ঙসি ভারতকী উপ-রাস্ত্রপতি শ্রী এম. বেনকাইয়া নাইদুনা হায়খি কোবিদ-১৯ লাইচৎ মাংজৌন্না ঙাকথোক্নবা আয়ুর্বেদাগী লৌশিং শীজিন্নগদবনি। আয়ুর্বেদানা পীরিবা মহৌশাগী লায়েংশিং অসিনা ঐখোয়গী লায়না ঙাকথোকপা ঙম্বগী শক্তি হেনগৎহনদুনা ভাইরস থেংনবদা মতেং পাংগনি।

 ‘লায়না ঙাকথোকপা ঙম্বগী শক্তি হেনগৎহন্নবা আয়ুর্বেদা’ হায়বা হিরমদা কনফিদেরেসন ওফ ইন্দিয়ান ইন্দস্ত্রিনা শীনবা ওনলাইন্দা পাংথোকপা মালেমগী আয়ুর্বেদাগী মীফম হৌদোকপা থৌরমদা শ্রী নাইদুনা হায়খি আয়ুর্বেদা শুপ্নগী অনা-লায়েংগী কাংলোন অমা নত্তে, পুন্সিগী ফিলোসোফি অমসুনি। আয়ুর্বেদানা মীওইবা অসি মহৌশাগী শরুক অমনি হায়না লৌরি অমসুং লনাই মীওইশিংনা মখোয়গী অকোয়বদা লৈরিবশিংগা নুংশিন্না লৈমিন্ননবগী অচুম্বা লম্বী অমা তাক্লি।

মহাক্না হায়খি হকচাং ফনা লৈনবা আয়ুর্বেদানা মহৌশাগী পোৎলমশিং অমসুং মীওইবগী হকচাংগী ত্রিদোসাসকী মরক্তা খল চানা থম্লি। লায়েংনবদা অমসুং হিদাক থাবদা মীওই খুদিংমক্কী তোঙানবা মওংশিং অমসুং ফবগী মওং আয়ুর্বেদাদা য়াওজরি। অরিবা মতমগী ভারত্তা লায়নাশিং লায়েংনবা মতিক চাবা, সাইন্তিফিক ওইবা থবকশিং লৈরমখি। ভারত্তা ঙল্লিঙৈ মতমদগী হৌনা মশিং য়াম্লবা মীওইশিং আয়ুর্বেদানা অরুবা অনাবশিং লায়েংখি।

মহাক্না হায়খি অনা-লায়েংগী অফবা থবক ওইনা লৈনবা আয়ুর্বেদা য়োকখৎকদবনি। অনৌবা হিদাকশিং চাংয়েং তৌনবা আর অমসুং দিগী খুদোংচাবশিং শেমগৎনবা লনাই কম্পেনিশিং অমসুং সরকার পুন্না থবক তৌমিন্নগদবনি। ভারত অমসুং মালেমগী মীয়াম শীনবা থুংনা আয়ুর্বেদাগী কান্নবা ফঙহনগদবনি।মহৌশাগী লায়েং মখলশিং মমল হোংই অমসুং মীয়াম্না য়াম্না লাইনা ফংবা য়াই।

মহাক্না হায়খি ভারত মালেমদা মমল হোংবা অমসুং মগুন লৈবা হিদাকশিং ফংফম্নি। লৈবাক অসি মালেমগী লায়েংফম অমসুং মেদিকেল তুরিজমগী মফম অমা ওইবা য়াগনি। মমাংঙৈগী অমসুং অনৌবা মতমগী লায়েং-কাংলোনশিংগী মরক্তা পুন্না থবক তৌমিন্নগদবনি অমসুং অমনা অমদগী তম্নগদবনি অমসুং শৌগৎনগদবনি।

উপ-রাস্ত্রপতিনা হায়খি আয়ুর্বেদা চাউখৎহন্নবা অনৌবা তেক্নোলোজি শীজিন্নগদবনি। আয়ুর্বেদাগী লমদা থবক তৌরিবশিংনা নেসনেল ইন্নোবেসন ফাউন্দেসন অমসুং মালেমদা আয়ুর্বেদা চাউখৎনবা থবক তৌরিবা লুপশিংগা পুন্না থবক তৌমিন্নগদবনি। হকশেলগী লমদা স্তার্দঅপশিং য়োকখৎনবা ঐখোয়গী মমাংঙৈগী লায়েং মখলশিংদা শেন থাদগদবনি।

