লেবর অমসুং ইমপ্লোয়মেন্ত মন্ত্রালয়না নুমিৎ খরনিগী মমাংদা পারলিয়ামেন্তনা অয়াবা পীখ্রবা লেবর কোদ হায়না খঙনরিবা শেমদোকপা কয়া অমা পুরক্কদৌরিবা পুৱারী ওইরবা বিল অসিগী মতাংদা মীয়াম্না নুংনাংবা ফাওরিবা অসিগী মতাংদা ঙসি শেংদোকখ্রে। কেন্দ্রগী লেবর মন্ত্রীনা বিল অসিগী মতাংদা মীয়াম্না অফ-ফত্তা কয়া ঙাংনরিবা অসি য়ুম্ফম য়াওগদবনি হায়খ্রে। থিংজিনগদবা অপিকপা য়ুনিৎশিংদা থবক তৌবা মীওইশিংগী মশিং অসি ৩০০ ফাওবদা হেনগৎপগী হীরম অসিগী মতাংদা শেংদোক্লদুনা মহাক্না হায়খিবদা বিভাগ অসিগা মরী লৈনবা পারলিয়ামেন্তরী স্তেন্দিং কম্মিত্তীনা য়ুনিৎশিং অসিগী শিন্মীশিংবু থবক্তগী পোত্থাহনবা, মতম-খরগী ওইনা থবক পীদবা অমসুং থিংজিনবগী মাংজৌননা অয়াবা লৌনবগীদমক্তা তঙাই ফদনা লৈগদবা শিন্মী মশিং অসি ১০০দগী ৩০০দা হেনগৎপা হায়নসু হায়খিবা লৈ হায়না ফোঙদোকখি। চানবা সরকারদগী মাংজৌননা অয়াবা লৌবগী থৌওং অসিতমক লৌথোকপনি অমসুং শিন্মীশিংগী হক অমসুং অতোপ্পা কান্নবা ফংবগী থৌওংশিংদি হান্নগুম লেংদনা অদুমক লৈখিগনি। থবক্তগী পোত্থাহন্দ্রিঙৈগী মমাংদা মাংজৌননা পাউ ফাওবা, থবক তৌবগী চহি লোইবগী মতুং ইন্না নুমিৎ ১৫নিগী চাংদা খুৎশুমন পীবা খঙহল্লিবা মতমশিং অসিগী খুৎশুমন পীবগুম্বা শিন্মীশিংগী ফংফম থোকপা হকশিংদি লৌথোকপা লৈতে। আই.আর. কোদনা মখা তানা নৌনা শেম্লিবা রি-স্কিলিং ফন্দগী মখাদা নুমিৎ ১৫নিগী খুৎশুমনগা মান্নবা শেলগী খুদোংচাবা পীবগী থৌওং লৈরি। অৱাংবা থাক অমা লৈরকপা অসিনা থবক লৌবা অমসুং তান্থোকপা হেনগৎকনি হায়বগী মওং অমত্তা লৈতে।

