প্রধান মন্ত্রী শ্রী নরেন্দ্র মোদীনা ঙসি ৱর্ল্দ হেল্থ ওর্গনাইজেসন (দবল্যু.ঐচ.ও.)গী দাইরেক্তর জেনরেল, ঐচ.ই. দা. তেদ্রোস অধনম ঘিব্রেয়েসগা লোইননা তেলিফোন্দা ৱারী শানখ্রে।

প্রধান মন্ত্রীনা কোবিদ-১৯ লাইচৎ অসিগীদা মালেমগী ওইবা অপুনবা থৌরাংবু খুদোং চাবা ওইহনবদা দবল্যু.ঐচ.ও.না লৌরিবা মরুওইবা থৌদাংগীদমক থাগৎপা ফোংদোকখ্রে। মহাক্না অতৈ লাইনাশিংগী মায়োক্তা চংশিল্লিবা লানফমদা মায়থিদনবা মথৌ তাবশিংগী মতাংদসু পুক্নীং চিংশিনখি অমসুং চাউখৎলক্লিবা লৈবাকশিংগী হকশেল সিস্তেমগীদমক দবল্যু.ঐচ.ও.গী তেংবাং অদুগীদমক থাগৎপা ফোংদোকখি।

দাইরেক্তর জেনরেলনা দবল্যু.ঐচ.ও. অমসুং ভারতকী হেল্থ ওথোরিতীশিংগী মরক্তা অচেৎপা অমসুং চাং নাইনা তেংবাং পীনবদা শাফু পীখি, অমসুং মরুওইনা আয়ুশ্মান ভারত য়োজনা অমসুং ত্যুবর্কুলোসিসকী মায়োক্তা চংশিল্লিবা খোংজংগুম্বা ভারতকী দোমেস্তিক ইনিসিএতিবশিংদা থাগৎপা ফোংদোকখি। মহাক্না হায়খি মদুদি হকশেলগী ইসুশিংদা ভারতনা মরুওইবা থৌদাং লৌরি।

প্রধান মন্ত্রী অমসুং দাইরেক্তর জেনরেলনা ত্রেদিস্নেল মেদিসিন সিস্তেমশিংগী মগুন্দা কান্নবা মওংদা ৱারী-ৱাতাই তৌনখি, মরুওইনা মালেমগী মীয়ামগী চাউখৎ-থৌরাং অমসুং ইম্যুনিতী হেনগৎহন্নবা খন্নখি। মখোয়না ইন্তিগ্রেতিং ত্রেদিস্নেল মেদিসিন সোলুসনশিংবু অনৌবা মেদিকেল প্রাক্তিসতা পুনশিনবা অমসুং তাইম-তেস্তেদ ত্রেদিস্নেল মেদিসিনগী পোৎথোকশিং অমসুং প্রাক্তিসশিংগী চেকশিন্না সাইন্তিফিক ওইবা মওংদা মগুন লেপথোকপদসু য়ানখি। 

দাইরেক্তর জেনরেলনা শাফু পীরদুনা হায়খি মদুদি ত্রেদিস্নেল মেদিসিনগী তৌবা ঙম্বা অসি হৌজিক ফাওবা মতিক চানা শিংথানবা ওইদ্রি, অমসুং হায়খ্রে মদুদি দবল্যু.ঐচ.ও.না লম অসোমদা খ্বাইদগী ফবা প্রাক্তিসশিংগী রিসর্স, ত্রেনিং অমসুং শিয়রিং তৌবদা পুক্নীং থৌগৎনবা অচেৎপা মওংদা থবক পায়খৎলি।

প্রধান মন্ত্রীনা হোৎনরিবশিং অদুদা থাগৎপা ফোংদোকখি, অমসুং দাইরেক্তর জেনরেলদা নবেম্বর ১৩দা ভারত্তা ‘কোবিদ-১৯গীদমক আয়ুর্বেদ’ হায়বা থিমদা পাংথোক্কদবা আয়ুর্বেদ নুমিৎকী মতাংদা খঙহনখি।

প্রধান মন্ত্রী অমসুং দাইরেক্তর জেনরেলনা কোবিদ-১৯ লাইচৎ অসি মায়োক্ননবা পায়খৎলিবা মালেমগী তেংবাং পীনবগী মতাংদসু ৱারী শানখি। মসিগী মতাংদা, দাইরেক্তর জেনরেলনা মীওইবগী কান্ননবগীদমক ভেক্সিন পুথোকপা অমসুং ফার্মাস্যুতিকেলগী মকোক থোংবা মেন্যুফেকচরর অমা ওইনা ভারতকী তৌবা ঙম্বা অদু শিজিন্ননবা ফোংদোকখিবা প্রধান মন্ত্রী মোদীগী ৱাফম অদুবু অচেৎপা মওংদা থাগৎপা ফোংদোকখি।

***