উপ-রাস্ত্রপতিগী লোইশঙ
চাওখৎপা অমদি অকোয়বগী ফীভম য়োকখৎপা অনি অসি পুন্না চৎমিন্নগদবনি – উপ রাস্ত্রপতি
ঐখোয়না মপাঙ্গল কনবা ভারতখক্তা নত্তনা হেন্না শংবা ভারত অমসু মথৌ তাই – উপ রাস্ত্রপতি
ফাইনান্স কম্মিসনশিং অমদি লোকেল বোদীশিংনা খাজনাগী ইন্সেন্তিবশিংগী পাম্বৈনা অশংবা বিল্দিংশিং পুক্নিং থৌগৎকদবনি হায়রি
অশংবা বিল্দিং তঙাই ফদবা ওইহন্নবা খন্নবা মতম ওইরে – উপ রাস্ত্রপতি
মীয়ামদা অশংবা বিল্দিংগী মতাঙদা পাক শন্না খঙহন্নবা ৱাফম থম্লি
অইং অশাগী খল হোংলকপা অসি নুংশা মঙালগুম তশেং তশেংলবা ৱাফম্নি অমদি মসি কোকহন্নবা অকনবা থৌরাং মথৌ তারে – উপ রাস্ত্রপতি
বিল্দিংশিংদা লমদমদুগী ওইবা অমদি অকোয়বগী ফীভমগা চুনবা মচাকশিং শীজিন্নবা ৱাফম থম্লি
কন্সত্রক্সন সেক্তরবু বিল্দিংশিং হেন্না অশংবা, হকচাং ফবা ওইহন্নবা অমদি নুংঙাই য়াইফবা ভারত ওইহন্নবগীদমক লৈঙাক্কা পুন্না থবক তৌমিন্ননবা ৱাফম থম্লি
সি.আই.আই.গী গ্রীন বিল্দিং কংগ্রেস ২০২০ হৌদোকখ্রে
Posted On:
29 OCT 2020 12:29PM by PIB Imphal
ভারতকী উপ রাস্ত্রপতি, শ্রী ভেঙ্কয়া নাইদুনা ঙসি নৌনা শারকপা বিল্দিং খুদিংমক অশংবা অমদি অকোয়বগী ফীভমগা চুনবা ওইহন্নবা ৱাফম খন্নবা মতম ওইরে হায়না ফোঙদোকখ্রে। মহাক্না লৈঙাক্তা, ফাইনান্স কম্মিসনদা অমদি লোকেল বোদীশিংদা তেক্স ইন্সেন্তিবশিং অমদি অতৈ থৌরাংশিংগী পাম্বৈনা গ্রীন বিল্দিং পুক্নিং থৌগৎনবা ৱাফম হৌদোকখ্রে।
সি.আই.আই.গী গ্রীন বিল্দিং কংগ্রেস ২০২০ ঙসি ভর্চুএল ওইনা হৌদোক্লদুনা, উপা রাস্ত্রপতিনা অনৌবা বিল্দিংখক্তা নত্তনা হান্না লৈরিবা বিল্দিংশিংসু ইনর্জী য়াম্না চঙদবা অমদি ঈশিং য়োকপা থৌওংশিং য়াওবা গ্রীন প্রাক্তিসশিং শীজিন্নদুনা অকোয়বগী ফীভমগা চুনহন্নবা নৌনা শেমদোক শাদোকপগী মতাঙদসু পুক্নিং চিংশিনখি।
তুং কোইনা চৎকদবা বিল্দিংশিংবু খাংবা কনবা খুন্নাই অমা শেমগৎপগী মরুওইবা মচাক অমনি হায়রদুনা কার্বোন য়ামদনা চঙবা তেক্নোলোজীশিং পাক্তক্ননা শীজিন্ননবা অমদি থৌওংসিবু য়োকখৎনবা ৱাফম মহাক্না থমখি। “ঐখোয়না মপাঙ্গল কনবা ভারতখক্তা নত্তনা হেন্না শংবা ভারত অমসু মথৌ তাই,” হায়না মহাক্না ফোঙদোকখি।
