উপ-ৰাষ্ট্ৰপতি শ্রী এম ভেংকাইয়া নাইডুৱে দেশত জনসংখ্যা বৃদ্ধি পোৱাৰ সমান্তৰালভাৱে উন্নয়নৰ সমস্যাসমূহৰ সমাধান কৰাটো আৰু কঠিন হৈ পৰা বুলি সজাগ কৰি দিয়ে৷

আজি ‘ভাৰতত জন্ম অনুসৰি লিংগ অনুপাতৰ স্থিতি’ আৰু ‘ভাৰতত জ্যেষ্ঠ নাগৰিকৰ সংখ্যাঃ স্থিতি আৰু সহায়ক ব্যৱস্থাপনা’ শীর্ষক দুখন প্ৰতিবেদন প্ৰকাশ কৰে উপ-ৰাষ্ট্ৰপতিয়ে৷ ইণ্ডিয়ান এছ’চিয়েচন ফৰ পার্লিমেণ্টেৰিয়ান ফৰ পপুলেচন এণ্ড ডেভেলপমেণ্ট(আইএপিপিডি) এই প্ৰতিবেদন দুখন প্ৰস্তুত কৰিছে।

প্ৰতিবেদন প্ৰকাশৰ পাছত অনলাইনযোগে আগবঢ়োৱা বক্তব্যত উপ-ৰাষ্ট্ৰপতিয়ে জনসংখ্যা আৰু উন্নয়নৰ দিশত দৃষ্টি দিয়াৰ বাবে আইএপিপিডিক উচ্চ প্ৰশংসা কৰে৷ তেওঁ কয় যে বিশেষজ্ঞসকলে কৰা অনুমান অনুসৰি ২০৩৬ চনৰ মাজত ভাৰতৰ জনসংখ্যা প্রায় ১৫২ কোটি হ’ব৷

নাগৰিকসকলক মৌলিক সেৱা প্ৰদানৰ কথা উল্লেখ কৰি উপ-ৰাষ্ট্ৰপতিগৰাকীয়ে কয় যে দেশত ২০ শতাংশ লোকে এতিয়াও দৰিদ্ৰ সীমা ৰেখাৰ তলত বসবাস কৰে৷ দেশত এতিয়াও বহু নিৰক্ষৰ লোক আছে৷ যাৰফলত দেশে বিভিন্ন সমস্যাৰ সন্মুখীন হৈছে৷ এই প্ৰসংগত তেওঁ সাধাৰণ লোকসকলৰ পৰিয়াল পৰিকল্পনাৰ প্ৰয়োজনীয়তাৰ ওপৰত জোৰ দিয়ে৷ উপ-ৰাষ্ট্ৰপতিয়ে কয় যে প্ৰধানমন্ত্রীয়ে যোৱা বছৰ স্বাধীনতা দিবসৰ ভাষণত সৰু পৰিয়ালৰ নীতি অনুসৰণ কৰি সমগ্ৰ দেশবাসীক উন্নয়নৰ ক্ষেত্ৰত অবদান আগবঢ়োৱাৰ বাবে যি আহ্বান জনাইছিল তাৰ প্ৰতি সকলোৱে সমৰ্থন কৰা উচিত৷

শ্ৰী নাইডুৱে বিভিন্ন ৰাজনৈতিক দল আৰু জন প্ৰতিনিধিসকলক এই গুৰুত্বপূর্ণ বিষয়ত দৃষ্টি আকর্ষণ কৰাৰ লগতে সাধাৰণ জনতাক শিক্ষিত কৰি তোলাৰ আহ্বান জনায়৷

ভাৰতত বহু বছৰ পুৰণি যৌথ পৰিয়াল ব্যৱস্থা পুনৰ ঘূৰাই অনাৰ আহ্বান জনায় শ্রী নাইডুৱে কয় যে আমাৰ দেশৰ এই পৰিয়াল ব্যৱস্থা অৱশ্যে অন্যান্য দেশৰ বাবে আদর্শ হৈ উঠিব পাৰে৷

শ্রী নাইডুৱে ভাৰতৰ ঐতিহ্যমণ্ডিত যৌথ পৰিয়াল ব্যৱস্থাপনাত জ্যেষ্ঠসকলে শ্ৰদ্ধা লাভ কৰা বুলিও অৱগত কৰে৷ উপ-ৰাষ্ট্ৰপতিয়ে কয় যে জ্যেষ্ঠসকল হ’ল পৰিয়ালৰ সন্মান আৰু সংস্কাৰৰ ৰক্ষক, ন্যায় পৰায়ন আৰু ঐতিহ্যৰ বাহক৷ তেওঁ লগতে কয় যে যৌথ পৰিয়ালসমূহত শিশুসকলে জ্যেষ্ঠ প্ৰজন্মৰ আদৰ, স্নেহ, যত্ন, প্ৰেম, পৃষ্ঠপোষকতা আৰু নীতি আদর্শত ডাঙৰ হয়৷

