হকশেল অমসুং য়াইফ-য়ুম্বাল মন্ত্রালয়গী কেন্দ্রগী মন্ত্রী দা. হর্শ বর্ধন্না কর্নাতকাগী হেল্থ অমসুং মেদিকেল এজুকেসন মন্ত্রী দা. কে. সুধাকর অমসুং রাজ্য সরকার অসিগী অতোপ্পা মকোক থোংবা ওফিসিএলশিংগা লোয়ননা কোবিদ-১৯গী শেম শারিবা অমসুং কোবিদকা চুনবা চৎন-লোচৎকী লৌখৎলিবা খোঙথাংশিং য়েংশিন্নবা ঙসি ভিদিও কনফরেন্সকী থোংদা মীফম অমা পাংথোকখ্রে। 

ভারতনা কোরোনা লাকশিনবদা খুমাং চাউশিল্লিবা অসিদা অপেনবা পোক্লদুনা দা. হর্শ বর্ধন্না হায়খি, “অথুবদা ঐখোয়না কোরোনাগা লান্থেংনবগী খোঙচৎ অসি থা ১০ মপুং ফারগনি। লৈবাক অসিনা হৌজিক কোবিদকী পেরামিতরশিংদা চাউনা ফগৎপা উবা ফংলে। কেসশিং অমসুং শীখিবগী মশিং অসি হন্থরকপগী তাঙ্কক অমদা লৈরে। এক্তিব কেসশিং চাউনা হন্থখ্রে। ভারতকী নাবা ফগৎলকপগী চাং অসি ঙসি ৯২% হেনখ্রে। কেস ফেতেলিতী রেৎসু হন্থরক্লি অমসুং ১.৪৯%দা লৈরি। লেব ২০০০গী মথক্তা লৈবগা লোয়ননা তেস্তিং কেপাসিতীসু হেনগৎলকখ্রে”, হায়না মহাক্না ফোঙদোকখি।

লৈবাক অসিদা লৈরিবা মীয়াম্না ‘জন অন্দোলন’গী শরুক ওইনা ইকাই খুম্নরবা প্রধান মন্ত্রীনা অকনবা মওংদা ফোঙদোকখিবা অপাম্বা অদু ঙাক্না চৎনবা ফোঙদোক্লদুনা কেন্দ্রগী হকশেল মন্ত্রীনা মীয়াম্না কোবিদকা চুনবা চৎন-লোনচৎশিং ঙাক্না চৎনবা ফোঙদোকখি। মহাক্না হায়খি, “লাক্কদৌরিবা কুমহৈ অমসুং ইংথম থা অসিদা ভাইরস অসিনা অচৌবা খুদোংথিবা থোকহল্লকপা য়াই। ভাইরস অসি শন্দোকপা থিংনবা কোবিদকা চুনবা চৎন-লোনচৎ ঙাক্না চৎপা য়াম্না মরু ওইরি। তঙাই ফদবা চেকশিল থৌরাংশিং অসি ঙাক্না চৎপদা কোমথোকপা মতমদা লৈবাক অসিনা অৱাবা তাখি।”

কর্নাতকাগী কোবিদকী ত্রেজেক্তরীগা লৈবাক অসিগী ত্রেজেক্তরীগা চাংদম্নরদুনা দা. হর্শ বর্ধন্না হায়খি, “মহারাস্ত্রগী মতুংদা কর্নাতকানা অপুনবা কেসকী মশিং খ্বাইদগী য়াম্বদা অনিশুবদা লৈরি। কর্নাতকাগী নাবা ফগৎলকপগী চাং অসি ৯৩% ওইদুনা লৈবাক অসিগী নাবা ফগৎলকপগী চাংদগী হেল্লি। কেস ফেতেলিতী রেৎ (১.৩৫%) অসিসু লৈবাক অসিগী লৈরিবা চাংচৎতগী হেন্না তারি।” রাজ্য অসিনা এক্তিব কেসশিং হন্থহন্নবা হোৎনরিবা অসিবু মহাক্না থাগৎখি।

কর্নাতকাগী কেস লোদ ৱাংবা জিলাশিং অর্বান বেঙ্গলুরু, মাইসুরু, বেলারি, দাকশিন কনাদা, হসন অমসুং বেলাগবিদা লাইনা অসিগী লৈরিবা ত্রেজেক্তরীগী মতাংদা দা. হর্শ বর্ধন্না নুংনাংবা ফোঙদোকখি। পোজিতিব কেসশিং হেনগৎলক্লিবা অমসুং ফেতেলিতী রেৎ ৱাংখৎলক্লিবা জিলাশিংগী ওফিসিএলশিংগা লোয়ননা দা. বর্ধন্না ৱারী শাখি। কর্নাতকানা আই.ই.সি.গী থবক থৌরমশিংগী পাইখৎলিবা থবক অসিবু মহাক্না থাগৎখি। কেন্দ্রগী হকশেল মন্ত্রীনা কোবিদকা চুনবা চৎন-লোনচৎ ঙাক্না চৎনবা রাজ্য পুম্বদা পাকশন্না অমসুং আই.ই.সি. কেম্পেনশিং মপুং ফানা লৌখৎনবা খঙহনখি।

