• প্রধান মন্ত্রীগী প্রিন্সিপাল সেক্রেতরী দাঃ পি.কে. মিশ্রানা লুচিংবা অৱাংবা থাক্কী কাঙবু অসিনা ১৮/৯/২০২০দা এজেন্সী অসিনা পাঙথোকখিবা থবকশিং য়েংশিন্নবা অমসুং লাক্লিবা কুমগী থবক-থৌরমশিংগী থৌরাং য়াৎপগী মতাংদা খন্নখি।
• প্রিন্সিপাল সেক্রেতরীনা মীফম অসি ঙন্না ফম্বগী পান্দমদি পাঙথোক্কদবা থবকশিং অসি মতম চানা পাঙথোকপা ঙম্নবনি হায়খি।
• মপুং ওইবা ফিভমশিং য়েংশিনবা ওইনা পঞ্জাব, হরয়ানা অমসুং উত্তর প্রদেশকুম্বা য়ুম্লোন্নবা রাজ্যশিংদা চরুখোক মৈ থাবগী থবকশিং অসি মমাংগী চহি ফাওবদা চাং য়াম্না ৱাংলি হায়বা ৱাফম খঙখি। প্রধান মন্ত্রীগী প্রিন্সিপাল সেক্রেতরীনা মসিগী থৌওং অসি মখা তানা চত্থহন্দনবা থবক কয়া অমগী মতাংদা ৱাফম থমখি।

প্রধান মন্ত্রীগী প্রিন্সিপাল সেক্রেতরী দাঃ পি.কে. মিশ্রানা লুচিংদুনা লৈবাক্কী কোনুং দিল্লীগী মফমশিংদা নুংশিৎকী মগুন ফগৎহন্নবা অৱাংবা থাক্কী মীফম অমা ফমখ্রে। দিল্লী, পঞ্জাব, হরয়ানা, রাজস্থান অমসুং উত্তর প্রদেশকী চীফ সেক্রেতরীশিং, ইনবাইরনমেন্ত, ফোরেস্ত অমসুং ক্লাইমেৎ চেঞ্জ; লৌউ-শিংউবা, লম্বী-শোরোক, পেত্রোলিয়ম অমসুং সেন্ত্রেল পোল্ল্যুসন কন্ত্রোল বোর্দকী তোঙান তোঙানবা বিভাগ/মন্ত্রালয়শিংগী সেক্রেতরীশিংসু মীফম অদুদা শরুক য়াখি।

প্রধান মন্ত্রীগী প্রিন্সিপাল সেক্রেতরীনা হায়খিবদা মীফম অসি য়াম্না মাঙজৌননা কৌবগী মরমদি লৌরোকপগী থা অমসুং নিংথমথা লাক্ত্রিঙৈদা মসিগা মরী লৈনবা নুংশিৎপু মোৎহনবা থীংবগী থবক কয়া অমসুং চেকশিন থৌরাং কয়া মাঙজৌননা পাঙথোক্নবা শেম-শাবা য়ানবনি হায়খি।

নুংশিৎ মোৎহনবগী মরু ওইবা মরমশিং য়েংশিনবা, রাজ্য সরকার অমসুং অতোপ্পা মন্ত্রালয়শিংনা হীরম অসিগী মতাংদা পাঙথোকপা থৌওংসিং অমসুং মখোয়গী হৌজিক ওইরিবা ফিভমশিংগী মতাং কয়া অমা মীফম অসিদা খন্নখি। হৌখিবা চহি ২দা চরুখোক মৈ থাবগী চাং অসি য়াম্না হন্থরক্লে অমসুং অফবা এ.ক্যু.আই.গী নুমিৎশিংসু হেনগৎলে হায়বগী ৱাফমশিং অসি মীফম অসিদা য়ানখি।

পঞ্জাব, হরয়ানা অমসুং উত্তর প্রদেশকী সরকারশিংনা চরুখোক অমসুং লৌরোক্কী অরেম্বশিং মৈ থাবা লাকশিন্নবা থৌওং অমসুং থৌরাংশিংগী মতাংদা য়েংশিনখি অমসুং মসিগী মনুংদা কুপ্না খন্নখিবা ৱাফমশিংদি লৌরোক্কী অরেম্বশিংবু নীংথিনা শেন্ননবা মরী লৈনবা মফমশিংদা মতিক চাবা খুৎলায়শিং লৈহনবা অসিনি।

