কেন্দ্রগী হকশেল অমসুং য়াইফ-য়ুম্বাল মন্ত্রী দাঃ হর্শ বর্ধন্না ঙসি ভিদিও কনফরেন্সিংগী খুত্থাংদা কোবিদকা চুনবা লিচৎ-শাজৎশিং ইনবগী “জন আন্দোলন”গী মখাদা পাঙথোকপা থবক-থৌরমশিং য়েংশিনবগী মীফম অমা মফম অসিদা এ.আই.আই.এম.এস. খুদিংমক্কী অমসুং কেন্দ্র সরকারগী হোস্পিতালশিংগী মকোকশিংগা লোয়ননা ফমখ্রে।

লাক্কদৌরিবা থা খরা অসিদা লৈবাক পুম্বনা অপুনবা ওইনা লায়চৎ অসিবু থেংনমিন্নবগী মরু ওইবশিংগী মতাংদা পল্লদুনা দাঃ হর্শ বর্ধন্না হায়খি, “ঐখোয়না কোবিদ-১৯গা লান্থেংনবা অসিগী তরাসুবা থাদা চঙশিল্লক্লি। ঐখোয়না অখঙ-অহৈশিংগা লোয়ননা অহানবা মীফম পাঙথোকখিবা অসি জনুৱারি ৮দনি। মদুদগী হৌনা লাকিবা লম্বী অসি অৱাবনা থল্লি। অদুবু ঙসিদি ঐখোয়না কোবিদকী মায়োক্তা থেংনরিবা লান অসিগী মনুং চন্না ফমুং লাখ ৯০ হেনবা, ক্বারেন্তাইন সেন্তর ১২,০০০ হেনবা অমসুং লেব ১৯০০ হেনবগী ইফ্রাস্ত্রকচর শাবা ঙমখ্রে হায়না চাউথোক্না হায়বা ঙম্লে”। মহাক্না কোবিদকী লান্মী খুদিংমক্না অৱাবা লৈতনা অমসুং নীংহন্নবা লৈতনা হোৎনরিবা থবকশিংগীদমক্তা থাগৎপা ফোঙদোকখি অমসুং অতোপ্পা মীওইশিংগী পুন্সি কন্নবা মশাগী মপুন্সি কত্থোকখ্রবা লান্মীশিংগীদমক্তসু অৱাবা ফোঙদোকখি।

মহাক্না হায়খিবদা, “হরাও-কুমহৈগী মতম অমসুং নীংথমথা লাক্কদবা অসিনা মথংগী থা অনিগা তঙখায় অসি ঐখোয়না কোরোনাগা লান্থেংনরিবা অসিগী য়াম্না অরুবা মতম ওইগনি। ঐখোয়না চেকশিন্না লৈরিবা অসিবু লেংদনা অদুমক লৈবা অসিদি মীয়ামগী থৌদাংনি অমসুং কোবিদকা চুনবা লিচৎ-শাজৎশিং ইন্দুনা লায়না অসি শন্দোকপা থীংশি”।

থা অসিগী ৮দা হৌদোকখিবা ‘জন আন্দোলন’গী শরুক অমা ওইনা লৈবাক শিনবা থুংবগী মীয়াম্না প্রধান মন্ত্রীনা লাওরিবা খোল্লাও অসিগী মতুং ইনবীয়ু হায়রদুনা কেন্দ্রগী হকশেল মন্ত্রীনা মীয়ামদা কোবিদকা চুনবা লিচৎ-শাজৎশিং ইন্দুনা চৎপীয়ু হায়খি। মহাক্না হায়খি, “ ভাইরস অসিনা মালেম শিনবা থুংববু শাথীনা শোকহল্লে। অদুবু চেকশিনবগী ইচম চম্বা থৌওংশিং খরনা কোরোনা ভাইরস অসিবু লাকশিনবদসু য়াম্না মতেং পাংলি। মীয়াম তিনবা মফমদা মাস্ক উপ্পা, খুৎশা অমসুং নিংশা হোনবগী চৎনবী ইনবা অসিনা সোসিএল বেক্সিনগী মরু ওইবা মগুনশিংনি”। লায়না অসিবু শন্দোকপা থিংবদা সোসিএল দিস্তেন্সিং তৌবনা তেংবাংবা অসিগী মতাংদা মহাক্না মীৎয়েং চঙখি। কেন্দ্রগী মন্ত্রীনা লৈবাক অসিদা লায়না অসিনা শন্দোকপগী পরিং অসিবু থুগায়নবা মেদিকেল ইন্সতিত্যুসনশিংগী মকোক-থোংবশিংনা সোসিএল বেক্সিনগী মরু ওইবশিংগী মতাংদা মীয়ামদা খঙহন্নবা হোৎনবদা মাংজিল থানা চৎনবা হায়খি।

ভারতনা কোবিদ-১৯গা লান্থেংনরীবা অসিগী মতাংদা দাঃ হর্শ বর্ধন্না হায়খি, “কোবিদ লায়েংবগী হীরমশিংদা ভারতনা মশক থোকপা থৌওং কয়া লেপ্তনা পাঙথোক্লি। ঐখোয়গী নাবা ফবগী চাং অসিনা মালেমগী খ্বাইদগী ৱাংবা ওইরি অমসুং ফেতালিতী রেৎ অসিনা মালেমগী খ্বাইদগী নেম্বগী মনুংদা চল্লি। এক্তিব কেসকী মশিংসু য়াম্না থুনা হন্থরক্লি। প্রধান মন্ত্রীগী লুচিং মখাদা পাঙথোকপা কোবিদ-১৯ লাকশিনবগী থৌরাংশিং অসি রাজ্য অমসুং য়ু.তি.শিংনা নীংথিনা ইন্দুনা মাই-পাক্না পাঙথোক্লিবা অসিনা য়াৎলিবা থৌরাংশিং অসি অচুম্বনি হায়বা তাক্লে। ঐখোয়না ঐখোয়গী তেস্ত তৌবগী মতিকসু হেনগৎহনবদগী ঙসিদি করোর ৯ হেনখ্রে। ভারত অসি হান্নদি মীরমদগী লৈরম্বা মাস্ক অমসুং পি.পি.ই. পুত্থোকপগী মতাংদা হৌজিক্তি মরোমদোম লেপচবা ঙম্লে।

মহাক্না মেদিকেল ইন্সতিত্যুৎকী মকোকশিংদা লুচিংবগী থৌদাং লৌদুনা মীয়াম্বু ইথিল পীদুনা অমসুং মরু ওইবা মীওইশিং, লোকেল এন.জি.ও.শিং, মহৈলোয়শঙনচিংবা মফমশিংগা মীফম পাঙথোকমিন্নদুনা মীয়ামদা হীরম অসিগী মতাংদা খঙহনবগী থৌওং কয়া পাঙথোক্নবসু হায়খি।

****