কেন্দ্রগী দোনরগী রাজ্য মন্ত্রী (ইন-চার্জ) দোক্তর জিতেন্দ্র সিংহনা ব্রিতিস লৈঙাক অমসুং লনাই সেক্তরশিংদা ভারতকী অৱাং-নোংপোক লমদমদা লৈরিবা চাউরবা লল্লোন ইতিক্কী মতিংবু শীজিন্ননবা ৱাফম হৌদোকখ্রে‍। ব্রিতিস হায় কমিসনগী ওফিসিএলশিংগা পাঙথোকখিবা ভর্চুএল মীফম অমদা মহাক্না হায়খিবদা মশক থোকপা দিমোক্রেসী অনী, ভারত অমসুং য়ু.কে.না নাকল অনিগী কান্নবা লল্লোন ইতিক্কী মরী লৈরি অমদি অৱাং-নোংপোক লমদমদা লৈরিবা অনৌবা খুদোংচাবশিং থিমিন্নদুনা শীজিন্নমিন্ননবগীদমক পুন্না থবক তৌমিন্নবা য়াই‍। কোবিদ মতুংদা শেন্মিৎলোন, লল্লোন ইতিক, সাইন্তিফিক রিছর্চ অমসুং অতৈ তোঙান তোঙানবা খেন্নবা হীরমশিংদা অনৌবা মতিং কয়াগা লোয়ননা অৱাং-নোংপোক লমদমদা অনৌবা মশক মওং অমা লাক্লগনি অমদি মদু ভারত অমসুং য়ু.কে. অনিমক্কী কান্নগদবা ফীভম ওইগনি‍।

ব্রিতিস ওফিসিএলশিংনা অৱাং-নোংপোক স্তেতশিংগী খুৎশা হৈবগী পোত্থোকশিং, উহৈ-ৱাহৈ, মনা মশিং অমসুং মরুউ-মরাংবু থাক ৱাংনা থাঙ্গত্তুনা মখোয়বু মালেমগী কৈথেলদা ব্রান্দ তৌদুনা য়োন্নিংবগী অপাম্বা ফোঙদোকখি‍। ব্রিতেন অসি এগ্রি-তেক্কী লমদা লময়ানবা অমনি অমসুং হরিয়ানাদা চানবা চীঞ্জাকশিং প্রোসেস তৌনবগীদমক পায়খৎখিবগুম্না লমদম অসিদসু কোল্দ চেনশিং শেমগৎপা মখোয়না ঙমগনি হায়না ফোঙদোকখি‍।

দোক্তর জিতেন্দ্র সিংহনা লমদমল অসিগী স্তেত ৮মক্তা সাইন্স অমসুং মেথমেতিক্স তম্বিনবগীদমক এজুকেসন সেক্তরদা খুৎশম্ননা চৎমিন্ননবগী ব্রিতিস কাউন্সিলনা হৌদোরক্লিবা ৱাফমবু তরাম্না ওকখি অমদি খুৎশম্ননা চৎমিন্নরিবা অসিবু অনৌবা থাক অমদা পুখৎনবগীদমক্তা অথুবদা নোর্থ ইস্তর্ন কাউন্সিলগা এম.ও.য়ু. অমা খুৎয়েক পীনরগনি‍। কাউন্সিল অসিনা লমদমসিদা লৈরিবা য়ুনিভর্সিতীশিং অমসুং তেক ইন্সতিত্যুৎশিংগা, মরুওইনা আই.আই.তি গুৱাহাতিগা থবক তৌমিন্ননিংবগা অপামবসু ফোঙদোকখি‍।

হৌখিবা চহি তরুকসিদা, অৱাং নোংপোক লমদমনা মমাঙদা পন্থহৌবা কয়া ফুক্কৎলক্তুনা অহানবা ওইনা প্রধান মন্ত্রী নরেন্দ্র মোদীগী লুচিং মখাদা লমদম অসি লৈবাক্কী মফম অতৈগা মান্নবা মীৎয়েং ফংলে হায়না দোক্তর জিতেন্দ্র সিংহনা হায়খি‍। মসিনা মীয়ামগী মরক্তা থাজবা পীবতা নত্তনা ভারতকী অতৈ মফমশিংগী অমদি নোংপোক ঙমখৈগী ৱাংমদা লৈরিবা লৈবাকশিংগা তোঙান তোঙানবা থাক্তা চৎমিন্নবগী মতিংসু হেনগৎহল্লে‍।

