সাইন্স অমসুং তেক্নোলোজী মন্ত্রালয়
আই.আই.এস.এফ ২০২০দা গ্লোবেল ইন্দিয়ান সাইন্তিস্তস এন্ত তেক্নোগ্রেতস(জি আই এস তি)মীফম হৌখ্রে
লৈবাক অমতনা মালেমগী পাম্বৈশিং মথন্থা পুথোকপা ঙম্লোই; মরুওইনা সাইন্স অমসুং তেক্নোলোজিগী হিরমশিংদা মতেং পাংন্দুনা অসিগুম্বা অৱাবশিং কোকহনবা ঙমগনি: দোক্তর হর্স ভর্ধন
ঐখোয়গী লৈবাক খক খুদোংচাবা ফংনবা নত্তনা মালেমগী ওইনা য়াইফনবা মপান লৈবাকশিংদা লৈরিবা ভারতকী সাইন্তিস্তশিংগা থবক তৌমিন্নবগী খুদোংচাবা কয়া মরাংকাইনা লৈরি: দোক্তর হর্স ভর্ধন
Posted On:
23 DEC 2020 5:54PM by PIB Imphal
আই.আই.এস.এফ ২০২০
![](https://static.pib.gov.in/WriteReadData/userfiles/image/image003O3IS.jpg)
ইন্দিয়া ইন্তরনেসনেল সাইন্স ফেস্তিবেল-২০২০গী শরুক অমা ওইনা পাংথোকপা গ্লোবেল ইন্দিয়ান সাইন্তিস্তস এন্ত তেক্নোগ্রেতস(জি আই এস তি)মীফম সাইন্স অমসুং তেক্নোলোজি, ই.এস অমসুং হেল্থ অমসুং ফেমিলি ৱেলফিয়ারগী য়ুনিয়ন মিনিস্তর দোক্তর হর্স ভর্ধন্না হৌদোকখ্রে। থৌরম অদুদা মিনিস্তরনা হায়খি মালেমগী মফম শীনবা থুংনা লৈরিবা সাইন্স অমসুং তেক্নোলোজিগী থবক তৌরিবা মশিং য়াম্লবা ভারতমচা কয়ানা মখোয়না লৈরিবা লৈবাকশিংগী চাউখৎনবা মতেং পাংবা খক নত্তনা, চুনবা থবকশিংদা ভারতকী চাউখৎপগী খোঙজেল য়াংখৎনবা মখোয়গী লৌশিং অমসুং হৈশিংনবা শরুক য়ানবা খৌরাংনা ঙাইরি। ঐখোয়গী লৈবাক খক খুদোংচাবা ফংনবা নত্তনা মালেমগী ওইনা য়াইফনবা মপান লৈবাকশিংদা লৈরিবা ভারতমচা সাইন্তিস্তশিংগা থবক তৌমিন্নবগী খুদোংচাবা কয়া মরাংকাইনা লৈরি।
![](https://static.pib.gov.in/WriteReadData/userfiles/image/image004H3WZ.jpg)
![](http://164.100.117.97/WriteReadData/userfiles/image/image005381P.jpg)
মিনিস্তরনা হায়খি মীফম অসিনা খুঙ্গং চাউখৎহন্নবা সাইন্স অমসুং তেক্নোলোজিগী খুৎলায়শিং মপুংফানা শীজিন্ননবা তুংকোইনা চৎনগদবা মরী শেমগৎপা ঙম্লগনি। লৈবাক অমা চাউখৎহনবদা সাইন্স অমসুং তেক্নোলোজি অসি থাউ অমনি হায়বা অমসুং লৈবাকশিং চাউখৎহনবা অমসুং মীওইবা খুন্নাইগী য়াইফনবা মরুওইবা মচাকশিংনি হায়বা ঐখোয় পুম্নমক্না খঙনরে। সাইন্সনা পুথোকপা তেক্নোলোজিশিংনা মাইকৈ খুদিংমক্তা চাউখৎহনবা ঙম্লে অমসুং মরুওইনা মীওইবগী তৌবা ঙম্বা হেনগৎহল্লে।
দোক্তর হর্স ভর্ধন্না হায়খি অইং-অশাগী খল কাইরকপা, চীঞ্জাক ফংদবা, লায়রবা কোকহনবা য়াওনা হৌজিক মালেম অসিনা মায়োক্নরিবা খুদোংচাদবশিং অসি সাইন্স অমসুং তেক্নোলোজিগী পাম্বৈ খক্তনা কোকহনবা ঙমগনি। লৈবাক অমতনা অসিগুম্বা মাইপাকপশিং নাইতোম ওইনা পুথোকপা ঙম্লোই; মরুওইনা সাইন্স অমসুং তেক্নোলোজিগী হিরমশিংদা মতেং পাংন্দুনা অসিগুম্বা অৱাবশিং কোকহনবা ঙমগনি।
