হকশেল অমসুং য়াইফ য়ুম্বালগী কেন্দ্র মন্ত্রী দাঃ হর্শ বর্ধন অমসুং আয়ুশকী কেন্দ্র মন্ত্রী (আই./সি.) শ্রী শ্রীপদ য়েসো নায়ক্না ঙসি কোবিদ-১৯ শেন্ননবা আয়ুর্বেদ অমসুং য়োগদা য়ুম্ফম ওইবা নেস্নেল ক্লিনিকেল মেনেজমেন্ত প্রোতকোল পুন্না পুথোকমিন্নখ্রে। বর্চুএলগী থৌরম অদুদা নিতি আয়োগকী ভাইস চেয়রমেন দাঃ রজিব কুমারসু শরুক য়াখি।

থৌরম অসিদা দাঃ হর্শ বর্ধন্না হায়খিবদা অখঙ-অহৈশিং অমসুং লৈবাক্কী অতোপ্পা রিসর্চ তৌবা লুপশিংনা ইন্তর্দিসিপ্লিনরী কম্মিত্তীশিংনা পীরকপা পাউতাক অমসুং ৱারোলগী মতুং ইন্না লৈবাক অসিগী কোবিদ-১৯ থেংনবগী লানফম অসিদা হেন্না মপাঙ্গল লৈহন্নবা হায়দুনা আয়ুর্বেদ অমসুং য়োগদা য়ুম্ফম ওইবা কোবিদ-১৯ শেন্ননবা নেস্নেল ক্লিনিকেল মেনেজমেন্ত প্রোতোকোল অসি শেমখিবনি হায়খি।

থৌরম অদুদা তিনলিবা মীয়াম্বু ভিদিও কনফরেন্সিংগী খুত্থাংদা ৱা ঙাংবদা শ্রী শ্রীপদ য়েসো নায়ক্না হায়খিবদা থৌওং অসিগী থৌরাং য়াৎপা অমসুং মপুং ওইবা মশক অমা পীনবা আয়ুশ মন্ত্রালয়না সেনিয়র ওইবা অখঙ-অহৈশিংগা লোয়ননা আয়ুশ রিসর্চ অমসুং দিভেলপমেন্ত তাস্ক ফোর্স অমা শেমখি হায়খি। মহাক্না হায়খিবদা কোবিদ-১৯গী ইরাং শেন্ননবা অমসুং হন্থহনবগী থৌওংশিংদা আয়ুশকী থৌওংশিংগী থৌদাংশিংবু খঙদোক্নবা আয়ুশ মন্ত্রালয়না ক্লিনিকেল ওইবা, য়েংশিন্দুনা নৈনবগী থৌওং কয়া পাঙথোকখি হায়খি। মন্ত্রীনা মখা তানা হায়খিবদা হান্নগী আই.সি.এম.আর.গী দাইরেক্তর জেনেরেল দাঃ ভি.এম. কতোচনা লুচিংদুনা অমসুং অতোপ্পা অখঙ-অহৈশিংগা লোয়ননা ‘নেস্নেল ক্লিনিকেল মেনেজমেন্ত প্রোতোকোলঃ কোবিদ-১৯’ অসিদা আয়ুর্বেদ অমসুং য়োগবু মনুং চলহন্নবা ইন্তর্দিসিপ্লিনরী কম্মিতী অমসু মন্ত্রালয় অসিনা শেমখি হায়না হয়াখি।

