ভারত সরকারগী সেক্রেতরী (পাৱর), শ্রী সঞ্জীব নন্দন সাহাইনা অরুনাচল প্রদেশকী চাংলাং দিস্ত্রীক্তা ২০২০গী দিসেম্বর ৩দা চৎখ্রে। খোঙচৎ অসিগী মনুংদা সেক্রেতরী (পাৱর)না জোইন্ত সেক্রেতরী (হায়দ্রো) শ্রী তান্মাই কুমার, এন.ঐচ.পি.সি.গী সি.এম.দি. শ্রী এ.কে. সিংহ, অমসুং পি.জি.সি.আই.এল.গী সি.এম.দি. শ্রী শ্রীকান্তগা লোয়নখি।

মহাক্না চাংলাং হেলিপেদ য়ৌরকপদা সেক্রেরী (পাৱর)বু অরুনাচল প্রদেশ লেজিসলেতিব এসেম্লীগী দিপুতি স্পীকর শ্রী তেসম পোংতে অমসুং চাংলাং (খা), এম.এল.এ. শ্রী ফোশুম খীমহুম লোয়ননা চাংলাং দিস্ত্রীক্তকী দিপুতী কম্মিস্নর (আই./সি), সুপরিন্ততেন্দেন্ত ওফ পুলিস অমসুং এন.ঐচ.পি.সি অমসুং পি.জি.সি.আই.এল.গী মকোক থোংবা ওফিসরশিংগা লোয়ননা হরাও তয়াম্না ওকখি।

সেক্রেতরী (পাৱর)বু চাংলাংগী, সর্কুইত হাউস্তা মফম অদুগী মীওইশিংনা নাৎকী ওইবা চৎনবীগা লোয়ননা হরাও তয়াম্না ওকখি। নিংশিংবা য়াই মদুদি হৌজিক লাক্লিবা ভারত সরকারগী সেক্রেতরী (পাৱর) অসি ১৯৯১-৯৪গী মনুংদা চাংলাংগী মীয়ামগীদমক দিপুতী কম্মিস্নর ওইনা থৌ পুরম্মী। মফম অসিগী মীওইশিংনা চাংলাংদা শ্রী সঞ্জীব নন্দন সাহাইনা পায়খৎলম্বা মশক নাইরবা চাওখৎ থৌরাংগী থবকশিং নিংশিংবা ফোংদোকরক্লি।    

সেক্রেতরী (পাৱর)না  মিনি অমসুং মাইক্রো-হায়দ্রো প্রোজেক্তশিংগী চাওখৎ থৌরাংশিংগীদমক অমুক হন্না য়েংবা মিতিং পাংথোকখি। মিতিং অসি চাংলাং (খা),গী ইকাই খুম্নরবা এম.এল.এ. শ্রী ফোশুম খীমহুম্না চেয়র লৌখি অমসুং অরুনাচল প্রদেশ হায়দ্রো পাৱর দিপার্তমেন্তনা দিস্ত্রীক্ত অসিদা মিনি অমসুং মাইক্রো-হায়দ্রো প্রোজেক্তশিংগী ওইরিবা ইশুশিং শম্লপ্না হায়খি। পি.জি.সি.আই.এল.না ত্রান্সমিসন লাইন শেমগৎপদা থেংনরিবা অৱাবশিং অসিগী মতাংদা শাংনা খন্নখি অমসুং সেক্রেতরী (পাৱর)না লাক্লিবা অসিনা মিনিস্ত্রীদগী পাংবা য়াবা মতেং পীগনি হায়না থাজবা পীখি।     

******