রিজর্ব বেঙ্ক ওফ ইন্দিয়ানা অহেনবা মিৎয়েং চঙদুনা শেল পীবগী সেক্তরগী মনুংদা রেসিদ্যুদা য়ুম্ফম ওইবা পাৱর/ফুএল প্লান্তশিং অসি হন্দক্তা য়াওখিবা অসি য়েংদুনা রাজ্য অমসুং কেন্দ্র সরকারনা পুন্দুনা অসিগুম্বা য়ুনিৎ কয়া লিংখৎপগী থৌওং চত্থগদবনি হায়না য়ানখি। লৌরোক মখল য়ামহনবা অমসুং সপ্লাই চেন মপাঙ্গল কনখৎহনবগী মতাংদসু মীফম অসিদা খন্নখি।

প্রিন্সিপাল সেক্রেতরীনা রাজ্যশিংনা লৌউ-শিংউ মন্ত্রালয়গী হৌজিক চত্থরিবা লৌরোক্কী অরেম্বশিং নীংথিনা শেন্নবগী স্কিমশিং অসি নীংথিনা পাঙথোক্নবা হায়খিবতা নত্তনা লৌরোক্কী মতমগী মমাংদা হন্দক্কী চহি অসিদা মসিগী মরী লৈনবা খুৎলায়শিং অসি লৌউবশিংদা ফংহনগদবনি হায়খি। মসিগী মতাংদা লৌউ-শিংউ মন্ত্রালয়না পাংবা য়াবা মতেং খুদিংমক পাংনবা হায়খি।

চরুখোক মৈ থাবগী থৌওং অসিবু লাকশিনবা য়ানবা মতিক চাবা মশিংগী কাঙবু কয়া অমা গ্রাউন্দ লেবেলদা থাদোক্কদবনি অমসুং মখোয়না পঞ্জাব, হরয়ানা অমসুং উত্তর প্রদেশকী রাজ্যশিংদা অসিগুম্বা থৌওং অসি মখা তানা চত্থহন্দনবা হোৎনগদবনি। মসিগী তেংবাংবা ওইনা রাজ্যশিংনা মরী লৈনবা জিলাশিংদা অহেনবা থৌওং পাঙথোকপা অমসুং মতিক চাবা ইন্সেন্তিব পীবগী তঙাই ফদবা লৈ।

জি.এন.সি.তি.-দিল্লী সরকারনা পোল্ল্যুসন থোকহনবগী লোকেলগী ওইবা হীরমশিংসু চেকশিনবীয়ু হায়রি। লেমহৌখাকশিংবু মপান্দা মৈ থাবা লাকশিন্নবা য়েংশিনবগী কাঙবু থাদোকপা, শোরোক শেংনবা মেছিনশিংবু আই.তি. শিজিন্নদুনা য়েংশিনবা, য়ুমশাবগী লেমহৌখাক নীংথিনা শিজিন্নবা অমসুং ফত্ত-হৌদি নীংথিনা মাঙ-তাকহনবা অমসুং মশক খঙলবা মফমশিংগী মতাংদা মতিক চাবা থবক পায়খৎপগী থৌরাং য়াৎপগী মতাংদা প্রিন্সিপাল সেক্রেতরীনা মিৎয়েং চঙখি। হরয়ানা অমসুং উত্তর প্রদেশনা মখোয়গী এন.সি.আর.গী মনুংদা চনবা মফমশিংদা হীরম অসিগা মরী লৈনবা অখন্নবা থবকশিং পাঙথোকপা হায়নসু মীফম অসিদা ৱারেপ লৌখি।

প্রিন্সিপাল সেক্রেতরীনা হায়রিবা থৌওংশিং অসি ফিভম লুশিল্লক্ত্রিঙৈগী মমাংদা পাঙথোক্কদবনি অমসুং ইন্দস্ত্রীশিংনা অহাঙবা মফমদা লৈবা ইন্দস্ত্রীগী মফমশিংদসু মৈখু থাদোকপগী চৎন-কাঙলোন ইনবদা মিৎয়েং চঙবগী মতাংদসু ৱাফম কয়া ফোঙদোকখি।

*****