মন্ত্রালয়না হায়খিবদা ইকোনোমিক সর্ভে ২০১৯না ভারতকী ফর্মশিংদা চৎনরিবা ‘দ্বারফিজম’গী চৈথেং অসিগী মতাংদা য়েংশিনখি হায়না হায়খি। ‘দ্বারফিজম’ হায়বদা ঐখোয়না খঙনরিবা অসিদি চহি ১০দগী হেন্না লৈরক্লবা ফর্ম অদুবু অনৌবা থবক লৌবগী হীরমদা শাহৌ লৈতবা অসিবুনি। অনৌবা থবক লৌবদা থিন্থহল্লিবা অসি ইন্দস্ত্রীএল দিস্প্যুৎ এক্ত, ১৯৪৭না শিন্মী মশিং ১০০দগী হেন্না লৈবা য়ারোই হায়না পল্লিবা ৱাফম অসিননি। লেবর লেজিস্লেসনগী মখাদা লৈরিবা থাক খায়বা অসিনা পিক্না লৈবদা হেন্না কান্নবা পী। রাজস্থান্না ইং ২০১৪দা শিন্মীগী অকক্নবা মশিং অসি ১০০দগী ৩০০দা হেনগৎখি অমসুং শিন্মী ৩০০দগী হন্থনা লৈবা ফর্মশিংনা শিন্মীশিং থবক্তগী তান্থোক্ত্রিঙৈগী মমাংদা মাংজৌননা অয়াবা লৌবগী কাঙলোনশিং চৎনহনখিদে। মসিগী থাক ৱাংখৎপগী থৌওং অসিদগী রাজ্য অসিদা চাংচত্তা শিন্মী ১০০ লৈবা ফেক্তরীগী মশিং অসি ভারতকী অতোপ্পা মফমশিংদগী য়াম্না হেন্না হেনগৎপগী ফিভম উবা ফংখি। মসিগী ফেক্তরীশিং অসিগী অপুনবা মহৈ পুথোকপগী চাংসু হেনগৎখি। রাজ্য ১৫ অমসু শিন্মীগী অকক্নবা মশিং অসি ৩০০দা হেনগৎখ্রবনি।

মসিনা মখা তানা হায়খিবদা রাজস্থানগী থৌওং অসিগী খুদম লৌরদুনা রাজস্থান য়াওনা রাজ্য ১৬না আই.আর. কোদ অসিগী অয়াবা পীদ্রিঙৈগী মমাংদা আই.দি. এক্তকী মখাদা শিন্মীগী অকক্নবা মশিং অসি ১০০দগী ৩০০দা হেনগৎখ্রবনি হায়খি। মসিগী রাজ্যশিং অসিদা য়াওরিবশিংদি – আন্ধ্র প্রদেশ, অরুনাচল প্রদেশ, অসম, বিহার, গোৱা, গুজরাত, হরয়ানা, হিমাচল প্রদেশ, ঝারখন্দ, করনাতকা, মধ্য প্রদেশ, মেঘালয়, ওরিশানি। থবক্তগী তান্থোক্ত্রিঙৈদা নত্ত্রগা থবক থিংজিন্দ্রিঙৈদা অয়াবা লৌবা অসিনা অহেনবা কান্নবা পীদবতা নত্তনা মসিনা থৌওং অসিনা থিংজিনগদৌরবা ফর্ম অদুগী অমাঙবা হেন্না হেনগৎহল্লি।

হৌজিক চৎনরিবা আই.দি. এক্ত, ১৯৪৭কী মতুং ইন্না মাংজৌননা অয়াবা লৌগদবা অসি ফেক্তরী, মাইন অমসুং প্লান্তেসনগী মফম খক্তগীনি। মসিগী থৌওং অসি অতোপ্পা সেক্তরগী ওইনদি চৎনদে।

অকক্নবা মতমগী য়ানবা লৈদুনা থবক পীবা অসিনা থবক লৌবা অমসুং তান্থোকপগী থৌওং লৈহল্লি হায়বা তোকঙা অসিবু অরানবনি হায়রদুনা মন্ত্রালয়না মসিগী থৌওং অসিগী মতাংদা কেন্দ্র সরকারনা অতোপ্পা রাজ্য ১৪দা খঙহনখিবা লৈরবনি হায়খি। মসিগী রাজ্যশিং অদুদি – অসম, বিহার, গোৱা, গুজরাত, হরয়ানা, হিমাচল প্রদেশ, ঝারখন্দ (ফিরোল), করনাতকা, মধ্য প্রদেশ, ওরিশা, পঞ্জাব, রাজস্থান, উত্তর প্রদেশ (তেক্সতাইল অমসুং ই.ও.য়ু.) অমসুং উত্তরাখন্দনি।

