প্রধান মন্ত্রী শ্রী নরেন্দ্র মোদীনা ঙসি  রানি লক্ষ্মী মাই সেন্ত্রেল এগ্রিকলচরেল য়ুনিবর্সিতী, ঝান্সি, য়ু.পি.গী কোলেজ অমসুং এদমিনিস্ত্রেসন বিল্দিং ভিদিও কনফরেন্সকী খুথাংদা শঙ্গাখ্রে। য়ুনিবর্সিতী অসিগী মহৈরোইশিংগা মহাক্কা ৱারী ৱাতাই শান্নখি।

প্রধান মন্ত্রীনা মীয়ামদা হরাউবা ফোংদোক্লদুনা মহৈরোইশিং অসিনা য়ুনিবর্সিতী অসিদগী গ্রেজুএৎ তৌরবা মতুংদা লৈবাক অসিগী লৌউ-শিংউগী হীরম্বু পাঙ্গল কনখৎনবা হোৎনবদা মতেং পাংলগনি হায়না ফোংদোকখি। অনৌবা বিল্দিং অসিগী ৱাৎলিবা অনৌবা ফেসিলিতীশিং অসিনা মহৈরোইশিংবু কন্না হোৎনহন্নিংগনি।

রানি লক্ষ্মীবাইনা হায়রম্বা "ঐহাক্না ঐগী ঝান্সি থাদোক্লোই," হায়বসি পল্লদুনা মহাক্না ঝান্সি অমসুং বুন্দেলখান্দগী মীয়ামদা আত্মনির্ভর ভারত অভিয়ানবু মাই পাক্নবগীদমক হোৎনমিন্নগদবনি হায়না ফোংদোকখি।

াত্মনির্ভর ভারত অভিয়ান্দা লৌউ-শিংউগী অচৌবা থৌদাং লৈ। মহাক্না হায়খি, লৌউ-শিংউদা মরোমদোম লেপচবনা লৌমীশিংবু- প্রদ্যুসর অমসুং ওন্ত্রপ্রিন্যুর ওইহন্নবা পান্দম থম্লি। প্রধান মন্ত্রীনা হায়খি, মসিগী পান্দম অসিগা লোইননা, তোঙান-তোঙানবা লৌউশিংউদা শেমদোক শাদোকপা কয়া অমা লৈখ্রে। অতোপ্পা ইন্দস্ত্রীশিংগুম্না হৌজিক্তি লৌমীশিংনসু মখোয়গী পোত্থোকশিংবু মখয়না পাম্বা মমল ফংবা লৈবাক অসিগী মফম অমহেক্তদা য়োনবা য়ারগনি। মহাক্না হায়খি মদুদি লুপা কোতি লাখ ১গী ফন্দসু ক্লস্তর ওইনা লৈবা ইন্দস্ত্রীশিং চাউখৎনবা অমসুং অহেনবা খুদোংচাবশিং পীনবগীদমক খাক্তুনা থমখ্রে।

লৌমীশিংবু হৌজিক্কী মতমগী তেক্নোলোজীশিংগা নকশিন্ননবা লেপ্পা লৈতনা হোৎনরি হায়রদুনা প্রধান মন্ত্রীনা রিসর্চ ইন্সতিত্যুৎ অমসুং এগ্রিকলচরেল য়ুনিবর্সিতীশিং অসিনা মসিদা অচৌবা থৌদাং লৈ হায়খ্রে। মহাক্না হায়খি, লৈবাক অসিদা চহী তরুক্কী মমাংদা অমখক্তং লৈরম্বদগী হৌজিক্তি সেন্ত্রেল এগ্রিকলচরেল য়ুনিবর্সিতী অহুম লৈরে। মসিগী মথক্তা, অহেনবা নেসনেল ইন্সতিত্যুৎ অহুম অমগসু হাপচিল্লগনি, আই.এ.আর.আই. ঝার্খন্দ, আই.এ.আর.আই. অসম, অমসুং মোতিহারি, বিহারদা মহাত্মা গান্ধী ইন্সতিত্যুৎ ফোর ইন্তিগ্রেতেদ ফার্মিংসু লিংখৎলগনি। হায়রিবা ইন্সতিত্যুৎশিং অসিনা মহৈরোইশিংদা অনৌবা খুদোংচাবশিং পীবদা নত্তনা মখোয়বু লমদম অসিগী লৌমীশিংদা তেক্নোলোজীগী কান্নবা পীনবা হোৎনবদা হৈ শিংবা হেনগৎলগনি।