ভারত্তা লৌনগন্দবা অমসুং পুন্সি মহিংগা মরী লৈনবা লায়নাশিং হেনগৎলকপদা নুংনাংবা ফোঙদোক্লদুনা শ্রী নাইদুনা হায়খি অসিগুম্বা ফিবম অসিদা আয়ুর্বেদা য়াম্না কান্নগনি। মী খুদিংমক হকচাং ফবা পুন্সি মহিং লৈগদবনি অমসুং অফবা চীঞ্জাক চাগদবনি। ঐখোয়গী ইপা-ইপুশিংনা তাক্লম্বা চীঞ্জাকশিং অসি ঐখোয়গী হকচাং অমসুং নোং-চিংগী ফিবমগা চুনবা ঙাক্তনি।

লায়নাগী মতাংদা কিবা অসিনা লায়না মশাগী হেন্না শাথি অমসুং অসিগুম্বা লাংতক্নবশিং কোক্নবা ধ্যান তৌগদবনি। মী খুদিংমক্তা আয়ুর্বেদাগী কান্নবা ফংহন্নবা অয়ুসমান ভারতগুম্বা স্কিমশিং শীজিন্নগদবনি। ঐখোয়গী ইন্সুরেন্স সেক্তরনা আয়ুর্বেদা য়োকখৎকদবনি। আয়ুর্বেদাগী লমদা লৌশিং হেনগৎহন্নবা থবকশিং পায়খৎকদবনি অমসুং মসিনা আয়ুর্বেদাগী থবকশিং মপান্দা থাদোকপদা মতেং পাংগনি। 

ওনলাইনদা পাংথোকখিবা থৌরম অদুদা এক্সতর্নেল এফেয়ার্স অমসুং পর্লিয়ামেন্তরি এফেয়ার্সকী রাজ্য মন্ত্রী ভি.মুরালিধারন, সি.আই.আইগী চিয়রমেন থোমাস জোন মুথুৎ, সি.আই.আই আয়ুর্বেদা পেনেলগী কো-কনভেনর বেবি মেথিউ, আয়ুর্বেদা ইন্দস্ত্রিগী লুচিংবশিং, আয়ুর্বেদা এসোসিএসনগী মেম্বরশিং, আয়ুর্বেদা দোক্তরশিং অমসুং মহৈরোইশিং শরুক য়াখি।

মখাগী অসি মপুংফাবা ৱারোলনি:

 ‘লায়না ঙাকথোকপা ঙম্বগী শক্তি হেনগৎহন্নবা আয়ুর্বেদা’ হায়বা হিরমদা মালেমগী মীফম হৌদোকপদা ময়ামগী মরক্তা ঐ শরুক য়াবদা ঐ হরাওই। ৱেবকী খুৎথাংদা অসিগুম্বা মালেমগী থৌরম অমা কেরলাদা পাংথোকপদা ঐ হরাওই।

লাইচৎকী অৱাবা মরক্তা মসিগী থৌরম অসি শীনবগীদমক ঐনা কনফেদেরেসন ওফ ইন্দিয়ান ইন্দস্ত্রি থাগৎলি। মসি শুপ্নগী থৌরম অমা খক নত্তে, লাইচৎ অসি লাকশিন্নবা শক্তি পীরিবা হকশেলগী মরুওইবা মিসন অমা উৎপনি।

ঐগী নুংশিরবা ইচলশিং অমসুং ইনাওশিং,

মমাংঙৈদা ভারত্তা লায়নাশিং সাইন্তিফিক ওইনা লায়েংবগী থবক পাংথোক্লমখি। অথার্বা বেদা অসি হিদাক-লাংথকশিংগী লৌশিংগী পুক্কৈ অমনি। মসি ভারত্তা অঙনবা মতমগী মেদিকেলগী লৌশিং কয়াগী হৌরকফম্নি।

আয়ুর্বেদা অসি অথার্বা বেদাগী উপ-বেদা অমনি। মসি খৃস্তগী মমাংগী ৬সুবা চহিচাগী মতমগীনি। মসিনা মীওইবা খুন্নাইদা খ্বাইদগী লিরবা অনা-লায়েংগী লমদা মমিং লৈরবা লাইরিক অমনি। মমাংঙৈগী হিন্দু ফিলোসোফিগী পাউতাকশিং- বাইসেসিকা অমসুং ন্যায়া হায়না খঙনবা লোজিক অসি আয়ুর্বেদাগী য়ুম্ফমনি।

