কেন্দ্রগী কেমিকেল অমসুং ফর্তিলাইজরগী রাজ্যগী মন্ত্রী অমসুং সিপ্পিংগী এম.ও.এস. (আই./সি.) ওইরিবা শ্রী মন্সুখ মান্দবিয়ানা ঙসি রামগুন্দম ফর্তিলাইজর্স অমসুং কেমিকেল লিমিতেদ (আর.এফ.সি.এল.)গী শেমগৎলিবা য়ুরিয়া য়ুনিৎতা চৎখি অমসুং প্রোজেক্ত অসিগী খুমাং চাউশিনবগী চাংবু কম্পেনী অসিগী মকোক থোংবা ওফিসিএলশিংগা লোইননা য়েংশিনখি।

শ্রী মান্দবিয়াগা লোইননা য়ুম্লৈ-কৈরৈ মন্ত্রালয়গী রাজ্যগী মন্ত্রী (এম.ও.এস.) ওইরিবা শ্রী কিসান রেদ্দী, ফর্তিলাইজর্সকী এদিসনেল সেক্রেতরী শ্রী ধরম্পাল, আর.এফ.সি.এল.গী সি.ই.ও. শ্রী নির্লেপ সিংহ রাই অমসুং আর.এফ.সি.এল.গী প্রোজেক্ত সাইৎ একজিক্যুতিব দিরেক্তর শ্রী রাজন থপর য়াওখি। খোংচৎ অদুগী মনুংদা শ্রী মান্দবিয়ানা নীমনা কুপ্পা য়ুরিয়া শুংফম ওইরিবা মেন কন্ত্রোল রুমদা চঙদুনা আর.এফ.সি.এল.গী  ওফিসিএলশিংনা শন্দোক্না তাক্লবা মতুংদা রিফোর্মর অমসুং বেগিং প্লান্ততা চঙখি।

শ্রী মান্দবিয়ানা য়েংশিন মীফম অমগী ময়াই তাংবল লৌদুনা আর.এফ.সি.এল.গী ওফিসিএলশিংনা মন্ত্রীদা প্রজেন্তেসনগী থোংদা পাউদমখি। মীফম অদুয়া য়ুম্লৈ-কৈরৈ মন্ত্রালয়গী রাজ্যগী মন্ত্রী (এম.ও.এস.) ওইরিবা শ্রী কিসান রেদ্দী, ফর্তিলাইজর্সকী এদিসনেল সেক্রেতরী শ্রী ধরম্পালগা লোইননা আর.এফ.সি.এল. অমসুং ই.আই.এল.গী মকোক থোংবা ওফিসিএলশিং অমসুং সরকারগী ওফিসিএলশিংনা শরুক য়াখি।

মীফম অদুগী মনুংদা, শ্রী নির্লেপ সিংহ রাই, সি.ই.ও. আর.এফ.সি.এল.না মন্ত্রীদা প্রোজেক্ত অসিগী তোঙান-তোঙানবা থবকশিংগী খুমাং চাউশিনবগী চাং পাউদমখি অমসুং প্রোজেক্ত অসিগী চাদা ৯৯ লোইশিনলে হায়খি। মসিমসু তমখি মদুদি, মফম অসিদা শুরিবা থবকশিং অসি মতম খরগী ওইনা লোকদাউন মনুংদা লেপ্লুরে অদুবু মে, ০৩, ২০২০দগী অমুক মখা চত্থখি। শ্রী সিংহনা হায়খি মদুদি মফম অসিদা লৈরিবা শিন্মী মশীংদা নুংনাংখি অদুবু মেনেজমেন্তনা অকনবা খোংথাং লৌখত্তুনা কন্ত্রেক্ত ৱার্করশিংবু লেম্না চানবা অমসুং লৈফম পীদুনা থমহৌখি। মখোয়দা লোকদাউনগী মনুংদা খুৎশুমলসু পীখি।

শ্রী মান্দবিয়ানা আর.এফ.সি.এল.না লোকদাউন মনুংদা অমসুং মতুংদা শিন্মীশিংগী পুন্সিদা অকায়বা থোকহন্দনা লৌখৎখিবা থবক থৌরমশিংবু শিংথাখি।

থৌরম অসিদা মীদিয়াদা ৱা ঙাংলদুনা শ্রী মান্দবিয়ানা হায়খি মদুদি মথৌ তৌরুদ্রবা ফর্তিলাইজর য়ুনিৎশিং হিংগৎহনবনা য়ুরিয়াদা মীপান তাংবগী চাং হন্থদুনা লমদম অসিদা য়ুরিয়া পুথোকপগী চাং হেনগৎলগনি। মাহক্না মখা তানা হায়খি মদুদি তেলঙ্গানাদা লৈবা লৌমীশিংনা তঙাই ফদবা য়ুরিয়াগী চাং অসি আর.এফ.সি.এল.না থবক হৌরকপগা ৱাত্তনা ফংলগনি।

শ্রী মান্দবিয়ানা থাজবা ফোংদোক্লদুনা প্লান্ত অসি মতম চানা কম্মিসন তৌগনি অমসুং নীম কুপ্পা য়ুরিয়াশিং অসি থা অনীসিদা পুথোকপা হৌগনি হায়খি। মহাক্না মসিমসু হায়খি মদুদি আর.এফ.সি.এল. প্লান্ত অসিনা লমদমসিগী নহাশিংদা থবক পীরগনি অমসুং তেলঙ্গানাগী শেন্মিৎলোন হেনগৎহল্লগনি।

আর.এফ.সি.এল.গী তেলঙ্গানাগী রামগুন্দমদা নৌনা শাগদবা গ্যাসতা য়ুম্ফম ওইবা চহীদা মেত্রিক তন লাখ ১২.৭ পুথোক্কদবা য়ুরিয়া য়ুনিৎ অসিসু নেসনেল ফর্তিলাইজর লিমিতেদ (এন.এফ.এল.), ইঞ্জিনীয়র্স ইন্দিয়া লিমিতেদ (ই.আই.এল.) অমসুং ফর্তিলাইজর কোরপোরেসন ওব ইন্দিয়া লিমিতেদ (এফ.সি.আই.এল.)না শৌগৎপা জোইন্ত ভেঞ্চর (জে.ভি.সি.) অমনি। প্রোজেক্ত অসিগী উরেপ উয়ুংসু প্রধান মন্ত্রীনা ওগস্ত ৭, ২০১৬দা তমখি।

*****