৫সুবা ইন্দিয়া ৱাতর ইম্পেক্ত সমিৎ লোইশিনবা থৌরমদা জল শক্তি মিনিস্তর, গজেন্দ্রা সিংহ সেখাৱাতনা হায়খি কোবিদ-১৯ লাইচৎ থেংন্নবা মালেম অসিনা অমতা ওইনা পুনবগুম ঈশিং ফংদবগী অৱাবশিং কোকহন্নবা মালেম অসি পুন্না থবক তৌমিন্নবা দরকার ওইরে। ঙসি মীফম অসিগী অরোইবা নুমিৎতা “তুরেল কনবা, চৎথোক-চৎশিন তৌবা অমসুং ইচাউ থেংনবা” হায়বা হিরম অসিদা খন্নখি। মীফম অসি “ভাইচারিকুম্ভ”গা চাংদম্নদুনা মিনিস্তরনা হায়খি ঈশিংগা মরী লৈনবা থবকশিংদা ভারত অমসুং মপানগী লৈবাক কয়াগী মরক্তা মতেং পীন্নবা হেনগৎহন্নবা মীফম অসিদা ইনভেস্তরশিং অমসুং মরী লৈনবশিং ৱা খন্নরে। লৈবাক অসিগী অমসুং মপান লৈবাকশিংগী থবক কয়াদগী ঐখোয়না তম্বা য়াবশিং তম্লে অমসুং মদুদগী ফংলকপশিং অদু থবক ওইনা পায়খৎনবা হোৎনবা অসি ঐখোয়গী পান্দমনি। মহৈলোয়শঙশিং অমসুং সেল্ফ হেল্প ওর্গনাইজেসনশিংনা মতেং পাংদুনা মমাঙদা অমুক্তা ওইখিদ্রিবা রাজনিতিগী অচেৎপা ফিরেপ লৈরে।

Photo

শ্রী সেখাৱাতনা হায়খি মালেমগী মফম অয়াম্বদা ঐখোয়না লৈনুংগী ঈশিং শীজিন্নরি। লৈনুংগী ঈশিংগী মখা পোন্দনবা ঐখোয়না হোৎনরি। ৱার্ল্দ বেঙ্কগা লোয়ন্না লৈনুংগী ঈশিং কন্নবা অমসুং ঈশিং ফংবা মফমশিং অমুক হন্না ঈশিং লৈহন্নবা অমসুং মেপ য়েক্নবা অতল ভুজাল য়োজনা কৌবা থৌরাং অমা ঐখোয়না পায়খৎলি। য়োজনা অসিগী পান্দমদি লৈনুংগী ঈশিং ফজনা শীজিন্ননবা অমসুং রাজ্য ৭দা তুংকোইনা মীয়াম্না লৈনুংগী ঈশিং শীজিন্নবগী লমচৎ-শাজত্তা অহোঙবা পুরক্নবা থবক পায়খৎপনি। য়োজনা অসিনা পঞ্চায়ত্তা য়ুম্ফম ওইদুনা লৈনুংগী ঈশিং শীজিন্নবগী থবক পুক্নিং থৌগৎকনি অমসুং ঈশিং য়াম্না দরকার ওইবা মফমশিংদা লৈবা মীয়ামদা ৱাখল তাহনগনি। মীফম অদুদা জল শক্তি মিনিস্ত্রিগী রাজ্য মন্ত্রী শ্রী রতন লাল কাতারিয়াসু শরুক য়াখি।

নমামি গঙ্গে মিসন্না পায়খৎলিবা থবকশিং থাগৎলদুনা হাওসিং অমসুং অর্বান এফেয়ার্সকী মিনিস্তর শ্রী হরদিপ সিংহ পুরিনা হায়খি ‘সহরগী তুরেল য়েংশিন্নবা থৌরাং’ কৌবা গঙ্গা তুরেল মপান্দা লৈবা সহরশিংগী তুরেলগী শরুক য়েংশিন্নবা অহানবা মরুওইবা ঙাকলৌ অমা এন.এম.সি.জি অমসুং নেসনেল ইন্সতিতুৎ ওফ অর্বান এফেয়ার্সনা পুথোক্লে। তুরেলদা মরুওইবা মিৎয়েং থম্বা ঙাকলৌ অসিনা সহরশিংনা মখোয়গী লম ফাওদুনা চেল্লিবা তুরেলশিং শেন্নবগী থবকশিংগী থৌরাং অমসুং দিজাইন্দা মতেং পাংগনি।