ইকং, ইচাউ, লম্মৈ চাকপনচিংবা শাথিবা অইং-অশাগা মরী লৈনবা থৌদোকশিং হেনগৎলকপা অসিদা পুক্নিং চিংশিল্লদুনা শ্রী নাইদুনা অইং অশা হোংলকপা অসি নুংশা মঙালগুম্না তশেং তশেংলবা অমনি অমদি মালেমগী লৈবাক পুম্নমক্না মালেমগী ওইনা শাবা হেনগৎলক্লিবা অসি কোকহন্নবা অকনবা অমদি অনৌবা থৌরাংশিং শীজিন্নবা মথৌ তারে হায়না হায়খি।
চাউখৎপা পুরকপদা তুং কোইগদবা থৌওং শীজিন্ননবা ৱাফম থম্লদুনা উপ রাস্ত্রপতিনা হায়খিবদা ঐখোয়গী মাঙদা তারিবা শিংনবদি নহাক্না কমদৌনা চাওখৎপা অমদি অকোয়বগী ফীভম অনিসিবু পুন্না চৎমিন্নগদগে হায়বসিনি। “করিগুম্বা ঐখোয়না মহৌশাগী য়াইফনবা থৌরাং লৌখৎলবদি, মহৌশা লাইরেম্বীনসু মীওইবা খুন্নাইগী য়াইফনবা তৌরক্কনি”, হায়না মহাক্না হায়খি।
বিল্দিং অমসুং শেমগৎ শাগৎপনা মালেমগী ইনর্জীগা মরী লৈনবা সি.ও.২ থাদোকপগী চাদা ৩৯ ওইরি হায়না ফোঙদোক্লদুনা মহাক্না শেমগৎ শাগৎলিবসিগী অকোয়বগী ফীভমদা মপুং ফাবা দি-কার্বোনাইজেসনগী থৌওং অসি খোঙজেল য়াঙখৎহন্নিংবগী অপামবা ফোঙদোকখি।
গ্রীন বিল্দিংগী ৱাখল্লোন শন্দোক্না তাক্লদুনা, শ্রী নাইদুনা ইনর্জী য়াম্না চঙহন্দবগী মথক্তা মসিনা ঈশিং য়াম্না চঙহন্দনবা, নৌথোকহনবা য়াবা ইনর্জী শীজিন্ননবা ফত্ত হৌদি থোকপা হন্থহন্নবা অমদি অকোয়বগী ফীভমগা চুনবা লমদমদুদা ফংবা মচাকশিং শীজিন্নবা পুক্নিং থৌগৎনবগী পান্দম থম্লি হায়না হায়খি।
ঙসি ঐখোয়না শীজিন্নরিবা শেমগৎ শাগৎপগী মচাকশিং অসি তুং কোইগদবা অমদি অকোয়বগী ফীভমগা চুনবা ওইহনগদবনি – মসিনা করিগুম্বা মওং অমত্তদা তুংগী মীরোলনা মখোয়গী মথৌ তাবশিং ফংবা ঙমবগী মতিংদা অকায়বা পীহল্লোইদবনি হায়না মহাক্না ফোঙদোকখি।
গ্রীন বিল্দিংগী ৱাখল্লোন য়োকখৎপগী তঙায়ফদবশিং মীয়ামদা পাক শন্না খঙহনবগী মথৌ তাবা ৱাফম উপ রাস্ত্রপতিনা থমখি। হীরমসিগী মতাঙদা, মহাক্না ইন্দিয়া গ্রীন বিল্দিং কাউন্সিলবু ‘নেত জিরো কার্বোন বিল্দিং’ য়োকখৎনবা কেম্পেন অমা হৌদোক্নবা পাউতাক পীখি। মহাক্না অর্বান প্লান্নরশিং অমদি বিল্দর্স এসোসিএসন ওফ ইন্দিয়া, সি.আর.ই.দি.এ.আই.নচিংবা লূপশিংসু কেম্পেন অসিদা শরুক য়াহন্নিংবগী অপামবা ফোঙদোকখি।