মিনিস্তরনা হায়খি তোঙান-তোঙানবা সাইন্তিফিক দিপার্তমেন্তশিং/মিনিস্ত্রিশিং/কাউন্সিলশিংনা পুন্না শীন্দুনা মপান লৈবাকশিংদা লৈরিবা সাইন্স অমসুং তেক্নোলোজিগী লমদা থবক তৌরিবা ভারতমচাশিংগা শম্নবা হেনগৎহন্নবা সরকারনা পায়খৎপা থবকশিংগী শরুক অমা ওইনা ভাইসবিক ভারতীয়া বৈগ্যানিক(বাইভাব) মীফম পাংথোক্তুনা মখোয়না তোঙান-তোঙানবা হিরমশিং অমসুং মরুওইবা হিরমশিংদা থৱায় য়াওনা ৱাফম কয়া ফোঙদোকখি। মপান লৈবাকশিংদা লৈরিবা ভারতমচাশিংগা উন্নবা সি.এস.আই.আরনা পায়খৎপা অতোপ্পা থবক অমগী মখাদা “প্রভাসি ভারতীয়া একাদেমিক এন্দ সাইন্তিফিক সমপার্ক(প্রাভাস)” কৌবা নেসনেল দিজিতেল প্লেতফোর্ম অমা শেমগৎলে।
কোবিদ-১৯ লাকশিন্নবা সাইন্তিস্তশিংনা লৌরিবা অখন্নবা থৌদাংশিংগী মতাংদা মিনিস্তরনা হায়খি কোবিদ মতুংগী মালেমদা মতেং পাংনবগী ৱাখল্লোন মখা তানা লৈহনগদবনি অমসুং ভারতকী সাইন্তিস্তশিংনা মপান লৈবাকশিংদা লৈরিবা ভারতমচাশিংগা পুন্না থবক তৌমিন্নদুনা অইং-অশাগী খল কাইরকপা য়াওনা মালেমগী অৱাবশিং কোকহন্নবা মরুওইবা থৌদাং অমা লৌগদবনি অমসুং ভারত অমসুং মালেমগী তুংকোইনা চৎনগদবা চাউখৎ-থৌরাংগী থবকশিংদা মতেং পাংগদবনি। ভারতকী খুঙ্গংদা কান্নবা ফংনবা খুন্নাইগী অৱাবশিং কোকহন্নবা রিছর্স অমসুং একাদেমিক ইন্সতিতুৎশিং পুন্দুনা মরুওইবা থবক পায়খৎকদবনি।
মীফম অদুদা থবক ফংবা হেনগৎনবা লাইরিক তম্বা অমসুং স্কিল ত্রেনিং পীবদা অৱাংবা থাক্কী তেক্নোলোজিশিং শীজিন্নবগী মতাংদা খন্নবদা দোক্তর হর্স ভর্ধন্না অপেনবা ফোঙদোকখি। মসি মরুওইবা অমনি অমসুং মপান্দা লৈরিবা ভারতমচাশিংনা য়াম্না চাউনবা মতেং পাংবা য়াবা হিরম অমনি হায়না মহাক্না হায়খি।
তোঙান-তোঙানবা খুদোংচাদবশিং কোকহন্নবা পাম্বৈশিং পুথোক্নবা মপান্দা লৈরিবা ভারতমচাশিংগা উন্দুনা মখোয়গী লৌশিং অমসুং হৈশিংবা শীজিন্ননবা ভারতনা খুদোংচাবা লৌগদবনি অমসুং য়াম্না লাইনা মালেমগী লৈবাকশিংগা মতেং পাংন্নবা ভর্চুএল প্লেফোর্ম শেম্লে হায়না থৌরম অদুদা বিগ্যান ভারতীগী প্রসিদেন্ত দোক্তর বিজয় বাতকরনা ফোঙদোকখি।
জি.আই.এস.তি মীফম অসিদা য়ু.এস.এ, য়ু.কে, ক্বাতর, অঙ্গোলা, এঙ্গুইলা, অস্ত্রেলিয়া, সুইজরলেন্দ য়াওনা লৈবাক কয়াগী মীওইশিং শরুক য়াখি। মীফম অদুদা লৌউ-শিংউ, ঈশিং, এ.আই শীজিন্নবা, হকশেল, ইজুকেসন, স্কিল দিবলপমেন্ত য়াওনা হিরম কয়াদা খন্নখি। মপান লৈবাকশিংদা লৈবা ভারতমচাশিং অমসুং ভারতকী সাইন্তিস্তশিংনা মখোয়গী ওইবা ৱাফমশিং পুথোক্তুনা খন্নখি অমসুং থবক ওইনা পাংথোক্নবা ৱারেপশিং লৌখি।
![](https://static.pib.gov.in/WriteReadData/userfiles/image/image006DJZE.jpg)
*****
(Release ID: 1683265)
Visitor Counter : 143