চাকারা সামহিতা, সুস্রুথা সামহিতা অমসুং অসতানাগা হরিদয়া হায়রিবা লাইরিকশিং অসিদা আয়ুর্বেদাগী লৌশিংগী লন কয়া য়াওরি।অথার্বা বেদাগী লাইৱাশিংদা হিদাক শেম্বা য়াবা পাম্বীশিং, ধাতুশিং, হিদাক-লাংথকশিং, লায়নাশিং অমসুং লায়েংবগী মতাংদা য়াওরি। লায়না কয়া লায়েংবা ঙম্বা পাম্বীশিংগী মগুনশিং মখোয়না পল্লি।

অনাবশিং ফহন্নবা আয়ুর্বেদানা প্রাকৃতি অমসুং ত্রিদোসহাসতা য়ুম্ফম ওইরি। হায়রিবা ৱাখল্লোলশিং অসিদা আয়ুর্বেদানা লায়েংবদা অমসুং হিদাক থাবদা মীওই খুদিংমক তোঙান-তোঙানবা মওংদা কান্নবা ফংই হায়বা উৎলে। থৱায় পানবা অমা হকচাং ফনা লৈনবা আয়ুর্বেদানা মহৌশাগী পোৎলমশিং অমসুং মীওইবগী হকচাংগী ত্রিদোসাসকী মরক্তা খল চানা থম্মি।

সংস্কৃত অমসুং ভারতকী অতৈ লোলশিংদা ইবা অরিবা লাইরিক চা কয়াদা আয়ুর্বেদাগী মরমদা ইরমখি। হৌখিবা চহি সেঞ্চুরি কয়াদা আয়ুর্বেদানা ভারতকী য়াম্লা মীয়াম অফবা মখলগী লায়েংবগী থবকশিং পাংথোক্লম্বগী পুৱারি অমা লৈরি।

অরিবা মতমগী ভারত্তা লৈঙাকপশিংনা আয়ুর্বেদাগী কান্না লৌখি। মৌর্য লৈবাক্তা আয়ুর্বেদা অসি ইন্সতিতুৎ অমা ওইনা শেমখৎখিবগী ৱারি লৈরি। মসিনা ললোন-ইতিক অমসুং লৌউ-শিংউগা লোয়ন্না পাংথোকমিন্নখি হায়রি। ঙসিদি আয়ুর্বেদা অসি হকশেলগী সাইন্স অমা ওইনা মালেম্না খঙনরে। আয়ুর্বেদা শুপ্নগী অনা-লায়েংগী কাংলোন অমা নত্তে, পুন্সিগী ফিলোসোফি অমসু ওইরি।

আয়ুর্বেদানা মীওইবা অসি মহৌশাগী শরুক অমনি হায়না লৌরি অমসুং লনাই মীওইশিংনা মখোয়গী অকোয়বদা লৈরিবশিংগা নুংশিন্না লৈমিন্ননবগী অচুম্বা লম্বী অমা তাক্লি। মসি ভারতকী পুন্সিগী ফিলোসোফিদা চেৎনা মরা তারবা হকচাং ফনা লৈনবা থৌরাং অমনি।

ঐগী নুংশিরবা ইচলশিং অমসুং ইনাওশিং,

মমাংদা অমুক্তা থোকখিদ্রিবা লাইচৎ অমনা ঙসিদি মালেম অসি অৱাবা নংলে। ঙসি ঐখোয়না থেংনরিবা মালেমগী লোকদাউন অসি ঐখোয়গী পুৱারিদা অহানবনি। মসিনা ওইহল্লিবা শেন-থুম অমসুং খুন্নাইগী চৈথেং ৱাখলনা লাম্বা ফংদে। ঐখোয়না চাবা, থবক শুবা, চৎপা অমসুং মী উনবা য়াওনা ঐখোয়গী পুন্সিগী মশক কয়া লাইচৎ অসিনা হোংহল্লে।