পনবা য়াবা ৱাফমদি নেত জিরো কার্বোন বিল্দিং অমা হায়বসি ইনর্জী য়াম্না চঙদবা অমদি মফমদুদা লৈবা অমদি/ নৎত্রগা অতোপ্পা মফমদা লৈবা নৌথোকহনবা য়াবা ইনর্জীগী হৌরকফম্না মপুং ফানা চলাইবনি।
লৈবাকসিদা খোঙলৈ থুনা ময়োল্লম ওল্লকপগী খোঙজেল অসি পল্লদুনা তুং কোইগদবা চাওখৎপা পুরকপনা ঐখোয়গী লৈবাক শেমগৎপগী মরুওইবা শরুক অমা ওইগদবনি হায়বা মহাক্কী ৱাখল্লোন ফোঙদোকখি। মালেমগী শাবা হেনগৎলক্লিবা অসি থেংনবা হায়বসি হান্নগী মতৌগুম লল্লোন ইতিক ওইনা লৌবা য়ারোই হায়বা ৱাফমসি খঙবা মথৌ তাই হায়না মহাক্না মখা তাখি।
স্মার্ত সিতিজ মিসন অমদি প্রধান মন্ত্রী অৱাস য়োজনা (পি.এম.এ.ৱাই.)গুম্বা থৌরমশিং পল্লদুনা উপ রাস্ত্রপতিনা হায়খিবদা ময়োল্লমশিং চাওখৎপগী হিংবা য়াবা মফম ওইহনবা হায়বসিনা ভারত লৈঙাক্কী খোল্লাউনি।
ভারতনা গ্রীন বিল্দিং ফুতপ্রিন্ত স্কোয়র ফীত বিলিয়ন ৭.৬১গী মথক্তা লৈদুনা মালেমগী মকোক থোংবা লৈবাক মঙাগী মনুংদা য়াওরি হায়বা ৱাফমসিদা মহাক্না নুংঙাইবা ফোঙদোকখি অমদি হেন্না শংবা অমদি হকচাং ফবা ভারত অমা শেমবদা স্তেকহোল্দর খুদিংমক্না লৌখিবা থৌদাংবু থাগৎখি।
ভারত্তা মালেমগী গ্রীন বিল্দিংগী ইহৌ অসি লমজিংনবা মতিং লৈ হায়বা ৱাফম থম্লদুনা, শ্রী নাইদুনা হায়খিবদা হীরম অসিগী মতাঙদা লনাই প্লেয়রশিং অমদি লৈঙাক অনিমক্না পুন্না ইচঙ থৌনা হোৎনমিন্নবা মথৌ তাই। মহাক্না সি.আই.আই.বু পুবা থাংবা ঙমবা য়ুমশা-কৈশাগী প্রোজেক্তশিংদা গ্রীন কনসেপ্ত হাপচিন্নবগীদমক স্তেত লৈঙাকশিং অমদি দেভেলপরশিংগা পুন্না থবক তৌমীন্নবগীদমক থাগৎপা ফোঙদোকখি অমদি কন্সত্রক্সন সেক্তরবু হেন্না শংবা, হকচাং হেন্না ফবা অমদি নুংঙাই য়াইফবা ভারত শেমগৎপদা লৈঙাক্কা পুন্না চৎমিন্ননবা ৱাফম থমখি।
শ্রী নাইদুনা সি.আই.আই.বু ‘গাইদলাইন্স ফোর কোম্বেতিং কোবিদ-১৯ ইন গ্রীন বিল্দিংস’ শেমগৎপগীদমক্তসু থাগৎখি অমদি অফবা থবক অসি মখা চত্থগদবনি অমদি লৈঙাক অমসুং ইন্দস্ত্রীনা লৈবাকসিগী গ্রীন মিসন ফংনবগীদমক পুন্না থবক তৌমিন্নগদবনি হায়বা ৱাফম থমখি।