​ অকক্নবা মতমগী থবক পীবগী চৎনবী লৈতবা অসিনা থবক পীরিবা মীওই অমনা শিন্মী অমবু মতম শাংনা নত্ত্রগা য়ানবা মতমগী ওইনা থবক পীবগী অপাম্বা খনবা য়াই। য়ানবা মতমগী খুত্থাংদা থবক পীবা অসিনা থবক পীবা মীওইশিংদা ত্রাঞ্জেক্সন ৱাংবা, থবক তৌরিবশিং অসি মতম শাংনা থবক তৌবগী থাজবা লৈতবা অমসুং থবক হৈবা ৱাৎপগী ফিভম কয়া অমা লৈহল্লি। মসিনা থবক তৌবা অমসুং থবক পীবা মীওইগী মরক্তা থাজবগী মরী লৈবা হন্থহল্লি।

মন্ত্রালয়না হায়বগী মতুং ইন্না অকক্নবা মতমগী থবক পীবগী পথাপ অসি শিন্মীশিংগী কান্নবনি। মসিনা থবক পীরিবা মীওইশিংনা থবক তৌগদৌরিবা মীওইশিংগা অতোপ্পা কন্ত্রেক্তরশিং য়াওদনা হকথেংননা থবক তৌমিন্নবগী পথাপ য়ানবা পুরকপগী থৌওং ওইথোকহনগনি। কন্ত্রেক্তরশিংনা অপিকপা খুৎশুমন অমসুং ই.পি.এফ., ই.এস.আই.সি.গুম্বগী কান্নবশিং অসি মপুং ওইনা লৌশিল্লি অমসুং শিন্মীশিংদদি য়েন্থোক্তে হায়না মরাল শিবগী থৌদোক কয়া অমসু লৈরি।

কেন্দ্রগী লেবর মন্ত্রালয়না অকক্নবা মতমগী থবক পীবগী পথাপ অসিনা চাং নাইনা থবক তৌরিবা মীওই অমনা ফংলিবা কান্নবা খুদিংগা মান্ননা ফংহল্লি। ইন্দস্ত্রীএল রিলেসনগী মতাংদা লৈরিবা কোদ অসিনা প্রো-রেতা বেসিস্তা এফ.তি.ই.শিংদা গ্রেতুইতীগী কান্নবা ফাওবা ফংহল্লি।

ইন্তর-স্তেৎ মাইগ্রেন্ত শিন্মীগী মতাংদা পল্লগদি, ইন্তর-স্তেৎ মাইগ্রেন্ত ৱর্কর এক্ত, ১৯৭৯ অসি ও.এস.ঐচ. কোদকী মনুং চলহনখ্রে। হান্না চৎনরম্বা এক্ত অসিগী তোঙান তোঙানবা কান্নবশিং অসি মপাঙ্গল কনখৎলবা ও.এস.ঐচ. কোদকী মনুংদা চলহনখ্রবনি।

ইন্তর-স্তেৎ মাইগ্রেন্ত শিন্মীগী ৱাহন্থোক অসি ইন্তর-স্তেৎ মাইগ্রেন্ত ৱর্কর এক্ত, ১৯৭৯গী মতুং য়াম্না ইল্লি। মসিনা হায়বগী মতুং ইন্না মখোয়শিং অসিদি কন্ত্রেক্তরশিংনা রাজ্য অমদগী খন্দুনা রাজ্য অমদা থবক তৌনবা থাবা মীওইশিংনি। ও.এস.ঐচ. কোদনা কন্ত্রেক্তর নত্তনা থবক পীবা মীওইশিংনা হকথেংননা খনবা মীওইশিংসু মনুং চলহনলি। মখা তাবা ওইনা মশানা থবক শুইবা লাকচবা শিন্মী অমনা মশাবু মাইগ্রেন্ত শিন্মীনি হায়না আধার শিজিন্নদুনা ইলেক্ত্রোনিক পোর্তেল অমদা মশানা রেজিস্তর তৌদুনা হায়জবসু য়াই। পোর্তেল অসিদা রেজিস্ত্রেসন তৌবগী থৌওঙ্গ অসি য়াম্না লায়হল্লে অমসুং মসিদা আধার নত্তবা অতোপ্পা চে-চাং অমত্তা চঙলোই।