কেঅৱাং নোংপোক লমদম অসি খা নোংপোক এসিয়ন লৈবাকশিংগী চাউখৎলক্লিবা শেন্মিৎলোনগী হোজঙ ওইবা মরম্না অসিনগা লল্লোন ইতিক্কী মরী শেমগৎপদা লমদমসিগী অখন্নবা থৌদাং লৈ হায়না মন্ত্রীনা হায়খি‍। প্রধান মন্ত্রী শ্রী নরেন্দ্র মোদীনা মায়কৈ কয়াগী তেংবাংনবগী অনৌবা থাক ফংবা ঙম্নবগীদমক “লুক ইস্ত” পোলিসীবু “এক্ত ইস্ত” ওন্থোকখ্রে হায়না মহাক্না হায়খি‍।

লম্বী-থোংগী ফীভমগী মতাঙদা পল্লদুনা, দোক্তর জিতেন্দ্র সিংহনা হায়খিবদা হৌখিবা চহি তরুকসিদা, লম্বী, রেল অমসুং নোংথক্কী চত্থোক চৎশিনগী মতাঙদা মশক থোক্না ফীভম ফগৎলক্তুনা লমদমসিদা খক্তা নত্তনা লৈবাক শিনবা থুংনা মী চত্থোক চৎশিন তৌবা অমদি পোৎ-চৈ পুথোক পুশিন তৌবদা নুংঙাইহল্লে‍। প্রধান মন্ত্রী নরেন্দ্র মোদীগী লুচিং মখাদা ফংবা ঙমখিবা ইন্দো-বঙ্গলাদেশ ত্রীতী ফোর এক্সচেঞ্জ ওফ এনক্লেব্সনা হান্না অৱাবগী মশক ওইরমবা ইজ ওফ বিজিনেস, ইজ ওফ মুভমেন্ত অমসুং ইজ ওফ কম্ম্যুতিংগীদমক খোঙফম শেমখ্রে‍। য়াম্না থুনা বঙ্গলাদেশ অমসুং ত্রিপুরাগী মরক্তা ত্রেন চেলহন্দুনা অনৌবা পন্দুপ অমা হৌরগনি অমদি লমদমসিগী মফম পুম্নমকপু সমুদ্রগী হিথাংফম য়ৌনবা লম্বী ফংহন্দুনা লমদম অসিদা চাউখৎপগী অনৌবা ময়োল অমা হাংদোক্লগনি‍ হায়না মহাক্না ফোঙদোকখি‍। পোৎ পুথোক পুশিনগী অতোপ্পা পাম্বৈ হায়বদি লমদমসিগী অকোয়বগী লৈবাকশিংগা শম্নহনগদবা লল্লোন ইতিক অমসুং পোৎ পুথোক পুশিনগী হেন্না হোঙবা লম্বী অমা কংফাল মনুংগী ঈশিং লম্বী (ব্রহ্মপুত্রদগী বে ওফ বেঙ্গল ফাওবা) য়াত্থোক্নবা ভারত লৈঙাক্না লেপ্পা নাইদনা হোৎনরিবা অসিগী মতাঙদসু মহাক্না পনখি‍। মসিনা  ঙমখৈ লান্না, , মরুওইনা ঐখোয়গী নোংপোক্কী য়ুম্লোন্নবশিংগা চ্থবা লল্লোন ইতিক্কী ফীভমদা চাউনা ইনোৎ হাপ্লগনি হায়না মহাক্না ফোঙদোকখি‍।

হোর্তিকলচর, চা মনা, ৱা, ওক লোইবা, মুগা তিন য়োকপা, শিং, চম্প্রাগুম্বগী পোত্থোকশিংগী সেক্তরশিংদা মপান্দা থাদোকপগী চাউরবা মতিং লৈ হায়না দোক্তর জিতেন্দ্রনা ফোঙদোকখি‍। মহাক্না অৱাং নোংপোক লমদমদা মতিং লৈনা কোরোনা মেনেজ তৌনবগী মতাঙদা ব্রিতিস ওফিসিএলশিংগী পুক্নিং চিংশিনখি অমদি কোবিদ মতুংদা লমদম অসি লল্লোন ইতিক্কী অমদি লমকোয়বশিংগী পন্থুংফমগী অচৌবা মফম অমা ওইনা লিৎখৎলক্কনি হায়না ফোঙদোকখি‍।

<><><><><>