কম্মর্স অমসুং ইন্দস্ত্রী অমসুং রেলৱেগী কেন্দ্র মন্ত্রী শ্রী পিয়ুশ গোয়লনা ইন্দিয়ন ওতোমোতিব কম্পোনেন্ত মেন্যুফেকচররশিংদা খুৎশম্নবা, তেংবাংনবা অমসুং মতম কত্থোকপগী ইথিলগী লোয়ননা থবক পাঙথোক্তুনা মালেমগী অতোপ্পা মফমশিংগা চাংদম্নদুনা থাজবা অমগা লোয়ননা শাহৌ লৌসি হায়খ্রে। ওতোমোতিব কম্পোনেন্ত মেন্যুফেকচরর এসোসিএসন (এ.সি.এম.এ.)গী ৬০শুবা চহিগী থৌরমদা ৱা ঙাংবদা মহাক্না মেন্যুফেকচররশিংনা হৌখিবা চহি খরদগী পাকথোক চাউথোকপা হেল্লক্লি অমসুং মালেমগী থাক্তা চাংয়েংনবা ঙম্নবা হোৎনদুনা লাক্লি হায়খি।

মন্ত্রীনা হায়খিবদা ইন্দস্ত্রী অসিনা তুংগী মতমগীদমক্তা শেম শাবা লোয়রে অমসুং কোবিদকী মতুংদা ওইরক্কদৌরিবা মতমশিংদা শোইদনা মাই পাক্কনি হায়খি। মহাক্না মখা তানা অসুম্না হায়খি, “ঐখোয়গী লুপ অসিনা ইরাংগী মতমদা খক্তা ঐখোয়গী খ্বাইদগী ফবা তৌবা ঙম্বা অদু পাঙথোকপা ঙম্মি। ত্রেদতা খুমাং চাউশিনবা, তেক্নোলোজী ফগৎহনবা, পোত্থোক্কী মগুন হেনগৎহনবা, ই-পাউ তাশিনবা অমসুং থাদোকপগী থৌরাং কয়াগী খুত্থাংদা এ.সি.এম.এ. অনা অনৌবা মহৌশা অসিদা মাং থাদুনা চৎপা ঙমগনি”।

শ্রী গোয়লনা ঐখোয়গী লৈবাক পুম্বনা প্রধান মন্ত্রী নরেন্দ্র মোদীগী আত্মানির্ভর ভারত ওইবগী খোল্লাওবু থবক ওইনা পাঙথোক্তুনা পাঙ্গল কনবা থাক্তা লৈনবা অমসুং তুং লমচৎকীদমক্তা ইশাদা থাজবা লৈদুনা মালেমগী অতোপ্পা মফমশিংগা মান্ননা চৎনবা হোৎনরি হায়খি। মহাক্না নীংহন্নবা লৈতবা মালেমগী সপ্লাই চেনগী থাজবা য়াবা খোঙলোই ওইনা চৎপগী চাউরবা অপাম্বা লৈরি হায়খি। “ঐখোয়না মালেমগা মান্ননা চৎপা ঙম্বগী মতিক অসি পাকথোক চাউথোকহল্লগনি। ঐখোয়না কারবার চাউথোকপা য়াবগী খুদোংচাবা কয়া অমা উরি অমসুং থাজবা য়াবা মালেমগী খোঙলোই ওইনবা চাংয়েংনবা য়াবা মমলদা মগুন লৈরবা পোত্থোক কয়া পীগনি”, হায়না মন্ত্রীনা মখা তানা হায়খি।

ভারতকী শেন্মিৎলোন্দা লৈরিবা অফবা থৌওংগী চৎনবী কয়াগী মতাংদা ৱা ঙাংলদুনা মন্ত্রীনা হায়খিবদা, “মমাং থাদা ঐখোয়না রেলৱেজকী মমাং চহিগী মান্নবা মতমদা ওইখিবা ফ্রাইৎ ত্রাফিক্কী চাং অদুদগী চাদা ৪গী চাংদা হেনগৎহনবা ঙমখি। হৌজক্কী থা অসিদনা হেন্না ফিভম ফজনা চৎলি। ত্রেক্তর য়োনবগী চাং অসি হান্নগুম্না হিংগৎলক্লে, চকা অনি পানবা অমসুং চকা অহুম পানবা গারি য়োনবগী চাংদসু ফিভম য়াম্না ফগৎলে। ঐখোয়না তুংগী মতম য়েংবা মতমদা চাউখৎপা ৱাখল খন্দুনা চিংনবগী ৱাখল থাদোকপগী মতম ওইরে। অমসুং থাজবা অমসুং অফবা মঙলান অমদা তুংগী মতম য়েংবা মতম ওইরে”।

মন্ত্রীনা হায়খিবদা হৌজিক অসি ঐখোয়গী খোঙফম চেৎহনবা, পোত্থোক পুথোকপা হেনগৎপা, য়োনগদবা মমলগী মচাকশিংদা য়েংশিনবা হৌবা অমসুং কস্তমরশিংনা পাম্বা পোত্থোক পীবগী খোঙলোই ওইনবা হৈ-শিংবা ৱারোইশিন পুরকপগী থবক থৌরম কয়া পাঙথোকপা হৌবগী মতম্নি। ইন্দস্ত্রী অসিনা শেল য়াম্না চঙদবা অমসুং পুক্নিং চিংশিংনিংঙাই ওইবা থৌওংশিংদা মিৎয়েং চঙবা হৌরবদি এ.সি.এম.এ.গী ওইনা অফতর্মেরকেৎ ব্যুজিনেসনা খুদোংচাবা কয়া লৈহনবা ঙমগনি হায়না মহাক্না হায়খি। মগুন লৈবা থৌওং অমসুং পাক চাউথোকপগী ৱাখল্লোনগা লোয়ননা ইন্দস্ত্রী অসিনা মীরমদা পোত্থোক থাদোকপা অতৈগা চাংদম্নবা ঙম্বগী ফিভম ফগৎলক্কনি। মহাক্না ওতো ইন্দস্ত্রীগী ওইনা শেলগী থাদবগী অনৌবা থৌওং পুথোরক্নবা হায়খি।

****