কঞ্জ্যুমর এফিয়ার্স, ফুদ অমসুং পব্লিক দিস্ত্রিব্যুসনগী কেন্দ্র মন্ত্রী শ্রী রাম বিলাস পাসৱন্না ঙসি বর্চুএলগী খুত্থাংদা ঙসি সনা শাবশিংগী ওনলাইন্দা রেসজিস্ত্রেসন অমসুং রিন্যুএল তৌবগী পথাপ অমসুং এসেয়িং অমসুং হোল্মার্কিং (এ. অমসুং ঐচ.) সেন্তরশিংবু মশক খঙবা অমসুং রিন্যুএল তৌবগী ওনলাইনগী পথাপশিং লোঞ্চ তৌখ্রে। মসিগী ওনলাইনগী পথাপশিং অসি ব্যুরো ওফ ইন্দিয়ন স্তেন্দর্দকী ৱেব পোর্তেল www.manakonline.in গী খুত্থাংদা য়েংবা য়াগনি। ওনলাইনগী পথাপ অসি লোঞ্চ তৌবা মতমদা শ্রী পাসৱন্না মেনুএল ওইনা রেজিস্ত্রেসন তৌবগী মশিং য়াম্বা ৱাহৌদোক কয়া অমা লাকপগী অৱাবা কয়া থেংনরি অমসুং মসিগী ওনলাইনগী থৌওং অসিনা এসেয়িং অমসুং হোল্মার্কিং সেন্তরশিং লৈজরবা অমসুং লৈহন্নিংবা সনা শাবশিং অমসুং ওন্তোপ্রিনরশিংগী কারবার তৌবগী থৌওং য়াম্না নুংঙাইহল্লগনি হায়খি। জুন ১, ২০২১দগী হৌদুনা অতাংবা ধাতুশিং হোল্মার্কিং তৌবা অসি শোইদনা পাঙথোক্কদবা থৌওং ওইরগনি।

স্কিমশিং অসিগী মতাংদা মীদিয়াদা পাউদম্বা মতমদা শ্রী পাসৱন্না ওনলাইন পথাপকী খ্বাইদগী ফবা মগুন্দি এপ্লিকেসনশিং অসিবু প্রোসেস তৌবা মতমদা মীওইবা অমত্তা য়াওদবা অসিনি হায়খি। হৌজিক্তি সনা শাবশিংনা মসিগী পোর্তেল অসিগী খুত্থাংদা লাইসেন্স লৌনবগীদমক ওনলাইন্দা এপ্লাই তৌদুনা অচংবা চে চাংশিং অমসুং থীগদবা ফীশিং থীবা য়ারগনি। ওনলাইনগী থৌওং অসিগী মরমদা তাক্লদুনা মহাক্না হায়খিবদা সনা শাবা মীওই অমনা অচংবা ফীগা লোয়ননা এপ্লিকেসন থাজিল্লক্কনি অমসুং মসিগী মতুংদা রেসজিস্ত্রেসন তৌবা য়াহনগনি। রেজিস্ত্রেসন নম্বর য়াওবা ইমেল নত্ত্রগা এস.এম.এস. অমা মঙোন্দা থাগনি অমসুং মসি ফংলবা তুংদা মীওই অসুনা রেসজিস্ত্রেসন নম্বর অদু শিজিন্নদুনা রেজিস্ত্রেসন সর্তিফিকেৎ অদু দাউনলোদ তৌদুনা প্রিন্ত তৌবা য়াগনি।