রাজ্য অসিগী হেল্থ ওথোরিতীশিংনা কেন্দ্র সরকারদা কোবিদ লাকশিন্নবা লৌখৎলিবা খোঙথাংশিংগী মতাংদা খঙহনখি। কেন্দ্রগী হকশেল মন্ত্রীনা কেস ৱাংনা রিপোর্ত তৌরক্লিবা অমসুং শীবগী চাং ৱাংবা জিলা তরুক্কী দিপুতী কম্মিস্নরশিং অমসুং দি.এম.শিংগা লোয়ননা ৱারী শাখি। রাজ্য অসিনা কোবিদ-১৯ লাকশিন্নবা ত্রেসিং, তেস্তিং, ত্রীৎমেন্ত অমসুং তেক্নোলোজীগী তি ৪ ঙাক্না চৎলি।  জুনদা নোংমদা তেস্ত তৌরম্বা অসি ১০,০০০দগী ঙসিদি নোংমদা তেস্ত ৮০,০০০গী মথক্তা তৌরে। রাজ্য অসিগী মেদিকেল কোলেজ পুম্নমক্তা তেস্তিং ফেসিলিতীশিংদা ফংহনখ্রে। মসিনা তেস্ত তৌবগী চাং শরুক কয়া থোক্না হেনগৎখ্রে। হৌজিক ফাওবদা রাজ্য অসিদা তেস্ত মিলিয়ন ৮গী মথক্তা তৌখ্রে। তৌরিবা তেস্তশিংগী ৮০%দি আর.তি.পি.সি.আর.নি হায়না রাজ্য অসিগী ওথোরিতীশিংনা ফোঙদোকখি। ওক্তোবর ২৫দগী নবেম্বর ১গী মরক্তা রাজ্য অসিগী এক্তিব কেসশিং অসি ৩৭% হন্থখ্রে। ঙন্না কন্তেনমেন্ত তৌনবা অমসুং চুনবা লায়েং চত্থনবা রেন্দম পুল তেস্তিং অমসুং তর্গেতেদ তেস্তিং তৌহনখি। সহরগী মফমশিংদা কন্তেনমেন্তগী লালোংশিং লৌখৎখি। রাজ্য অসিদা আই.ই.সি.গী থবক থৌরমশিংদা চাউনা ফগৎহল্লি অমসুং হিরম অসিগী তোখাইবা ফন্দ অমা এল্লোকেৎ তৌরি।

কেন্দ্রগী হকশেল সেক্রেতরী শ্রী রাজেশ ভুশন্না কর্নাতকাদা অনৌবা কেসশিং অমসুং শীখিবশিং অসি চাউনা হন্থরক্লে অদুবু জুলাইগী মমাংদা ওইখিবা পেরামিতরশিংগী থাকশিংদা হল্লক্নবা তৌগদবা য়াম্না লৈরি হায়না ফোঙদোকখি। রাজ্য অসিনা পোজিতিবিতী লেবেল ৫%গী মখাদা লৈহন্নবা পান্দম থম্লি। লৈবাক অসিগী শীবগী চাংদগী হেন্না ৱাংবা জিলাশিংদা স্তেকহোল্দর পুম্নমক্কা লোয়ননা রাজ্য অসিনা থবক কন্না পাইখৎপা মথৌ তাই।

এন.সি.দি.সি.গী দিরেক্তর দা. এস.কে. সিংহনা রাজ্য অসিদা কোবিদ-১৯গী হৌজিক লৈরিবা ফীভম অসিগী মরমদা প্রসেন্তেসন অমা পীখি। মহাক্না মীৎনা শিংনা লৈনবা অমসুং কোবিদকা চুনবা চৎন-লোনচৎ ঙাক্না চৎনগী মথৌ তাবা অদু ফোঙদোকখি।

শ্রীমতি আর্তি অহুজা, এদিস্নেল সেক্রেতরী (হেল্থ), দা. সুনিল কুমার, দি.জি.ঐচ.এস., শ্রী লব অগর্ৱাল, জোইন্ত সেক্তেতরী অমসুং মকোক থোংবা ওফিসিএলশিং মীফম অসিদা য়াওখি। রাজ্য অসিগী অতোপ্পা ওফিসিএলশিংনা ভর্চ্যুএল ওইনা য়াওখি।

****