য়ুমলৈ-কৈরৈ মন্ত্রালয়

কেন্দ্রগী গৃহ মন্ত্রী শ্রী অমিত শাহনা মনিপুরদা চাউখৎ-থৌরাংগী প্রোজেক্ত কয়ামরুম হৌদোকখ্রে
প্রধান মন্ত্রী শ্রী নরেন্দ্র মোদীজীগী লুচিং মখাদা হৌদোকখিবা মনিপুরগী চাউখৎ খোংচৎকী মরুওইবা খোংথাং
শ্রী নরেন্দ্র মোদীগী লুচিং মখাদা রাজ্য অসিদা মুখ্য মন্ত্রী শ্রী এন বিরেন সিংহনা মনিপুরবু বন্দ অমসুং ব্লোকেদতগী নান্থোকহন্দুনা চাউখৎপগী লম্বীদা পুরক্নবা থবক তৌরি
মোদীজীগী নোর্থ-ইস্ত অপুনবগী চাউখৎ-থৌরাংগীদমক ফিরেপ, মফম অসিগী মীয়ামগী থাজবা কৈদৌঙৈদসু মাংহল্লোই
ত্রিপল আই.তি. অমসুং আই.তি.-এস.ই.জেদ.না মনিপুরগী নহাশিংবু মালেম পুম্নমক্কা কনেক্ত তৌরগনি
লৈবাক অসিগী প্রধান মন্ত্রীনা নোর্থ-ইস্তপু মাগী থমোইদা লেংদনা থম্লি
নোর্থ-ইস্ত অসি অহানবদা তোঙান্না তানীংবা অমসুং তোঙান তোঙানবা হিংসাগী খোংজং চংশিনবগীদমক খঙনরম্মি অদুবু হৌখিবা চহি ৬ অসিদা লুপ কয়ানা মথং মথং ওইনা খুৎলাই থাদোকখ্রে

লৈবাক অসিগী প্রধান মন্ত্রীনা মনিপুরবু ইনর লাইন পরমিৎ পীখ্রে মসি মনিপুর রাজ্য লিংখৎলবা মতুংদা কেন্দ্র সরকারগী খ্বাইদগী চাউবা মায় পাকপনি
মমাংদদি প্রোজেক্তশিংবু শুপ্নগী উরেপ-উয়ুং তম্লম্লগা তোকখি, মোদীজীগী লুচিং মখাদা মমাংগী সরকারনা উরেপ-উয়ুং তম্লম্বা পুম্নমক অদু শঙ্গাবদা হোংদোক্নবগী থবক পায়খৎলি

Posted On: 27 DEC 2020 6:07PM by PIB Imphal

কেন্দ্রগী গৃহ মন্ত্রী শ্রী অমিত শাহনা ঙসি মনিপুরদা চাউখৎ-থৌরাংগী প্রোজেক্ত কয়ামরুম হৌদোকখ্রে। শ্রী অমিত শাহনা ইম্ফালদা ভর্চুএলগী থোংদা ই-ওফিস অমসুং থৌবাল মল্ত্রিপর্পজ প্রোজেক্ত (দাম) শঙ্গাখি। লোইননা মহাক্না চুরাচান্দপুর মেদিকেল কোলেজ, মন্ত্রীপুখ্রীদা আই.তি. এস.ই.জেদ., নই দিল্লীগী দ্বরকাদা মনিপুর ভবন অমসুং ইম্ফালদা ইন্ত্রিগ্রেতেদ কমান্দ এন্দ কন্ত্রোল সেন্তর য়াওনা মরুওইবা প্রোজেক্ত তরেৎকী ভর্চুএল ওইনা উরেপ-উয়ুং তমখি। থৌরম অদুদা দোনর মন্ত্রী দোক্তর জিতেন্দ্র সিংহ, মনিপুরগী মুখ্যমন্ত্রী শ্রী এন বিরেন সিংহ, বিধানসভাগী স্পীকর অমসুং অতৈ শক্নাইরবা মীওইশিংসু শরুক য়াখি।