শ্রী পাসৱন্না সনাগী লিক-কোনশিং অমসুং পোৎলমশিং হোল্মার্কিং তৌবা অসি শোইদনা পাঙথোক্কদবা থৌওং ওইবদগী হৌজিক লৈরিবা সনা শাবগী মশিং ৩০,০০০ ওইরিবা অসিদগী রেজিস্ত্রেসন তৌনবা লাক্লিবা সনা শাবগী মশিং অসি লাখ ৫ ফাওবা য়ৌগনি হায়বগী থাজবা থম্মি হায়খি। হোল্মার্ক তৌগদবা সনা-লুপাশিং অমসুং পোত্থোকশিংগী মশিংদসু য়াম্না হেনগৎলক্কনি হায়না মহাক্না মখা তানা হায়খি। হৌজিক লৈরিবা কোতি ৫গী মশিং অসিদগী কোতি ১০ ফাওবা হেনগৎলক্কনি হায়বগী থাজবসু লৈ হায়না মহাক্না হায়খি। মসিনা তঙাই ফদবগী মতুং ইন্না এসেয়িং অমসুং হোল্মার্কিং সেন্তরসু হেনগৎহল্লগনি। হৌজিক লৈবাক অসিগী জিলা ২৩৪দা পুল্লপ্না সেন্তর ৯২১ লৈরি। লেমহৌরিবা জিলা ৪৮০দা জুন ২০২১ ফাওবগী মনুংদা এ. অমসুং ঐচ. সেন্তরশিং মথৌ তৌবা হৌহন্নবা বি.আই.এস.না থৌরাং তৌরি হায়না মহাক্না হায়খি। শ্রী পাসৱন্না হৌজিক বি.আই.এস. হোল্মার্ক অসি কাংলুপ ৩ খক্কী ওইনা পীরগনি হায়খি। মখোয়শিং অদুদি এ. অমসুং ঐচ. সেন্তরগী মশক তাকপগী মার্ক/নম্বর অমসুং সনা শাবগী মশক তাকপগী মার্ক/নম্বর য়াওবা করাৎ ১৪ (১৪কে.৫৮৫), করাৎ ১৮ (১৮কে.৭৫০) অমসুং করাৎ ২২ (২২কে.৯১৬)নি।

ওনলাইনগী পথাপ অসিনা এপ্লিকেসন থারক্লিবশিং অসিনা অনৌবা সেন্তর অমা হৌহনবা অমসুং হৌজিক লৈরিবা লাইসেন্সপু রিন্যু তৌদুনা ওনলাইন্দা পীশিনবা য়াহল্লগনি হায়খি। সেন্তরশিংবু ওদিৎ তৌবা, ওদিৎ রিপোর্ত পীশিনবা অমসুং শক খঙবা নত্ত্রগা রিন্যু তৌবগী অয়াবা পীবা য়াওবা মশক খঙবগী থৌওং অপুনবা অসি হৌজিক ওতোমেতেদ ওইরে। এপ্লিকেসন থারক্লিবা মীওই অমনা ই-পাউ খুদিংমক খঙবতা নত্তনা এপ্লিকেসন প্রোসেস তৌবগী থৌওংশিংগী হৌজিক হৌজিক্কী ওইরিবা ফিভমশিং য়েংবসু য়ারগনি।

শ্রী পাসৱন্না মহাক্কী ৱারোল অদুদা ওনলাইন্দা ওদিৎ তৌবগী পথাপ অসিনা সনা-লুপাগী পোৎলমশিং হোল্মার্ক তৌবদা মীচং মীখায় নাইবগী মতাংদা লাকপা ৱাকৎশিং নীংথিনা লোইশিনবা য়ারগনি হায়না য়াম্না মরু ওইনা হায়খি। বি.আই.এস.না এসেয়িং অমসুং জোল্মার্কিং সেন্তরশিংগী থবক তৌবগী মওংবু ওতোমেৎ তৌনবা মোদ্যুল অমদা থবক কন্না চত্থরি অমসুং মসি দিসেম্বর ২০২০ ফাওবগী মনুংদা লোইরগনি হায়বগী থাজবা থম্মি হায়না মহাক্না ফোঙদোকখি।

ওনলাইন পথাপ অনি লোঞ্চ তৌখিবগা লোয়ননা মগুন অমসুং শেংবগী প্রমান লৈরবা সনা লুপাশিং অসি কঞ্জ্যুমরশিংদা ফংহন্নবা সরকারনা হোৎনরিবা অসিদা সনা শাবশিং অমসুং ওন্তোপ্রিনরশিংনা তেংবাংনবা পুক্নিং থৌগৎকনি হায়না মহাক্না হায়খি। বি.আই.এস.কী মথৌ তৌবগী মওংবু হঙ্গৎনা য়েংশিল্লদুনা শ্রী পাসৱন্না হায়খিবদা হোল্মার্কিং তৌবগী মেনপাৱরদা ফগৎহনবগী তঙাই ফদবা লৈ হায়না হায়খি অমসুং ব্রাঞ্চ ওফিসশিংদা অহেনবা মেনপাৱর শিজিন্নবগী অয়াবসু পীখি।

