কমর্স অমসুং ইন্দস্ত্রি অমসুং রেলৱেজ মিনিস্তর পিয়ুস গোয়ল না হায়খি অপুনবা ৱাখল্লোন অমগা লোয়ন্না মৈখু চেন্দবা ইনর্জিগী লমদা ভারত থবক পায়খৎলি। লৈবাকপোকপা নুমিৎতা ইন্তরনেসনেল সোলার এল্লাইন্সনা শীনবা অহানবা মালেমগী সোলার তেক্নোলোজি সম্মিৎ লোইশিনবা থৌরমদা শ্রী গোয়ল না হায়খি মৈখু চেন্দবা ইনর্জিগী লমদা ভারত মশাগী ওইবা থবকশিংগী খ্বাইদগী ফবা শরুক্তি অপুনবা ৱাখল্লোন অমদা থবক পাংথোকপা, দিপার্তমেন্তশিংগী মরক্তা পাউ ফাওনদবা লৈহন্দবা অমসুং ঐখোয়গী তুংগী মীরোলশিংগীদমক মৈখু চেন্দবা তুংলমচৎ অমা শেমগৎনবা অমনা অমবু শৌগৎনদুনা থবক পাংথোকপা অসিনি।

য়ুনিয়ন মিনিস্তরনা হায়খি হিংনবা হেন্না নানবা অমসুং নুংঙাইবা মালেম অমা শেমগৎনবা  সোলার ইনর্জি অমসুং অনৌবা তেক্নোলোজিশিংনা ঐখোয়গী তুংগী পৱার ওইগনি। ঐখোয়গী ইনর্জি ফংফমশিং মৈখু চেনহন্দনবা অমসুং তুংদা মসি থবক ওইনা পাংথোক্নবা ঐখোয় খুদিংমক শরুক য়াবা অমসুং ঐখোয়গী অঙাংশিংগী হেন্না ফবা হয়েং অমা শেমগৎনবা থবক পায়খৎপা অসি নত্তনা ঐখোয়না পায়খৎনবা থবক অমতা লৈতে।

ভারত্তা গ্যাসতা য়ুম্ফম ওইবা ইকোনোমি অমা শেমগৎনবা পেত্রোলিয়ম অমসুং নেচরেল গ্যাস মিনিস্ত্রর ধরমেন্দ্র প্রধান্না পায়খৎলিবা থবকশিং থাগৎলদুনা মিনিস্তরনা হায়খি অহোঙবা অমসুং অওনবা থবকশিং অসিনা লৈবাক অসিনা ফোসিল ফুয়েলশিং শীজিন্নবদগী লোম্বা নাইদনা ফংবা ইনর্জি শীজিন্নবগী মাইকৈদা হোংলকপদা মতেং পাংগনি।

য়ুনিয়ন মিনিস্তরনা হায়খি নোংমদি মালেম অসি পৱার লেম্না ফংলক্কনি। ভারতনা গিগা ৱাত ৭৪৫গী সোলার ইনর্জি পুথোকপা ঙম্বগী থৌনা লৈরে হায়বা ঐনা মাংজৌন্না ফোঙদোক্লি। মসিনা মখোয়গী মৈ য়াম্না শীজিন্নবা মতমদা মালেমগী অতৈ মফমশিংদা মৈ ফংহনবা ঙমগনি। সমুদ্রশিং লান্দুনা মালেমগী গ্রিদ ত্রান্সমিসন লাইনশিং পুনবা ঐনা মঙলান অমা শাগৎলি, মসিনা ঐখোয়না মালেম শীনবা থুংনা ইনর্জি পীবা ঙমগনি। মালেমগী মফম খরদা মতম পুম্নমক্তা নুমিৎ থোক্লি, মালেমগী মফম খরদা মতম চুপ্পদা নুংশিৎনা ইনর্জিগী মওংদা কান্নবা ফংহল্লি অমসুং ঈশিংনা হায়দ্রো ইনর্জিগী মওংদা মালেমগী মফম কয়াদা পৱার ফংহল্লি।

মহাক্না হায়খি কার্বোন থাদোকপগী চাং হন্থহন্নবা পেরিসতা পাংথোকপা কোপ-২১ সম্মিৎতা লৌখিবা ৱারপ অদু চহি খর অসিদা লৌখিবা খ্বাইদগী মরুওইবা অপুনবা ৱারেপনি। মসি পুম্নমক্কী মৈখু চেন্দবা তুংলমচৎ অমগী খ্বাইদগী মরুওইবা ৱারেপনি। ঐখোয়গী মালেম অসি তুংদা হেন্না নুংঙাইনবা অমসুং মৈখু থাংদনবা, কার্বোন থাদোকপা হন্থনবা লৈবাকশিংনা করি ৱারেপ লৌগনি হায়বা ঐখোয়না ৱারেপ লৌরে অমসুং অইং-অশাগী খল হোংলক্লিবা অসি থেংন্নবা মরী লৈনবা খুদিংমক মালেমগী ওইনা দাইত্ব লৌনবা অমতা ওইনা য়ানরে।

লৈবাক ১০০ হেনবনা অয়াবা পীবগীদমক ইন্তরনেসনেল সোল্লার এল্লাইন্স থাগৎলদুনা সুরজ(এস-স্তেবল, য়ু-অনকন্দিসনেল, আর-রিনিউএবল, এ-এফোরদেবল, জে-জজতিস্ত)গী লোম্বা নাইদ্রবা শক্তি লৌনবা পুন্না থবক তৌমিন্ননবা মিনিস্তরনা অপীল তৌখি।

*****