স্তীল মন্ত্রালয়না কনফেদেরেসন ওফ ইন্দিয়ন ইন্দস্ত্রী (সি.আই.আই.)গা খুৎশম্নদুনা ‘আত্মানির্ভর ভারতঃ খুঙ্গংগী শেন্মিৎলোন, লৌউ-শিংউবা, খুঙ্গং চাউখৎপা, দাইরিয়িং অমসুং ফুদ প্রোসেসিংগী হীরমশিংদা স্তীল শিজিন্নবা হেনগৎহনবা’গী মতাংদা ওক্তোবর ২০, ২০২০দা ৱেবিনার অমা শিনগনি। পেত্রোলিয়ম, নেচরেল গ্যাস অমসুং স্তীলগী মন্ত্রী শ্রী ধর্মেন্দ্র প্রধান্না ৱেবিনার অদুগী অথোয়বা মীথুংলেন ওইগনি। খুঙ্গং চাউখৎপা, লৌউ-শিংউবা অমসুং লৌউবশিংগী য়াইফ-য়ুম্বাল, পঞ্চায়তী রাজ অমসুং ফুদ প্রোসেসিং ইন্দস্ত্রীগী মন্ত্রী শ্রী নরেন্দ্র সিংহ তোমারসু থৌরম অদুদা গেস্ত ওফ হোনর ওইনা শরুক য়াগনি। স্তীলগী রাজ্য মন্ত্রী শ্রী ফজ্ঞান সিংহ কুলাস্তেনা থৌরম অসিদা অখন্নবা ৱারোল খরা থমগনি। ৱেবিনার অসিগী পান্দমদি খুঙ্গং চাউখৎপগী সেক্তরদা হৌজিক্কী অমসুং তুংদা ওইরক্কদবা স্তীল অমসুং স্তীলগী পোত্থোকশিংগী তঙাই ফদবশিংবু মশক খঙদোকপনি অমসুং খুন্নাইগী/মীয়াম্না পুন্নবা শিজিন্নবা মফমশিংদা স্তীলনা মপুং ওইবা মশক-মওংশিং, ঈশিং থম্নবা ফেসিলিতীশিং, ফৌ থম্নবা সিলোস, কম্মন গ্রেন স্তোরেজ ফেসিলিতীশিং অমসুং য়ুমদা শিজিন্নবা ঈশিং হাপ্নবা দ্রমশিংনচিংবা স্তীলগী পোত্থোকশিং শিজিন্নবা অমসুং মসিগী কান্নবশিংগী মতাংদা মীয়ামদা খঙবা হেনগৎহনবনি।

ৱেবিনার অসিনা স্তীলগী পোত্থোকশিং লৈবদা থেংনবা খুদোংচাদবশিং অমসুং ভারতকী য়োৎ অমসুং স্তীলগী ইন্দস্ত্রীশিংনা হৌজিক লৈরিবা অপাম্বশিং পীবা, তুংদা পাকথোক-চাউথোকপগী থৌরাংশিং, অনৌবা পোত্থোকশিং শেম-শানবা মেন্যুফেকচরিং অমসুং আর. অমসুং দি.গী মতিকশিংগী মতাংদা লৈরিবা তৌবা ঙম্বশিংগী মতাংদা কুপ্না খন্না নৈনগনি। ৱেবিনার অসিদা খুঙ্গং চাউখৎপগী মরু ওইবা এজেন্সীশিংগী মথক্তা কেন্দ্র অমসুং রাজ্য সরকারগী খুঙ্গং চাউখৎপগী মরু ওইবা মন্ত্রালয়শিংগী সেক্রেতরীশিং য়াওবা  সেক্রেতরীশিংগী পেনেল অমসুং রাজ্যশিংগী পেনেলশিংসু য়াওগনি।

শেমগত-শাগৎপা, ইনফ্রাস্ত্রকচর, পোত্থোক পুথোকপা, রেলৱেজ, থাউ অমসুং গ্যাস, দিফেন্স অমসুং খুঙ্গং অমসুং লৌউ-শিংউবনচিংবা শাহৌ লৌবগী হীরমশিংদা মরু ওইবা থৌদাং লৌরিবা অসিনা মরম ওইদুনা ভারতপু ত্রিলিয়ন দোল্লর ৫গী শেন্মিৎলোন অমা ওইহনবদা স্তীলনা মরু ওইবা থৌদাং লৌগনি। অদুবু মালেমগী খ্বাইদগী অনিশুবা চাউবা স্তীল পুথোকপা লৈবাক অমা ওইজরবসু ভারতকী চহিগী ওইবা পর কেপিতা স্তীল শিজিন্নবগী চাং অসি কিলোগ্রাম ৭৪.১নি অমসুং মসি মালেমগী ওইবা চাংচৎকী (কিলোগ্রাম ২২৪.৫) শরুক অহুম থোকপগী অমখক্তনি। অর্বানগী মফমশিংদা স্তীল শিজিন্নবগী চাংদগী খুঙ্গংগী মফমদা শিজিন্নবা অসিনা য়াম্না তাথৈ। লৈবাক অসিদা ইং ২০১৯দা ওইরিবা খুঙ্গংগী পর কেপিতা স্তীল শিজিন্নবা অসি লৈবাক্কী ওইবা চাংচৎ (কিলোগ্রাম ৭৪.১)কা চাংদম্নবদা চাউরাক্না কিলোগ্রাম ১৯.১নি। খুঙ্গংগী ওইনা স্তীল শিজিন্নবগী চাং অসি য়ুম শাবদা চাউরাক্না ৫৪%, খুন্নাইগী ওইনা শেম-শাগৎপদা ১০%, থবক্তা শিজিন্নবগী (লৌউ-শিংউবদা মরু ওইনা শিজিন্নবা) ২০%, উপু-কাংথোল, গারি অমসুং য়ুমদা শিজিন্না পোত্থোকশিংদা ১৬% মুক ওই হায়না পানরি। মরম অদুনা কেপাসিতী এক্সপান্সন্দা মতেং পাংবগী মথক্তা স্তীল মন্ত্রালয়না লৈবাক অসিদা স্তীল শিজিন্নবগী অপাম্বা হেনগৎহন্নবা খোঙথাং কয়া অমা লৌখৎলি অমসুং মসিগীদমক্তা মরী লৈনবা মন্ত্রালয়শিংদা থবক পায়খৎমিন্নরি। ৱর্কশোপ/ৱেবিনার কয়া অমা রেলৱে মন্ত্রালয় অমসুং ঙাক-শেল মন্ত্রালয় লোয়ননা ফেব্রুৱারি ১৭, ২০২০দা, পি.এন.জি. মন্ত্রালয়গা জুন ১৬, ২০২০দা অমসুং এম.ও.ঐচ.য়ু.এ. অমসুং সিবিল এবিএসন মন্ত্রালয়গা লোয়ননা ওগস্ত ১৮, ২০২০দা মমাংদা পাঙথোকখ্রবনি।

****