ভারত্তা পে্ত্রোলিয়ম থাউ চোইনা য়োনবদা অহোঙবা অমা পুরক্কদবা খোঙথাং অমদা, ঙসি লৈবাক অসিদা ইন্দিয়ান ওইলনা মালেম থাক্কী অফবা মখলগী পেত্রোল(ওকতেন ১০০)য়োনবা হৌদোক্লে। এক্সপি ১০০ হায়না মমিং থোনবা অফবা মখলগী পেত্রোল অসি পেত্রোলিয়ম অমসুং নেচরেল গ্যাস অমসুং স্তিলগী মিনিস্তর শ্রী ধরমেন্দ্র প্রধান্না সহর ১০ শীনবা থুংনা হৌদোকখ্রে। ভর্চুএল ওইনা পাংথোকপা থৌরম অদুদা পেত্রোলিয়ম অমসুং নেচরেল গ্যাস মিনিস্ত্রিগী সেক্রেতরি শ্রী তারুন কাপুর, ইন্দিয়ান ওইলগী চিয়রমেন শ্রী শ্রীকান্ত মাধব অমসুং মিনিস্ত্রি অমসুং ইন্দিয়ান ওইলগী অতোপ্পা সেনিয়র ওফিসিএলশিং শরুক য়াখি।

থৌরম অদুদা শ্রী প্রধান্না হায়খি ভারতকী অহানবা ওকতেন ১০০ পেত্রোলগী তেক্নোলোজি অসি লৈবাক অসিদা ইন্দিয়ান ওইল রিছর্স অমসুং দিবলপমেন্তনা পুথোকপনি অমসুং মসি চাউথোকচনিং ওইবা অমনি। ঐখোয়গী প্রধান মন্ত্রীগী ইনর্জিগী পান্দমগা লোয়ন্না ইনর্জিগী লমদা সরকারনা থৱায় য়াওনা পায়খৎলিবা অত্মানির্ভর ভারত থবক্কী মাইকৈদা থাংলকপা অতোপ্পা খোঙথাং অমনি। এক্সপি ১০০ শীজিন্নবা হৌবা অসিনা অসিগুম্বা অফবা মখলগী থাউ ফংবা চাউখৎলবা লৈবাকশিংগী কাংলুপ অমদা ভারত য়াওরে। তেক্নোলোজি পুথোকপা অমসুং শীজিন্নবদা ইন্দিয়ান ওইল অসি লুচিংবা অমনি। ভারতকী পি.এস.য়ুশিংগী মরক্তা চাংদম্নবা অসিনা লৈবাক অসি অমসুং ভারতকী মীয়াম কান্নবা ফংহল্লে। চহি অসিগী এপ্রিল থাদগী ভারতনা বি.এস-৬ কাংলুপগী থাউ শীজিন্নবা হৌখ্রে অমসুং মসিগী তেক্নোলোজি অসিগীদমক লুপা করোর ৩০,০০০ হেন্না থাদখ্রে। এক্সপি ১০০ হৌদোকপা অসিনা লৈবাক অসিগী মীয়াম হিংবদা লাইহন্নবা সরকারনা থবক ওইনা পাংথোক্লে হায়বা অদু উৎলে।    

তাঙ্ক অনি থোক্না লৈবাক অসিগী সহর ১৫দা ইন্দিয়ান ওইলনা অফবা মখলগী পেত্রোল এক্সপি ১০০ ফংহল্লগনি। অহানবা তাঙ্কক্তা ২০২০গী দিসেম্বর ১দগী দিল্লি, গুরগাউন, নোইদা, অগ্রা, জয়পুর, চন্দিগর, লুধিয়ানা, মুম্বাই, পুনে অমসুং অহমেদাবাত্তা ফংহনখ্রে। অনিশুবা তাঙ্কক্তা ওক্তেন ১০০ পেত্রোল অসি চেন্নাই, বেঙ্গালুরু, হায়দ্রবাদ, কোচি অমসুং কোলকাতাদা ফংহনগনি। হায়রিবা সহরশিং অসিদা ফংলিবা অফবা মখলগী কারশিং অমসুং বাইকশিংগী দিল্লরশিং অমসুং সহরশিং অসিদা লৈরিবা মীওইগী শেন-থুমগী ফিবম য়েংলগা সহরশিং খনগৎপনি।

খ্বাইদগী নৌবা তেক্নোলোজি য়াওরবা অফবা মখলগী অতাংবা গারিশিং ওকতেন ১০০ পেত্রোলগী কান্নবা মপুংফানা লৌনবা থৌরাং তৌখ্রবনি। মালেম পুম্নমক্কী ওইনা মমল য়াম্বা গারিশিংগীদমক ওকতেন ১০০ পেত্রোল য়াম্না পাম্না শীজিন্নরি অমসুং জর্মনি অমসুং য়ু.এস.এ য়াওনা শুপ্নগী লৈবাক ৬ খক্তদা ফংলি।

*****