শ্রী পাসৱন্না বিভাগ অসিনা পোত্থোকশিং অসিগী ওইনা ভারত্তা আই.এস. নত্ত্রগা ই.য়ু.গী স্তেন্দর্দ চৎনহন্নবা থবক পায়খৎলি হায়খি। সেপ্তেম্বর ২০২০দগী বি.আই.এস. ওফিসিএলশিংনা কস্তমস ওফিসিএলশিংগা লোয়ননা  ভারতকী হিথাংফম ৭তা মীরমদগী পুশিল্লকপা পোত্থোকশিংগী কার্গোগী মগুন অমসুং স্তেন্দর্দ য়েংশিনবা হৌরগনি হায়খ্রে। তঙাই ফদনা চেনগদবা মগুন লৈবগী স্তেন্দর্দ য়ৌরবা পোত্থোকশিংখক্তা ভারতকী মার্কেৎশিংদা চংবা য়াবগী অয়াবা পীগনি। হৌজিক্কী ওইনা স্তীল, কেমিকেল, অরুম্বা মেছিনশিং অমসুং শান্নপোৎশিংনা লৈবাক অসিদা মীরমদগী পুশিল্লকপগী অয়াম্বা শরুক ওইরি। 

শ্রী পাসৱন্না হৌজিক বি.আই.এনা মার্কেত্তা ফংলিবা তোঙান তোঙানবা পোত্থোকশিংগী মগুন য়েংশিনবগী থবক পাঙথোক্লি হায়খি। হৌজিক্কী ওইনা পোত্থোক ২৫৪গী ক্যু.সি.ও.শিং লৈরি অমসুং পোত্থোক ২৬৮গী ক্যু.সি.ও.শিং অসি মথংদা লৈরি। শ্রী পাসৱন্না অতোপ্পা অমসুং অহেনবা পোত্থোক কয়াগী ক্যু.স পীনবা অতোপ্পা মন্ত্রালয়শিং অমসুং বিভাগশিংগা ৱা তানবগী থৌওং চত্থরি হায়খি।

অনৌবা বি.আই.এস. এক্ত ২০১৭ অসিনা শেন্মিৎলোনগী অনৌবা খুদোংচাদবা কয়া অমা থেংনবদা হেন্না কান্নরি। এক্ত অসিগী খুত্থাংদা বি.আই.এস.কী তৌবা ঙমবশিং অসি পাকথোক চাউথোক্লি। কঞ্জ্যুমর এফিয়ার্সকী বিভাগ্না অতোপ্পা মন্ত্রালয় অমসুং বিভাগশিংগা ৱারী শাদুনা পোত্থোকশিংগী পথাপ ইনবা অমসুং স্তেন্দর্দ য়ৌবগী সর্তিফিকেৎ পীবসু তঙাই ফদনা য়াহন্নবা হোৎনরি।

মহাক্কী ৱা ঙাংবা লোইশিনবা ওইনা শ্রী পাসৱন্না মতম খরগী মমাংদা লোঞ্চ তৌখিবা ব্যুরো ওফ ইন্দিয়ন স্তেন্দর্দ – বি.আই.এস. কেয়র এপকী মতাংদা মীয়ামগী মিৎয়েং চিংশিনখি। মহাক্না কঞ্জ্যুমরশিংনা এপ অসি শিজিন্নদুনা সনা-লুপা/মরী লৈনবা পোৎলমশিংগী মগুনগী মতাংদা নত্ত্রগা  রেজিস্ত্রেসনগী অয়াবা পীবদা অৱাৎপা লৈবা নত্ত্রগা এ. অমসুং ঐচ. সেন্তর মশক খঙবগী মতাংদা নত্ত্রগা অতোপ্পা পোত্থোকশিংগী মতাংদা ৱাকৎপগী রেজিস্তর তৌনবা শিজিন্ননবসু হায়খি।

****