নিতি অয়োগকী ভাইস-চিয়রমেন শ্রী রজিব কুমারনা হায়খি হৌজিক অমোৎপা থাদরগা তুংদা অমুক শেংদোকপগী চৎনবগী অসি হোংদোক্কদবনি। মীফম অসিদা খন্নরিবা হিরমশিং মখল য়াম্মী। অকোয়গী ফিবম শোকহন্দনা কমদৌনা চাউখৎ-থৌরাংগী থবকশিং পায়খৎকনি অমসুং অফবা ফলশিং ফংনবা থবক অসিদা কমদৌনা মীয়াম শরুক য়াহনগনি হায়বগী মতাংদা মহাক্না শন্দোক্না তাকখি।

অৱাংলোমদা নেপালদগী চেল্লকপা তুরেলশিং অমসুং খা মাইকৈদগী ভারতকী অতোপ্পা রাজ্যশিংদগী চঙলকপা তুরেলশিংগী মতাংদা বিহারনা থেংনরিবা অৱাবশিং মীয়ামদা থমলদুনা বিহার সরকারগী ৱাতর রিছোর্স দিপার্তমেন্তগী মিনিস্তর শ্রী বিজয় কুমার চৌধুরিনা হায়খি রাজ্য অসিগী লম্মিৎ-তুমিৎনা মরম ওইদুনা ঈশিং ইচাউ থেংন্নবা থৌরাং তৌবা অসি বিহারগী ওইনা য়াম্না মরুওইবা হীরম অমনি। রাজ্য অসিগী ঈশিং ফংবা মফমশিং কন্নবা অমসুং অমোৎপা ঈশিং শেংদোক্নবা বিহারনা অকনবা থবক পায়খৎলি। বিহারদা ঈশিং ইচাউ থিংনবা সিগঙ্গা অমসুং এন.এম.সি.জিনা অখন্নবা মিৎয়েং চঙগদবনি।

জল শক্তি মিনিস্ত্রিগী সেক্রেতরি শ্রী য়ু.পি সিংহনা হায়খি হৌখিবা চহি ৫ অসিদা মিসন অসিনা গঙ্গা তুরেল শেংদোক্নবা অমসুং হিঙ্গৎনবা থবক পায়খৎতুনা লাক্লি। হৌজিক মিসন অসিনা পোল্লুসন ঙাকথোকপা খক নত্তনা ই-ফ্লো, বাইওদাইভর্সিতি, মীয়াম শরুক য়াহনবা অমসুং অপীকপা তুরেলশিং হিঙ্গৎহন্নবা থবকশিংসু খন্নরে।

লৈবাক অসিদা ঈশিংগী অৱাৎপা লৈহন্দনবা অমসুং ঈশিং ফংবা মফমশিং অমুক হন্না শেমগৎনবা পান্দমদা এন.এম.সি.জি অমসুং সেন্তর ফোর গঙ্গা রিভর বেসিন মেনেজমেন্ত অমসুং স্তদিজনা ৫সুবা ইন্দিয়া ৱাতর সমিৎ পাংথোকপনি। মীফম অদুদা এন.এম.সি.জিগী দিরেক্তর জেনেরেল, রজিব রঞ্জন মিশ্রা, এন.এম.সি.জিগী ইজুকিউতিপ দিরেক্তর রোজি অগরৱাল, আই.আই.তি কানপুরগী প্রোফেসার অমসুং সিগঙ্গাগী ফাউন্দর প্রোফেসার বিনোদ তারে শরুক য়াখি।

মীফম অদুদা মালেম শীনবা থুংনা অখঙ-অহৈশিং, ঈশিং অমসুং অকোয়বগী ফিবমগী অখঙ-অহৈশিং য়াওনা মীওই ৩০০০ হেন্না শরুক য়াখি। মীফমগী অরোইবা নুমিৎতা সিগঙ্গনা পুথোকপা রিপোর্ত অহুম ফোঙখি। হন্দক এন.এম.সি.জিনা নুমিৎ হুম্নি পাংথোকখিবা গঙ্গা উৎসব ২০২০গী  অকুপ্পা পাউদম অমসু ফোঙখি।

*****