ৱার্ল্দ ইন্তেলেকচুএল প্রোপর্তি ওর্গনাইজেসনগী গ্লোবেল ইন্নোবেসন ইন্দেক্স ২০২০ রেঙ্কিংদা ভারতনা মফম ৪ হাইগৎলে অমসুং ৪৮শুবা মফমদা লৈরে। কোবিদ-১৯ লাইচৎ মরক অসিদা, মসি ভারতকী নুংঙাইবা পাউনি অমসুং লৈবাক অসিদা অফবা রিছর্স অমসুং দিবলপমেন্তগী থবকশিং পায়খৎপগী খুদম অমনি। ২০১৯দা ভারত ৫২সুবা মফমদা লৈখি অমসুং ২০১৫দা ৮১সুবদা লৈখি। মালেম পুম্নমক্কী ফজনা চাউখৎলবা লৈবাকশিংগী মরক্তা য়াওবা অসি শিংথানিংঙাই ওইনা মাইপাকপা অমনি। ২০১৯দা ময়াইথংবা অমসুং খাথংবা এসিয়াগী লমদমদা নৌবা পুথোকপদা মাইপাক্লবা লৈবাকশিংগী মনুংদা ভারত অমনি হায়বা ৱার্ল্দ ইন্তেলেকচুএল প্রোপর্তি ওর্গনাইজেসন্না য়ারে। হৌখিবা চহি ৫ অসিদা লৈবাক অসিনা অনৌবা পুথোকপগী রেঙ্কিংদা লেপ্তনা ফিবম ফগৎলক্লি।

হৈথোই-শিংথোইবা মীওই য়াম্না লৈবা, স্তার্দ-অপকী থবকশিং ফজনা পায়খৎপা অমুং সরকার অমসুং লনাইগী রিছর্স ওর্গনাইজেসনশিংনা থবক ফজনা পাংথোকপনা মরম ওইদুনা গ্লোবেল ইন্নোবেসন ইন্দেক্স রেঙ্কিংদা ফিবম ফগৎলকপনি। লৈবাক অসিদা অনৌবা পুথোকপগী থবকশিং ফগৎহনবদা সাইন্সকী লমদা থবক তৌরিবা মিনিস্ত্রিশিং হায়বদি সাইন্স অমসুং তেক্নোলোজি দিপার্তমেন্ত, বাইওতেক্নোলোজি দিপার্তমেন্ত অমসুং স্পেস দিপার্তমেন্তনা মরুওইবা থৌদাং অমা লৌরি।

ই.ভিশিং, বাইওতেক্নোলোজি, নানো তেক্নোলোজি, স্পেস, অতোপ্পা ইনর্জি ফংফমগী লমদা লৈবাক্কী ওইবা অফবা থবকশিং পায়খৎনবা নিতি অয়োগনা চোকথবা লৈতনা হোৎনদুনা লাক্লি। মমাং চহিদা নিতি অয়োগনা ফোঙখিবা ইন্দিয়া ইন্নোবেসন ইন্দেক্স অদু ভারতকী রাজ্যশিংদা ইন্নোবেসনগী থবকশিং পায়খৎনবা মরুওইবা খোঙথাং অমনি হায়না পাক-শন্না য়ানখি। গ্লোবেল ইন্নোবেসন ইন্দেক্স য়াওনা মালেমগী রেঙ্কিংশিংগী ফিবম য়েংশিনবগী থবক নিতি অয়োগনা পাংথোক্লি।

গ্লোবেল ইন্নোবেসন ইন্দেক্সদা লৈবাক অসিগী রেঙ্কিং ফগৎলক্নবা ভারতনা পান্দম ৱাংনা থমগদবনি অমসুং মসিগী থবকশিং শরুক অনি হেনগৎহনগদবনি। করিগুম্বা ভারতনা হৌজিক ওইরিবা ফিবম অসিদগী হেনগৎনা থবক পাংথোক্লবা অমসুং সাইন্তিফিক ওইবা থবকশিংদা মালেমগী চাউখৎলবা লৈবাকশিংগা চাংদম্নবা ঙম্লবদি প্রধান মন্ত্রীনা পাম্লিবা অত্মা নির্ভর ভারত থবক ওইনা পাংথোকপা ঙমগনি। হৌজিক ভারতনা অহোংবা পুক্নবা হোৎনবা মতম ওইরে অমসুং মথংগী গ্লোবেল ইন্নোবেসন ইন্দেক্স রেঙ্কিংশিংদা মকোকথোংবা লৈবাক ২৫গী মনুংদা য়াওনবা পান্দম থমগদবনি।

*****