মহাত্মা গান্ধীনা হায়রমবা ৱাফম পল্লদুনা, উপ রাস্ত্রপতিনা ভারতনা মহাক্কী খুঙ্গঙদা লৈরি অমদি করিগুম্বা ভারতনা চাউখৎকে হায়রবদি ঐখোয়গী খুঙ্গঙশিং নুংঙাই য়াফবা ওইহনগদবনি অমদি ময়োল্লমগী মফমগুম্না তঙায় ফদবা মচাকশিং ফংহনগদবনি। খুঙ্গঙশিংদা অশং অমানগী ফীভম পুরকপা হায়বসি লু-নানবা, হকশেল, সেনিতেসন, ইনর্জী, ঈশিং অমদি মহৈ মশিং ফংহনবা মথৌ তাই হায়না মহাক্না হায়খি।
স্তেত ১১গী খুঙ্গঙ ২৪দা অশং অমানগী থৌরাং পায়খৎনবা সি.আই.আই.গী থৌরাংশিংদা অপেনবা ফোঙদোক্লদুনা শ্রী নাইদুনা সি.আই.আই.বু মখোয়গী খোঙদাফম অহেনবা খুঙ্গঙ অমদি স্তেতশিংদা পাকথোক চাউথোকহন্নিংবগী অপামবা ফোঙদোকখি।
থৌরম অদুদা উপ রাস্ত্রপতিনা কোফী তেবল লাইরিক অমা অমদি হকশেল, লোজিস্তিক্স অমদি নেত জিরো ৱাতরগী রেতিং সিস্তেমশিংসু হৌদোকখি। মহাক্না সি.আই.আই.গী ১২৫শুবা মপোক কূমওনগীদমক্তা তরাউ তয়ামবসু ফোঙদোকখি।
সি.আই.আই.গী হান্নগী প্রেসিদেন্ত অমদি সি.আই.আই.-সোহরবজি গাদ্রেজ গ্রীন বিজিনেস সেন্তরগী চেয়রমেন শ্রী জমসীদ এন. গোদ্রেজ, সি.আই.আই. – ইন্দিয়ন গ্রীন বিল্দিং কাউন্সিল চেয়রমেন শ্রী ভি. সুরেস, কনফিদরেসন ওফ ইন্দিয়ন ইন্দস্ত্রীগী দাইরেক্তর জেনেরেল শ্রী চন্দ্রজীৎ বেনর্জী, সি.আই.আই. – ইন্দিয়ন গ্রীন বিল্দিং কাউন্সিলগী ভাইস চেয়রমেন শ্রী গুর্মিৎ সিংহ অরোরা, গ্রীন বিল্দিং প্রোফেসনেলশিং, সি.আই.আই.গী ওফিসিএলশিং, ইঞ্জিনিয়রশিং, দেভেলপরশিং, বিল্দরশিং অমদি অর্কিতেক্তশিংসু ভর্চুএল থৌরম অদুদা শরুক য়াখি।
মখাদা পীরিবসি মপুং ফাবা ৱারোলনি –
ইচিল ইনাউ পুম্নমক
সি.আই.আই.গী গ্রীন বিল্দিং কংগ্রেস ২০২০ হৌদোকপবা ফংবগী নুংঙাইবা ফাওই।
কন্ফরেন্সি অসিদা খন্ন-নৈনবা অসিনা অনৌবা মীৎয়েং পীগনি অমদি ইন্দিয়ন কন্সত্রক্সন ইন্দস্ত্রীবু হেন্না শংবা ভারত অমা শেমগৎপদা মতেং ওইগনি হায়না ঐনা থাজৈ।
চৎলিবা চহি ২০২০ অসি সি.আই.আই.না ইন্দস্ত্রী অমদি লৈবাকসিগী থৌদাং য়ারকপা চহি ১২৫ ফারে হায়বসিদা ঐঙোন্দা নুংঙাইবা ফাওই।
ঐনা সি.আই.আই.বু মখোয়গী “ইন্দিয়ন গ্রীন বিল্দিং কাউন্সিল’গী খুত্থাঙদা ২০০১দগী হৌনা গ্রীন বিল্দিংগী ইহৌ লুচিংদুনা লাকপগীদমক থাগৎরি। মসি অচুম্বা মায়কৈদা থাংবা খোঙথাং অমনি।
