খাদী অমসুং ভিলেজ ইন্দস্ত্রিজ কমিসন (কে.ভি.আই.সি.)গী মায়কৈদগী বারানসীদা পাংথোকপা অখন্নবা খাদী এগজিবিসন্দা অফবা মখলগী খাদীগী পোৎথোকশিং পুথোকখ্রে মদুগী মনুংদা কশ্মীরগী অৱাংবা মফমগী খোইহি অমসুং উত্তরাখন্দগী শামতুগী ফি-রোল অমসুং মনা-মশিংগী হিদাক্কী মতাংদা শোন্নখ্রে। এগজিবিসন অসি ঙসি কে.ভি.আই.সি.গী চিয়রমেন শ্রী বিনয় কুমার সক্সেনানা হৌদোকখি। উত্তর প্রদেশ, জম্মু-কশ্মীর, নোংচুপ বেঙ্গল, উত্তরাখন্দ, বিহার, ঝারখন্দ, রাজস্থান অমসুং পঞ্জাবতগী লাকপা খুৎহৈবা কয়ানা স্তোল ৯০দগী হেন্না হাংলি। মসি কোবিদ-১৯গী মতুংদা পাংথোকপা কে.ভি.আই.সি.গী অনিশুবা এগজিবিসন্নি। এগজিবিসন অসি মথংগী নুমিৎ ১৫ (নবেম্বর ২২ – দিসেম্বর ৭) ফাওবা চৎথগনি। চহি অসিগী ওক্তোবরদা লখনৌদা লোকদাউন মতুংদা অহানবা খাদীগী এগজিবিসন পাংথোকখি।

এগজিবিসন অসিদা খাদীগী ইন্সতিত্যুৎ কয়ামরুমনা অমসুং জম্মু-কশ্মীরগী পি.এম.ই.জি.পি. য়ুনিৎশিংনা শরুক য়ারি। কশ্মীরগী অৱাংবা চিংগী মফমদগী পুরকপা খোইহি, শামতুগী ফী-রোল অমসুং শালনা পুম্নমক্কী পু্ক্নীং চিংশিল্লি। বারানসীদা অসিগুমবা মখলগী খোইহি তাংনা ফংই। মসিদা নত্তনা উত্তরাখন্দগী পুরকপা পোৎথোকশিংনসু পুক্নীং চিংশিল্লি। মসিগী মগুন ৱাংবা অমসুং মহাওনা মরম ওইদুনা খোইহি অসি লৈবাক অপুনবদা য়াম্না পাম্নৈ। হয়িংখোই য়োকপশিংদা প্রধান মন্ত্রীনসু মালেম্না য়াম্না পাম্নবা অৱাংবা মফমদগী পুথোকপা খোইহিগী পোৎথোকশিং হেনগৎহন্নবা অপীল তৌখি। কে.ভি.আই.সি.না মফম অদুগী নহাশিংনা য়ু.তি. অসিদা খোইহিগী পোৎথোক হেনগৎহল্লিবা কশ্মীরগী অৱাংবা মফমশিংদা হয়িংখোই উপু লিশিং কয়া য়েন্থোকখি।

নোংচুপ বেঙ্গলদগী মুস্লিম ফেব্রিক, জে. & কে.দগী পশ্মিনা শাল অমসুং শামতুগী ফি, পঞ্জাতগী কোতী শাল, কানপুরদগী শাউনগী পোৎথোক, রাজস্থান অমসুং উত্তর প্রদেশতগী তেরাকোত্তাগী লৈবাক্কী চফু অমসুং আচার, রাজস্থান্দগী মুরব্বা অমসুং মনা-মশিংগী হিদাক-লাংথকশিং অসি পুক্নীং চিংশিন্নীংঙাই ওইরি। বিহার অমসুং পঞ্জাবতগী মখল মখা কয়াগী মুগা অমসুং লশিংগী ফি অমসুং রেদিমেদ ফি-রোলসু উৎখি। এগজিবিসন অসিদা খাদীগী ফি-রোল অমসুং রেদিমেদ ফি-রোলদা অখন্ননা ৩০% দিস্কাউন্ত পীরি।

কে.ভি.আই.সি.গী চিয়রমেন শ্রী সক্সেনানা হায়খি মদুদি বারানসীদা রাজ্যগী থাক্তা পাংথোক্লিবা খাদী এগজিবিসন অসি ‘আত্মনির্ভর ভারত’কী মায়কৈদা পুক্নীং চিংশিন্নীংঙাই ওইবা খাদী খুৎহৈবশিংগী খোংজং অমনি মখোয়না শিনমিৎলোনগী অৱাবা অসি কোকহন্নবগীদমক্তা অৱাবা মতম অসিদা তরেং নাইরি। মহাক্না হায়খি, “এগজিবিসন অসি তোপ-তোপ্পা ফম্বাক অমনি মসিদা বারানসী অমসুং মসিগী অকোইবদা লৈরিবা মীয়াম্না জে. & কে., রাজস্থান, নোংচুপ বেঙ্গল, পঞ্জাব, উত্তরাখন্দ অমসুং অতৈ রাজ্যশিংগী খুৎনা শাবা পোৎলমশিং লৈবা ফংলি। মসিনা ‘ভোকেল ফোর লোকেল’গী খোংথাংদা ইনোৎ পীরগনি অমসুং খাদীবুসু শৌগৎলি।”

পনবা য়াই, বারানসী অসি প্রধান মন্ত্রীগী পার্লিয়মেন্তরী কন্সতিত্যুএন্সীসু ওইরি, শহর অসিনা খাদীবু য়োকখৎনবগীদমক্তা অমসুং খুৎহৈবশিংবু শৌগৎনবগীদমক থৌরম কয়া হৌদোক্লি। হৌজিক হৌজিক বারানসীদা খাদীগী ইন্সতিত্যুসন ১৩৪ থবক তৌরি, মসিদা থবক তৌরিবা মীওইশিংগী অপুনবা মশিংগী শরুক ৮০%দি নুপীনি।

*****