ভারতকী খ্বাইদগী অহানবা লমদমসিদা পুথোকচবা এম.এম.৯গী পিস্তোল অসি দি.আর.দি.ও. অমসুং ইন্দিয়ন আর্মীনা পুল্লগা পুথোকমিন্নবনি। ইনফেন্তরী স্কুল, এম.ঐচ.ও.দবল্যু. অমসুং দি.আর.দি.ও.গী আর্মামেন্ত রিসর্চ অমসুং দিভেলপমেন্ত ইস্তাব্লিশমেন্ত (এ.আর.দি.ই.), পুনেনা মখোয়-মখোয়গী লমগী হৈথোই-শিংথোইবশিং শিজিন্নদুনা খুৎলায় অসিগী মওং শেম্বা শাবা অমসুং খুৎলায় অসিবু শাবনি। খুৎলায় অসি হায়নখিবা থা ৪গী মনুংদা শাবা লোইশিনখি। মেছিন পিস্তোল অসিনা হৌজিক সর্ভিস্তা শিজিন্নরিবা এম.এম. ৯গী মরু কাপ্পি অমসুং এয়রক্রাফ গ্রেদকী এলুমিনিয়ম্না শাবা অপ্পর রিসিভর অমসুং কার্বোন ফাইবর্না শাবা লাৱর রিসিভর য়াওি। খুৎলায় অসিগী প্রোতোতাইপ শাবদা ৩.দি. প্রিন্তিংগী থৌওং শিজিন্নখি অমসুং ত্রিগর কম্পোনেন্ত য়াওনা তোঙান-তোঙানবা মচাক কয়া মেতাল ৩.দি. প্রিন্তিংনা শাখি।

খুৎলায় অসিনা আর্ম্দ ফোর্সতা অচৌবা খুৎলায় পায়বা মীওইশিং, কম্মান্দর, তেঙ্ক অমসুং এয়রক্রাফকী ক্রু, দ্রাইভর/দিস্পেৎচ রাইদর, রেদিও/রেদার ওপরেতর, ক্লোজ ক্বার্তর বেত্তল, কাউন্তর ইন্সর্জেন্সী অমসুং কাউন্তর তেরোরিজম ওপরেসন্নচিংবদা ইশাগী খুৎলায় ওইনা শিজিন্নবা য়াবগী য়াম্না চাউবা মতিক লৈ। খুৎলায় অসি কেন্দ্র অমসুং রাজ্যগী পুলিসকী লুপশিংগা লোয়ননা ভি.আই.পি. ঙাক-শেনবগী থবকশিং অমসুং পুলিসিংগী থবকশিংদা পাক-শন্না শিজিন্নরকপা য়ানা লৈরি। মসিগী মেছিন পিস্তোল অমা শাবদা লুপা ৫০০০০গী শেনফমগী মখাদা চঙবা য়াই অমসুং মীরমদা থাদোকপা য়াবগী ওইথোকপসু য়াম্না লৈ। 

খুৎলায় অসিগী মমিং অসি য়াম্না চানবা ওইনা “অসমি” কৌই অমসুং মসিগী ৱাহন্থোক্তি “চাউথোকচবা”, “ইশানা ইশাবু ইকায় খুম্নজবা” অমসুং “থবক কনবা” হায়বনি।

ইকায় খুম্ননীংঙাই ওইরবা প্রধান মন্ত্রী, শ্রী নরেন্দ্র মোদীগী মরোমদোম লেপচবা ঙম্বা ভারতকী মঙলান অসিবু মাংদা থম্লদুনা, মসিগী পিক্লবা খোঙথাং অসিনা মরোমদোম লেপচবা ঙম্বগী লম্বী য়াৎকনি অমসুং সর্ভিসেস অমসুং পেরামিলিতরী ফোর্স (পি.এম.এফ.)না মসিবু পাক-শন্না শিজিন্নরক্কনি হায়বগী থাজবা লৈনরি।

***