দিভেলপমেন্ত ওফ নোর্থ ইস্তর্ন রিজন(দোনর), পি.এম.ও., পর্সোনেল, পব্লিক গ্রিভান্সেস, পেন্সন্স, এতোমিক ইনর্জী অমসুং স্পেসকী রাজ্য মন্ত্রী কেন্দ্র মন্ত্রী(মনিং তম্বা) দা.জিতেন্দ্র সিংহনা থৌরমদা ৱা ঙাংলদুনা  ঙসি অসি মন্সর লেক দিভেলপমেন্ত প্লান অসি মতম শাংনা চহি ৭০মুক ঙাইনরক্লবা মতুংদা মপুং ফারকপা অসিদা মন্সরদা লৈরিবা মীশিংগী ওইনা ঐতিহাসিক ওইরবা নুমিৎ অমনি হায়না ফোংদোকখ্রে।  দা. জিতেন্দ্রনা নিংথিরবা মান্সর পাৎ অসি অমুক হন্না শেমগৎ-শাগৎপা/ফগৎহন্নবগী থবক-থৌরাং অসি ইলেক্ত্রোনিক্কী থোংদা উরেপ-উয়ুং তম্বগী থৌরম পাংথোক্লবা মতুংদা ৱা ঙাংলদুনা হৌখিবা চহি ৬কী মতম অসিদা মসিগী লম অসিদা হৌদোকখিবা নেস্নেল প্রোজেক্তশিংগী মশিং অসি হান্না মমাংগী চহি ৭০গী মতমদা তৌখিবা প্রোজেক্তশিং অসিগী মশিংদগী হেল্লি হায়না ফোংদোকখ্রে।  থাজনিংঙাই ওইদবা মওংদা শেমগৎপা অসি কনানসু ময়েক শেংনা খঙবিদনা লৈরি। মসি থবক ওইনা পাংথোক্লবা মতুংদা মান্সর অসিদা চহি খুদিংগী তুরিজম/তীর্থ চৎপশিংগী মশিং অসি লাখ ১০দগী লাখ ২০দা হেনগৎলগনি। দা. জিতেন্দ্রনা মান্সর শেমগ-শাগনবগী থবক-থৌরাং অসিনা চাউরাক্না মীওই করোর-নুমিৎ ১.১৫গী থবক থোরকহল্লগনি অমদি চহি খুদিংগী লুপা করোর ৮০০দগী হেনবগী চাগা ওইহল্লগনি।

মোদীগী সরকার অসিনা পাল্লকপদগী হায়না পল্লদুনা দা. জিতেন্দ্রনা জম্মু অমসুং কাশ্মীর অসিদা মরুওইনা ভারত্তা মশক নাইবা মওংদা চাউখৎনবগী থবক্কীদমক্তা অতোপ্পা লোক সভাগী মফম অমত্তগা চাংদম্নবা য়ারবা উধমপুর-দোদা-কথুৱা কেন্দ্রদা চাউখৎনবা খ্বাইদগী খ্বাইদগী মরুওইনা তৌখি হায়না ফোংদোকখি।  উধমপুর-দোদা-কথুৱা অসি লৈবাক অসিদা চহি ৩সিদা মেদিকেল কোলেজ ৩ লৈবা ঙমখ্রবা লোক সভাগী কেন্দ্র অমা ওইবা অসি ওইবা য়ারি অদুগা উধমপুর অসি লৈবাক অসিগী নামমী গঙ্গা অমদি গঙ্গা শেংদোক্নবা প্রোজেক্তকী পরিংদা লৈবা, মথংশিৎনা দেবিকা তুরেল অমদি মন্সর পাৎ অমুক হন্না শেমগৎ-শাগৎনবগী অমদি অনৌবা মওংদা শেমদোক্নবা মান্নবা থবক অনি ফংখিবা অসি পুথোক্তুনা খঙহনখি। 

দেবিকা প্রোজেক্ত অমদি মন্সর প্রোজেক্ত হায়না কৌবা প্রোজেক্ত অনি অসি লুপা করোর ২০০ চংগনি অদুগা অতৈ মান্নবা প্রোজেক্তশিংসু লৈরি হায়না দা.জিতেন্দ্রনা ফোংদোকখি। খুদম ওইনা দেবিকা তুরেল অসি ইমা গঙ্গাগী মচেনি হায়না থেংনরিবা অসিগুম্না মন্সর পাৎ অসি মহাভারতকী অরিবা অইবশিংগী মতাংদা থেংনৈ।

দা. জিতেন্দ্রনা নিংশিংলদুনা হৌখিবা চহি ৬ অসিদা মীয়াম্না খল্লুবগী ৱাংমদা অসিগুম্বা প্রোজেক্ত কয়া অমা হৌদোকখি অমদি মতৌ অসিগুম্না চহি কয়াদগী চত্থরক্লিবা প্রোজেক্তশিং অসি অমুক হন্না হিঙ্গৎহনখি হায়না ফোংদোকখি। প্রধান মন্ত্রী নরেন্দ্র মোদীনা মশানা ওইনা থবক পাংথোকপগা লোয়ননা চহি ৪০গী মতুংদা অমুক হন্না হিঙ্গৎহনখিবা শাহপুর কন্দী ইরিগেসন প্রোজেক্তশিং অমসুং চহি ৫০দগী হেল্লবা মতুংদা উঝ ম্লিতীপর্পজ প্রোজেক্ত অসিসু অমুক হন্না হিঙ্গৎহনখ্রে হায়না মহাক্না ফোংদোকখ্রে। মসিগা মান্নবা হিরম অসিদা অৱাং ভারতকী অহানবা বাইও-তেক ইন্দস্ত্রীএল পার্ক অমসুং অহানবা সীদ-প্রোসেসিং প্লান্ত অসিসু লৈরক্তুনা মসিনা থবক্কী খুদোংচাবশিংগা লোয়ন-লোয়ননা পুন্সি মহিং অমদি রিসর্সশিং লৈহল্লক্লগনি হায়না মহাক্না ফোংদোকখি। 

