রেলৱেজকী ইকায়খুম্নরবা মন্ত্রী শ্রী পিয়ুস গোয়লনা জম্মু অমসুং কাস্মিরদা য়ু.এস.বি.আর.এল.গী নেসনেল প্রোজেক্তকী হৌজিক লৈরিবা খোঙজেলগী য়েংশিনখ্রে‍। ভিদিও কন্ফরেন্সিংগী খুত্থাঙদা পাঙথোকখিবা মীফম অদুদা রেলৱে বোর্দকী সি.ই.ও. অমসুং চেয়রমেন শ্রী ভি.কে. য়াদব অমসুং নোরদর্ন রেলৱেগী জেনেরেল মেনেজর শ্রী অশুতোস গঙ্গলসু শরুক য়াখি‍। য়ু.এস.বি.আর.এল. প্রোজেক্তকী চীফ এদমিনিস্ত্রেতিব ওফিসর/কন্সত্রক্সন শ্রী বিজয় শর্ম্মনা ইকায়খুম্নরবা মন্ত্রীদা প্রোজেক্ত অদুগী কত্রা-বনিহল শরুক্কী অরোইবা তাঙ্কক্কী হৌজিক ওইরিবা ফীভমগী মতাঙদা পাউদমখি‍।

প্রোজেক্ত অদুগী খোঙজেলদা অপেনবা ফোঙদোক্লদুনা রেলৱেজ মন্ত্রীনা প্রোজেক্ত অসি লোইশিন্দুনা জম্মু অমসুং কাস্মিরগী মীয়ামগী অপামবা ফংহন্নবা অমদি লমদম অসিদা লৈবাক্কী অতৈ মফমশিংগা শম্ননবা অফবা চত্থোক চৎশিনগী পাম্বৈ ফংহনগদবনি হায়না হায়খি‍। মহাক্না প্রোজেক্ত অদু পায়রিবা ইঞ্জিনিয়রশিংদুদা লেমহৌরিবা শরুক অদু মিসন মোদতা লোইশিন্নবা ৱাফম থমখি‍। মখোয়গী মফমদা মচাক মথুম লৌশিনবা অমদি অয়াবা লৌবগী থবকশিং লম্বী অদু শেমগৎপদা থিন্থদনবগীদমক মতম চানা পায়খৎনবা ৱাফমসু থমখি‍।

নোরদর্ন রেলৱেগী জি.এম. শ্রী অশুতোস গঙ্গলনা হৌজিক হৌজিক শেমগৎ শাগৎপগী থবক পায়খৎলিবা রমবন অমসুং রিয়সি দিস্ত্রিক্ততা কোবিদকী রেদ অমসুং ওরেঞ্জ জোন ওইজরবসু প্রোজেক্তকী থবকশিং কোবিদ-১৯গী এস.ও.পি. ঙাক্না পায়খৎলি‍ হায়না মন্ত্রীগী মফমদা পাউদমখি‍। খুৎশা হৈবশিংগী কেম্প অমদি আইসোলেসন সেন্তরশিং থবক মফমদা পীরি‍। প্রোজেক্ত অসিগী তোঙান তোঙানবা মফমশিংদা থবক শুরিবা মীওই ৩৬৬ ভাইরস অসিনা নাবা থেংনখি অদুবু মখোয় পুম্নমক মপুং ফানা ফখ্রে‍।

য়ু.এস.বি.আর.এল. (উধমপুর শ্রিনগর বরামুল্লা রেল লিঙ্ক) অসি কাস্মির রিজনবু লৈবাক্কী অতৈ মফমশিংগা শম্নহন্নবা পান্দমদা হিমালয়া ফাউরগা ব্রোদ গেজ রেলৱে লাইন শেমগৎনবা ইন্দিয়ন রেলৱেনা পায়খৎপা নেসনেল প্রোজেক্তনি‍। নোংজু নুংশা খায়দবা, শীজিন্নবদা নুংঙাইবা, খুদোং চাবা অমদি মমল চঙদবা মীয়ামগী চত্থোক চৎশিনগী থৌওং অসিনা লৈবাকসিগী অৱাং ইথং থংবা অল্পাইন রিজনগী মপুং ওইবা চাউখৎপা ফীভম পুরক্নবগী চঙদ্রবা য়াদ্রবা মচাক ওইরগনি‍।