ঐখোয়না মপাঙ্গল কনবা ভারতখক নত্তনা হেন্না শংবা ভারত অমসু মথৌ তাই।
ঙসি ঐখোয়গী মাঙদা তারিবা শিংনবা অসি অদোম্না কমদৌনা চাওখৎপা অমদি অকোয়বগী ফীভম অনি পুন্না চৎমিন্নগদগে হায়বসিনি। মখোয়সি অমগা অমগা তাইওন্নবা নত্তে। করিগুম্বা ঐখোয়না মহৌশাগী য়াইফনবা তৌরবদি মহৌশা লাইরেম্বীনসু মীওইবা খুন্নাইগী য়াফনবা তৌরক্কনি। ঐখোয়গী মীৎয়েঙ মহৌশাগা হেন্না নকশিন্নবরোমদা মায় ওনশিনগদবনি।
বিল্দিংশিং অসি গ্রীনহাউস গ্যাসশিং থাদোকপগী অচৌবা থৌদাং লৌরিবশিংগী মরক্তা অমনি। ঐখোয়না গ্রীন বিল্দিং য়োকখৎনবা থৌরাং খুদিংমক পায়খৎপা মথৌ তাই। ঐনা লৈঙাক্কী লূপশিং, ফাইনান্স কম্মিসনশিং অমদি লোকেল বোদীশিংদা তেক্স ইন্সেন্তিবশিং অমদি অতৈ থৌরাংশিংগী পাম্বৈনা গ্রীন বিল্দিং পুক্নিং থৌগৎনবা পুক্নিং চিংশিল্লি।
ঐখোয় অচৌবা লৈবাক অমনি অমদি ঐখোয়গী মাঙদা শিংনবা কয়া তাদুনা লৈরি। হায়রিবা শিংবশিং অসি লৈঙাক মথন্তনা থেংনবা ঙম্লোই। মসিগীদমক প্রাইভেত অমদি পব্লিক সেক্তরদা লৈরিবা স্তেকহোল্দর পুম্নমক্না খুৎশম্ননা চৎমিন্নবা মথৌ তাই। সি.আই.আই.দা হীরম অসিগী মতাঙদা ৱাখল লৌশিং লৈরি, অদোম অমদি থবকসিদা য়াওরিবা মীওইশিং হীরমসিদা খঙ-হৈরবনি।
ভারতনা গ্রীন বিল্দিংগী খোঙফম স্কোয়র ফীত বিলিয়ন ৭.৬১ লৈদুনা মালেমগী মকোক থোংবা লৈবাক ৫গী মনুংদা অমা ওইরি খঙবদা ঐ নুংঙাইবা ফাওই। মসি তশেংনমক থাগৎনিংঙাই ওইবা অমদি হেন্না শংবা অমদি হেন্না মশা মউ ফবা ভারতগী মিসনদা ভারতকী মরুওইবা মায় পাকপা অমনি। ভারতকী গ্রীন বিল্দিং ইহৌবু অনৌবা থাক অমদা পুখৎলকপগীদমক্তা ঐনা অদোম পুম্নমকপু থাগৎচরি।
অফবা থবক অসি মখা চত্থগদবনি অমদি লৈঙাক অমসুং ইন্দস্ত্রীনা লৈবাক্কী পান্দম অসি ফংনবগীদমক পুন্না চৎমিন্নগদবনি। ঐনা সি.আই.আই.বু ‘গাইদলাইন্স ফোর কোম্বেতিং কোবিদ-১৯ ইন গ্রীন বিল্দিং’ শেম্বগীদমক্তসু থাগৎপা ফোঙদোকচরি।
চুংশিরবা ইচিল ইনাউশিং,
ঐখোয় পুম্নমক্না খঙলিবদুনি, ভারত লৈঙাক্না ভারতপু স্তেকহোল্দর পুম্নমক য়াওরগা মপুং ফানা তুং কোইনা চৎকদবা চাওখৎপা লৈবাক অমা ওন্থোক্নবগীদমক খোঙফম চেৎনা হোৎনরি।
