এস.তি., ই.এস. অমসুং এফ.দব্লয়ু.গী মন্ত্রী দা. হর্শ বর্ধন্না গাজিয়াবাদকী এন.দি.আর.এফ.কী ৮শুবা বত্তালিয়ন সেন্তরদা অনৌবা, মতম কুইনা চৎপা, পুথোক-পুশিন য়াবা, য়াম্না থুনা শেমগৎপা ঙম্বা, শোক্নিংঙাই ওইদবা অমসুং তোঙান-তোঙানবা অইং-অশাদা চান্নবা ফমুং ১০গী মতম খরগী ওইবা হোসপিতাল অমা শঙ্গাখ্রে।
মতম খরগী ওইবা হোসপিতাল অসি সি.এস.আই.আর.দা লৈবা লেবোরেতরী সি.এস.আই.আর.-সেন্ত্রেল বিল্দিং রিসর্চ ইন্সতিত্যুত রুরকীনা এন.দি.আর.এফ. অসি উত্তুনা তাক্নবগা লোয়ন-লোয়ননা সিজিন্ননবগীদমক্তা হোম এফেয়র্স মন্ত্রালয়গী নেস্নেল দিজাস্তর রেসপোন্স ফোর্স (এন.দি.আর.এফ.)কা খুৎশম্নরগা শেমগৎখিবনি। মসিনা অমাং-অতাশিং অমুক ফগৎহন্নবগী থাক্কী ওইনা অমসুং মতম শাংলবা লায়চৎ নত্রগা তঙাই ফদবা অথুবগী মওং লাকপগীদমক্তা থৌগল তৌবদা শিজিন্নগনি। সি.এস.আই.আর.গী দি.জি. দা. শেখর মান্দে, এন.দি.আর.এফ.কী দি.জি. দা. শ্রী এন. প্রধান, সি.এস.আই.আর.-সি.বি.আর.আই.গী দিরেক্তর দা. গোপালকৃষ্ণনন্নচিংবশিংনা ইকাই খুম্ননিংঙাই ওইরবা মীওইশিংনা থৌরম অদুদা য়াওখি।

দা. হর্শ বর্ধন্না মতম খরগী ওইনা শেমগৎখিবা হোসপিতালশিং অসিগী তোঙান-তোঙানবা য়ুনিৎশিংদা চত্তুনা হোসপিতালগী স্তাফশিংগা উন্নখি অমসুং একজিবিসন অমদি ফোতো গেলরী অমসুং কিন্থরবা স্ত্রকচর থিবা অমসুং কন্ননবগী তাক্তুনা উৎপা অদু য়েংখি। 

থৌরম অদুদা ৱা ঙাংলদুনা দা. হর্শ বর্ধন্না হায়খি, “মতম খরগী ওইনা শেমগৎখিবা হোসপিতাল অসি নুংঙাইনা হিংনবগী এনভাইরোন্মেন্ত অমসুং তুং-কোইনা চহি ২০ ফাওবা চৎকদবা অমদা অশোক-অপন অমসুং শোই-ঙামদবা প্রাইমরী হেল্থকেয়রকী খুদোংচাবশিং পীননবা দিজাইন শেমখিবনি।  মহাক্না মখা তানা “মসি অমাং-অতাশিং অমুক ফগৎহন্নবগী থাক্কী ওইনা অমসুং মতম শাংলবা লায়চৎ নত্রগা তঙাই ফদবা অথুবগী মওং লাকপগীদমক্তা অনৌবা, মতম কুইনা চৎপা, য়াম্না থুনা শেমগৎপা ঙম্বা, শোক্নিংঙাই ওইদবা অমসুং জিওগ্রাফিকেল ওইবগা লোয়ন-লোয়ননা অইং-অশা পুম্বগী ওইনা চান্নবা মওংদা থবক পাংথোকহনবা য়াবা তেক্নোলোজীগী ওইনা কান্নবা অমা ওইনা উত্তুনা তাক্লি” হায়না হায়খি। 

লৈবাক অসিদা হৌজিক নুমিৎ খুদিংগী ওইনা কোবিদ-১৯ ওইনা লাক্ষ তরাগী মথক্তা তেস্ত তৌবা ঙম্লে অমসুং লেবোরেতরী ১৫০০দগী হেন্না লৈহল্লে হায়না মন্ত্রীনা ফোংদোকখি। থবক অসি হৌজিক-হৌজিক ভেক্সিন কেন্দিদেৎ অহুমগী থবক চত্থরি অমসুং চাংয়েংশিংগী অহুমশুবা তাঙ্কক্তা লৈদুনা খুমাং চাউশিনবা থাক্তা লৈরে হায়না মহাক্না হায়খি।  তাঙ্কক নাইবা চাংয়েংশিং অসি হেক লোইবগা য়াম্না থুনা  ঐখোয়গী লৈবাক অসিদা ভেক্সিন লৈরগনি হায়না দা. হর্শ বর্ধন্না ফোংদোকখি।

