য়ুনিয়ন তেরিতোরি জম্মু অমসুং কাস্মিরগী গন্দরবাল অমসুং শ্রীনগর জিলাশিংগী য়ুমথোঙ খুদিং তোতি ঈশিং শম্লে অমসুং ইমুং খুদিং মখোয়গী য়ুমদা থক্নবা তোতি ঈশিং ফংলে। ২০২২ ফাওবগী মনুংদা জে অমসুং কেগী খুঙ্গংগী য়ুমথোঙ চাদা ১০০ তোতি ঈশিং ফংহন্নবা য়ুনিয়ন তেরিতোরি অসিনা থৌরাং তৌরি। লম্মিৎ-তুমিৎকী খুদোংচাদবা মফমশিংদা লৈবা খুঙ্গংশিংদা দরকার ওইবশিং ফংহন্নবা পায়খৎলিবা থবকশিং অসিনা মীয়ামগী য়াইফনবা সরকার থবক কয়া য়াম্না পায়খৎপগে হায়বা তাক্লে। জে অমসুং কেগী খুঙ্গংগী য়ুমথোঙ লাখ ১৮.১৭গী মনুংদা য়ুমথোঙ লাখ ৮.৬৬(চাদা ৪৮) তোতি ঈশিং ফংলে। ২০২০-২১গী মনুংদা য়ুমথোঙ লাখ ২.৩২ তোতি ঈশিং ফংহন্নবা জম্মু অমসুং কাস্মিরনা থৌরাং তৌরি।

২০২৪ ফাওবগী মনুংদা লৈবাক অসিগী খুঙ্গংগী য়ুমথোঙ খুদিংমক তোতি ঈশিং ফংহন্নবা পান্দমদা রাজ্যশিংগা খুৎশম্নদুনা কেন্দ্র সরকারনা জল জিবন মিসন পায়খৎলি। মিসন অসিগী পান্দমদি খুঙ্গং খুদিংগী য়ুমথোঙ খুদিং শীজিন্নবা য়াবা তোতি শম্বা অমসুং ইমুং অমতা চিৎথরমদবা অসিনি। মনুং হুঞ্জিনবা মফমশিং, চাউখৎত্রিবা জিলাশিং, ঙমখৈ ময়াদা লৈবা খুঙ্গংশিংদা তঙাইফদনা চঙদ্রবা য়াদ্রবশিং ফংহন্নবা কেন্দ্র সরকারগী পান্দমগা লোয়ন্না মিসন অসিনা খুঙ্গংগী য়ুমথোঙ খুদিংদা অফবা থক্নবা ঈশিং ফংহন্নবা পান্দম থম্লি।

দরকারগী মতুংইন্না পায়খৎপা থবক অসিগী থৱায়দি মীয়াম্না শরুক য়াবা অসিনি। থবক অসিদা খুঙ্গংদা ঈশিং পীনবা স্কিমগী থৌরাং তৌবা অমসুং মদু থবক ওইনা পাংথোকপা অমসুং মখা তানা শেন্নবগী থবকশিং মীয়ামদা পাংথোকহন্নবা মিৎয়েং চঙলি। খুঙ্গং খুদিংমক য়ুনিত অমা ওইনা লৌরে অমসুং মীয়াম শরুক য়াদুনা খুঙ্গং অমগী চহি ৫গী ওইনা ভিলেজ এক্সন প্লান(ভি এ পি) শেম্লে অমসুং মফম অমগী ঈশিং ফংফমশিং শেমগৎপা, তোতি ঈশিং ফংহন্নবা দরকার ওইবা মচাকশিং ফংহনবা, ঈশিং লুহনবা, ঈশিং পীনবা লৈরিবা সিস্তেমশিং শেন্নবা য়াওনা অতৈ মরুওইবা থবকশিং খুঙ্গংগী মীয়াম্না পাংথোক্কনি। জে অমসুং কেগী খুঙ্গং ৬,৮৭৭গী ভিলেজ এক্সন প্লানশিং লৈরে।

জল জিবন মিসন অসি মীয়ামগী খোঙজং অমা ওইহন্নবা মীয়াম শরুক য়াদুনা খুঙ্গংশিংদা আই.ই.সি কেম্পেন পাংথোক্লে। ঈশিং চাংয়েং তৌনবা লেব ৯৮ লৈবগী মনুংদা, চৎলিবা চহি অসিদা লেব ২০ এন.এ.বি.এল এক্রিদিতেসন ফংনবা য়ু.তি অসিনা থৌরাং তৌরি। ঈশিং কয়া য়াম্না ফরিবগে হায়বা খঙদোক্নবা মীয়ামদা ফিল্দ তেস্তিং কিৎশিং পীরগনি।

মিসন অসি ২০১৯গী দিশেম্বর ২৫দগী চপ চানা থবক হৌখি, কোবিদ-১৯ লাইচৎ অমসুং লোকদাউন লৈরবসু, লৈবাক অসিগী য়ুমথোঙ করোর ২.৮০ তোতি ঈশিং ফংহল্লে। মসিগী মনুংদা খুঙ্গংগী য়ুমথোঙ করোর ৬.০৩(চাদা ৩২) হৌজিক মখোয়গী য়ুমশিং তোতি ঈশিং ফংলে। চহি খুদিংগী, য়ুমথোঙ করোর ৩ হেন্না তোতি ঈশিং ফংহনগনি। মসিগী খোঙজেল অমসুং পাক-চাউবা অসিদা জল জিবন মিসন পায়খৎলি।

হৌজিক ফাওবদা, গৱা, জে অমসুং কেগী জিলা ১৮, হিমাচল প্রদেসকী লাহুল অমসুং স্পিতি অমসুং ব্লোক ৪২৩, গ্রাম পঞ্চায়ত লিশিং ৩৩ অমসুং খুঙ্গং লিশিং ৬০গী য়ুমথোঙ চাদা ১০০ তোতি ঈশিং ফংলে। মী খুদিংমক কোনশিনবা চাউখৎপা অমসুং কনাগুম্বা অমতা চিৎথদবা হায়বা পান্দম অদু থবক ওইনা পাংথোকপা অদু মসিনা উৎলে।

*****