থৌরম অদুদা শ্রী অমিত শাহনা হায়খি মদুদি প্রধান মন্ত্রী শ্রী নরেন্দ্র মোদীজীগী লুচিং মখাদা হৌদোকখিবা মনিপুরগী চাউখৎপগী খোংচৎ অসিগী ঙসি মরুওইরবা খোংথাং অমনি। ঙসি নোংমা খক্তদা মরুওইবা থবক কয়ামরুম হৌদোক্লিবা অসিগী মনুংদা চুরাচান্দপুরদা মেদিকেল কোলেজ, ত্রিপল আই.তি., মন্ত্রীপুখ্রীদা আই.তি.-এস.ই.জেদ. য়াওনা মরুওইবা প্রোজেক্ত কয়ামরুম য়াওরি। মসিনা অৱাং নোংপোক অপুনবগী মায়কৈ তাকপগী থবক তৌগনি। শ্রী শাহনা হায়খি মদুদি ইম্ফালদা রাজ্যগী পুলিস হেদ ক্বাতর অমসুং স্মার্ত সিতী ইন্তিগ্রেতেদ সেন্তরদগী স্মার্ত গভর্নেন্সপু মাংদা পুখৎপদা মতেং ওইরগনি। শ্রী শাহনা হায়খি মদুদি ত্রিপল আই.তি. অমসুং আই.তি.-এস.ই.জেদ.না মনিপুরগী নহাশিংবু মালেম অপুনবগা কনেক্ত তৌরগনি। আই.তি.-এস.ই.জেদ. শারবা মতুংদা মনিপুরগী জি.দি.পি.দা চহিগী লুপা করোর ৪০০০ হেনগৎলগনি অমসুং মীওই ৪৪,০০০দসু থবক ফংহল্লগনি। মেদিকেল কোলেজ লিংখৎপদগী মনিপুরগী নহাশিংনা দোক্তর ওইদুনা থোক্লক্কনি অমসুং রাজ্যগী হকশেলগী থৌরাং মপাঙ্গল কলহনগনি।

                   

কেন্দ্রগী গৃহ মন্ত্রীনা হায়খি মদুদি শ্রী নরেন্দ্র মোদীগী লুচিং মখাদা রাজ্যগী মুখ্য মন্ত্রী শ্রী এন. বিরেন সিংহনা মনিপুরবু বন্দ অমসুং ব্লোকেদতগী নান্থোকহন্দুনা চাউখৎপগী লম্বীদা পুরকপগী থবক পায়খৎলি। মোদীজীনা নোর্থ-ইস্ত অপুনবগী চাউখৎনবা ফিরেপ লৌরি অমসুং মফম অসিগী মীয়ামগী থাজবা কৈদৌঙৈদসু মাংহল্লোই। শ্রী শাহনা হায়খি মদুদি মনিপুরগী মুখ্যমন্ত্রী শ্রী এন বিরেন সিংহনা হৌখিবা চহি ৩ লোম অসিদা শিংথানীংঙাই ওইবা থবক তৌখ্রে। হৌখিবা চহি ৩ লোম অসিদা বন্দ অমুক্তা ফাওবা তৌখিদ্রে মসিদগী ৱাফম অসি শেংলে মদুদি ভারতীয় জনতা পার্তীগী লৈঙাক্তা মীয়ামগী চাউখৎপা পুরক্লি। শ্রী বিরেন সিংহনা লৈবাক অসিগী প্রধান মন্ত্রী মোদীজীগী লুচিং মখাদা মনিপুরবু চাউখৎপগী লম্বীদা মাংদা পুখৎলি অমসুং মনিপুরবু অনৌবা শক্তাক পীবগী থবক পায়খৎলি।

শ্রী অমিত শাহনা হায়খি মদুদি প্রধান মন্ত্রী শ্রী নরেন্দ্র মোদীনা নোর্থ-ইস্ত অপুনবা অসিবু মহাক্কী থোমোইদা থম্লি, মহাক্না হায়খি মদুদি নোংপোক ভারত অমসুং নোংচুপ ভারত অসি ভারত ইমাগী পাম্বোম্নি। নোংচুপ ভারত চাউখৎখ্রে অদুবু নোংপোক ভারত চাউখৎতনা ভারতকী চাউখৎপা ওইথোকপা য়ারোই। ২০১৪গী মতুংদগী শ্রী নরেন্দ্র মোদীগী লুচিং মখাদা অৱাং-নোংপোক্তা চাউখৎপগী ইচাউ থোক্লি। নোর্থ-ইস্ত অসি অহানবদা তোঙান্না তানীংবা অমসুং তোঙান তোঙানবা হিংসাগী খোংজংগীদমক্তা খঙনরম্মি অদুবু হৌখিবা চহি ৬ অসিদা লুপ কয়ানা অমগী মথংদা অমা মখোয়গী খুৎলাই থাদোকখ্রে অমসুং লেমহৌরিবা খরা অসিসু মোদীজীগী লুচিং মখাদা থাজবা পীদুনা মেন স্ত্রীমদা পুরক্লগনি।

