মশাগী দরকার ওইবা মৈ চাদা ১০০ পুথোকপা ঙম্নবা অমসুং লৈবাক অসিগী নুমিৎ মঙালদগী মৈ পুথোকপগী পান্দম অদু ফংবা ঙম্নবা ভারত রেলৱেজনা হৌজিক স্তেসন ৯৬০ হেন্না নুমিৎ মঙালগী মৈ শীজিন্নরে। স্তেসন ৫৫০দা নুমিৎ মঙালদগী মৈ মেগাৱাত ১৯৮ পুথোক্নবা থবক পায়খৎলে।

২০৩০গী মমাংদা কার্বোন থাদোক্তবা ঙম্নবা ভারত রেলৱেজগী খোঙচৎ অসিদা শরুক য়ানবা মখোয়গী মতেং লৌনবা হন্দক ভারত রেলৱেজনা শীন্দুনা নুমিৎ মঙালদগী মৈ পুথোকপদা মাংজিল থারিবা কম্পেনিশিংগা মীফম অমা পাংথোকখ্রে। ২০৩০ ফাওবগী মনুংদা নুমিৎ মঙালদগী দরকার ওইবা মৈ বিল্লিয়ন য়ুনিত ৩৩ হেন্না পুথোক্নবা ভারত রেলৱেজনা থৌরাং তৌরে। হৌজিক চহিগী ওইনা দরকার ওইরিবা অসি বিল্লিয়ন য়ুনিত ২০নি।

২০৩০ ফাওবগী মনুংদা মসিগী অহাংবা লমশিং শীজিন্নদুনা মৈ গিগাৱাত ২০ পুথোকপা ঙমগদবা সোলার প্লান্তশিং লিংখৎনবা ভারত রেলৱেজনা অচৌবা থৌরাং অমা লৈরে। হৌজিক বনারাসি, নিউ দিল্লি, ওল্দ দিল্লি, জয়পুর, সেকন্দ্রবাদ, কোলকাতা, গুৱাহাতি, হায়দ্রবাদ অমসুং হাওরা স্তেসনশিং নুমিৎ মঙালদগী লৌবা মৈ শীজিন্নরে।  

ভারত রেলৱেজগী হেক্তর ৫১,০০০ রোমগী অহাংবা লম লৈরি অমসুং রেলৱেজগী খোপচিন্দ্রিবা অহাংবা লমশিংদা সোলার পৱার প্লান্তশিং শেমগৎনবা থৌরাং তৌরি। ২০২৩ ফাওবগী মনুংদা চাদা ১০০ নুমিৎ মঙালগী মৈ শীজিন্ননবা রেলৱেজনা পান্দম থম্লি।

রেলৱেজনা মসিগী দরকার ওইবা মৈ নুমিৎ মঙালদগী পুথোক্নবা অমসুং মৈখু চেন্দবা চৎথোক-চৎশিনগী থবক ওইহন্নবা থবক পায়খৎলে। মসি রিনিউএবল ইনর্জি প্রোজেকশিং লিংখৎনবা রেলৱেজগী অহাংবা লমশিং শীজিন্ননবা অমসুং রেলৱেজ স্তেসনশিং নুমিৎ মঙালদগী পুথোকপা মৈ শীজিন্ননবা প্রধান মন্ত্রী নরেন্দ্র মোদীগী পান্দম অদুগী মখাদা পায়খৎলকপনি।

নুমিৎ মঙালদগী পুথোকপা মৈ শীজিন্নবা হেনগৎহনবনা ‘কার্বোন থাদোক্তবা রেলৱেজ’ ওইনবা থম্লিবা পান্দম অদু ফংবা ঙমগনি। মসি ফংবা ঙম্নবা, ২০৩০ ফাওবগী মনুংদা নুমিৎ মঙালদগী দরকার ওইবা মৈ গিগাৱাত ২০ পুথোক্নপা ঙম্বা সোলার প্লান্তশিং লিংখৎনবা ভারত রেলৱেজনা মসিগী অহাংবা লমশিং শীজিন্ননবা অচৌবা থৌরাং অমা পায়খৎলে।

থৌরাং অসিগীদমক, রেলৱেজগী অহাংবা লমশিংদা গিগা ৱাত ৩গী সোলার প্রোজেকশিং লিংখৎনবা ভারত রেলৱেজগী পি.এস.য়ু অমা ওইরিবা রেলৱেজ ইনর্জি মেনেজমেন্ত কম্পেনি লিমিতেদনা বিদশিং কৌখ্রে। হায়রিবা সোলার প্রোজেকশিং অসিনা অহোংবা মমলদা রেলৱেজদা মৈ ফংহনবগী মথক্তা, ত্রেক পরিংদা চেকপল খাদুনা রেলৱেজগী লম ঙাকশেনগনি।

*****