নেস্নেল ফর্তিলাইজর লিমিতেদ (এন.এফ.এল.)না সি.সি.আই.গা লোয়ননা ঙরাং রাজস্থানগী শ্রী গঙ্গানগরগী এগ্রীকলচর রিসর্চ সেন্তরদা নোঙমগী ওইবা লৌ-উবশিংগী ত্রেনিং প্রোগ্রাম অমা শিন্দুনা পাঙথোকখ্রে।

শ্রীগঙ্গানগর, বিকানের ইমসুং হনুমানগর জিলাদগী লৌ-শিংউবদা ময়ামগা মান্নবা থৌওং শিজিন্নবা অপুনবা লৌউবা ৭৫না প্রোগ্রাম অসিদা শরুক য়াখি। এগ্রীকলচর সাইন্তিস্তশিংনা মখোয়দা খ্বাইদগী অনৌবা থৌওংশিংগী মতাংদা তাকপী-তম্বীখি। মসিনা লৌউবশিংবু পোত্থোক থাবদা চাদিং তৌবগী চাং হন্থহন্দুনা অফবা অমসুং অহেনবা চাগা তানবা ঙমহনগনি।

ত্রেনিংগী মনুংদা, সাইন্তিস্তশিংনা লশিং থাবা লৌউবশিংনা থেংনবা তোঙান-তোঙানবা খুদোংচাদবশিংগী মতাংদা ৱারোইশিন পীখি। কত্তন কোর্পোরেসন ওফ ইন্দিয়া অমসুং নেস্নেল ফর্তিলাইজরস লিমিতেদকী ওফিসিএলশিংনা লৌউবশিংদা অনৌবা খুৎশু-খুৎলায় শিজিন্নদুনা মখোয়গী মহৈ-মরোইশিং হেন্না পুথোক্নবা অমসুং মগুন লৈহন্নবা পুক্নিং থৌগৎখি।

এন.এফ.এল.গী জোনেল মেনেজর, শ্রী দিলবাগ সিংহ অমসুং কত্তন কোর্পোরেসন ওফ ইন্দিয়াগী চীফ জেনেরেল মেনেজর, শ্রী নীরজ কুমার ভৎ লশিং হেক্নবা মেছিন শিজিন্নদুনা লশিং হেকপগী থৌওং পাঙথোক্তুনা লৌউবশিংদা উৎখি। থৌরম অসিদা, এন.এফ.এল.না শ্রী শরুক য়ারিবা লৌউবশিংদা লশিং হেক্নবা মেছিন ৭৫ লেম্না পীখি। শ্রী ভৎনা মিৎয়েং চঙলদুনা হায়খিবদা কৈথেলদগী নীংথিবা লশিংগী মমল ফংগে হায়রবদা মসিবু থাবা মতমদা নুংশিত্তা য়াওবা ঈশিংগী চাং অসি য়ামহল্লোইদবনি হায়না হায়খি।

শ্রী দিলবাগনা লৌউবশিংদা মখোয়গী লৈহাওগী চাংয়েং তৌবগী পাউদমদা য়ুম্ফম ওইদুনা মখোয়গী মহৈ-মরোংশিংগী হার শিজিন্ননবা পুক্নিং থৌগৎখি। মহাক্না লৌউবশিংনা থারিবা তোঙান-তোঙানবা মহৈ-মরোংশিংগী হার শিজিন্নবদা খল-মান্ননবা মিৎয়েং চঙখি অমসুং থৌওং অসি ইন্দুনা চৎলবদি হারদা তৌবা চাদিং অসি হন্থহন্দুনা চাগাদা ওইনা হেনগৎহনবা য়াগনি হায়বগী ৱাফমসু থমখি।

মনা-মশিং ব্রীদ তৌবগী সাইন্তিস্ত দাঃ বিজয় প্রকাশনা শ্রী গঙ্গানগর অমসুং রাজস্থানগী থংনবা জিলাশিংগী অইং-অশাগা চান্নবা খ্বাইদগী ফবা তোঙান-তোঙানবা মহৈ-মরোংশিংগী অকুপ্পা ৱারোল কয়া পীখি। মহাক্না লৌউবশিংগী চাগা হেনগৎপগী মতাংদা মিৎয়েং চঙলদুনা মখোয়না খ্বাইদগী চান্নবা অমসুং পোত্থোক য়ামগদবা লশিংগী মখল খন্দুনা অমসুং মসি থাবদা খ্বাইদগী নৌবা তেক্নোলোজী শিজিন্নবগী মতাংদা ৱাফম থমখি। দাঃ বিজয়না মনা-মশিং থাবগী থৌওংশিং নীংথিনা শেন্নদুনা (মসিদা লশিং থাবদা চঙবা থৌওং খুদিংমক মনুং চল্লবনি) মখোয়গী চাদিং হন্থহনবা অমসুং চাগা হেনগৎপগী মতাংদসু অহেনবা মিৎয়েং চঙখি।

প্রোগ্রাম অসিবু হৌদোকপা ওইনা, শ্রী দিলবাগনা এন.এফ.এল.গী তোঙান-তোঙানবা পোত্থোকশিং, মিং ওইনা পল্লবদা হার (য়ুরিয়া, দি.এ.পি., এম.ও.পি. অমসুং এন.পি.কে.), মরু, এগ্রো-কেমিকেল, সিতী কম্পোস্ত, বাইও-ফর্তিলাইজর অমসুং বেন্তোনাইৎ সলফরনচিংবা কয়াগী মতাংদা পাউদমখি। মহাক্না কম্পেনী অসিনা পায়খৎলিবা তোঙান-তোঙানবা সি.এস.আর.গী থবকশিংগী মতাংদসু তমখি।

এন.এফ.এল. অসি কেমিকেলস অমসুং ফর্তিলাইজর মন্ত্রালয়গী মখাদা লৈবা পব্লিক সেক্তরগী অন্দর্তেকিং অমনি।

*****