মন্ত্রালয়না হীরম অসিগা মরী লৈননা মাইগ্রেন্তশিং য়াওনা অনওর্গনাইজদ সেক্তরদা লৈবা শিন্মীশিংগী লৈবাক্কী দেতা অমা শেম্নবা থবক পায়খৎলি অমসুং মসিনা শিন্মীশিংদা মখোয়গী মহৈগা চানবা থবক ফংহনবা অমসুং অতোপ্পা খুন্নাইগী কান্নবা কয়া অমা ফংহনবদা তেংবাংগনি। মসিনা হায়রিবা সেক্তর অসিদা লৈরিবা শিন্মীশিংগী পোলিসী শেম্বদসু য়াম্না তেংবাংগনি।

মাইগ্রেন্ত শিন্মীশিংগী হেল্পলাইন অমসু লৈহনগনি।

মাইগ্রেন্ত শিন্মীশিংনা মফম অমা হেক্তদগী রেসন ফংবা অমসুং বিলদিং অমসুং অতোপ্পা য়ুমশা-কৈশাগী সেসকী কান্নবসু ফংগনি। মখোয়না ই.এস.আই.সি., ই.পি.এফ.ও. অমসুং চহিগী ওইনা হকশেল য়েংশিনবগী কান্নবা ক্যা অমসু ফংগনি।

নুপীশিংবু নুমিদাংদা থবক শুবা য়াহনবগী থৌওং অসিদা মীয়াম্না ঙাংনরিবা অসি য়াম্না মতাং চাদে মরমদি ও.এস.ঐচ.না অনৌবা ভারত্তা জেন্দরশিংদা মান্নবা মিৎইয়েং য়েংবা পাম্মি। কোদ অসিনা নুপীশিং অসি মখল খুদিংগী থবক মফমদা থবক শুবতা নত্তনা নুমিদাংদসু থবক শুবা য়াহল্লি। মসিগা লোয়ননা নুমিদাংদা মখোয়বু মতিক চানা ঙাক-শেন্নবা থৌরাং কয়াসু লৈরি। নুমিদাংদা থবক শুবগী মতাংদা নুপীশিংনা অপাম্বা ফোঙদোকপা য়াহল্লি। মখা তবা ওইনা, নুপীশিং অসিবু নুমিদাংদা থবক শুহনবা, মখোয়গী তেক্ত কায়দবা ওইনবা, সুতিগী ৱারোলশিং পীদ্রিঙৈদা সরকারনা মসিগী মতিক চাবা চেকশিন থৌরাংগী কাঙলোন অমা হান্না পীরক্কনি।

মন্ত্রালয়না মখা তানা হায়খিবদা, থবক তৌরিবা পাউমীশিংগী হক অসিবু মপাঙ্গল হেন্না কনখৎহন্নবা  থবক পায়খৎলি। মসিগী মনুংদা য়াওরিবশিং অদুদি থবক তৌরিবা পাউমীগী ৱাহন্থোক অসিদা ইলেক্ত্রোনিক অমসুং দিজিতেল মীদিয়াদা থবক তৌরিবা মীওইশিংসু মনুং চলহনবতা নত্তনা মখোয়না থবক তৌবা মতমগী শরুক তরামাথোইগী অমগী চাংদা তোলোবকা সুতিগা শকচিন্নবা য়াগনি। মসিগী শেনফমশিং অসি তুংশিন্দুনা কোন্না শেল ওইনা কায়থোকপসু য়াগনি।

