কার্তুনশিং অসি মীওইবশিংগী মশেলদা পাউ ফাওননবগী য়াম্না কান্নবা থৌওং অমনি। মখোয়না ঐখোয়বু নোকহনবতা নত্তনা অরুবা ৱারোল কয়াবু অচম্বা, অকক্নবা অমসুং মনুং হুৎনা খঙহনবসু ঙম্মমি। মীওইবগী ৱাখল অসি পাউ ফাওনবগী অতোপ্পা পাম্বৈশিংগা চাংদম্নবদা মসিগী মওং অসিনা হেন্না লৌশিনবা ঙম্নবা মহৌশানা শেম্বীরক্লবনি। ‘সাইন্তুন’ হায়বদি সাইন্সতা য়ুম্ফম ওইদুনা পাউ ফাওননবা কার্তুন্নি। সাইন্তুনশিং অসিবু সাইন্স অমসুং সাইন্সকী ৱাখল্লোনশিংবু মীয়ামদা ভাব তাহনবা অমসুং নুংঙাইবা মওংদা পাউ ফাওবগী পাম্বৈ ওইনা শিজিন্নৈ।

মালেমগী খ্বাইদগী অহানবা ‘বাই বাই কোরোনা’ হায়না মিংথোনবা, লখনৌগী সি.এস.আই.আর.-সেন্ত্রেল দ্রগ রিসর্চ ইন্সতিত্যুৎ (সি.দি.আর.আই.)কী হান্নগী প্রিন্সিপাল সাইন্তিস্ত ওইরম্বা ‘সাইন্তুনিস্ত’ দাঃ প্রদীপ শ্রীবাস্তবনা ইবা লাইরিক অসি ঙসি লখনৌগী রাজ ভবন্দা পাঙথোকপা থৌরম অমদা উত্তর প্রদেশকী রাজ্যপাল মিস অনন্দি বেন্না পুথোকখি। লাইরিক অসি ভারত সরকারগী সাইন্স অমসুং তেক্নোলোজী বিভাগ (দি.এস.তি.)কী মখাদা লৈবা ওতোনোমস এজেন্সী, বিগ্যান পারাশারনা ফোঙবনি। বিগ্যান পারাশারগী দাইরেক্তর দাঃ নকুল পারাশার অমসুং বিগ্যান পারাশারগী সাইন্তিস্ত অমসুং চে-চাং ফোঙবগী মকোক ওইরিবা নিমিশ কপুরনা মথংশিৎনা লাইরিক অসিগী চীফ ইদিতর অমসুং ইদিতরনি।

লমাই ২২০ পানবা লাইরিক অসিদা নোভেল কোরোনাভাইরস লাইচৎ, মসিগী সিম্পতোমশিং অমসুং চেকশিনবগী খুত্থাংদা মসিদগী ঙাকথোকপগী পাক-শনবা ই-পাউশিং য়াওরি। ‘বাই বাই কোরোনা’দা করিগুম্বা ভাইরস অসিনা মতম শাংনা লৈগদৌবা ওইরবদি, ঐখোয়গী নুংতিগী পুসিগা মসিগা মতৌ করম্না লোইনগদগে হায়বা পাম্বৈদা মিৎয়েং চঙবা ‘কোরোনাভাইরসকা লৈমিন্নবগী কলা’ কৌবা য়াম্না নুংঙাইবা চেপ্তর অমা য়াওই। লাইরিক অসিনা কিনিংঙাই ওইরবা লাইচৎ অসিগী খুদোংথিনিংঙাই ওইবা অকুপ্পা ৱারোল কয়া পারিবা মীয়ামদা অকীবা ফাওহন্দনা তাক্লি।

