নোংচুপ-বেঙ্গোলদা জল জীবন মিসন (জে.জে.এম.)গী থৌরাং য়াৎপা অমসুং থবক পায়খৎপগী চহি ময়ায়গী ওনা য়েংশিনবগী মীফম অমা পাংথোকখ্রে অমসুং মসিদা লৈবাক্কী জল জীবন মিসনগী কাঙবুগী মমাংদা রাজ্যগী ওফিসিএলশিংনা প্রোগ্রাম অসিগী হৌজিক্কী ওইবা ফিভমশিং পুথোকখি। নোংচুপ-বেঙ্গোলগী রাজ্য সরকারনা ইং ২০২৪ ফাওবগী মনুংদা মসিগী খুঙ্গংগী ইমুং করোর ১.৬৩দা তোতি ঈশিং ফংহনবগী পান্দম ফংনবা ৱারেপ লৌখ্রে। নোংচুপ-বেঙ্গোলদা জিলা ২২, ব্লোক ৩৪১, খুঙ্গং ৪১৩৫৭ অমসুং মী-পুন্না তাবা মফম লাখ ১.০৭ লৈ। ইং ২০২০-২১গী ওইনা রাজ্য অসিনা পান্দম থম্লিবা লাখ ৫৫.৫৮গা য়েংনবদা হৌজিক ফাওবদা শুপ্নগী তোতি ঈশিং কন্নেক্সন লাখ ২.২০খক পীবা ঙমখ্রে।

জল জীবন মিসনগী মখাদা, ভারত সরকারনা রাজ্য/য়ু.তি.শিংদা তোতি ঈশিং পীখিবগী অপুনবা মশিং অমসুং কেন্দ্র অমসুং রাজ্যগী চান্নবা শরুক্কী শেম্ফম লৈরিবা অদুদগী শিজিন্নখিবগী শেনফমদা  য়ুম্ফম ওইদুনা শেল থাদৈ। ইং ২০২০-২১দা নোংচুপ-বেঙ্গোলদা থাদখিবা শেম্ফম অসি লুপা করোর ১৬১০.৭৬নি। থবক পাঙথোকপগী খুমাং চাউশিনবগী চাংদা য়ুম্ফম ওইদুনা পর্ফোর্মেন্স ইন্সেন্তিব ওইনা মিসন অসিগী মখাদা অহেনবা শেনফম পীবা য়াই। মসিগী মথক্তা, ১৫শুবা ফাইনান্স কম্মিসন গ্রান্তনা পি.আর.আই.দা শেনফম পীথবা ওইনা নোংচুপ-বেঙ্গোলনা লুপা করোর ৪৪১২ ফংগনি অমসুং মসিগী মনুংদগী ৫০%দি ঈশিং অমসুং সেন্তিসেনগী থৌওংশিংদা শুংশোই শোইদনা শিজিন্নগদবনি। য়েংশিনবগী মীফম অসিদা মন্ত্রালয়না রাজ্যসিদা কেন্দ্রনা পীথরিবা শেনফম অসি মাঙখিদনবা হৌজিক লৈরিবা শেনফমশিং অসি শিজিন্নদুনা অকক্নবা মতমগী মনুংদা পান্দম অসি ফংনবা অমসুং কায়থোকখ্রবা শেনফমশিং মখা তানা ফংনবা থবক-থৌরমশিংগী খোঙজেল য়াঙশিন্নবসু হায়খি।  ইমুং খুদিংদা ঈশিং পীবা ঙম্বগী পান্দম অসিবু ফংনবা রাজ্য সরকারনা হোৎনবা খোঙথাং খুদিংদা কেন্দ্র সরকারনা অঙম্বা তেংবাং পীগনি হায়বগী থাজবসু পীখি।

