খাদি অমসুং ভিলেজ ইন্দস্ত্রীজ কম্মিসন (কে.ভি.আই.সি.)না “স্বদেশি” হেন্না খুমাং চাউশিলহন্নবা অতোপ্পা খোঙথাং অমগা পায়খৎখ্রে; অমসুং হন্দক্কী থৌওং অসিদনা স্পেসিএল প্রোতেক্সন গ্রুপ (এস.পি.জি.)সু শরুক য়াহনখ্রে। ঙসি কে.ভি.আই.সি.না নই-দিল্লীগী দ্বারকাদা লৈবা এস.পি.জি. রেসিদেন্সিএল কমপ্লেক্সকী মনুংদা খাদি ইন্দিয়াগী অনৌবা সেলস আউৎলেৎ অমা শঙ্গাখ্রে। মসিগী আউৎলেৎ অসিনা মফম অসিদা অসিদা থঙনবা কমপ্লেক্স অনিদা লৈরিবা এস.পি.জি.গী ওফিসারশিং অমসুং স্তাফশিংগী চাউরাক্না ইমুং ৪০০০দা কান্নবা ফংহনগনি। এস.পি.জি. অসি ভারতকী প্রধান মন্ত্রীগী ঙাক শেনবগী থৌদাং লৌবা এজেন্সী অমনি। খাদিগী সেলস আউৎলেৎ অসি কে.ভি.আই.সি.গী চেয়রমেন শ্রী বিনয় কুমার সক্সেনা অমসুং এস.পি.জি.গী দাইরেক্তর শ্রী অরুন সিনহানা পুন্না শঙ্গামিন্নখিবনি।

কে.ভি.আই.সি.না থোকপা ৱারোল অমগী মতুং ইন্না খাদিগী পোত্থোক য়োনবগী আউৎলেৎ হাংদোকপগী ৱারেপ অসি এস.পি.জি.গী মীওইশিং অমসুং মখোয়গী ইমুং-মনুংদা অশেঙবা অমসুং খুৎনা শাবা “স্বদেশি”গী পোত্থোকসিং ফংহন্নবা হায়দুনা লৌখিবনি। ইমুংশিং অসিনা খাদিগী পোত্থোকশিং অসি লৈহন্নবা হায়দুনা কে.ভি.আই.সি. মসিগী আউৎলেৎ অসিদা য়োল্লিবা পোত্থোক খুদিংদা অপীবা মমলদগী ২০% তাথনা য়োনবগী ৱারেপ অমা লৌখ্রে। একর ১২৫ হেন্না পাক-চাউনা লৈরিবা দ্বারকাগী এস.পি.জি. কমপ্লেক্স অসিদা চাউরাক্না মীওই ১৫,০০০ রোম্না লৈনরি। মসিগা হেক থংনবদা এস.পি.জি.গী স্তাফশিংগী ইমুং ৮০০ হেন্না লৈনবা একর ২৬ চাউবা রেসিদেন্সিএল কমপ্লেক্স অমসু লৈরি। মসিগী মরম অসিনা খাদিগী আউৎলেৎ লৈরিবা মফম অসিগী পোত-লৈফমগী কমপ্লেক্স অসিদা পোৎ লৈবা মীওই য়াম্না লাকই। এস.পি.জি.না কে.ভি.আই.সি.দা আউৎলেৎকী মফম অসি থা অমদা লুপা ১গী ভরা লৌদুনা পীবনি।

কে.ভি.আই.সি.গী চেয়রমেন্না হায়খিবদা মসিগী আউৎলেৎ অসিগী খুত্থাংদা কে.ভি.আই.সি.না এস.পি.জি.গী ইমুং-মনুংশিংদা খুৎনা শাবা মহৌশাগী খ্বাইদগী ফবা পোত্থোকশিং ফংহনগনি হায়খি। “এস.পি.জি.না খাদিগী খ্বাইদগী চাউবা ব্রান্দ এম্বেসেদর ওইরিবা প্রধান মন্ত্রীগী তেক্ত-কায়দবগী থৌদাং লৌরি। অমসুং মসিগী খাদিগী আউৎলেৎ অসিগী খুত্থাংদা কে.ভি.আই.সি.না এস.পি.জি.গী ওফিসিএল অমসুং স্তাফশিংগী ইমুংশিংদা খ্বাইদগী শিজিন্নবা নুংঙাইবা পোত্থোকশিং ফংহন্দুনা তেংবাংনিঙই”, হায়না সক্সেনানা হায়খি। মহাক্না মখা তারদুনা খাদিগী পোৎ য়োনবগী আউৎলেৎ অসিনা খাদিগী আর্তিসানশিংদা পুক্নিং থৌগৎপগা লোয়ননা অমসিনা লমদম অসিদা পোত্থোক পুথোকচবদা খুমাং চাউশিলহন্দুনা খুঙ্গংগী ইন্দস্ত্রীশিং মপাঙ্গল কনখৎহন্দুনা মীয়ামগী তুং কোইনা চৎকদবা পুন্সি মহিং অমা শেম্বদসু তেংবাংগনি।

কে.ভি.আই.সি.না মখা তানা হায়খিবদা হৌজিক পায়খৎলিবা থৌওং অসি প্রধান মন্ত্রীনা আত্মানির্ভর ভারত অমসুং ভোকেল ফোর লোকেলগী খোল্লাও লাউরিবা অসিগী মতুং ইন্না পাঙথোকপনি হায়খি। মমাংদসু কেন্দ্রগী গৃহ মন্ত্রী শ্রী অমিৎ শাহনা পেরামিলিতরী ফোর্সশিংদা মখোয়গী কেন্তীনশিংদা “স্বদেশি”গী পোত্থোক্তমক য়োন্নবা খঙহনখিবা লৈখ্রবনি। হন্দক্তসু কে.ভি.আই.সি.না অহানবা ওইনা আই.তি.বি.পি.গা থোং-থাকপগী পোত্থোক পীনবগী এম.ও.য়ু. অমা খুৎয়েক পীনখিবা অদুগী মতুং ইন্না পেরামিলিতরী ফোর্সশিংদা অশেঙবা কচ্ছি ঘানি মস্তার্দ ওইল পীবসু হৌখ্রবনি। কে.ভি.আই.সি.না খাদিগী ফিরোল অমসুং রেদীমেদ গার্মেন্ত খুদিংমক্কা লোয়ননা খুঙ্গংদা পুথোকপা পোত্থোকশিং অসি আউৎলেৎ অসিদা য়োনগনি।

******