মসিনা মখা তানা হায়বগী মতুং ইন্না হৌজিক লৈরিবা পাউমীশিংনা ফংলিবা কান্নবশিং অসিসু অদুমক লৈগনি। ইন্তর-স্তেৎ মাইগ্রেন্ত শিন্মীশিংগী ৱাহন্থোক অসি সোসিএল সেক্যুরিতী কোদ অমসুং ও.এস.ঐচ. কোদতা চপ মান্ননা য়াওই।  খুৎশুমনগী কোদ অসিগী মখাদা লৈবা কাঙলোনগী মতুং ইন্না ৱর্কিং জর্নেলিস্ত অমসুং অতোপ্পা ন্যুস্পেপর ইমপ্লোয়ী (কন্দিসন ওফ সর্বিস) অমসুং মিসেলানিয়স প্রোবিজন এক্ত, ১৯৫৫গী সেক্সন ২গী ক্লোস (এফ.)তা য়াওরিবা থবক তৌরিবা পাউমীশিংগী কোদকী মতুং ইন্না খ্বাইদগী পিকপা খুৎশুমন লেপ্পগী তেক্নিকেল কম্মিত্তী অমা শেম্বা হায়বা য়াওরি।

মখা তাবা ওইনা, সোসিএল সেক্যুরিতী কোদকী মখাদা থবক তৌরিবা পাউমীশিংনা গ্রেতুইতী ফংবগী মতিক চাবগী হীরমশিং অসিদি হান্নগুম লৈহন্দ্রে অদুবু মতিক চাবগী মতম অসিদি অতোপ্পগী চহি ৫ ওইবা অসিদগী শেমদোক্তুনা চহি ৩দা ওইহল্লে।

মন্ত্রালয়না হায়খিবগী মতুং ইন্না ও.এস.ঐচ. কোদতা অনৌবা য়াই য়ুম্বালগী কান্নবশিং য়াওরি হায়রি -

১) পুন্সিদা খুদোংথিবা থোকপা য়াবা থবকশিংগী ওইনা ইস্তাব্লিশমেন্ত অসিনা অপিবা থাক্কী মশিংদগী তাথনা শিন্মী লৈরবসু সরকারনা মসিগী মনুং চনবগী মতাংদা ৱারোল থোকপা য়াই।

২) ই.এস.আই.সি. অসি মনা-মশিং থাবগী শিন্মীশিংসু য়াওহল্লগনি।

৩) থবক খনবগী চে পীবা অসি শুংশোই শোইদনা পীগদবনি।

৪) চহিগী ওইবা হকশেল চাংয়েং তৌবা অসি হৌদোক্লে।

৫) খুদোংথিনিংঙাই ওইবা ফেক্তরীশিংগী মহুত্তা ফেক্তরী, মাইন অমসুং মনা-মশিং থাবগী মফমশিংগী বাইপারতাইৎ সেফতী কম্মিত্তী অমা হৌদোক্লে।

৬) লৌহাৎ অমসুং তিলহাৎ হিদাক শিজিন্নদুনা থবক তৌরিবা মনা-মশিং থাবগী শিন্মীশিং অসি খুদোংথিনিংঙাই ওইবা থবকশিংগী মনুং চনহল্লে।

৭) ইন্তর-স্তেৎ মাইগ্রেসন শিন্মীশিংগী কান্নবা পীবশিং হেন্না ফগৎহন্দুনা চহি অমদা ময়ুমদা চৎপগী শেলসু পীগনি।

মন্ত্রালয়না হায়খিবগী মতুং ইন্না ত্রেদ য়ুনিয়নগী ফিভমশিং অসিসু দিসেন্ত্রেলাইজ তৌরবা রেজিস্ত্রেসন তৌবগী থৌওঙ্গ লৈহন্দুনা মপাঙ্গল হেনগৎহল্লে হায়খি। নুমিৎ ১৪নিগী ৱারোল পীবগী মতমগী মতাংদা খন্নরিবা ৱাফমশিং অসি য়ুম্ফম য়াওদবনি হায়খি। মসিনা করিগুম্বা হীরম অমগী ৱারোইশিন পুরক্নবা স্ত্রাইক তৌবগী থবক চত্থবগী মহুত্তা অতোপ্পা থৌওংদা ৱারোইশিন পুরকপগী অহেনবা খুদোংচাবা পীবনি।

*****