কেন্দ্রগী এজুকেসন মন্ত্রী শ্রী রমেশ পোখ্রিয়াল ‘নিশাঙ্ক’না ঙসি নই-দিল্লীদা নেস্নেল ইন্সতিত্যুৎ ওফ ওপন স্কুলিং (এন.আই.ও.এস.)গী তোঙান তোঙানবা থবকশিং য়েংশিনখ্রে। মীফম অদুদা স্কুল এজুকেসন অমসুং লিতরেসীগী সেক্রেতরী শ্রীমতি অনিতা কারৱাল; স্কুল এজুকেসনগী জোইন্ত সেক্রেতরী শ্রীমতি স্বীতী চংশান অমসুং এন.আই.ও.এস.কী সেনিয়র ওফিসিএলশিংনা শরুক য়াখি।

শ্রী পোখ্রিয়ালনা মীফম অদুদা ইন্সতিত্যুসন অসিনা হেন্না ফগৎপা রিজল্ত উৎপা ঙম্নবা নুং ফাওনা উবা থবক পায়খৎপগী তঙাই ফদবা লৈবশিংগী হীরমদা মিৎয়েং চংখি। মন্ত্রীনা পরিখা পাঙথোকপগী থৌওংশিং হেন্না চেকশিনহনবগী মতাংদসু ৱাফম কয়া খন্নখি। করিগুম্বা ঐখোয়না ইন্সতিত্যুসন অসিদা অশোইবা থবক থৌরম পাঙথোকপা থেংনরবদি মরাল লৈরিবা মীওইদুগী মথক্তা অকনবা থবক পায়খৎকদবনি। এন.আই.ও.এস.কী পরিখা মফমশিংগী মায়োক্তা করিগুম্বা ৱাকৎ অমা হেক্তা ফংলবদি অথুবা মতমদা মদুগী ৱারোইশিন পুরক্কদবনি হায়না মহাক্না এন.আই.ও.এস.কী ওফিসিএলশিংদা হায়খি। ইকায় খুম্ননিংঙাই ওইরবা ইন্সতিত্যুসন অসিগী শন-মানগী মায়োক্তা মীওই অমা হেক্তনা পামদবা ৱাফম হায়রক্তনবা পরিখা পাঙথোকপগী মওংদা অহোংবা পুরক্নবা মহাক্না এন.আই.ও.এস.কী ওফিসিএলশিংদা হায়খি। লৈবাক শিনবা থুংনা লৈবা পরিখা থাফমশিংগী অকুপ্পা ৱারোল য়াওবা দেশবোর্দ অমা শেম্বগী ৱাফমসু মন্ত্রীনা হৌদোকখি। মসিদা স্তেকহোলদর খুদিংগী ই-পাউ অমসুং পাউতাক কয়া য়াওহন্দুনা পথাপ অসিগী নুং ফাওনা উবা ঙম্বগী মতৌ হেন্না ফগৎহনবা ঙমগনি।

এন.আই.ও.এস. অসি মালেমগী খ্বাইদগী চাউবা স্কুলিংগী পথাপনি অমসুং ঐখোয়না মসিবু নীংথিনা শিজিন্নদুনা গ্রাস রুত লেবেলদা এজুকেসনগী কান্নবা ফংহনবা ঙম্নবা এজুকেসন মন্ত্রীনা হায়খি। ঐখোয়না মসিগী নেৎৱর্ক অসিগী মতেং লৌদুনা লৈবাক অসিদা লৈরিবা ইবা-পাবা হৈতবা মীওইশিংদা ইবা-পাবা হৈহন্নবা শিজিন্ননগদবনি হায়না মন্ত্রীনা হায়খি। হীরম অসিগী মতাংদা য়েংশিন্নবা ওফিসিএলশিংনা কাংবু অমা শেম্নবা মহাক্না মখা তানা হায়খি।