হৌখিবা চহি তরা খরসিদা মীওইবা খুন্নাইনা চাং নাইনা তমথিরবা অইং অশাগী ফীভম মায়োক্নরি। ইকংদগী হৌরগা ইচাউ অমদি লম্মৈ চাকপনচিংবা শাথিরবা থৌদোকশিংনা শোকহল্লবা মফমশিংদা অমাঙ অতা কয়া থোকহন্দুনা শেন্মিৎলোনগী মাঙ-তাকপা থোকহল্লি। অইং অশাগী খল কায়থরকপা অসি নুংশা মঙালগুম তশেং তশেংলবা ৱাফম্নি অমদি মালেমগী লৈবাক পুম্নমক্না মালেমগী শাগৎলকপগী ফীভম অসি কোকহন্নবগীদমক অকনবা অমদি অনৌবা থৌরাং পায়খৎপা মথৌ তারে।
ৱর্ল্দ গ্রীন বিল্দিং কাউন্সিলগী মতুং ইন্না মালেমগী ওইনা ইনর্জীগা মরী লৈননা সি.ও.২ থাদোকপগী চাদা ৩৯দি বিল্দিং অমদি শেমগৎ শাগৎপদগীনি হায়রি। মসি নুংনাংনিংঙাই ওইবা ৱাফম অমনি অমদি লানগী মতৌগুম থেংনবা মথৌ তাই। তানফমসিদা মথৌ তারিবদি বিল্ত এনভাইরনমেন্ততা মপুং ফানা দি-কার্বোনাইজেসন তৌবগী থৌওং অসি খোঙজেল য়াঙ্খৎহনবনি।
ওফিস, অনা লাইয়েংশঙ, মহৈ মশিং, এন্তরতেন্মেন্ত, হোতেল নৎত্রগা য়ুম ওইরবসু অনৌবা বিল্দিং খুদিংমক তঙায়ফদনা গ্রীন ওইহন্নবগী থৌরাং লৌখৎপা অসি লুম্না লৌদুনা খন্নবা মতম ওইরবরা হায়না খল্লি। অনৌবা বিল্দিং খক্তা নত্তনা হান্না লৈরিবা বিল্দিংশিংসু ইনর্জী য়াম্না চঙদবা অমদি ঈশিং য়োকশিনবগী থৌওংশিং য়োকখৎপা গ্রীন প্রাক্তিসশিং শীজিন্নদুনা অকোয়বগী ফীভমগা চুনবা ওইহন্নবা নৌনা শেমদোক শাদোকপগী মথৌ তারে। তুং কোইগদবা বিল্দিংশিং অসি খাঙবা কনবা খুন্নাই অমা শেমগৎপগী মরুওইবা মচাক অমনি।
তশেংবা ৱাফমদি মীয়াম মরক্তা গ্রীন বিল্দিংগী ৱাখল্লোন য়োকখৎনবগী তঙাইফদবদু পাক শন্না খঙহনবা মথৌ তারে।
ইনর্জী য়াম্না চঙদবতা নত্তনা ৱাখল্লোন অসিনা ঈশিং য়াম্না চঙহন্দবা, নৌথোকহনবা য়াবা ইনর্জী শীজিন্নবা, ফত্ত হৌদি হন্থহনবা অমদি লমদমদুদা ফংবা অকোয়বগী ফীভমজা চুনবা মচাশিং শীজিন্নবা পুক্নিং থৌগৎনবা পান্দম থম্লি। ৱাহৈ অমদা তুং কোইগদবা হায়বসিনা মরুওইবা য়ুম্ফম ওইগদবনি।
