দিজিতেল ওইনা হোমগী রাজ্য মন্ত্রী শ্রী জি. কিসন রেদ্দিনা ২১সুবা ওল ইন্দিয়া কনফরেন্স ওফ দিরেক্তরস, ফিঙ্গরপ্রিন্ত বিউরো ২০২০ হৌদোকখ্রে অমসুং থৌরম অসিদা নেসনেল ক্রাইম রেকোর্দস বিউরো(এন সি আর বি)না লিংখৎপা ই-সাইবর লেব অমসু শঙ্গাখ্রে

শ্রী জি.কিসন্না রেদ্দিনা হায়খি মীহাৎ-মীপুন অমসুং কিহন-খঙহনবগী থবকশিংদা প্রধান মন্ত্রী শ্রী নরেন্দ্র মোদীগী সরকারনা খাংদুনা লৈথোক্তে। য়ুনিয়ন হোম মিনিস্তর অমিত সাহগী লুচিং মখাদা ঐখোয়গী পান্দমদি মীহাৎ-মীপুন লৈতবা ভারত অমা শেমগৎপনি। মীহাৎ-মীপুনগী থৌদোক অমা কাংলুপ-ফরুপ, লাইনিং নৎত্রগা লমদম অমগী প্রিজমদগী য়েংবদা সরকারনা থাজবা লৈতে, মীহাৎ-মীপুন অসি মীওইবা খুন্নাই অমসুং শান্তিগী মায়োক্তনি অমসুং নুপীশিং অমসুং তোল্লবশিংগী মথক্তা চৎথবা মীহাৎ-মীপুনশিং সরকারনা কৈদৌঙৈদা খাংদুনা লৈথোক্লোই অমসুং অৱাবা তারবশিং অথুবদা অচুম্বা ফংহন্নবা থবক খুদিংমক পায়খৎকনি।

মহাক্না মখা তানা হায়খি লো অমসুং ওর্দর অসি রাজ্যগী মথৌ ওইরবসু, মীহাৎ-মীপুন য়েংশিনবা অমসুং খোঙ্গুল লিবা, পুলিস ফোর্সশিং মতমগা চুন্না শেমগৎপা, ত্রেনিং পীবা অমসুং পুলিসকী থবকশিং ফিবম ফগৎনবা রাজ্য সরকারশিংদা মতেং পাংবদা কেন্দ্র সরকারনা মরুওইবা থৌদাং অমা লৌরি। পুলিস ফোর্সশিং মতমগা চুনবা মওংদা শেমগৎপগী মরুওইবা অদুদা য়ুনিয়ন হোম মিনিস্তর অমিত সাহনা মিৎয়েং চঙলে। শেনবা চহি ২০১৯-২০দা ভারত শীনবা থুংনা পুলিস ফোর্সশিং মতমগা চুনবা মওংদা শেমগৎনবা ভারত সরকারনা লুপা করোর ৭৮০ থাদোকখ্রে।

ফিঙ্গর প্রিন্তশিংগী মরুওইবা পল্লদুনা শ্রী রেদ্দিনা হায়খি মসিগী অঙকপা মশক, কুইনা লৈবা ঙম্বা, মী অমগা অমগা মান্নদবা অমসুং লৌশিনবদা য়াম্না লাইবা অসিনা মরম ওইদুনা ফিঙ্গরপ্রিন্ত অসি তঙাইফদবা খুৎলায় অমনি। মীহাৎ-মীপুনগী থৌদোকশিংগী চে-চাং খোমজিনবা অমসুং খোঙ্গুল লিবা অমসুং ফত্তবা মীওইশিং থিবদা রেকোর্দশিং অমসুং ফিঙ্গরপ্রিন্ত দেতাশিং দিজিতেল ওন্থোকপা অসি মরুওইবা খোঙথাং অমনি। মপুংফানা কম্পুতরাইজ তৌরবা নেসনেল ওতোমেতেদ ফিঙ্গরপ্রিন্ত আইদেন্তিফিকেসন সিস্তেম( এন এ এফ আই এস) অসি অথুবদা থবক হৌরগনি অমসুং পুলিস ফোর্সশিংদা কান্নবা পীরগনি।

সাইবর ফোরেন্সিক্কী খ্বাইদগী ফরবা খুৎলায়শিং য়াওরবা এন.সি.আর.বিনা লিংখৎপা ই-সাইবর লেব শঙ্গারদুনা কিসন রেদ্দিনা হায়খি ওক্তোবর থা অসি নেসনেল সাইবর সেকুরিতি এৱারনেস মন্থ হায়না থৌরম পাংথোক্লি অমসুং ই-সাইবর লেব অসিনা সাইবর ক্রাইমশিং থিজিনবদা ভর্চুএলগী খুদোংচাবশিং পীগনি।

এন.সি.আর.বিগী দিরেক্তর, শ্রী রামফাল পৱারনা হায়খি নেসনেল ক্রাইম রেকোর্দস বিউরোগা থবক তৌমিন্নবদা এন.এ.এফ.আই.এসনা অহোংবা অমা পুরক্লগনি। মখোয়গী খুৎশাশিংগী মমিশিংদা য়ুম্ফম ওইরগা অরানবা তৌবা মীওইশিং মশক খঙদোকপদা এন.এ.এফ.আই.এসনা থিজিল্লিবা ওফিসারশিং মতেং পাংগনি।

ভিদিও কনফরেন্সকী খুৎথাংদা পাংথোকপা থৌরম অদুদা গুজরাত, রাজস্থান অমসুং মৈধ্য প্রদেসতা লৈবা এন.সি.আর.বিগী ত্রেনিং সেন্তর অহুমগী ওফিসারশিং অমসুং হোম মিনিস্ত্রিগী সেনিয়র ওফিসিএলশিংসু শরুক য়াখি।

*****