লৌউ-শিংউগা মরী লৈনবা থবক থৌরমশিংদা অনৌবা তেক্নোলোজীশিং শীজিন্নবগী মতাংদা পল্লদুনা, প্রধান মন্ত্রীনা হন্দক্তা নৌনা থোকখিবা কৌজেংগী লান অদুবু খুদম ওইনা পনখি। মহাক্না হায়খি, সরকার অসিনা লানগী মওংদা শন্দোকপা থিংনবা অমসুং মাংহন তাকহনবা হন্থনবা কন্না হোৎনখি। তোঙান-তোঙনবা শহরশিংদা কন্ত্রোল রুম কয়া শেমগৎখি, লৌমীশিংবু মাংজৌননা শেম শাদুনা লৈনবা শীল-লাংখি, হিদাক কাপথোক্নবা দ্রোনশিং শীজিন্নখি, অনৌবা কাপথোক্নবা মেচিনশিংবুসু কৌজেংশিং হাৎনবা লৌমীশিংদা পীখি।

প্রধান মন্ত্রীনা হায়খি মদুদি হৌখিবা চহী তরুক্লোমসিদা, সরকার অসিনা রিসর্চ অমসুং লৌ উবগগী মরক্তা মরী অমা শাগৎনবা হোৎনরক্লি, অমসুং খুঙ্গংশিংদা লৈরিবা লৌমীশিংদা সাইন্তিফিক এদবাইসশিং পীনবা হোৎনরি হায়না প্রধান মন্ত্রীনা ফোংদোকখি। মহাক্না কেম্পসশিংদা লৈরিবা লৌশিং অমসুং হৈশিংবশিং অসি লৌবুক্তা থাদনবা হোৎনবদা য়ুনিবর্সিতীশিং অসিনা মতেং পাংবীনবা আপিল তৌখি।

লৌউ-শিংউ অমসুং মসিগা মরী লৈনবা তৌবা য়াবা থবকশিং স্কুলশিংদা খংহনবগী তঙাইফদবা লৈরিবশিং অসিগী মতাংদা পল্লদুনা প্রধান মন্ত্রীনা হায়খি মদুদি এগ্রিকলচরগী হীরমশিং অসি খুঙ্গংগী মিদ্দল স্কুলগী সবজেক্ত অমা ওইনা হাপ্পা তঙাইফদে হায়খি। মসিনা অনী থোক্না কান্নবা পীগনি – অহানবদা মসিনা মহৈরোইশিংদা লৌউ-শিংউগা মরী লৈনবা হীরমশিংদা খঙহনবা অমসুং অনীশুবদা মসিনা মহৈরোইশিংদা লৌউ-শিংউগী মরমদা খঙহন্দুনা মখোয়গী ইমুং মনুংদা অনৌবা লৌ উবগী তেক্নিকশিং অমসুং মার্কেতিংগী লৌশিং কয়া পীবা ঙমগনি। মসিনা লৈবাক অসিদা এগ্রো ওন্ত্রপ্রিন্যুরশিপ চাউখৎপা হেলহনলগনি হায়না মহাক্না মখা তাখি।

প্রধান মন্ত্রীনা ঙসি রানি লক্ষ্মী মাই সেন্ত্রেল এগ্রিকলচরেল য়ুনিবর্সিতী, ঝান্সিগী কোলেজ অমসুং এদমিনিস্ত্রেসন বিল্দিং ভিদিও কনফরেন্সকী খুথাংদা শঙ্গাবদা পীখিবা অপুনবা ৱারোলশিং পান্নবগীদমক

নম্বীয়ু  https://www.pib.gov.in/PressReleasePage.aspx?PRID=1649484#.X0pe3jAecEg.gmail

মহাক্কী তরাম্না ওকপগী ৱারোলদা কেন্দ্রগী লৌউ-শিংউ অমসুং লৌমীশিংগী য়াইফ থৌরাং মন্ত্রী শ্রী নরেন্দ্র সিংহ তোমারনা হায়খি মদুদি সবকা সাথ সবকা বিকাস্কী মন্ত্রগা লোইননা, প্রধান মন্ত্রী শ্রী নরেন্দ্র মোদীগী মখাদা লৈবাক অসিদা লৈরিবা খল মান্নদবা কয়া অসি কোকহন্নবগীদমক্তা ২০১৪দগী হৌখিবা থবকশিংগী মহৈ উবা ফংলে। রানি লক্ষ্মীবাই সেন্ত্রেল এগ্রিকলচরেল য়ুনিবর্সিতী অসি ২০১৪দগী হৌখিবনি, অমসুং হৌজিক্তি এফিলিএৎ কোলেজ অহুম লৈরে অমসুং রাজ্য ২২দগী মহৈরোইশিংনা মফমসিদা মহৈ তম্লি। মসিনা চপ চানা মথৌ তৌবা হৌরকপদা, লৈবাক পুম্বনা কান্নবা ফংগনি। শ্রী তোমার সিংহনা হায়খি মদুদি বুন্দেলখন্দদা কেন্দ্র সরকার অমসুং য়ু.পি. সরকারনা পুন্না হোৎনমিন্নদুনা ওর্গানিক ফার্মিং পাক শন্না তৌবা য়াই।