মসিগী প্রোতোকোল অসিনা কোবিদ-১৯ শেন্নবা অমসুং অহোংবা লাকপগী হীরমদা মশক থোকপা থৌওং অমনি হায়খি। কোবিদ-১৯ শেন্ননবা আয়ুর্বেদ অমসুং য়োগদা য়ুম্ফম ওইবা নেস্নেল ক্লিনিকেল মেনেজমেন্ত প্রোতকোল অসিগী মশক থোকপা কান্নবা অমদি কোবিদ-১৯গী ক্লিনিকেল মেনেজমেন্ত তৌবগী থৌওংদা আয়ুর্বেদ অমসুং য়োগদা য়ুম্ফম ওইবা ৱারোইশিন শিজিন্নবগী মতাংদা খঞ্জান্নবা লৈরম্বা অদুবু কোকহনবা অসিনি। প্রোতোকোল অসিগী মখা তারকপা মওংশিংদা আয়ুশকী অতোপ্পা থৌওংশিংসু মনুং চনলক্কনি। হৌজিক লৈরিবা প্রোতোকোল অসিনা কোবিদ-১৯গী তোঙান তোঙানবা থাক্তা নারবা মীওইশিংগী লায়েংবগী থৌওংদা হীরম অনি অসি শিজিন্নবগী মতাংদা আয়ুশকী থৌওং ইনলিবা মীওইশিংনা নীংথিজনা ইনবগী পাউতাকশিং পীরি। মসিনা লৈবাক শিনবা থুংনা লায়চৎ অসিবু থেংনবগী থৌওংদা আয়ুশতা য়ুম্ফম ওইবা লায়েংবগী মওংদা চাং মান্নবা পুরকপদা তেংবাংলি। মসিনা রাজ্য/য়ু.তি. সরকারশিংনা কোবিদ-১৯ থেংননবা পাঙথোক্লিবা থবক-থৌরমশিংদা মসিগী ৱারোইশিন অসিবু শিজিন্ননবা থৌরাং য়াৎপদসু তেংবাঙই।

মসিগী প্রোতোকোল অসিনা কোবিদ-১৯ শেন্নবগী থৌওংশিংদা আয়ুশকী ৱারোইশিন য়াওহনবদা শৌগৎকনি হায়বগী থাজবা লৈ অমসুং মসিগী থৌওংশিং অসি মীয়াম্না য়াম্না লাইনা ফংবা য়াবা ওইবনিনা মসিনা লায়চৎ অসিনা থোকহল্লিবা অৱাবা কয়া অমা হন্থহনবদসু য়াম্না কান্নগনি হায়বগী থাজবসু লৈরি।

লায়চৎ অসিনা মালেম শিনবা থুংনা মখা তানা চত্থরকপা অসিগা লোয়ননা মহৌশাগী ওইবা লায়েংবগী থৌওংশিংদা নাৎকী ওইবা মওং কয়া অমা হাপচিনবগী থবক কয়া লৈবাক ময়াম অমদা চত্থনরি। ভারতকী ওইনসু লৈবাক শিনবা থুংবদগী কোবিদ-১৯ থেংনবগী থৌওংশিংগী মতুং ইন্না খঙলকপা লৌশিং কয়া তম্নরকপগী মতুং ইন্না লায়চৎ অসিবু লাকশিনবগী থৌওংশিংদা আয়ুর্বেদ অমসুং য়োগনা মরু ওইবা থৌদাং কয়া লৌবা ঙম্মি হায়বা খঙবা ঙম্লে। মসিদা পল্লিবা লায়চৎ লাকশিনবগী থৌওংশিং অসিদি হকশেল অমসুং য়াইফ য়ূম্বাল মন্ত্রালয়না ফোঙখিবা কাঙলোনশিংদা য়াওরিবা থৌওংশিং অদুবুনি। মসিগী আয়ুর্বেদ অমসুং য়োগগী মতিক অসিবু খঙলদুনা নেস্নেল ইন্সতিত্যুৎশিং অমসুং রিসর্চ সেন্তরশিংগী সেন্ত্রেল কাউসিলশিংগী অখঙ-অহৈশিংনা অতোপ্পা মমিং লৈবা রিসর্চ ইন্সতিত্যুসনশিংগা লোয়নদুনা কোবিদ-১৯ শেন্নবগী কাঙলোন শেম্নবা খুৎশম্নরিবনি।

নিতি আয়োগকী মেম্বর দাঃ ভি.কে. পাউল; হকশেল অমসুং য়াইফ য়ুম্বালগী সেক্রেতরী শ্রী রাজেশ ভুশন অমসুং আয়ুশকী সেক্রেতরী বাইদ্য রাজেশ কোতেচানা প্রোতোকোল ফোঙবগী থৌরম অসিদা ৱা ঙাংখি।

*****