ইনকম তেক্স দিপার্তমেন্তনা শ্রীনগর, গুলমার্গ, সোনামার্গ অমসুং পহলগামদা হোতেল চেনশিংগী মপু ওইবা অমদি লেহদা অতোপ্পা হোতেল অমা শাগৎলিবা মশক নাইবা হোতেল মপু অমগীদা থিবা হুমবা অমদি পোৎ ফাগৎপগী থবক চত্থখ্রে‍।

থিবা হুবগী থবক অদুদা মহাক্না এ.ৱাই. ২০১৪-১৫দগী খাজনা অমত্তা থীরমদ্রবসু লেঙবা য়াদবা লনথুম, হোতেল অমদি য়ুম কৈ শাগৎপদা হৌখিবা শেনবা চী তরুক্তা পুন্না লুপা করোর ২৫ রোমগী শেন মরম চাদনা থাদরম্বগী খুদম চাংদম ওইবা য়াবা চে-চাং অমসুং পোৎলম কয়া ফাগৎখি‍। হায়রিবা শেনফমশিং অসি অয়ামবনা শেনগঙ ওইনা অমদি মহাক্কী অখঙবা শেন্থোক লম্বীশিংগী ৱাংমদগী থাদরম্বনি‍।

থিবগী থবক অদুদা শেন্থোক লম্বী লৈতবা মীওইশিংদগী হৌখিবা চহী অনিসিদা লুপা করোর ২৫গী অনসিক্যুর্দ লোন লৌরমবগী চেনীং ফংখি‍। হায়রিবা শেন্থঙশিং অসি প্রাইমা-ফেসিনি অশেংবা নত্তে মরমদি শেনফমদু ক্রেদিতগী মঙম লৈরোই হায়না চিংনবা মীওইশিংনা থাদরকপনি‍।

থিবা হুম্বগী থবক্তুদা মীওই অদুগী অঙাঙশিং য়ু.এস.এ.দা মহৈ মশিং তমহন্দুনা চহীদা চাউরাক্না লুপা লাখ ২৫গী চাংদা চৎলমবা থেংনখি‍। য়ু.এস.এ.দা মহৈ মশিং তমবগী চৎলিবা শেনফম অদু য়েংবদা মরম চাদবা/হায়দোক্তবা ওইনা উরি‍। মখা তানা থিজিল্লিবা মীওই অদুনা মহাক্কা মমাগা লোয়ননা ত্রস্ত অমা লিংখত্তুনা বি.এদ. কলেজ অমসু চলাইরি‍। ত্রস্ত অসি রেজিস্তর তৌরমদে অমদি মশাগী শেন্থোক মরাঙ কায়না লৈজরবসু ত্রস্ত অসিনা রিতর্ন অমত্তা ফাইল তৌরমদে‍। মহাক্কী লৈননবা য়ুম শেমজিনবদা লুপা লাখ ৪০ চঙখ্রে হায়না মহাক মশানা য়াজখি‍।

থিজিনবা অদুদা বেঙ্ক লোক্কর অমসু ফংখি অমদি মদু থিংজিন্দুনা থমখ্রে‍।

দিপার্তমেন্ত অসিনা অতোপ্পা কেস অমদা স্রিনগরদা লৈবা মমীং লৈবা সনা-লুপা লল্লোনবা মীওই অমগীদসু থিবা হুমবগী থবক চত্থখি‍। থিজিনবা অদুদা হৌখিবা চহীশিংদা চহীদা লুপা করোর ২দগী লুপা করোর ১০ ফাওবগী শেনফম লাক্লবসু মহাক্না মহাক্কী সনা লুপাগী লল্লোন ইতিক তৌবগী একাউন্ত বুক থম্লমদবা থেংনখি‍।

থিজিনবা অদুদা মীওই অসিনা লুপা করোর কয়াগী খুজিংদা থমজিনবা হায়দোক্তবা বেঙ্ক একাউন্ত অমসু লৈরমবা থেংনখি, অমদি মদু মহাক্না খাজনাগীদমক হায়দোক্লমদে‍। মহাক্না শেনবা চহী ২০১৫-১৬দা স্রিনগরদা লুপা করোর ১.৯০গী ওইগদবা লেঙবা য়াদবা লনথুম য়োনখি অমদি মদুগী কেপিতেল গেন তেক্স থীখিদে‍।

থিজিনবা অদুদা শেনবা চহী ২০১৯-২০দা দুকান অমা শান্দোকপগী ‘পগ্রি’ ওইনা লুপা লাখ ১৬ ফংখিবগী চে-চাংসু ফংখি‍। শেনফম অসি ইনকম-তেক্স এক্ত, ১৯৬১গী সেক্সন ২৬৯এস.এস.কী ৱাফমশিং থুগাইবনি‍। লুপা লাখ ১৬ পীথোক পীশিন তৌবগী ৱাফম অসি মীওই অদুনা অমদি কা ৱায়রিবা মীওই অনিমক্না য়াজরে‍। লুপা লাখ ১৬গী পগ্রি থীখিবগী শেনফম অসি দুকান ৱায়রিবা মীওইদুগী হায়দোক্তবা শেনফমদগীনি ওইরমখি‍।

থিজিনবা অদুদা থিজিল্লিবা মীওই অসিগী লোয়নবীনা শেনবা চহী ২০১৯-২০দা দিল্লীদা লুপা লাখ ৩৩গী ওইবা ফ্লেত অমা য়োনখি হায়বসু খঙবা ঙমখি‍। থিজিনবা অদুদা হায়রিবা ফ্লেত য়োনখিবসিদা কেপিতেল গেন তেক্স অমত্তা থীরমদে হায়বা খঙবা ঙমখি‍। লৈবা য়োনবগী লুপা লাখ ৩৩ অদুগী মনুংদা লুপা লাখ ১৩দি ইনকম তেক্স এক্স, ১৯৬১গী সেক্সন ২৬৯এস.এস.কী ৱাফমশিং থুগাইদুনা শেনগঙ ওইনা পীখি‍। লৈরিবা মীওই অদুগী শেন্থোক লম্বীসু হায়দোক্লমদে অমদি মখা-তানা থিজিল্লি‍।

থিজিনবা অদুদা থিজিল্লিবা মীশক অদুগী মচানুপীসু মপান লৈবাক্তা মহৈ মশিং তমলম্মী অমদি মদুগী অচঙবা শেনফম চনৈনবা/হায়দোক্তবা ফীভমদা লৈরি‍।

মখা তানা থিজিনবগী থবক চত্থরি‍।

****