লেমজনিঙাই ওইরবা সাইন্স ফিল্ম ফেস্তিবেলগী ১০সুবা ইদিসন ভর্চুএল ওইনা হৌদোকখ্রে। সাইন্স পাক-শন্না পাম্নহন্নবা পান্দমদা ফেস্তিবেল অসি ভারত সরকারগী সাইন্স অমসুং তেক্নোলোজি দিপার্তমেন্তগী মখাদা লৈবা ওতোনোমস এজেন্সি অমা ওইরিবা বিগ্যান প্রাসারনা শীনবনি। তোঙান-তোঙানবা পান্দমশিংদা শীনফম অমা ওইনা ফিল্ম পুথোকপা মীওইশিং, লনাই ওইনা ফিল্ম পুথোকপা মীওইশিং অমসুং ফিল্ম নম্বা তম্লিবা মহৈরোয়শিংনা পুথোকপা সাইন্স ফিল্মশিং উৎনবগী অখন্নবা মফম অমা ফেস্তিবেল অসিনা পীরে।

নুমিৎ মরিনি চৎথগদবা ফিল্ম ফেস্তিবেল অদু লৈবাকপোকপা নুমিৎতা ত্রিপুরাগী দিপুতি চীফ মিনিস্তর জিষ্ণু দেব ভর্মন্না হৌদোকখি। মহাক্কী হৌদোকপগী ৱারোলদা জিষ্ণু দেব ভর্মন্না হায়খি ফিল্মশিং অসি ই-পাউ ফাওনবগী খ্বাইদগী পাম্নবা পাম্বৈ অমা ওইবনা, মীয়ামগা ফিল্মশিংগা হকথেংননা শম্নবা মরম্না মপুংফানা সাইন্স পাম্নবা হেনগৎহনবদা মতেং পাংগনি। সাইন্স অসি কলাগা তোৎশিন্নরে অমসুং ফিল্ম অসি মপুংফাবা মেদিয়ম অমা ওইরে। কলা মখল কয়া সাইন্সতা য়ুম্ফম ওইবা মরম্না ভারত্তা কলাদগী সাইন্স তোখায়না লৈবা য়ারোই। ভারতকী অৱাং-নোংপোক লমদম অমসুং মরুওইনা ত্রিপুরা অসি মশাগী ওইবা চৎনবীশিং অমসুং ইনাকখুল্লবা মহৌশা লাইরেম্বীগী পোৎথোকশিং মরাংকাইনা ফংবগী মমিং চৎলি। ফিল্মশিংগী খুৎথাংদা মীচম মীয়ামদা সাইন্স য়ৌহন্নবা পায়খৎলিবা থবক অসি থাগৎনিঙাইনি। মসিনা লমদম অসিগী মীয়ামদা সাইন্সকী ৱাখল্লোন লৈহনবদা মতেং পাংগনি।

নেসনেল সাইন্স ফিল্ম ফেস্তিবেল ২০২০ অসি বিগ্যান প্রাসার অমসুং ত্রিপুরা সরকারগী ত্রিপুরা স্তেৎ কাউন্সিল ওফ সাইন্স এন্দ তেক্নোলোজিনা পুন্না শীনবনি। চহি অসিগী ফেস্তিবেল অসিদা শরুক য়ানবা তোঙান-তোঙানবা লোলশিংগী অপুনবা ফিল্ম ৩৭২ পীশিল্লকখি।