বিল্দিংশিং অসি গ্রীনহাউস গ্যাস থাদোরকপগী অচৌবা থৌদাং লৌবনা মরম ওইরগা শেমগৎ শাগৎপগী মচাকশিং অকোয়বগী ফীভমগা চুনবা ওইহন্নবা অমদি অইং অশাগী খল কায়থরকপগী চৈথেং কোকহন্নবগীদমক স্তেকহোল্দর খুদিংমক্না পুন্না খুৎশম্ননা হোৎনমিন্নবা মথৌ তাই। ঙসু ঐখোয়না শীজিন্নরিবা শেমগৎ শাগৎপগী মচাক মথুমশিং অসি তুং কোইগদবা ওইহনগদবনি – মসিনা করিগুম্বা মওং অমত্তদা তুংগী মীরোলশিংনা মখোয়গী মথৌ তাবশিং ফংনবগী লম্বীদা অকায়বা পীহল্লোইদবনি।
কার্বোন হন্থনা থাদোকপা তেক্নোলোজীশিং পাক্তক্ননা য়োকখৎকদবনি অমদি শীজিন্নগদবনি। গ্রীন বিল্দিং অমা হায়রগদি ইনর্জী, ঈশিং হন্থনা শীজিন্নগদবনি অমদি গ্রীনহাউস গ্যাস থাদোকপা শাথিনা হন্থহনগদবনি।
ঐনা ইন্দিয়া গ্রীন বিল্দিং কাউন্সিলগী মফমদা ‘নেত জিরো কার্বোন বিল্দিং’ য়োকখৎনবা কেম্পেন অমা হৌদোক্নবা ৱাফম হৌদোকপা পাম্মি। অর্বান প্লান্নরশিং অমদি বিল্দর্স এসোসিএসন ওফ ইন্দিয়া, সি.আর.ই.দি.এ.আই.গুম্বা লূপশিংসু কেম্পেন অসিদা শরুক য়াহনগদবনি। অদোম্না খঙলিবদুনি, নেত জিরো কার্বোন বিল্দিং অমা হায়বসি ইনর্জী য়াম্না চঙদবা অমদি মফমদুদা লৈবা অমসুং / নৎত্রগা অতোপ্পা মফমদা লৈবা নৌথোকহনবা য়াবা ইনর্জীগী হৌরকফম্না চলাইবা ওইগদবনি।
নুংশিরবা ইচিল ইনাউশিং,
মালেমগী শাবা হেনগৎলকপগী ফীভম থেংনবা অসি হান্নগী মতৌগুম লল্লোন ইতিক তৌবা ওইনা লৌবা য়ারোই হায়বসি খঙজিনগদবনি। হৌজিক চৎলিবা চাউখৎপগী চাং অসিদা ভারতকী ময়োল্লমগী মীশিং ২০৩০ ফাওবদা করোর ৫৭কী ময়া অমদি ২০৫০ ফাওবদা করোর ৮৭ য়ৌরগনি হায়না পানরি। মসিগী য়েংলগা তুং কোইগদবা চাউখৎ থৌরাং হায়বসি ঐখোয়গী লৈবাক শেমবগী মরুওইবা শরুক অমা ওইরে।
ঙসি, ভারতকী ময়োল্লমশিংনা ভারতকী জি.দি.পি.গী চাদা ৬৫গৌ থৌদাং য়ারি, অমদি মসি ২০৩০ ফাওবদা চাদা ৭০দা হেনগৎলক্তুনা হান্না খন্নরুদবা মওংদা ভারতকী শেন্মিৎলোন, খুন্নাই অমদি অকোয়বগী ফীভমদা অহোংবা পুরক্কদৌরি।
স্মার্ত সিতীজ মিসন শেমগৎলিবা অসি ময়োল্লমগী চঙদ্রবা য়াদ্রবা মচাক মথুমশিং পীবগা লোয়ননা মীয়ামদা মশক থোকপা পুন্সি, তরু তনানবা অমদি তুং কোইগদবা অকোয়বগী ফীভম পীননবগীদমক্তনি।
ভারত লৈঙাক্কী মরুওইবা খোল্লাউদি ময়োল্লমশিং হিংবা য়াবা চাউখৎপগী মফম ওইহনবনি।