মসিগী অরুনবা তানফম অসিদা , কমদৌনা ভারতনা মাইপাক্লবা লৈবাক অমা ওইনা লিৎখৎলকপা ঙমগনি হায়বা ঐখোয়না খনগদবনি। পুম্নমক অসি মসিগী লাইচৎ অসি লাকশিনবগী মখা পোল্লি। আয়ুর্বেদানা তাকলিবা লায়না ঙাকথোক্নবা মহৌশাগী লায়েংশিং শীজিন্নদুনা ভাইরস অসি মতম শাংনা থেংনগদবনি।

“দিনাচার্য়া”(নোংমগী থবকশিং) অমসুং “রিতুচার্য়া”(হকচাং ফনা লৈনবা মতম মতমগী থবকশিং)দা য়ুম্ফম ওইদুনা আয়ুর্বেদানা লায়না ঙাকথোক্নবা লৌশিং কয়া পীরি।

য়াইঙং, কুমিন, ফদিগোম, চনম, তুলসি, সিন্নামোন, ব্লেক পেপ্পর, শিং, রাইসিন অমসুং জেগগরি চাবনা হকচাংগী লায়না ঙাকথোকপা ঙম্বগী শক্তি হেনগৎহল্লি।

নুমিৎ খুদিংগী য়োগা শান্নবা, মরুওইনা  য়ামদ্রবদা মিনিত ৩০ প্রানায়াম অমসুং ধ্যান শান্নবনা হকচাং ফগৎহল্লি হায়না অয়ুস মিনিস্ত্রিনা পাউতাক পীরি।

অয়ুর রক্ষ ক্লিনিকশিংগী শরুক অমা ওইনা, সি.আই.আইগী মতেংগা লোয়ন্না কেরলা সরকারনা হৌদোকপা আয়ুর্বেদাগী লায়না ঙাকথোক্নবা “অয়ুরসিল্দ” হায়রিবা থবক অসি শকখঙবদা ঐ হরাওই।

ভারত অমসুং মালেমদা চৈথেং পীরবা লাইচৎ লাকশিনবদা আয়ুর্বেদানা পাউখুম পীবা ঙমগনি।

সাইন্তিফিক ওইবা খুদমশিংগা লোয়ন্না আয়ুর্বেদাগী হিদাকশিংগী মগুনশিং মখা তানা থিদোকপা দরকার ওই। আয়ুর্বেদাগী কান্নবশিং ভারত অমসুং মালেমগী মীয়ামদা ফংহনগদবনি। ভারত মালেমদা মমল হোংবা অমসুং মগুন লৈবা হিদাকশিং ফংফম্নি। লৈবাক অসি মালেমগী লায়েংফম অমসুং মেদিকেল তুরিজমগী মফম অমা ওইবা য়াগনি।

মসি থবক ওইনা পাংথোক্নবা, ঐখোয়গী মমাংঙৈগী লায়েংবগী থবকশিং অসি ঐখোয়না মখা তানা ফগৎহনগদবনি। থিজিনবা অমসুং লৌশিংদা য়ুম্ফম ওইদুনা অফবা হকশেলগী থবক ওইনা লৈনবা আয়ুর্বেদা য়োকখৎকদবনি।

অনৌবা হিদাকশিং পুথোক্নবা অমসুং চাংয়েং তৌনবা আর অমসুং দিগী খুদোংচাবশিং শেমগৎনবা লনাই কম্পেনিশিং অমসুং সরকার পুন্না থবক তৌমিন্নগদবনি। ভারত অমসুং মালেমগী মীয়াম শীনবা থুংনা আয়ুর্বেদাগী কান্নবা ফঙহনগদবনি।মহৌশাগী লায়েং মখলশিং মমল হোংই অমসুং মীয়াম্না য়াম্না লাইনা ফংবা য়াই।

কোরোনাভাইরসগুম্বা মালেমগী লাইচৎ মনুংদা মীওইবা খুন্নাই পুম্বা কান্নবা ফংনবা মালেমগী লৈবাকশিংনা মখোয়গী অরিবা লায়েং-কাংলোনশিংগী লৌশিং শরুক য়ামিন্নগদবনি। অদুবু, লায়েং-কাংলোনশিং অদুবু  খুদম-চাংদমদা য়ুম্ফম ওইগদবনি। 