মেম্বর ১০গী জুরিনা খনগৎলবা ফিল্ম ১১৫ ফেস্তিবেল মনুংদা উৎকনি। মখোয়গী মনুংদা হিন্দি, ইংলিস, উর্দু, মালায়ালাম, কাস্মিরি, বেঙ্গালি, মরাথি, পঞ্জাবী অমসুং তামিল লোনশিংগী ফিল্মশিং য়াওরি।পীশিল্লকখিবা ফিল্মশিংগী অদুগী থিমশিংগী মনুংদা সাইন্স অমসুং তেক্নোলোজি, অকোয়বগী ফিবম, লৌউ-শিংউ, রিনিউএবল ইনর্জি, ঈশিং শীজিন্নবা, হকশেল অমসুং হিদাক-লাংথকশিং অমসুং অনৌবা পুথোকপা তেক্নোলোজিশিং য়াওরি। ফিল্মশিং অদুগী মনুংদা দোকুমেন্তরিশিং, বাইওগ্রাফি, অতেন ফিল্মশিং, দোকু-দ্রামাশিং, সাইন্স ফিক্সন অমসুং এনিমেসন ফিল্মশিং য়াওরি। অকক্নবা কাংলুপ অমগী মখাদা চাংদম্ননবা হায়রিবা ফিল্মশিং অসি ইন্সতিতুৎশিং, শীনফম অমা ওইনা ফিল্ম পুথোকপা মীওইশিং, লনাই ওইনা ফিল্ম পুথোকপা মীওইশিং অমসুং ফিল্ম নম্বা তম্লিবা মহৈরোয়শিংনা পুথোকপনি। ফেস্তিবেল অসি অগরতালাদা ২০২০গী মার্চ ১৮-২২ ফাওবা পাংথোক্নবা থৌরাং তৌরম্বনি। থৌরম অসি লাইচৎ অসিনা মরম ওইদুনা য়ৈথোক্তুনা লাকপনি।

বিগ্যান প্রাসারগী দিরেক্তর দোক্তর নাকুল পরাসারনা হায়খি চহি ৩০গী মসিগী খোঙচৎ অসিদা তোঙান-তোঙানবা মেদিয়াগী খুৎথাংদা মীয়ামগা শম্ননবা বিগ্যান প্রাসারনা থবক কয়া পায়খৎখ্রে। সাইন্স ফিল্ম ফেস্তিবেল অসি খোঙচৎ অসিগী মরুওইবা শরুক অমনি। লাইচৎ অসিদগী ঙাকথোক্নবা মীওই খুদিংমক্না সাইন্সতা য়েংনরিবা মতম অসিদা মসিগী থৌরম অসি পাংথোক্লি। মথংগী ফিল্ম ফেস্তিবেলদি ভাবকশিং য়াওনা পাংথোক্কনি হায়না ঐনা থাজবা থম্লি।

নেসনেল সাইন্স ফিল্ম ফেস্তিবেল অসিদা সরকারনা পুথোকপা ফিল্মশিং লোয়ন্না লনাই ফিল্ম পুথোকপা মীওইশিং, মেদিয়া ইন্সতিতুৎশিং, কোলেজ, য়ুনিভর্সিতিশিং অমসুং স্কুলগী মহৈরোয়শিংনা পুথোকপা ফিল্মশিং থাজিল্লকখি। ফিল্মশিং উৎপগী মথক্তা, ভর্চুএল ওইনা পাংথোক্লিবা ফেস্তিবেল অসিদা ৱা খন্নবা অমসুং সাইন্স, মেদিয়া অমসুং ফিল্ম পুথোক্নবা তেক্নিকশিং য়াওনা হীরম কয়াদা খন্নবগী থৌরমসু য়াওরি। থৌরম অসিগী অরোইবা নুমিৎ নবেম্বর ২৭দা মনা পীগদবা খ্বাইদগী ফবা সাইন্স ফিল্মশিংগী মমিং লাউথোক্কনি।

ফেস্তিবেলগী কনভেনর নিমিস কাপুরনা হায়খি ফেস্তিবেল অসি পাংথোক্নবা ঐখোয়দা মতেং পাংবগীদমক ঐনা ত্রিপুরা স্তেৎ কাউন্সিল থাগৎলি। মখোয়না য়াম্না লাইনা ওনলাইন্দা য়েংবা ফংবদগী চহি অসিদা মীওই মশিং য়াম্না সাইন্স ফিল্মশিং অসি পাম্নগনি হায়না ঐনা থাজবা থম্লি। ফেস্তিবেল অসিনা সাইন্স ফিল্ম হেন্না পুথোক্নবা ফিল্ম পুথোক্লিবশিং হেন্না পুক্নিং থৌগৎকনি অমসুং ভারতকী মীয়ামদা সাইন্সকী ৱাখল্লোন হেন্না লৈহনগনি। ফেস্তিবেলগী ফিল্ম উৎকদবা মতম অমসুং মরুওইবা ই-পাউশিং বিগ্যান প্রাসারগী ৱেবসাইত্তগী ফংগনি।

*****