ভিদিও কনফরেন্সকী খুৎথাংদা য়ুনিয়ন এজুকেসন মিনিস্তর রমেস পোখ্রিয়াল ‘নিসান’না অলিগর মুস্লিম য়ুনিভর্সিতিগী জৱাহরলাল নেহরু মেদিকেল কোলেজ একজাম সেন্তর শঙ্গাখ্রে। সরকারগী লুপা করোর ৩গী গ্রান্তগা লোয়ন্না একজাম সেন্তর অসি শাবনি।

থৌরম অদুদা য়ুনিয়ন মিনিস্তরনা হায়খি হৌজিক মালেম অসিনা মরুওইনা লাইরিক তাকপী-তম্বীগী লমদা কোবিদ-১৯ লাইচৎনা মরম ওইদুনা অকাইবা কয়া থেংনরবসু; ঐখোয়গী লাইরিক তমফমশিং অমসুং মহৈরোইশিং অৱাবা নংদনবা সরকারনা থবক পায়খৎলি। নিংতম লালহৌদা অলিগর মুস্লিম য়ুনিভর্সিতিনা মরুওইবা থৌদাং লৌখি অমসুং হৌজিক ফাওবা মরৈবাক নুংশিবগী অকনবা ইচেল অমা লৈরি। য়ুনিভর্সিতি অসি লৈবাক অসিগী মমল নাইদ্রবা লন অমনি। লৈবাক অসি কোবিদ-১৯ লাইচৎনা অৱাবা তাহল্লবা মতমদা মসিগী মেদিকেল কোলেজ অসি থাজবগী মঙাল অমা ওইরে। কোরোনাভাইরস লাইচৎনা ফিবম চাহন্দ্রবসু হিরম খুদিংমক্তা লেপ্তনা চাউখৎ-থৌরাংগী থবকশিং পায়খৎপগীদমক মহাক্না য়ুনিভর্সিতি অসিগী ভি.সি থাগৎখি।

মিনিস্তরনা হায়খি মসিগী য়ুনিভর্সিতি অসি লেপ্তনা চাউখৎলক্কনি অমসুং লৌশিং, সাইন্স অমসুং তেক্নোলোজিগী অনৌবশিংগী ওইনা মালেমগী থাক্তা ফিদম্নফম ওইবা য়ুনিভর্সিতি অমা ওইরক্কনি। খুদোংথিবা তারবা মতম অসিদা ফাওবা মহৈরোইশিংদা লাইরিক লাইশুগী মঙাল ফংহন্নবা থবক পায়খৎলিবা য়ুনিভর্সিতিগী ওজাশিং অসি কোরোনা লান্মীশিংনি।

য়ুনিয়ন এজুকেসন মিনিস্তরনা হায়খি একজাম সেন্তর হাংদোকপা অসিনা মেদিকেল কোলেজ অসিনা মতম কয়াগী মমাংদগী থেংদুনা লাকপা খুদোংচাদবা কোকহল্লে অমসুং মেদিকেলগী মহৈরোইশিংনা মসিগী ইন্সতিতুৎ অসি অৱাংবা থাক্ত পুখৎকনি অমসুং লৈবাক্কীগী চাউথোকচফম ওইহনগনি হায়না ঐনা থাজবা থম্লি। লৈবাক অসিদা মালেম থাক্কী লাইরিক তাকপী তম্বীবগী থবক ফংহন্নবা অনৌবা এজুকেসন পোলিসিগী মখাদা ভারতনা মালেমগী লৌশিংগী সুপরপৱার অমা ওইহন্নবা ঐখোয়গী পান্দম অসি ফংহন্নবা থৌনা মেদিকেল কোলেজ অমসুং য়ুনিভর্সিতি অসিদা লৈরি।

*****