কেন্দ্রগী গৃহ মন্ত্রীনা হায়খি মদুদি নোর্থ-ইস্তপু অসুক য়াম্না মরুওইবা ওইনা মমাংদা খক লৌখিদ্রি অমসুং মরু ওইরিবা ৱাফমদি মোদীজী মশামক হৌখিবা চহি ৬ লোম অসিদা নোর্থ-ইস্ততা ৪০রক্তগী হেন্না লাকখ্রে অমসুং রাজ্য পুম্নমক্তা চৎখি মসিদগী মোদীজীগী মিৎয়েংদা অৱাং-নোংপোক অসি কয়াদা মরুওইবা ওইনা লৌরিবনো হায়বসি ফোংদোক্লে। শ্রী শাহনা হায়খি মদুদি মোদীজীনা মীয়ামগী থমোইগী ৱা খঙই, মফম অসিগী মীওইশিংগীদমক্তা ইনর লাইন পরমিৎকী দিমান্দ অসি চহি কয়াদগী চৎথরকখি অমসুং দিসেম্বর ১১, ২০১৯দা মোদীজীনা লেপখি মদুদি ইনর লাইন পরমিৎ মনিপুরদা পীদবা হায়বসি মফম অসিগী য়েল্হৌমীদা লংজবা ওইগনি। লৈবাক অসিগী প্রধান মন্ত্রীনা মনিপুরদা ইনর লাইন পরমিৎ পীখি মদু মনিপুর রাজ্য লিংখৎখিবা মতুংদা কেন্দ্র সরকারগী খ্বাইদগী চাউবা মায় পাকপনি।

শ্রী অমিত শাহনা থৌবাল মল্তিপ্রপজ প্রোজেক্তকী মতাংদা পল্লদুনা হায়খি মদুদি স্কিম অসি অতলজীগী মতমদা কুমজা ২০০৪দগী হৌখিবনি অদুবু ২০১৪ ফাওবা করিসু তৌখিদে অমসুং স্কিম অসি অসুম্ন অসুম তাদুনা লৈখি। ২০১৬তা মোদীজীনা লুপা করোর ৪৬২ পীদুনা মসি অমুক হন্না হৌহনখি অমসুং ঙসি হেক্তর ৩৫,১০৪গী ইথৈ-লৌখোংগী থৌরাং হেনগৎহনগদৌরিবা স্কিম অসি মপুং ফাগদৌরি। শ্রী শাহনা হায়খি মদুদি অহানবদা প্রোজেক্তশিংগী শুপ্নগী উরেপ-উয়ুংতমক তম্লম্লগা অসুম্মক থনম্মি অমসুং মোদীজীগী মিৎয়েং মখাদা মমাংগী সরকারনা তম্লম্বা উরেপ-উয়ুং পুম্নমক অদু শঙ্গাবদা ওন্থোকপগী থবক পায়খৎলি।

কেন্দ্রগী গৃহ মন্ত্রীনা হায়খি মদুদি রাজ্য অসিদা শুপ্নগী মীওই চাদা ৬ খক্তমক্না থক্নবা ঈশিং ফংলম্মি অদুবু জল জীবন মিশনগী মখাদা হৌখিবা চহি ৩ লোম অসিদা চাদা ৬তগী হেনগৎতুনা ইমুং চাদা ৩৩দা অফবা থক্নবা ঈশিং ফংহনবা হৌখ্রে। ইন্তর্নেস্নেল তুরিস্তশিংগী মশিংদা ২২২% হেনগৎলে মসিদগী লাক্কদৌরিবা মতমদা তুরিজমদা হেন্না কান্নবা ফংলগনি। শ্রী শাহনা হায়খি মদুদি মনিপুগুম্বা দিওগ্রাফিকেল স্তেৎকীদমক্তা স্তার্তঅপ স্কিম অসি অদুক্কী মতিক মরুওই অমসুং মোদীজীনা হৌদোকখিবা স্কিম অসিদা নহা ১১৮৬না মখোয়গী স্তার্তঅপ হৌখ্রে মদু য়াম্না ফবা খুদম অমনি। শ্রী অমতি শাহনা হায়খি মদুদি ১৪শুবা ফাইনান্স কমিশনগা য়েংনরুবদা ১৫শুবা ফাইনান্স কমিশন্দা অৱাং-নোংপোক্কীদমক ২৫১% হেনগৎহনখি অমসুং কাইথোকখিবা শেলফম লুপা করোর ৮৯.১৮৬তগী হেনগৎতুনা লুপা করোর ৩,১৩,৩৭৫ পীবগী থবকসু ঐখোয়গী সরকারনা তৌরে। কেন্দ্রগী গৃহ মন্ত্রীনা হায়খি মদুদি রাজ্য অসিদা শান্ন-খোৎনববু য়োকখৎনবা স্পোর্ত য়ুনিভর্সিতী শারি। মহাক্না মনিপুরদা নেস্নেল ফোরেন্সিক সাইন্স য়ুনিভর্সিতীদা এফিলিএৎ তৌবা কোলেজ হাংদোক্নবা ৱাফম হৌদোকখি মরমদি নোর্থ-ইস্তকী মরক্তা লম অসোমদসু মাংদা চখৎপা ঙম্নবনি।

*****

 



(Release ID: 1684009) Visitor Counter : 7