অখন্ননা শেন্মিৎলোন্দা শোত্থনা লৈরিবা কাঙলূপশিং অমদি শেন্থোক লম্বী পীকচবা কাঙবুশিংগীদমক লৈফম চাফম মরী লৈনবা ময়োল্লমগী মচাক মথুমশিংগী দিমান্দ হেনগৎলকপগা লোয়ননা ভারত লৈঙাক্না প্রধান মন্ত্রী অৱাস য়োজনা (পি.এম.এ.ৱাই.)গী খুত্থাঙদা পুম্নমক্কী পুবা থাংবা ঙমবা য়ুম-কৈ শাননবা খোঙফম চেৎনা থবক পায়খৎলি।
সি.আই.আই.না স্তেত লৈঙাকশিং অমদি দেভেলপরশিংগা খুৎশম্নদুনা পুবা থাংবা ঙমবা য়ুম-কৈ শাবগী প্রোজেক্তশিংদা গ্রীন কন্সেপ্ত হাপচিল্লি খঙদবা ঐঙোন্দা হরাওবা ফাওই।
মহাত্মা গান্ধীনা হায়বিম্মী মদুদি ভারতনা খুঙ্গঙদা লৈরি। ঐখোয়গী মীশিংগী চাদা ৫০ হেনবনা লৌউ শিংউদা তাংদুনা লৈবগা লোয়ননা খুঙ্গঙগী শেন্মিৎলোনদা ইনোৎ পীবা হায়বসি য়াম্নমক মরু ওইরি। করিগুম্বা ভারতনা চাওখৎকে হায়রবদি, ঐখোয়গী খুঙ্গঙশিং নুংঙাই য়াইফহনবা তাই অমদি ময়োল্লমগী মফমশিংদা ফংবগুম্না চঙদ্রবা য়াদ্রবা মচাক মথুমশিং ফংহনবা তাই।
খুঙ্গঙশিংদা অশং অমান পুরকপা হায়বসি লু-নানবা, হকশেল, সেনিতেসন, ইনর্জী, ঈশিং অমদি মহৈ মশিংগী লমদমা খুদোংচাবা ফংহনগদবনি। লৈবাক শিনবা থুংনা স্তেত ১১গী খুঙ্গঙ ২৪দা সি.আই.আই.না গ্রীন থৌরাংশিং পায়খৎনবা থৌরাং য়াৎলি হায়বসি খঙবদা নুংঙাই। সি.আই.আই.না মখোয়ঘী খোঙপম অতৈ খুঙ্গঙশিং অমদি স্তেতশিংদসু শন্দোকহন্নিংবগী অপাম্বা ঐঙোন্দা লৈ।
নুংশিরবা ইচিল ইনাউশিং,
ভারত্তা মালেমগী গ্রীন বিল্দিংগী ইহৌ অসি লমজিংনবা মতিং লৈ অমদি হীরম অসিগী মতাঙদা লনাই প্লেয়রশিং অমদি লৈঙাক অনিমক্না পুন্না ইচঙ থৌনা হোৎনমিন্নবা মথৌ তাই। ঐনা কন্সত্রক্সন সেক্তরবু হেন্না শংবা, হকচাং হেন্না ফবা অমদি নুংঙাই য়াইফবা ভারত শেমগৎপদা লৈঙাক্কা পুন্না চৎমিন্ননবা ৱাফম থমজরি।
ঐনা অমুক্কা হন্না অদোম পুম্নমক্কী মফমদা তুং কোইনা চৎকদবা ভারত অমা শেমগৎপদা অদোম্না য়ারিবা থৌদাংশিংগীদমক্তা থাগৎপা ফোঙদোকচরি।
কোফী তেবল লাইরিক অমা অমদি হকশেল, লোজিস্তিক্স অমদি নেত জিরো ৱাতরগী রেতিং সিস্তেমশিংসু হৌদোক্লিবসিগীসু ঐনা নুংঙাইবা ফোঙদোকচরি।
ঐনা গ্রীন বিল্দিং কংগ্রেস ২০২০বু চাউনা মায় পাক্লসনু হায়না য়াইফ-পাউজেল পীজরি।
ময়ামবু থাগৎচরি!”
****
(Release ID: 1668471)
Visitor Counter : 124