সি.এস.আই.আর.গী দিরেক্তর জেনরেল দা. শেখর সি. মান্দেনা কোবিদ লায়চৎ অসি থোরকখিবা মতুংদগী সি.এস.আ.আর.-সেন্ত্রেল বিল্দিং রিসর্চ ইন্সতিত্যুত(সি.এস.আই.আর.-সি.বি.আর.আই.) রুরকী অমসুং স্ত্রকচরেল ইঞ্জিনীয়রিং রিসর্চ ইন্সতিত্যুত(সি.এস.আই.আর.-এস.ই.আর.সি.) কৌবা সি.এস.আই.আর কন্সতিত্যুএন্ত লেবোরেতরীশিংনা মতম খরগী ওইবা মওংগী হোসপিতাল অমসুং অমাং-অতা থোক্লবা মতুংদা চংজফম লৌনবগী মওং শেম্বগী ৱাখল্লোন্দা পুন্না থবক তৌমিন্নদুনা শেমগৎখিবনি হায়না ফোংদোকখি। লেবোরেতরী অসি থুপচিনবা য়াবা অমসুং স্তীলনা ফ্রেম পানবা স্ত্রকচরদা মীওই অমখক্তংনা মাগী লেংবান্দা পুংবা অমা পুবা ঙম্বা মওংদা অমসুং মতম য়াম্না লৌদনা মফম অমদা হেক্তা পানখৎপা য়াবা মওং অমা হৌদোকখ্রে। থাক ৱাংবা তেক্নোলোজীদা শেমদুনা থম্বা য়াবা অমদা য়ৌবা ঙম্নবগী মায়কৈরোমদা সি.এস.আই.আর.-সি.বি.আর.আই.না ফমুং ১০গী খুদোংচাবা পীননবগী ৱাখল্লোন্দা গাজিয়াবাদকী এন.দি.আর.এফ.কী ৮শুবা বত্তালিয়ন্দা মোদুলর অমদা মতম খরগী ওইবা হোসপিতাল অসি তাক্তুনা উৎকনি হায়না লেপ্নখি।  

এন.দি.আর.এফ.কী দিরেক্তর জেনরেল শ্রী এস.এন. প্রধান্না সি.এস.আই.আর.-সি.বি.আর.আই. অমসুং এন.দি.আর.এফ.না থৌনা অমগা লোয়ননা পুন্না হোৎনমিন্নদুনা নুমিৎ ৩গী মনুংদা স্ত্রকচর অসি পানখৎপা ঙমখি। মসি ‘করুনা ভবন’ হায়না মমিং থোনখ্রে। মসিগী মতুংদা মপান থংবগী শরুকশিং য়াওনা হোসপিতাল অসি মপুং ফানা শেমজিনখি হায়না মহাক্না ফোংদোকখি।

নেস্নেল দিজাস্তর রেসপোন্স ফোর্স(এন.দি.আর.এফ.) অসি মল্তী-দিসিপ্লিনরী ওইবা, অমাং-অতাশিং অসিগীদমক্তা শেমজিনবা ঙম্নবা ত্রেন তৌরবা থাক ৱাংবা তেক্নোলোজীগী স্পিসিএলিস্ত অমনি। এন.দি.আর.এফ.না ভারত্তা অমাং-অতা থোকপশিংগীদা অমসুং অমাং-অতাগী খুদোংথিবশিং অসি হন্থহনবদা লমদা মাগী অকনবা ৱাশক অদু অমুক হন্না খুদম পীদুনা উৎখ্রে। জনুৱারী ২০২০দগী হৌনা কোবিদ-১৯গী লায়চৎ অসি য়েংশিনবদা এন.দি.আর.এফ.না য়াম্না চাউবা থৌদাং লৌদুনা লাকখি হায়না মহাক্না হায়খি।  এন.দি.আর.এফ.না তোঙান-তোঙানবা ইন্তর্নেস্নেল এয়রপোর্তশিং, লমগী হিথাংফমশিং অমসুং সমুদ্রগী হিথাংফমশিংদা সেক্যুরিতী,  এয়রলাইন, কার্গো শেন্নরিবা, ইম্মিগ্রেসন্নচিংবশিং ত্রেন তৌনবা কেম্পেন ৪৭৩ পাংথোকখ্রে। মসিনা ঐখোয়গী ইরৈবাক মচা মিলিয়ন কয়াদা খুদোং চাবা পীখ্রাবরাজ্য পুম্নমক্কী মীওই কাংলুপশিংগীদমক্তা কোবিদ-১৯গী এৱেয়রনেস অমসুং সেন্সিতাইজেসন প্রোগ্রাম কয়া অমসু পাংথোকখ্রে।  ত্রেনিং অমসুং এৱেয়রনেস জেনরেসন কেম্পেনশিংদা নত্তনা এন.দি.আর.এফ.না লায়চৎ অসি য়েংশিন্নবগী মখল-মখা কয়াগী হিরমশিংদসু মতেং পাংখ্রে। 

