কম্মিসন ফোর এগ্রিকলচরেল কোস্ত এন্দ প্রাইসেস (সি.এ.সি.পি.)গী রিকম্মেন্দেসন্দা য়ুম্ফম ওইরগা, স্তেত লৈঙাকশিং অমসুং কেন্দ্রগী মরী লৈনবা মন্ত্রালয়শিং/দিপার্তমেন্তশিং অমদি অতৈ মরী লৈনবা হীরমশিংগী মীৎয়েঙ খন্নরবা মতুংদা লৈঙাক্না লৌউ-শিংউগী মহৈ মরোং ২২গীদমক মিনিমম সপ্পোর্ত প্রাইসেস (এম.এস.পি.) লেপ্পী‍।এম.এস.পি. রিকম্মেন্দ তৌবা মতমদা, সি.এ.সি.পি.না তোঙান তোঙানবা ৱাফমশিং হায়বদি পুথোকপগী মমল, ইরমদমগী অমদি মালেমগী কৈথেলগী দিমান্দ-সপ্লাইগী অপুনবা ফীভম, ইন্তর-ক্রোপকী মান্নবা মমল, লৌউ-শিংউ অমসুং লৌউ-শিংউ নত্তবা সেক্তরশিংগী মরক্তা লৈনরিবা লল্লোন ইতিক্কী ৱাফমশিং, মমলগী থৌরাংনা অপুনবা শেন্মিৎলোন্দা পীবা য়াবা শাফু, অমসুং পোত্থোক পুথোকপগী মমলদগী য়ামদ্রবদা চাদা ৫০গী মার্জিন হায়রিবশিং অসি য়েংলগা লেপ্পনি‍।

২০১৮-১৯গী কেন্দ্রগী বদজেতনা পোত্থোক পুথোকপগী মমলগী শরুক অমগা তঙ্খায়গী চাংদা এম.এস.পি. থম্নবা হান্না লেপথোক্লবা চৎন-পথাপ লাউথোকখি‍। মতৌ অসুম্না, লৈঙাক্না মেন্দেত তৌখ্রবা খারিফ, রবি অমসুং অতৈ কম্মর্সিএল মহৈ মরোংশিংগী এম.এস.পি. এগ্রিকলচরেল চহী ২০১৮-১৯ অমসুং ২০১৯-২০গী ভারত অপুনবগী ওইবা পোত্থোক পুথোকপগী চাংগী চাদা ৫০গী শেন্দোং ফংননবা হেনগৎলে‍। হায়রিবা চৎন-পথাপ অসিগা চুননা, লৈঙাক্না হন্দক্তা (জুন ১, ২০২০) মার্কেতিং সিজন ২০২০-২১গী মেন্দেতেদ খারিফ মহৈ মরোং পুম্নমক্কা এম.এস.পি. হেনগৎপগী ৱাফম লাউথোকখ্রে‍।

এম.এস.পি. অসি লৈবাক অপুনবগী ওইনা লেপ্পনি অমদি মফম নৎত্রগা স্তেতকী অকক্নবা ওইদে‍। হৌখিবা চহী অহুমসিদা লৈঙাক্না এম.এস.পি. লাউথোকখ্রবা মেন্দেতেদ মহৈ মরোং ২২গী মনুংদা খারিফ মহৈ মরোং ১৪ – ফৌ (কম্মন অমসুং গ্রেদ ‘এ’), জোৱার (হাইব্রিদ অমসুং মল্দান্দি মখলশিং), বজরা, চুজাক, রাগি, অরহর, মুং, উরাদ, লৈবাক হৱাই, নুং হৱাই, নুমিৎলৈ, সিসামুম, নাইজরসীদ, লশিং (মিদিয়ম স্তেপল অমসুং লোং স্তেপল মখলশিং), অমসুং রবি মহৈ মরোং ৬ – গেহু, বার্লী, গ্রাম, মসুর (লেন্তিল), রেপসীদ অমসুং হঙ্গাম, কুসুমলৈ, অমসুং কম্মর্সিএল মহৈ মরোং অনি – চনান অমসুং কোপ্রা (মিলিং অমসুং বোল কোপ্রা)‍। মসিগী মথক্তা, তোরিয়া অমসুং মকু খোক্লবা য়ুবীগী এম.এস.পি.সু মথঙশিৎনা রেপসীদ অমসুং হঙ্গাম, অমদি কোপ্রাগী এম.এস.পি.গী মতুং ইন্না লেপ্পী‍।

ৱাফম অসি কেন্দ্রগী লৌউ-শিংউ অমসুং লৌমীগী য়াইফ থৌরাং মন্ত্রী শ্রী নরেন্দ্র সিংহ তোমারনা ঙরাং লোক সভাদা অইবা পীবা অইবা পাউখুম অমদা ফোঙদোকখিবনি‍।

*****