মহৌশানা খোঙগী শরুক্তা হকচাংগী মনুং থংবা শরুক্কী শিংলিদা ঈ ফমজিনবা নৎত্রগা দিব ভেন থ্রোম্বোসিস(দি ভি তি)না মীওইবগী পুন্সি মাঙবা য়াবা খুদোংথিবা কয়া থোকহল্লি। দিব ভেন থ্রোম্বোসিস ঙাকথোক্নবা খোঙগী শিংলিশিংদা ঈগী খোঙজেল হেনগৎহন্নবা সাইন্সতিস্তশিংনা খুৎলায় অমা পুথোকলে।

মতম কুইনা চৎপা য়াদ্রবা, ফমুংদা লৈরবা, ওপরেসন মতুংদা লেংবা য়াদ্রবা, খোঙশিং শিথরবা, অনাবা ফাওরবা, পোমখৎপা, ঙাংবা, শাগৎপা অমসুং শিংলিশিং মপান্দা তোংথোরকপা অসি খুৎলায় অসিনা ফহনবা ঙমগনি। ফমজিল্লবা ঈ অদু লংস ফাওবা শেংদবা ঈ পুরিবা আর্তিরিশিংদা লাকপা মতমদা থৱায় মাঙবা য়াবা অনাবা ‘পুলমোনারি আর্তিরি ইমবোলিজম’ থোকহল্লি।

দিব ভেন থ্রোম্বোসিস ঙাকথোক্নবা খুৎলায় অসি ভারত সরকারগী সাইন্স অমসুং তেক্নোলোজি দিপার্তমেন্তগী মখাদা লৈবা ওতোনোমস ইন্সতিতুৎ, শ্রী চিত্রা ত্রিরুনাল ইন্সিতিতুৎ ওফ মেদিকেল সাইন্সেস এন্দ তেক্নোলোজি, ত্রিবানদ্রমগী কাংবু অমনা পুথোকপনি। ইঞ্জিনিয়ারিং কাংবু অদুদা জিতিন কৃষ্ণন, বিজু বেঞ্জামিন অমসুং কোরুথু পি বারুগেসে য়াওখি।

অসিগুম্বা খুৎলায়শিং অসি হৌজিক ফাওবা লুপা লাখ ২দগী লাখ ৫ ফাওবা পীদুনা মপান্দগী লৈরি । শ্রী চিত্রা ত্রিরুনাল ইন্সিতিতুৎ ওফ মেদিকেল সাইন্সেস এন্দ তেক্নোলোজিগী কাংবুনা খুৎলায় অসি পুথোকপদগী কৈথেলদা লুপা লাখ ১গী মখাদা ফংলগনি।

নৌনা পুথোকপা খুৎলায় অসিনা খোঙগী শিংলিশিং তপ্না তপ্না নমশিন্দুনা খোঙগী শিংলিশিংদা ঈ চেনবা হেনগৎহনগনি। নমশিনবা অসি ভেনশিংদনি অমসুং আর্তিরিশিংদা নত্তে। খুৎলায় অসিদা নমশিনবগী চাং অদু য়েংশিন্নবা য়াওরি অমসুং ইলেকত্রোনিক সর্কুইত অমগী খুৎথাংদা ভেল্বশিংনা কন্ত্রোল তৌগনি। মতম পুম্নমক্তা অশোই-অঙাম থোক্তনবা চাংদা নমশিন্নবা খুৎলায় অসিদা সোফয়াৱার অমা অমসুং কন্ত্রোল সর্কুইত অমা য়াওরি। খুৎলায় অসিদা মৈ মুৎখিবা মতমদা মৈ ফংহন্নবা খুদোংচাবা য়াওরি।

খুৎলায় অসি শাবা অমসুং য়োনবগী লাইসেন্স কেরলাগী কোচিদা লৈবা ইনপ্রদক্সদা পীখ্রে। চহি ৭ শুরবা কম্পেনি অসি ওতোমেসন অমসুং কন্ত্রোলগী পোৎথোকশিং পুথোকপদা মাংজিল থারিবা অমনি।

*****