সাইন্স অমসুং তেক্নোলোজী, আর্থ সাইন্সেস অমসুং হকশেল অমদি য়াইফ-য়ুম্বালগী কেন্দ্রগী মন্ত্রী দা. হর্শ বর্ধন্না চেন্নাইগী ৪শুবা বত্তালিয়ন সেন্তরদা সি.এস.আই.আর.না লিংখৎখিবা ফমুং ১০ থাবা মেক শিফ হোস্পিতাল অমসুং আইসোলেসন সেন্তর অমা ঙসি ভিদিও কনফরেন্সকী থোংদা শঙ্গাখ্রে।

থৌরম অসিদা ৱা ঙাংলদুনা দা. হর্শ বর্ধন্না কোবিদ-১৯গুম্বা অনৌবা খুদোংচাদবশিং অসি মায়োক্ননবা অনৌবা পাম্বৈশিং থিদোকপগীদমক্তা সি.এস.আই.আর.-এস.ই.আর.সি. (স্ত্রকচরেল ইঞ্জিনিয়রিং রিসর্চ সেন্তর) অমসুং মখোয়গী সাইন্তিস্তশিংগা লোয়ননা নেস্নেল দিজাস্তর রেস্পোন্স ফোর্স (এন.দি.আর.এফ.)বু থাগৎপা ফোঙদোকখি।  মহাক্না ফেসিলিতী অসিগা মান্নবা মেকশিফ হোস্পিতাল অমা চহি অসিগী অগস্ত থাদা উত্তর প্রদেশকী ঘজিয়াবাদকী এন.দি.আর.এফ. কেম্পসতা শাখিবা অদু নীংশিংখি। মহাক্না ফোঙদোকখি, “চেন্নাইগী এন.দি.আর.এফ.কী ৪শুবা বত্তালিয়ন সেন্তরগী অনৌবা ফেসিলিতী অসি চেকশিন থৌরাং অমসুং নুংঙাইনা হিংনবা এনভাইরনমেন্ত অমগা লোয়ননা অনাবা মীওইদা প্রাইমরী হেল্থ ফেসিলিতী ফংহন্নবা মেকশিফ হোস্পিতাল অমা ওইনা দিজাইন তৌখি অমসুং চহি ২০ ফাওবা চৎকনি”। মহাক্না মখা তারদুনা হায়খি, “মসি মতমগা চুনবা, কুইনা চৎকদবা, থুনা ইন্সতোল তৌবা য়াবা, শাফবা অমসুং লমমিৎ-তুমিৎকা লোয়ননা নোংজু-নুংশা খাক্তনা মতম চংদনা দিপ্লোই তৌবা য়াবা তেক্নোলোজী অসি খুদোংথিবা থোকপা মতমদা অমসুং কুইনা লাইচৎ থোরকপা নত্ত্রগা ইমর্জেন্সীগী ফীভমশিংদা শীজিন্নবা য়ারগনি”। “সি.এস.আই.আর.-এস.ই.আর.সি. লেবোরেতরীনা শিদোক-শিজিন য়াবা অমদি স্তীলগী ফ্রেমগী স্ত্রকচর ওইবা অমা পুথোকখি, মসি মীওই অমা খক্তনা ফ্রেম খরা মহাক্কী লেংবান্দা পুবা ঙমগনি অমসুং মতম চংদনা মফম অমা হেক্তদা পনখৎপা য়াগনি”, হায়না মন্ত্রীনা ফোঙদোকখি।

“দ্রগ রিপর্পোজ তৌবা, পি.পি.ই. কিৎশিং, তেস্ত তৌবা, কুইনা থম্বা য়াবা খুদক্তা চাবা য়ারবা মচী ওইবা চীঞ্জাক অমসুং অরাইবা মওংদা ইন্সতোল তৌবা য়াবা মল্তি-পর্পজ শেল্তরশিং অমসুং হোস্পিতালশিং অসিগুম্বা তোঙান তোঙানবা লমদা অনৌবা পাম্বৈশিং পীন্নবা মাংজিল থানা হোৎনরিবা” সি.এস.আই.আর.বু মন্ত্রীনা থাগৎপা ফোঙদোকখি। মহাক্না হায়খি, “সাইন্তিস্ত, হেল্থ ৱার্কর, এন.দি.আর.এফ. পুম্নমক্না চোকথবা লৈতনা হোৎনবনা মরম ওইরগা ঙসি ভারতকী নাবা ফগৎলকপগী চাং অসি চাদা ৯২গী মথক্তা য়ৌবা ঙমখ্রে।”

সি.এস.আই.আর.গী দি.জি. দা. শেখর সি. মান্দেনা হায়খি কোবিদ-১৯গী মায়োক্তা লান্থেংনবদা সি.এস.আই.আর.না অহৌবা নুমিৎদগী য়াওদুনা মতম চংদনা দিপ্লোই তৌবা য়াবা স্ত্রকচর য়াওনা তোঙান তোঙানবা তঙাই ফদবশিং ফংহন্নবা অনৌবা পাম্বৈশিং পুথোক্তুনা লাকখি। হিমাচল প্রদেশকী সরকারনা রাজ্য অসিগী তোঙান তোঙানবা মফমশিংদা ফমুং ৫০ থাবা অসিগুম্বা হোস্পিতাল অহুম ইন্সতোল তৌনবা সি.এস.আই.আর.দা হায়জখি অমসুং অথুবদা সি.এস.আই.আর.না অসিগুম্বা অসি অনৌবা তেক্নোলোজী শীজিন্নদুনা শারগনি হায়না মহাক্না ফোঙদোকখি। “মসিগী তেক্নোলোজী দেমোনস্ত্রেসন এক্সর্সাইজ অসিদগী ফংলকখিবা লৌশিং অসিদা য়ুম্ফম ওইরগা সি.এস.আই.আর.-এস.ই.আর.সি.না হৌজিক্তি ফেসিলিতী অসি ফমুং ১০০ থাবা মশিং য়াম্না শেমগৎপা ঙম্লগনি অমসুং ভারতকী মফম অমা হেক্তদা তেক্নোলোজী পার্তনরগা লোয়ননা মপুং ফানা শেমগৎপা ঙম্লগনি,” হায়না মহাক্না ফোঙদোকখি।