উপ-ৰাষ্ট্ৰপতি নাইডুৱে কয় যে জ্যেষ্ঠ লোকসকলক কৰা অৱহেলা বা তেওঁলোকৰ ক্ষেত্ৰত বেয়া খবৰে তেওঁক উদ্বিগ্ন কৰি তোলে৷ নৱ প্ৰজন্মক জ্যেষ্ঠ নাগৰিকসকলৰ সৈতে সমন্বয় আৰু সংযোগ বজাই ৰখাৰ আহ্বান জনাই শ্রী নাইডু কয় যে অসুস্থ জ্যেষ্ঠসকলৰ চিকিৎসা সুনিশ্চিত কৰাৰ দৰে বিষয়সমূহক গুৰুত্বসহকাৰে বিচাৰ কৰিব লাগিব৷ উপ-ৰাষ্ট্ৰপতি কয় যে সমাজত লিংগ সমতা অনাটো প্ৰয়োজন৷ শিশুৰ জন্মৰ পূৰ্বেই লিংগ নির্ধাৰণ আৰু গর্ভপাতৰ দৰে ঘটনা ৰোধ কৰিবলৈ আইন যথেষ্ট কঠোৰ কৰা হৈছে বুলিও তেওঁ উল্লেখ কৰে৷ সমাজৰ পৰা লিংগ বৈষম্য দূৰ কৰাৰো আহ্বান জনায় উপ-ৰাষ্ট্ৰপতিয়ে৷ বিদ্যালয়সমূহত নৈতিক শিক্ষাৰ প্ৰসাৰত আহ্বান জনাই উপ-ৰাষ্ট্ৰপতিগৰাকীয়ে কয় যে ইয়াৰ জৰিয়তে শিশুসকলৰ বিকাশৰ লগে লগে সময়মতে দায়বদ্ধ আৰু সংবেদনশীল নাগৰিক হৈ উঠিব৷ কন্যাসকলৰ বিনামূলীয়া বাধ্যতামূলক শিক্ষা সুনিশ্চিত কৰাৰ লগে লগে কন্যা ভ্রুণ হত্যা, বিবাহৰ সময়ত যৌতুক প্ৰদানৰ দৰে ঘটনা ৰোধ কৰিবলৈ আইন কঠোৰভাবে প্ৰয়োগ কৰাৰো আহ্বান জনায়৷ তেওঁ কয় যে মহিলাসকলক সম্পত্তিৰ সমান ভাগ দিব লাগিব যাতে তেওঁলোক আর্থিকভাবে সবল হৈ উঠিব পাৰে৷ উপ-ৰাষ্ট্ৰপতিয়ে কয় যে সাংসদ আৰু সকলো ৰাজ্যৰ বিধানসভাত মহিলাসকলৰ বাবে পর্যাপ্ত আসন সংৰক্ষণ নিশ্চিত কৰিব লাগিব৷ এই ক্ষেত্ৰত সকলো গুৰুত্বপূর্ণ ৰাজনৈতিক দলে ঐক্যমতত উপনীত হোৱাৰ আহ্বান জনায়৷ উপ-ৰাষ্ট্ৰপতিয়ে কয় যে মহিলাসকল ৰাজনৈতিকভাৱে সবল নহ’লে দেশৰ অগ্ৰগতি অসম্ভৱ৷

উপ-ৰাষ্ট্ৰপতিয়ে দৰিদ্ৰ লোকসকলৰ নিৰক্ষৰতা দূৰীকৰণ, লিংগ বৈষম্যৰ দৰে সামাজিক কুফল নির্মূলত জনপ্ৰতিনিধি, পৰিকল্পনাবিদ, ৰাজনৈতিক দল আৰু অন্যান্য গুৰুত্বপূর্ণ অংশীদাৰসকলক একেলগে আগুৱাই অহাৰ আহ্বান জনায়৷ তেওঁ এই ক্ষেত্ৰত সংবাদ মাধ্যমক আৰু অধিক প্ৰচাৰ চলোৱাৰ আহ্বান জনায়৷

অনুষ্ঠানত আইএপিপিডিৰ অধ্যক্ষ তথা ৰাজ্যসভাৰ প্রাক্তন উপাধ্যক্ষ অধ্যাপক পি জে কুৰিয়ান, আইএপিপিডিৰ সচিব শ্ৰী মনমোহন শৰ্মা, ড০ সুদেশ নাংগিয়া, ড০ প্ৰেম তলৱাৰকে ধৰি কেইবাগৰাকী বিশিষ্ট ব্যক্তি উপস্থিত থাকে৷

*********

VRRK/MSY/MS/DP/DB