ঙসি হকশেল অমসুং য়াইফ-য়ুম্বালগী কেন্দ্র মন্ত্রী দোক্তর হর্স ভর্ধন্না ইন্দিয়ান ইন্সতিতুৎ ওফ মাস কম্মুনিকেসন(আই আই এম সি)গী মহৈরোয়শিংদা দিজিতেল ওইনা ৱা ঙাংখ্রে।

অহানবদা দোক্তর হর্স ভর্ধন্না মহৈরোয়শিং তরাম্না ওকখি অমসুং হৌগৎলক্লিবা পাউমীশিংগা ৱারি শান্নবা মহাক চেবাউ পীরকপদা মহাক্না থাগৎখি। দোক্তর ভর্ধন্না হায়খি, “মেদিয়ানা গনতন্ত্রগী মরিসুবা য়ুম্বী ওইনা মীয়ামগী ৱাখল্লোন শেমগৎপদা য়াম্না মরুওইবা থৌদাং লৌরি। মরম অদুনা মীয়ামদা কান্নবা কয়া ফংহনবদা পাউমীশিংগী য়াম্না চাউরবা থৌদাং অমা লৈরি”।

হৌখিবা থা ১১ অসিদা লাইচৎনা মরম ওইদুনা অৱাবা তারিঙৈদা পাউমীশিংনা হোৎনখিবশিং থাগৎলদুনা দোক্তর হর্স ভর্ধন্না হায়খি, মীয়ামদা ই-পাউ পীনবা পাউমীশিং অহিং-নুংথিল চুপ্পা থবক মথৌ পাংথোকখি। ২০২০গী জনুৱারিদগী হৌখিবা কোবিদ লান অসি হৌজিক থা ১১সুরে। হায়রিবা লান মনুং অসিদা মেদিয়ানা য়াম্না কন্না মতেং পাংখি। মীয়ামদা ই-পাউ পীনবা হোৎনবদা মখোয়গী থৱায় কৎখ্রবা পাউমীশিংগী মফমদা মহাক্না ইকায়খুম্নবা উৎখি। মহাক্না হায়খি ঐগী কোরোনা লান্মীশিংগী মমিং পরেংদা পাউমীশিংসু য়াওরি।

পোলিওমিলাইতিস থেংন্নবা হোৎনবদা পাউমীশিংনা মতেং পাংখিবা নিংশিংলদুনা মহাক্না হায়খি ঐখোয়না পোলিওগী মথক্তা চৎথরিবা লান অসিদা হেল্থ জর্নেলিজম্না থৱায়নি। ভারত্তা পোলিওনা শোকহল্লবা মীওইগী চাদা ৬০ লৈবা মতমদা, পোলিও লৈতবা ভারত অমা ওইহন্নবা মঙলান অসি য়াম্না থাপ্না লৈখি। মসি মাইপাক্লবা লৈবাক্কী থৌরম অমা ওইহনবদা পাউমীশিংনা মতেং পাংখি।

২০২৫ ফাওবগী মনুংদা তি.বি মুৎথৎনবা হৌগৎলক্লিবা পাউমীশিংগী মতেং নিরদুনা য়ুনিয়ন মিনিস্তরনা হায়খি তি.বি মুৎথৎনবা থবক অমসুং মসিগী মঙলান অসি মঙফাওন্নবা অদোম্না থৱায় অমসুং হকচাং য়াওনা হোৎন্নবা ঐনা হায়জরি। মীয়াম পাক-শান্না ৱাখল তাহনবদা পাউমীশিংনা থৱায় য়াওনা শরুক য়াবনা মতেং পাংগনি।

মহাক্না মখা তানা হায়খি মেদিয়ানা অরানবা পাউ শন্দোক্লোইদবনি। মখোয়না অচুম্বা পাউ ফংহনগনি হায়না মীয়াম্না মেদিয়াদা মখোয়গী থাজবা থম্লি। মীয়ামদা মরিক চুম্বা অমসুং অচুম্বা ই-পাউ ফংহনবা অসি পাউমী খুদিংমক্কী থৌদাংনি। মীয়ামদা অরানবা পাউ য়ৌহনবা অসি খুদোংথিনিংঙাই ওই অমসুং মসিনা অচৌবা অমাং-অতা থোকহনবা য়াই।

হেল্থ অমসুং সাইন্সকী লমদা হৌগৎলক্লিবা নহারোলশিং তম্নবা অফবা মফম অমা শেমগৎনবা ইন্সতিতুসন অমসুং অমসুং মিনিস্ত্রিগী মরক্তা মতেং পাংন্নবা থৌরম অমা পায়খৎনবা ৱাফম দোক্তর হর্স ভর্ধন্না হৌদোকখি।

থৌরম অদুদা আই.আই.এম.সিগী দিরেক্তর জেনেরেল, প্রোফেসার সঞ্জয় দ্বিবেদি, আই.আই.এম.সিগী এদিসনেল দিরেক্তর জেনেরেল(এদমিন) কে.সতিস নমবুদিরিপাদ, প্রোগ্রাম কনভেন্নর প্রোফেসার সুরভি দহিয়া অমসুং প্রোগ্রাম কো-কনভেন্নর প্রোফেসার(দোক্তর)প্রমোদ কুমার শরুক য়াখি।

*****