এন.দি.আর.এফ.কী দি.জি. শ্রী এস.এন. প্রধান্না অসিগুম্বা দেমোন্সত্রেসন প্রোজেক্তশিং এন.দি.আর.এফ.কী তোঙান তোঙানবা মফমশিংদা ফেসিলিতীশিং অসি শেমগৎনবা সি.এস.আই.আর.দা হায়জখি। মহাক্না হায়খি, “এন.দি.আর.এফ.না থা অমা চুপ্না মখোয়গী পর্সনেলশিং থারিবা অরাপ্পা মফমশিংদা রিলিফ অমসুং রেসক্যু ওপরেসনশিং চত্থবদা থেংনবা খুদোংচাদবশিং কোকহন্নবা অসিগুম্বা পাম্বৈশিং অসি মথৌ তাই”। মহাক্না হায়খি, দিজাস্তর মেনেজমেন্ত ওথোরিতীশিংনা অসিগুম্বা ফ্রেম শেল্তরশিং অসি শেম-শাদুনা থম্বা য়াগনি অমসুং তোঙান তোঙানবা রাজ্যশিংদা খুদক্কী মথৌ তারকপদা খুদোংথিবা থোক্লিবা মফমদা মখোয়বু পুবা য়াগনি। বেশিং মোদ্যুলর ওইনা হাপচিন্দুনা, মেদিকেল তিমশিং, গোদাউনশিং, স্কুলশিং, রেস্ত হাউসশিং অমসুং শান্তিগী মতমদা তুরিস্ত হুতশিংগীদমক শেল্তরশিং শাবা য়াগনি”।

আইসোলেসন সেন্তর অসি এন.দি.আর.এফ. ঐচ.ক্যু. নই দিল্লীনা সি.এস.আই.আর.-এস.ই.আর.সি. চেন্নাইগা খুৎশম্নরগা লুপা লাখ ৩৭.৬৭ চংনা শেমগৎখিবনি। মসিগী ফেসিলিতী অসি ই.সি.জি. মোনিতরশিং, দিফাইব্রিল্লেতরশিং, পল্স ওক্সিমীতর, ইমর্জেন্সী ওক্সিজেন সপ্লাই সিলিন্দরশিং ফংহল্লি। মসি তোঙান তোঙানবা দিজাস্তর রেস্ক্যু ওপরেসনশিংদগী হল্লকপা কোবিদ-১৯ নারবা এন.দি.আর.এফ. পর্সনেলশিংগী লায়েংনবা তঙাইফদনা চংদ্রবা য়াদ্রবা ফেসিলিতী অমনি।

অরাক্কোনমদা লৈবা সিস্তেম অসিদা থুনা খনগৎপা য়াবা, শিদোক শিজিন য়াবা, ৱাংবা, শাফবা, নুংঙাইবা, শেন চংদবা, অমুক হন্না শাগৎপা য়াবা ফিচরশিং য়াওবগা লোয়ননা থর্মেল ইন্সুলেসন মরাং কায়বা অমসুং ৱাতর প্রুফিংগী ফিচর য়াওবা অমসুং লোকেলদা ফংজবা স্কিলশিং শীজিন্ননবা দিজাইন তৌখি। মসিগী প্রি-ফেব্রিকেতেদ মেকশিফ হোস্পিতাল স্ত্রকচরশিং অসিনা মতেং অমসুং খুৎলাই য়াম্না চংদনা থুনা ইন্সতোল তৌবা য়াবা খক্তা নত্তনা থম্বা অমসুং পুথোক-পুশিন তৌবদা লাইহল্লি অমসুং শেল চংদবগা লোয়ননা চাউথোকপা য়াই।

অহেনবা ফিচরশিংগী মনুংদা মীওইবশিং ঙাকথোক্নবা এন্তি-আল্ত্রাভাইওলেৎ নেচর, মফম অদু হীরম কয়াদা শীজিন্নবা, হাই স্ত্রকচরেল পর্ফোর্মেন্স, ঈশিংদগী ঙাকথোকপা, মৈদগী ঙাকথোকপা, মতম কুইনা চৎহনবা, রিন্যুৱেবল অমসুং এন্তি-বেক্তরিএল মেতরিএলশিং য়াওরি।  

থৌরম অদু দা. পালানি, চীফ সাইন্তিস্ত, সি.এস.আই.আর- এস.ই.আর.সি., চেন্নাই; প্রোফ. এস. কাপুরিয়া, দিরেক্তর, এস.ই.আর.সি., চেন্নাই, অমসুং সি.এস.আই.আর. অমসুং এন.দি.আর.এফ.কী সাইন্তিস্ত অমসুং ওফিসিএল কয়ামরুম্না ওনলাইন ওইনা শরুক য়াখি। 

*****