদাউন্না মরম ওইরগা চাউনা শোকহনখিবা চহি অমা ওইরিবা – ইন্দিয়ন রেলৱেদগী লুপা করোর ৪৮.৯০গী অচৌবা পর্চেস ওর্দর অমা লাকখিবা অসিনা মরম ওইরগা অচৌবা কান্নবা ওইখ্রে। অমরোমদা রেলৱেজনা দিসেম্বর ২০২০ খক্তদা  লুপা করোর ৮.৪৮ ওইনা খাদিগী পোৎচৈশিং লৈখ্রে, মসিনা কোবিদ-১৯গী ৱারবা মতম অসিদা খাদিগী আর্তিসেনশিংদা থবক চাউনা পীখ্রে অমসুং ইনকম লাকহনখ্রে।

ইন্দিয়ন রেলৱেজতগী লাকপা পর্চেস ওর্দর অসিনা হকথেংননা লৈবাক অসিদা লৈরিবা শীতিং ক্লোথ, তাৱেলশিং, মোমপাক পীদক, ফ্লেগ বেনর, স্পোঞ্জ ক্লোথ, দোসুতি লংজমগী খাদি, বন্তিং ক্লোথ অমসুং অতোপ্পা কয়া শাবগী থবক তৌরিবা খাদি ইন্সতিত্যুসন ৮২গা লোইননা রেজিস্তর তৌখ্রবা আর্তিসেনশিংদা কান্নবা ফংহনখ্রে।

মে, ২০২০দগী দিসেম্বর ২০২০ (দিসেম্বর ৩১ ফাওবা) ফাওবগী মনুংদা, ইন্দিয়ন রেলৱেজনা খাদিগী ফী লুপা করোর ৪৮.৯০ লৈশিন্দুনা খাদিগী থবক-থৌরমশিং অসি লাইচৎ মনুংদা লেপহনখিদ্রে। পুক্নিং চিংশিন্নীংঙাই ওইরিবদি ইন্দিয়ন রেলৱেজনা লোকদাউন্না মরম ওইরগা শেন্মীৎলোনদা চাউনা শাফু পীখিবা মে অমসুং জুন থাশিং অসিদা খাদিদগী লুপা করোর ১৯.৮০গী পোৎলমশিং লৈখি। মসিগা চপ মান্ননা রেলৱেজনা জুলাই অমসুং অগস্ততা লুপা করোর ৭.৪২গী খাদিগী পোৎলিমশিং লৈশিনখি অমরোমদা ওক্তোবর অমসুং নবেম্বর থাশিং অসিদা লুপা করোর ১৩.০১গী খাদিগী পোত্থোকশিং লৈখ্রে।

কে.ভি.আই.সি.গী চিয়রমেন শ্রী বিনাই কুমার সক্সেনানা খাদি আর্তিসেনশিংবু শৌগৎপীদুনা কে.ভি.আই.সি.দা অচৌবা ওর্দরশিং পীরকখিবদা ইকাই খুম্নরবা রেলৱেগী মন্ত্রী শ্রী পিয়ুশ গোয়লবু থাগৎপা ফোঙদোকখ্রে। “লাইচৎ মনুংদা কে.ভি.আই.সি.না আর্তিসেন অসিদা থবক পীবদা অমদি মখোয়গী হিংনবগী পাম্বৈশিংদা অচৌবা শিংনবশিং মায়োক্নখি। অমরোমদা কে.ভি.আই.সি.না লাইচৎ মনুংদা মখোয়গী আর্তিসেনশিংবু খাদিগী মাস্কশিং শাবগী থবক তৌহনখি, মসিগা ইরোইননা রেলৱেজতগী অচৌবা ওর্দরশিং লাকপনা খাদিগী থবক-থৌরম লেপহনখিদে। মসিনা আর্তিসেনগীদা শেন-থুমগী অৱাবা মায়োক্নবরা অমসুং লৈবাক অসিগী শেন্মীৎলোনদা মতেং পাংদুনা আর্তিসেনশিংদা অহেনবা থবক পীখি অমসুং ইনকম লাকহনখি,” হায়না সক্সেনানা ফোঙদোকখ্রে।

হকথেংননা লৈদুনা খাদিবু শৌগৎপগী মথক্তা রেলৱেজনা খাদি আর্তিসেনশিংগী থৌনা হাপ্নবা পোলিসীগী ৱারেপশিং ইমপ্লিমেন্ত তৌখি। অসিগুম্বা খোঙথাং অমদা রেলৱেজনা মখোয়গী রেলৱে স্তেসন ৪০০দা পেসেঞ্জরশিংদা চান্নবা পোৎলমশিং অমসুং থবক্নবা মহী-মনাইশিং য়োনবদা লৈবাক্না শাবা খক্তা শীজিন্নহনখি অসুম্না মসিনা কে.ভি.আই.সি.দা কুমহর সাশক্তি করন য়োজনগী মখাদা ত্রেন তৌখিবা শাফু শাবশিংদা চাউনা কান্নবা পীখি। রেলৱে মন্ত্রালয়না অতোপ্পা রেলৱে স্তেসন ১০০দসু “প্লাস্তিক-ফ্রী স্তেসন্স” ওইহন্নবা খঙহন্নবা থবক চত্থরি।

*****