শ্রী পোখ্রিয়ালনা এন.আই.ও.এস.না মসিগী মহৈরোয়শিংগীদমক্তা পীরিবা কোর্স কয়াসু য়েংশিনখি। এন.আই.ও.এস.না মসিগী মহৈরোয়শিংগীদমক্তা সবজেক্ত ময়াম অমা পীরি হায়না মঙোন্দা পাউদমখি। মহাক্না হায়খিবদা এন.আই.ও.এস.কী সিলেবস অসি এন.সি.ই.আর.তি.গা মান্নহন্দুনা মসিগী মহৈরোয়শিংদা সবজেক্ত কয়া অসিগী মতাংদা হেন্না কুপথবা লৌশিং পীনবা হোৎনগদবনি হায়খি। এন.আই.ও.এস.না পীরিবা কোর্সশিং অসি য়েংশিন্দুনা মসিগী মহৈরোয়শিংগী তঙাই ফদবগী মতুং ইন্না অনৌবা কোর্স হাপচিনবগী মতাংদা খন্ননবা এন.আই.ও.এস.কী মীওইশিংদা এজুকেসন মন্ত্রীনা ৱাফম কয়া ফোঙদোকখি। শ্রী নিশাঙ্কনা এন.আই.ও.এস.তা মখোয়গী লাইরিক নম্বা মতমদা মহৈরোয়শিংগী হকশেলদা অকায়বা পীদনবা রিসাইকল তৌরবা চে শিজিন্নদনবা হায়খি। মহাক্না মখা তানা এন.আই.ও.এস.না মসিগী লাইরিকশিং নম্বদা চে অহনবা শিজিন্ননবা হায়খি।

মন্ত্রীনা কোবিদ-১৯গী ইরাং মরক্তা এন.আই.ও.এস.না পাঙথোকখিবা থবকশিংগী মরমদসু য়েংশিনখি। এন.আই.ও.এস.না হৌজিক মখোয়গী মহৈরোয়শিংগীদমক্তা চেনেল মরি চলাইরি অমসুং মসিগী মনুংদা অনি অমনা সেকন্দরী অমসুং অতোপ্পা অনি অমনা হাইয়র সেকন্দরীগী থাক্কীদমক্তা থম্লি হায়না মন্ত্রীদা পাউদমখি। কোবিদ-১৯গী ইরাংগী মমাংদা নোঙমদা পুং অনি খক্তগী অনৌবা কন্তেন্ত য়াওবা ক্লাস পীরম্বা অদু হৌজিক্তি চয়োল লোইবা য়াওনা নোঙমদা পুং ৬কী অনৌবা কন্তেন্ত য়াওবা ক্লাসশিংমখোয়গী মহৈরোয়শিংদা পীরি হায়না এন.আই.ও.এস.কী ওফিসিএলশিংনা মন্ত্রীদা পাউদমখি। মখোয়না মখা তানা হায়খিবদা প্রধান মন্ত্রী ই.-বিদ্যা প্রোগ্রামগী মখাদা মসিগী ক্লাসশিং অসিগী ভিদিওসু দিকশা প্লেৎফোর্মদা ফংহল্লি হায়না পাউদমখি। মথংগী মতম খরা অসিদা সেকন্দরী অমসুং হাইয়র সেকন্দরী থাক্তা অনৌবা কোর্স ৬ হাপচিন্নবা থৌরাং তৌরী হায়না এন.আই.ও.এস.কী ওফিসিলেশিংনা পাউদমখি।

ইন্দিয়ন আর্মী ত্রুপশিংগী মহৈগী থাক অমসুং হ্যুমেন রিসোর্সকী ফিভম ফগৎহন্নবা এন.আই.ও.এস. এজুকেসন প্রোজেক্ত ফোর ইন্দিয়ন আর্মী (এন.ই.পি.আই.এ.) হায়না খঙনবা জোইন্ত প্রোজেক্ত অমগী জুন ১৪, ২০১৬তা নেস্নেল ইন্সতিত্যুৎ ওফ ওপন স্কুলিং (এন.আই.ও.এস.)গা আর্মী এজুকেস্নেল কোর্পকা এম.ও.য়ু. অমগী খুৎয়েক পীনখ্রে হায়না এন.আই.ও.এস.কী ওফিসিএলশিংনা মন্ত্রীদা পাউদমখি।  মখোয়না হৌজিক এন.ই.পি.আই.এ. কোর্সশিং অসি হিন্দিদা হন্দোকপগী থবক চত্থদুনা মসিনা মহৈরোয় মশিং য়াম্বদা য়ৌবা ঙম্নবা হোৎনরি।

এজুকেসন মন্ত্রীনা এন.আই.ও.এস.তা লৈরিবা অহাঙবা ফম কয়াগী মতাংদা য়েংশিল্লদুনা অহাঙবশিং অসি অথুবা মতমদা মেনশিন্নবা হায়খি।

*****