তুং কোইনা থক্নবা ঈশিং পীবা ঙম্বা পথাপ অমা লৈহন্নবগীদমক্তা হৌজিক লৈরিবা ঈশিং ফংফমশিং অসিসু মপাঙ্গল হেন্না কনখৎহন্নবা মিৎয়েং চঙউ হায়নসু রাজ্যসিদা খঙহনখি। রাজ্য অসিনা এম.জি.এন.আর.ই.জি.এস., জে.জে.এম., এস.বি.এম. (জি.), ১৫শুবা এফ.সি. গ্রান্ত তু পি.আর.আই., দিস্ত্রিক্ত মিনরেল দিভেলপমেন্ত ফন্দ, সি.এ.এম.পি.এ., সি.এস.আর. ফন্দ, লোকেল এরিয়া দিভেলপমেন্ত ফন্দনচিংবা জিলাগী থাক্তা লৈবা প্রোগ্রামশিং অসি পুন্সিন্দুনা লৈরিবা রিসোর্সশিং শিজিন্ননবা অমসুং চহি ৫গী ওইবা ভিলেজ এক্সন প্লান (ভি.এ.পি.) অমসু মসিগী রিসোর্সশিং অসি নীংথিনা য়েংশিন্দুনা শেমগদবনি। রাজ্য অসিনা খুন্নাইগী মীওইশিংনা শরুক য়াহন্নবগীদমক্তা নীংথিনা মথৌ তৌবা আই.ই.সি. কম্মিত্তী অমসু শেম্বগী তঙাই ফদবা লৈ। মিসন অসিগী থৌরাংশিং নীংথিনা য়াত্তুনা থবক ওইনা পাংথোক্নবগীদমক্তা খুঙ্গংগী খুন্নাইশিংবু মপাঙ্গল হাপ্তুনা খুঙ্গংশিং অসিবু ‘হর ঘর জল গাওন’ ওইহন্নবা হোৎননবা রাজ্যসিদা খঙহনখি।

য়েংশিনবগী মীফম অসিদা রাজ্যসিগী খুঙ্গং ৪১৩৫৭কী মনুংদগী ২২৩১৯দদি রেত্রোফিত্তিংগী খুত্থাংদা লেমহৌরিবা ইমুংশিং অসিদা চাউরাক্না তোতি ঈশিং কন্নেক্সন করোর ১ পীবা ঙম্বগী মতিক লৈবা পব্লিক ৱাতর সপ্লাই (পি.দবল্যু.এস.) লৈ হায়বা অসিসু খঙখি। নোংচুপ-বেঙ্গোল অসি য়ানশিনবা ঈশিং লৈবগী খুদোংচাদবশিংনা শোকহল্লি অমসুং মসিনা লমদম অসিদা খুন্দারিবা মীওইশিংদা হকশেল শিংনবা লৈহল্লি। রাজ্য অসিগী খুঙ্গং ১০গী ইমুং লাখ ৪২.৯৬তি শাথিবা হকশেলগী শিংনবা, জাপানিজ এন্সেফেলাইতিস অমসুং এক্যুৎ এন্সেফেলাইতিস সীন্দ্রোম (জে.ই.-এ.ই.এস.) অসিনা শোকহল্লি অমসুং হায়রিবা ইমুংশিং অসিদগী শুপ্নগী ইমুং লাখ ২.৩৪ (৫.৪%) খক্তদা থক্না তোতি ঈশিং ফংলি। রাজ্য অসিদা দিসেম্বর, ২০২০ ফাওবগী মনুংদা তোতি ঈশিং য়ৌহনগদবা অর্সেনিক অমসুং ফ্লুওরাইদনা শোকহল্লবা মী-তাবা মফম ১৫৬৬ লৈ।

রাজ্য অসিদা মখোয়গী অঙ্গনৱাদি সেন্তরশিং, আশ্রমশালা অমসুং স্কুলশিংদা ওক্তোবর ২, ২০২০দা হৌদোকখিবা নুমিৎ ১০০গী কেম্পেন অসিগী শরুক অমা ওইনা তোতি ঈশিং ফংহন্দুনা ইন্সতিত্যুসনশিং অসিদা থক্নবা ঈশিং, খুৎ-শা হামদোক্নবা, অমাংশঙশিংদা শিজিন্ননবা অমসুং মিদ-দে মিল থোংবা-থাকপদা শিজিন্ননবা অফবা ঈশিং শোইদনা ফংহন্নবা হায়খ্রে। মসিগী কেম্পেন অসিনা অসিগুম্বা মীয়ামগী ইন্সতিত্যুসনশিং অসিদা অফবা ঈশিং ফংহনবগী খ্বাইদগী ফবা খুদোংচাবা অমনি অমসুং মসিগী মতুং ইন্না অঙাংশিংনা তেক্ত-কায়দবা ঈশিং শিজিন্নবা ফংদুনা মখোয়গী হকশেল অমসুং নুংঙাইনা লৈবদা তেংবাংদুনা মপুং ওইনা চাউখৎপগী ফিভম ফগৎপদা হেনগৎহনগনি।

*****