এগ্রিকলচরেল এজুকেসন্দা থম্লিবা মরুওইবসিগী মতাংদা পল্লদুনা শ্রী তোমারনা হায়খি মদুদি অৱাং নোংপোক লমদম য়াওনা লৈবাক শীনবা থুংনা এগ্রিকলচরেল কোলেজশিং হাংদোক্লক্লি।  ঝার্খন্দ অমসুং অসমদা হাংদোকখিবা ইন্দিয়ন এগ্রিকলচরেল রিসর্চ ইন্সতিত্যুৎশিং মথৌ তৌবা হৌরে। ইম্ফালগী সেন্ত্রেল ঈগ্রিকলচরেল য়ুনিবর্সিতীসু অনৌবা কোলেজ ৬ অমগা হাপচিন্দুনা পাকথোক চাউথোকখ্রে। লৌউশিংউদা মরুইবা পান্দম থম্লদুনা অৱাং নোংপোক লমদমগী পুন্সিরোল চাউখৎনবগীদমক কন্না হোৎনরদুনা লৌউ শিংউগী থবক থৌরমশিংবু এগ্রিকলচরেল এজুকেসন অমসুং রিসর্চনা হেন্না মপাঙ্গল কনখৎহল্লি। পি.ঐচ.দি. মহৈরোইশিংদা পীবা স্কোলার্শিপসু থা অমদা লুপা ৩১০০০দা হেনগৎখ্রে।

কেন্দ্রগী এগ্রিকলচরেল মন্ত্রীনা হায়খি মদুদি লৌমীশিংগী চাগা ২০২২ ফাওবদা  শরুক অনী হেনগৎনবগীদমক কেন্দ্র সরকারনা রাজ্যশিংগা নক্না চৎমিন্নরি। কোবিদ-১৯না মরম ওইদুনা লৈখিবা লোকদাউন লৈখ্রবসু লোকপগী চাংদি খম থেংনা ৱাংখি অমসুং খারিফকী মরু হুনবগী লৌফমসু মমাং চহীগা চাংদম্নবদা হেক্তর লাখ ১৩ হেনগৎখি। পি.এম. কিসান স্কিমগী মখাদা লুপা কোতি ৯২০০০ রোম লৌমী কোতি ১০ হেনবগী বেঙ্ক একাউন্তশিংদা হাপচিনখি। লৌউশিংউগী হীরমদা অহোংবা অমা পুরক্নবগীদমক এফ.পি.ও. ১০০০০ শেম্বা, কিসান ক্রেদিৎ কার্দ লৌমী কোতি ২.৫কীদমক শাবীবা, এগ্রি ইনফ্রাস্ত্রকচর ফন্দগীদমক লাখ ১গী ফন্দ খাকপা, অমসুং অনৌবা ওর্দিনান্স কয়া অমা শেম্বগী থবকশিং প্রধান মন্ত্রীগী লুচিং মখাদা পায়খৎখ্রে।

উত্তর প্রদেশকী মুখ্য মন্ত্রী শ্রী য়োগি অদিত্য নাথনা সেন্ত্রেল এগ্রিকলচরেল য়ুনিবর্সিতী অমা বুন্দেলখন্দগী মনুং হঞ্জিনবা মফমদা লিংখৎপীবগীদমক হরাউবা ফোংদোকখি। মহাক্না ইকাই খুম্নজরিবা প্রধান মন্ত্রীগী মখাদা লৌমীশিংগী চাগা শরুক অনী হেনগৎনবা, লৌমীশিংগী তেক্নোলোজীগা নক্নহনবা, তঙাইফদবা ইনফ্রাস্ত্রকচর পীবা অমসুং অফবা মরুশিং পীবগী থবকশিং লৌখৎপীরিবা অসিগীদমক থাগৎপা ফোংদোকচখি।

কেন্দ্রগী লৌউশিংউগী রাজ্যগী মন্ত্রী শ্রী পর্শোত্তম রুপালা অমসুং শ্রী কাইলাশ চৌধরি, ঝান্সিগী এম.পি. শ্রী অনুরাগ শর্মা দি.জি.আই.সি.এ.আর. দা. ত্রিলোচান মহোপত্র অমসুং অতোপ্পা শক্নাইরবা মীওই অমসুং সাইন্তিস্ত কয়ানা থৌরম অদুদা শরুক য়াখি।

*****