కోవిడ్-19 కేసుల సముచిత నిర్వహణ కోసం, కోవిడ్ కోసం ప్రత్యేకంగా మూడు స్థాయిల్లో ఆరోగ్య సౌకర్యాలను ఏర్పాటు చేయాలని భారత ప్రభుత్వం, అన్ని రాష్ట్ర ప్రభుత్వాలకు సూచించింది.

అవి ఈ విధంగా ఉన్నాయి :-

(i)      తేలికపాటి లేదా రోగలక్షణాలు కనబడని కేసుల కోసం ఐసోలేషన్ పడకలతో కూడిన కోవిడ్ సంరక్షణ కేంద్రాలు;

(ii)    రోగ లక్షణాలు మితంగా ఉన్న కేసుల కోసం ఆక్సిజన్ మద్దతు గల ఐసోలేషన్ పడకలతో కోవిడ్ చికిత్సకు అంకితమైన ఆరోగ్య సంరక్షణ కేంద్రాలు (డి.సి.హెచ్.సి) మరియు

(iii)  తీవ్రమైనరోగ లక్షణాలతో ఉన్న కేసుల కోసం ఐ.సి.యు. పడకలతో కోవిడ్ చికిత్సకు అంకితమైన ఆసుపత్రులు (డి.సి.హెచ్).

కోవిడ్ రోగుల నుండి ఇతర అనారోగ్యాలతో బాధపడుతున్నవారికి వైరస్ సోకకుండా నివారించడానికి, ఈ ఆసుపత్రుల్లో పడకలను కోవిడ్ సోకని ఇతర రోగుల చికిత్స కోసం ఉపయోగించరు.

భారత ప్రభుత్వ ఆరోగ్య, కుటుంబ సంక్షేమ మంత్రిత్వ శాఖ (ఎమ్.ఓ.హెచ్.ఎఫ్.డబ్ల్యూ) ఒక గ్రేడెడ్ విధానాన్ని అనుసరిస్తోంది. తదనుగుణంగా కోవిడ్-19 చికిత్స కోసం  అంకితమైన ఆసుపత్రుల మౌలిక సదుపాయాలను విస్తరించడానికి రాష్ట్రాలకు మార్గదర్శకత్వం వహిస్తోంది.   ప్రబలంగా ఉన్న మరియు ఊహించిన కేసు వృద్ధి రేటు ఆధారంగా అవసరమైన సంఖ్యలో ఐసోలేషన్, ఆక్సిజన్ సౌకర్యం, మరియు ఐ.సి.యు. పడకల కోసం ప్రణాళికలు రూపొందించాలని రాష్ట్రాలకు సూచించారు.

కోవిడ్ -19 పోర్టల్‌ లో రాష్ట్రాలు / కేంద్ర పాలిత ప్రాంతాలు పొందుపరచిన సమాచారం ప్రకారం,  2020 సెప్టెంబర్, 18వ తేదీ నాటికి, రాష్ట్రాల వారీగా ప్రభుత్వ, ప్రయివేటు ఆసుపత్రుల వివరాలు, కోవిడ్ చికిత్సకు అంకితమైన సౌకర్యాలు మరియు పడకల వివరాలు అనుబంధం లో పేర్కొనడం జరిగింది. అయితే, పరిస్థితి క్రియాశీలంగా ఉన్న కారణంగా, ఆసుపత్రుల్లో పడకల వినియోగ వివరాలు రోజు రోజుకూ మారుతున్నాయి.  

*****