দা. জিতেন্দ্রনা থবক তৌবা হৌখ্রবা অমদি লেন মরী ওইনা পাকথোক-চাউথোকহন্নবা কাত্রা-দিল্লী এক্সপ্রেশৱে কোরিদোর অমদি জম্মু-কাশ্মীরগী লেন মরী অসি লেন ৬তা ওন্থোক্নবা থবক হৌখ্রে হায়না ফোংদোকখি। মালেম অসিগী খ্বাইদগী ৱাংবা রেলৱেগী থোং অসি রিএসীদা লৈরক্কদৌরবা অসিদা মর্মাৎ ফাওদুনা সুধমহাদেবদগী খিলেনীগী অনৌবা নেস্নেল হাইৱে প্রোজেক্ত অসিগী থবক চত্থরি হায়না মহাক্না হায়খি।

দা. জিতেন্দ্রনা ভোৎ বেঙ্ককী মতাংদা ৱা খন্নবশিং অসিগী মথক্তা থওইবিদ্রবা মফমশিংদা চাউখৎনবগী খুদোংচাবশিং ফংহন্নবগী থবক অমনি হায়না ফোংদোকখি। লাপ্লবা কিশতাৱারগী পদ্দার অসিদা চহি অনিগী মমাংদা অহানবা কেন্দ্রনা ফন্দেদ তৌবা কোলেজ অসি লৈখি অদুগা কেন্দ্র সরকারগী উড়ান স্কীমগী মখাদা কিশতাৱারদা অনৌবা এয়র্পোর্ত অমা লৈরগনি হায়না মহাক্না ফোংদোকখি। মতৌ অসিগুম্না পোগল-উখরাজ অমসুং মরমতকী অরাপ্পা মফমশিংদা মখোয়গী খ্বাইদগী অহানবা দিগ্রী কোলেজ গন্দোহদা মখোয়গী অহানবা পোস্ত ওফিস লৈখ্রে অমদি অদুম ওইনমক হায়রিবা মফমশিং অসি কেন্দ্র মন্ত্রীশিং অমদি রাজ্যনা মসিগী মফম অসি পুথোরকখিবা অসি চহি কয়া শুখ্রে।

মহাক্কী ৱাফম ফোংদোকপদা উত্তরাখন্দ অমসুং জম্মু অমদি কাশ্মীরগী লেফতেনেন্ত গবর্নর শ্রী মনোজ সিংহনা পাক্লবা মন্সর পাৎ অমদি মসিগী পাম্বিশিং অমদি শা-উচেকশিংগী মরম্না খ্বাইদগী য়াম্না পুক্নিং চিংশিন্নিঙাই ওইবগা লোয়ননা তীর্থ চৎপগী ওইনসু য়াম্না মরুওইবা মফম অমনি হায়না ফোংদোকখি।  জম্মু অমসুং কাশ্মীরগী জি.দি.পি. অসি তুরিজমগী ওইনা চাদা ৭নি অদুবু কোরোনানা মরম ওইদুনা সেক্তর অসি শাথিনা চৈথেং ফংহল্লে হায়না মহাক্না ফোংদোকখি। তুরিজম ইন্দস্ত্রীগা মরি লৈনবা মীওইশিংনা অচৌবা স্কেলদা অৱাবা কোকহন্নবগীদমক্তা হোৎনবা য়াবশিং হোৎনরি হায়না মহাক্না ফোংদোকখি। কেন্দ্রনা তুরিজম সেক্তরগী ওইনা লুপা করোর ৭-৬ পীখ্রে অমদি জম্মু অমসুং কাশ্মীর অসি মালেমগী মেপ্তা খ্বাইদগী পাম্নবা তুরিজমগী মফম ওইহল্লক্নবগীদমক্তা হিরম কয়াগী ওইবা মওংদা থবক চত্থরি হায়না মহাক্না ফোংদোকখি। 

জম্মু অমসুং কাশ্মীরগী লেফতেনেন্ত জেনরেলগী এদভাইজর শ্রী বাশীর অহমদ খান, তুরিজমগী সেক্রতরী শ্রী সরমদ হফীজ, দিবিজনেল কম্মিস্নর শ্রী সঞ্জীব বর্মা, জম্মুগী তুরিজমগী দিরেক্তর শ্রী আর.কে. কাতোচ, সুরিন্সর-মন্সর দিভেলপমেন্ত ওথোরিতীগী সি.ই.ও. দা. গুর্বিন্দর জীৎ সিংহ অমদি জম্মু অমসুং শ্রীনগরগী অতৈ মকোক থোংবা ওফিসিএলশিংনা ৱেবিনার অমদি ইলেক্ত্রোনিক্কী থোংদা হৌদোকপগী থৌরম অদুদা শরুক য়াখি।

*****