গাজিয়াবাদকী সিস্তেম অসি থর্মেল ইন্সুলেসন অমসুং ৱাতর প্রুফ ওইবা মওংদা য়াম্না থুনা তিংথোকপা, থুপচিনবা য়াবা, য়াংবা, শোক্নিংঙাই ওইদবা, অশোই-অঙাম য়াওরোইদবা, কম্ফোর্ত, শেল ফংহনগদবা, অমুক হন্না শাগৎপা য়াবা অমসুং লৈরিবা লম-লমদুগী  হৈথোই-শিংথোইবশিং অদু শিজিন্নদুনা দিজাইন তৌখিবনি। অতোপ্পা ফীচরশিংদা অলত্রাভাইওলেৎ রে ঙাকথোকপা ঙম্বা, অহাংবা মফমশিং মরম কয়াদা শিজিন্নবা ঈশিং অমসুং নুংশিৎ অসি মতিক চানা চংহন্দবা থাক ৱাংবা স্ত্রকচরেল ওইনা তৌবা ঙম্বা, মৈ হন্থহল্লকপা ঙম্বা, কুইনা চৎপা, রিন্যুএবল অমসুং এন্তি-বেক্তরিএল ওইবা মচাকশিং য়াওই।

দিজাস্তর মেনেজমেন্ত ওথোরিতীশিংনা অসিগুম্বা ফ্রেমগী মফমশিং অদু থৌরাং তৌদুনা অমসুং তোঙান-তোঙানবা রাজ্যশিংদা খুদক্কী ওইনা মথৌ তাবগী ওইনা অমাং-অতা তোক্লবা মফমশিংদা থাই। য়াম্লবদগী য়াম্লবা শরুকশিং অদু শমজিন্নদুনা মেদিকেলগী তীমশিং, গোদামশিং, মহৈলোয়শঙশিং, রেস্ত হাউসশিং অমসুং ইংনা-চিক্না পোথাবা মতমদা তুরিস্তকী খাংপোকশঙ শেম্বদসু শাবা য়াই।

গাজিয়াবাদকী এন.দি.আর.এফ.কী ৮শুবা বত্তালিয়নগী মতম খরগী ওইবা হোসপিতালগী শক্তম

মপানগী শক্তম

হোসপিতালগী চংফমগী শক্তম

মনুংগী শক্তম

মতম খরগী ওইবা হোসপিতাল অসিদা লৈরিবা খুদোংচাবা অসিদা হেক য়েংবদা উবা ফংবশিং অসিঃ

1) মথৌ তারবদি ফমুং ২০ ফাওবা পাক-শন্না থাবা য়াবা ফমুং ১০ লৈবা এয়র কন্দিসন ৱার্দ

2) ফমুং খুদিংমক্কী কোবিদগী অনাবশিং মশিং হেনগৎলকপদা শিজিন্নবা য়াবা ওক্সিজেন পীফম পোইন্ত ২১দা শম্লবা সেন্ত্রেল পাইপলাইন্দগী ওক্সিজেন পীফম লৈ।

3) অরুবা অনাবগী ওইনা ওক্সিজেন সেচুরেসন য়াওবা অনাবশিংগী মরুওইবা পাম্লৈশিংগী পেরামোনিতরশিং লৈ।

4) কার্দিএক এরেস্তকী অনাবশিংগী ওইনা শিজিন্নবা এ.ই.দি./দিফাইব্রিলেতরশি।

5) ই.সি.জি.গী খুদোংচাবা।

6) ঈশিং লৌথোকপা/ফোৎপা/অশোকপশিং দ্রেসিং তৌবনচিংবা অপিকপা সর্জরী তৌবা য়াবা দ্রেশিং রুম অমা। 

7) মতম নাইনা ইনভেস্তিগেসনশিং তৌবগীদমক্তা অপিকপা লেবোরেতরী

8) খুৎ শোক্নদনা সেনিতাইজেসন তৌনবা য়াওবা রিসেপসন/ঙাইফম।

8) সেন্সরগী ওইবা ৱাশ বেসিন্দা খুৎ শোক্নদবা ঈশিংগী কোঞ্জিনশিং পানবা ৱাশরুম

9) দোক্তরশিংগী চেম্বরশিং

10) রেকোর্দ রুম

11)মথৌ তাবা হিদাকশিং লৈবা সেদিসিন স্তের অমসুং দিসপেন্সরী

12) মরুওইনা চংবা হিদাকশিং অমসুং ইঞ্জেক্সনশিং থম্নবা রিফ্রিজিরেতর

13) কোবিদকী অনাবশিংগী লায়েং চত্থনবা অমসুং চেকশিন্না য়েংশিন্নবগী থবক্তা মেদিকেল স্তাফশিংগী ওইনা তোঙানবা ফি হোংদোক-হোংজিনফম।

14) এম্বুলেন্স অমসুং খুদক্কী অথুবগী গারীশিংগী পার্কিংগী মফম।