অরিবা লায়েং-কাংলোনশিং অমসুং অনৌবা লায়েং মখলশিংগী মরক্তা তাথোক-তাশিন তৌনগদবনি অমসুং অমনা অমদগী তম্নবা অমসুং অমগা অমগা মতেং পাংন্নবা অসিনা খুদিংমক হকচাং ফহনবা ঙমগনি।

লৌনগন্দবা লায়নাশিং, শাদোং অমসুং শরুগী অনাবশিং, পুন্সি মহিংগা মরী লৈনবা অনাবশিং, অঙাং উনদ্রিঙৈ অমসুং উনরবা মতুংগী চেকশিন-থৌরাংশিংদা মসিনা ফজনা লায়েংবা ঙম্বগীদমক আয়ুর্বেদা মশক খঙবা হেনগৎলকলি। ভারত্তা লৌনগন্দবা লায়নাশিং অমসুং পুন্সি মহিংগা মরী লৈনবা লায়নাশিং হেনগৎলকপদগী আয়ুর্বেদাগী দরকার ওইবা হেনগৎলকলে।

ভারত সরকারগী অয়ুসমান ভারত অসি মালেমদা খ্বাইদগী চাউবা হেল্থ ইন্সুরেন্স স্কিমনি। মী খুদিংমক আয়ুর্বেদাগী কান্নবা ফংহন্নবা অসিগুম্বা স্কিম অসি শীজিন্নগদবনি। আয়ুর্বেদা ইন্দস্ত্রিনা মীওই কয়া থবক পীরি। মরম অদুনা আয়ুর্বেদা অমসুং মসিগা মরী লৈনবা হিরমশিংদা মিৎয়েং থমদুনা স্কিল ত্রেনিং কয়া পাংথোক্নবা থবক পায়খৎকদবনি। মসিনা মপান্দা আয়ুর্বেদাগী খুদোংচাবশিং থাদোকপদা মতেং পাংগনি।

হকশেলগী লমদা স্তার্দঅপশিং য়োকখৎনবা ঐখোয়গী মমাংঙৈগী লায়েং মখলশিংদা শেন থাদগদবনি। আয়ুর্বেদা চাউখৎহন্নবা অনৌবা তেক্নোলোজি শীজিন্নগদবনি। আয়ুর্বেদাগী লমদা থবক তৌরিবশিংনা নেসনেল ইন্নোবেসন ফাউন্দেসন অমসুং মালেমদা আয়ুর্বেদা চাউখৎনবা থবক তৌরিবা লুপশিংগা পুন্না থবক তৌমিন্নগদবনি।

ঐখোয়গী ইন্সুরেন্স সেক্তরনা আয়ুর্বেদা শৌগৎকদবনি। ঐখোয়গী হিদাক-লাংথকশিং, লায়ংবগী থবকশিং অমসুং অশীন-অরাংগী থবকশিং মগুন লৈহন্নবা ঐখোয়না লেপ্তনা য়েংশিনগদবনি।

ভারতকী সভেত্যনা মতম পুম্নমক্তা মালেম পুম্বা য়াইফনবা লাই খুরুমখি। বৃহদারণ্যক উপনিষদতগী লৌথোরকপা শক্তিমন্ত্রনা হায়রি :

“সর্ভে বাবন্তু সুখিনা

সর্ভে সান্তু নিরামায়াহ”

হায়বদি “খুদিংমক নুংঙাইরসনু! খুদিংমক লায়নাশিংদগী কোক্লসনু!”

মসিগী মালেমগী আয়ুর্বেদাগী মীফম অসিনা মীওইবা খুন্নাই হকচাং ফনা লৈনবা পান্দম অদু ফংনবা অচুম্বা খোঙথাং অমা ওইগনি হায়বা ঐনা থাজবা থম্লি।

৪সুবা মালেমগী আয়ুর্বেদাগী মীফম হৌদোকপদা ঐ হরাওই। মসিগী মীফম অসিদা মরুওইবা ৱাফম কয়া খন্নগনি অমসুং মরৈ য়েৎগনি হায়বগী থাজবা থম্লি অমসুং মসিনা ভারত অমসুং মালেম অনিমক্তা সাইন্স অমসুং আয়ুর্বেদাগী থবকশিং মপাঙ্গল কনখৎহনগনি হায়বগী থাজবা ঐনা থম্লি।

অদোমবু থাগৎচরি!

জয় হিন্দ !

*****