প্রোজেক্ত অসিগী অহানবগী তাঙ্কক অহুমগী শেমগৎ শাগৎপশিং লোইরে অমদি লাইন অসি কাস্মির তম্পাক্কী বরামুল্লা-বনিহল অমদি জম্মু-উধমপুর-কত্রাগী মরক্তা ত্রেন চেনবা য়াবা থাক্তা লৈরে‍। মসিগা তাইনবা শরুক্কী কিলোমিতর ১১১ শাংবা কত্রা-বনিহল শরুক্কী থবক মফমসি খ্বাইদগী খুদোংচাদবা, অমদি মাগী লৈমায়গী ফীভম লোয়ননা খোঙলম অরুবা কয়া লৈবগী খুদোংথিবা কয়া লৈবনা হৌজিক চত্থরি‍। হায়রিবা শরুকসিদা তোঙান তোঙানবা মশক নাইগদবা থোং অমসুং লৈনুংহুৎশিং লৈরি‍। হায়রিবা শরুকসিদা লৈগদবা রেল লম্বী পরিংগী অয়াম্বা শরুক লৈনুংহুৎ নৎত্রগ থোং মথক্তা ফাওরগা চৎকনি‍। মসিগী খুদোংচাদবা মফমসিদা কংফালগী চত্থোক চৎশিনগী মতিং লৈবা পাম্বা অমা লৈতবনা মরম ওইরগা রেলৱেনা অহানবদা কিলোমিতর ২০৫ শাংবা লম্বী পরিং অমা হান্না কন্সত্রক্তসন সাইত য়ৌনবা শেমগৎপা তাখি‍।

রেল লম্বী শেম্বদা নিংথিনা এক্সপিরিএন্স লৈরবা এজেন্সী অহুম; আই.আর.সি.ও.এন., কে.আর.সি.এল. অমসুং নোরদর্ন রেলৱে প্রোজেক্ত অসিদা থবক তৌরি‍। মালেমগী এজেন্সী অমদি আই.আই.তি. রুরকী, আই.আই.তি দিল্লী, দি.আর.দি.ও. অমসুং জিওলোজিকেল সর্ভে ওফ ইন্দিয়ানচিংবা ভারতকী মকোক থোংবা ইন্সতিত্যুৎশিংনা থৌরাং য়াৎপদা অমদি থবক পায়খৎপদা মখোয়গী হৈশিংবা পাউতাক পীরি‍। লৈনুংহুৎ হুৎনবা মেচিনরীশিং ঐমদি ক্রেনশিংসু মপান্দগী পুশিল্লকখি‍।

হৌজিক মালেমগী খ্বাইদগী ৱাংবা রেলৱে থোং চেনব থোংগী অর্চকী থবক্কী চাদা ৯৫ লোইশিল্লে অদুগা এসিমিত্রিক কেবল ব্রিদজ অমা ওইরিবা অঞ্জি থোংগী থবক খোঙজেল য়াঙনা চঙশিল্লি‍। কিলোমিতর ৯৭.৬৪ শাংবা লৈনুংহুৎকী কিলোমিতর ৮১.২১ অমদি কিলোমিতর ৬০.৫ শাংবা এস্কেপ তনেলগী কিলোমিতর ৫৩.৫০গী থবক লোইশিল্লে‍। অচৌবা থোং ১২ অমদি থোং মচা ১০ শাবা লোইরে‍। লেমহৌরিবা থোং অচৌবা ১২ অমদি থোং মচা অমগী থবক ২০২১-২২ ফাওবগী মনুংদা লোইরগনি‍।

*****