“লাইরিক অসিগী তঙাই ফদবা পান্দমদি মীয়াম্বু কোবিদ-১৯গী মতাংদা য়াম্না নুংঙাইবা মওংদা খঙহনবনি। ঐহাক্না কার্তুন খরা য়েক্লগা ঐহাক্কী ফেসবুক্তা থাগৎখি। দাঃ নকুল পারাশার (দাইরেক্তর, বিগ্যান পারাশার)না মখোয়শিংবু উরবা তুংদা কোরোনাভাইরসকী মতাংদা সাইন্সতুনগী লাইরিক অমা ওন্থোকপগী ৱাখল্লোন অমা হৌদোরকখি। ঐহাক্না প্রোজেক্ত অসিদা ইথন্ত থবক শুবনা, ঐহাক্না অহানবদা লমাই ৫০গী লাইরিক অমগী থৌরাং তৌরমখি। হীরম অসিগী পাক-চাউবগী মতাংদা খঙলক্লবা তুংদা ঐহাক্না অতোপ্পা মীওইশিংগী তেংবাং লৌগে হায়বা খনখি। লাইরিক অসিগী অরোইবা মখল অসিদি লমাই ২২০ ওইরে” হায়না অইবা দাঃ প্রদীপ পারাশারনা ফোংদোকখি। মহাক নত্তনা, গোৱা, মদগাওনগী পার্বতী বাই চাউগুলে কোলেজকী সাইন্তুনিস্ত মহৈরোই ৭, মিং ওইনা পল্লবদা মিস লাকিশা ইনাস্যা কোইলহো, মিস দা কোস্তা মারিয়া সিমরান ব্লোসম, মিস প্রিয়ঙ্কা শঙ্কে, মিস সামারাদিনী পাইগাঙ্কর, মিস সেলস্যা সাবিয়া দা কোস্তা অমসুং শ্রী প্রথমেশ পি. শেৎগাওঙ্করনসু লাইরিকা অসিদা তেংবাংখি। অতোপ্পা তেংবাংবা মীওই অমনা গুজরাতকী স্কুল ওজা, ভিশাল মুল্যানি। “ভারত্তা পুথোক্লবা মতুংদা, লাইরিক অসি ব্রাজিল-ইন্দিয়া নেৎৱর্ক প্রোগ্রামগী মখাদা ব্রাজিলদসু য়াম্না থুনা পুথোক্লগনি অমসুং পোর্তুগীজকী লোলদসু হন্দোক্লবা য়ানা লৈরি”, অইবা দাঃ প্রদীপ শ্রীবাস্তবনা হায়খি

“ৱাফম অমা নত্তবা ভাবনা শাগৎপা ৱাখল্লোন অমবু অয়েকপা লাই ওইনা উৎপসি অপাবা মীয়ামগী পুক্নিং চীংশিনবগী খ্বাইদগী শক্তি লৈবা পাম্বৈ অমা মতম পুম্বদা ওইদুনা লাক্লি। অপাবা মীওইশিংবু তেংবাংবা ওইনা ই-পাউ অমবু মিৎনা উবা য়াবা মওংদা পুথোকপগী মতাংদা কার্তুন অসিনা খ্বাইদগী পাম্নবা পাম্বৈ অমনি। সাইন্সতুনগী হীরমদা, দাঃ প্রদীপ শ্রীবাস্তবকী ‘বাই বাই কোরোনা’ অসিনা কার্তুনগী মওংগী তঙাইফদবা লৈহনবা য়াম্না চানবা হীরম কয়া য়াওদুনা অতৈ ময়ামদগী য়াম্না তোঙান্না তারি। য়াম্না চানবা হীরম কয়াগী মতাংদা কার্তুন ময়াম অমা পুন্সিনবা লাইরিক অমনি। তসেংনা, য়াম্না খৌরাংনা ঙাইনবা লাইরিক অমনি”, হায়না বিগ্যান পারাশারগী দাইরেক্তর, দাঃ নকুল পারাশারনা হায়খি।

“বিগ্যান পারাশারনা মমিং চৎপা বিগ্যানগী লাইরিক কয়া থৱাই য়াওনা ফোঙদুনা লাক্লি অমসুং বাই বাই কোরোনা অসিসু কার্তুনগী কেরেক্তরশিংগী খুত্থাংদা লাইচৎ অসিবু নীংথিনা খঙনবা মতম চানা পুথোকপা লাইরিক অমনি। ঙাকথোকপগী খ্বাইদগী কান্নবা খুৎলাইদি খঙবনি অমসুং মসিনা ঐখোয় পুম্নকপু লাইচৎ অসিদগী কনবা ঙম্বা খ্বাইদগী ফবা পাম্বৈ অমনি”, হায়না বিগ্যান পারাশারগী পব্লিকেসন দিবিজনগী মকোক, নিমিশ কপুরনা ফোংদোকখি।

ভারত অমসুং মালেম শিনবা থুংবগী তোঙানবা লোলশিংদা ফংহন্নবা লাইরিক অসিগী ৩.দি.গী মখল অমসু শেম্নবা থৌরাং তৌরি। ‘বাই বাই কোরোনা’ হায়রিবা সাইন্তুন লাইরিক অসিনা চহি, লোল অমসুং লৈবাক্কী ঙমখৈ কয়া লান্না কোবিদ-১৯গী মতাংদা অহেনবা মীয়ামদা ই-পাউশিং খঙহনবা ঙমগনি হায়বগী থাজবা থম্লি।

ই.-বুক্কীদমক্তা মফম অসিদা নম্বীয়ু :

*****